ভারতকী প্রধানমন্ত্রী

উত্তর প্রদেশকী রাজ্যপাল শ্রীমতী অনন্দী বেন পতেলজী, কেন্দ্রগী মন্ত্রীমন্দলদা ঐহাক্কী খোংলোই অমসুং লমদম অসিমক্কী মীহুৎ শ্রীমান রাজনাথ সিংহজী, মফম অসিগী মুখ্য মন্ত্রী শ্রীমান য়োগী আদিত্যনাথজী, উপ–মুখ্য মন্ত্রী কেশব প্রসাদজী, দিনেশ শর্মজী, বিধান সভাগী অধ্যক্ষ শ্রীমান নারায়ন দিক্ষিতজী, উত্তর প্রদেশ সরকারগী মন্ত্রীশিং, উত্তর প্রদেশকী এম.পি.শিং অমদি তিনবিরিবা পুকচেল চাউরবা অমসুং পুকচেল চাউরবীশিং।

লখনৌগী এম.পি.না তরাম্না ওকপীরিবা, উত্তর প্রদেশকী মুখ্য মন্ত্রীনা তরাম্না ওকপীরিবা অসিদা কাশীগী এম.পি.না থাগৎচরি। মরুওইবা অনিশুবা থৌরমদা লাকচনবগী তঞ্জা ফংজবা অসি ঙসি ঐহাক্কী লাইবক ফবনি। থৌরম অনিমক্তা ঐহাকপু অতল বিহারী ভাজপেয়ীবু থাগোন্নজনবা, মহাক্কী মীৎয়েংবু ইকায় খুম্নজনবা তঞ্জা ফংজরে।

মফম অসিদা লাক্ত্রিঙৈ মাংওইননা ঐহাক দিল্লীদা অতল জল য়োজনা হৌদোকচরমখি। লুপা কোতি লিশিং ৬কী স্কিম অসিগী মখাদা উত্তর প্রদেশ য়াওনা লৈবাক অসিগী রাজ্য ৭তা গ্রাউন্দ ৱাতরগী থাক ফগৎহন্নবগীদমক থবক তৌগনি।

মসিগা লোয়ননা ঙসি হিমাচলবু লদাখকা শম্নহল্লিবা রোহতাং তনেলগী মমিংসু অতন তনেল হায়না মমিং থোনখ্রে।

মরূপশিং,

মসিদা নত্তনা অতলজীগী মফমদা কত্থোক্লবা অতল মেদিকেল য়ুনিভর্সিতীগী উরেপ উয়ুংসু তমখ্রে। মতম কয়াদগী অতলজীগী কর্ম ভুমী ওইবিরম্বা, অতলজীগী অম.পি.গী সিৎ ফংখিবা লখনৌ অসিদা লাক্তুনা এজুকেসনগা মরী লৈনবা, হকশেলগা মরী লৈনবা সংস্থানগী উরেপ উয়ুং তম্বগী খুদোংচাবা ফংবা মীওই অদু পুন্সীদা লাইবক ফবনি হায়না লৌগনি, ঐহাক্কীদমকসু ঙসি অসি লাইবক ফবা মীকুপনি।

অতলজীনা মফম অসিগী এম.পি. ওইবা মতম অদুদা মহাক্না মফম অসিদা দিবেলপমেন্তকী তোঙান তোঙানবা প্রোজেক্তশিংদা থবক হৌহল্লম্মি। রিং রোদকী থবক ওইগেরা, ওল্দ লখনৌদা দ্রেনেজ সিস্তেম ওইগেরা, মফম অসিগী এয়ারপোর্তকী মোর্দনাইজেসন ওইগেরা, বাল্মীকী অম্বেদকর আৱাস য়োজনা ওইগেরা, বাইওতেক পার্ক ওইগেরা, লখনৌবু অনৌবা শক্তম পীনবা থবক কয়া অমা অতলজীনা তৌবিরমখি। হৌজিক্তি এম.পি. অমা ওইনা শ্রীমান রাজনাথজীনা লেগেসী অসি হেন্দল তৌরি, মশকসু থোকহল্লি।

মরূপশিং,

অতলজীনা হায়বিরম্মি মদুদি পুন্সী অসি মচেৎ মকায় ওইনা উরোইদবনি, মসিদি মপুম ওইনা উগদবনি। ৱাফম অসি সরকারগীদমকসু অচুম্বনি, অমসুং অফবা গবর্নান্সকীসু মতিক চাবা ক্রাইতেরিয়ানি।

অতল মেদিকেল য়ুনিভর্সিতী অসিনা ৱাখল্লোন অদুবু রিফ্লেক্ত তৌরি। য়ুনিভর্সিতী অসিনা উত্তর প্রদেশতা মেদিকেল স্তদী অমসুং মদুদা ইনক্লুসিবনেস পীগনি, মপুং ফাহল্লগনি অমদি কোর্সতগী হৌরগা চাংযেং ফাওবা মসিদা য়ুনিফোর্মিতী পুরক্লগনি অমসুং নেচরেল য়ুনিতরী ফীলিং পুরক্লগনি।

মেদিকেল কোলেজ ওইগেরা, দেন্তেল কোলেজ ওইগেরা, পেরামেদিক কোলেজ ওইগেরা, নর্সিং ওইগেরা, হেল্থকা মরী লৈনবা কোর্স পুম্নমক, দিগ্রী পুম্নমক ওইগেরা, সুপরভিজন অসিগী মখাদা য়ুনিভর্সিতী অসিনা এরেঞ্জমেন্ত অমসুং দিসিপ্লিন পুম্নমক মাংলোমদা পুখৎলগনি।

সরকারগী ওইগেরা, সেমি গবর্নমেন্ত ওইগেরা নত্রগা পাইবেৎ মেদিকেল সংস্থান ওইগেরা, পুম্নমক্কী এফিলিএসন হৌজিক্তি য়ুনিভর্সিতী অসিদগী তৌরগনি। মান্নবা একাদেমিক সেসন কেলেন্দর চৎনরগনি, চাংয়েংশিং লেপংনখিবা মতমদা পাংথোক্লগনি, ত্রান্সপরেন্ত ওইবা মওংদা পাংথোক্লগনি। য়ুনিভর্সিতী অসি শাবনা উত্তর প্রদেশতা মেদিকেল তম্বগী ক্বালিতীদসু ফগৎলক্লগনি।

মরূপশিং,

উত্তর প্রদেশ য়াওনা লৈবাক পুম্বগী হেল্থ সেক্তরগী দিবেলপমেন্তকীদমক ঐখোয়গী ভিজন অমসুং দাইরেক্সন অনিমক অহানবা নুমীৎতগী ক্লিয়ার ওইদুনা লাক্লি। হকশেলগা লোয়ননা মসিগা মরী লৈনবা খুদোংচাবশিং ফগৎহনবদসু ঐখোয়না পু্ক্নিং চিংশিল্লি।

হেল্থ সেক্তরগীদমক সরকারগী রোদ মেপ অদুদি:-

অহানবদা- প্রিভেন্তিব হেল্থকেয়ারদা ইথিল পীবা,

অনিশুবদা- এফোর্দেবল হেল্থকেয়ার, মসিবু য়ারিবা মখৈ শন্দোক্নবা হোৎনবা,

অহুমশুবদা- সপ্লাই সাইদ ইন্তরবেন্সনশিং, হায়বদি সেক্তর অসি দিমান্দ খুদিংমক য়েংদুনা সপ্লাই ফংহনবা

অমসুং মরিশুবদা- মিসন মোদ ইন্তরবেন্সন হায়বদিহকশেলগা মরী লৈনবা স্কিমশিংবু মিসন মোদতা পাংথোকপা। অদোম্না সরকারগী তোঙান তোঙানবা স্কিমশিং য়েংলগদি, মদু লম্বী অসি ফাওদুনা চৎলিবনি, মেপ অসিদা মাংলোমদা চংশিল্লিবনি।

মরূপশিং,

অনা-অয়েক্তা  তৌরিবা চাদিংবু কন্নবা খ্বাইদগী লাইবা পাম্বৈদি অনা-অয়েক চেলহন্দবনি। মসিমক প্রিভেন্তিব হেল্থকেয়রনি। অমসুং মসিগীদমক্তা ঐখোয়না য়ারিবা মখৈ মীয়াম্বু খংহনবনা এৱার্নেস ওইগনি, মীচম মীয়াম্না মসিবু লুনা লৌরিবা মখৈ মখোয়দা ইম্যুনিতী হেঙ্গৎকনি, হকচাং ফনা লৈরগনি।

স্বচ্ছ ভারত অসি করিগুম্বা প্রিভেন্তিব হেল্থকেয়ারগী অচৌবা খোংজং ওইরগদি যোগ অসিসু প্রিভেন্তিব হেল্থকেয়ারগীদমক্তা মমল চংদবা হেল্থকেয়রনি।

উজ্জ্বলা য়োজনানা মৈখুদগী ইমাশিংবু নান্থোকহল্লে- মসিসু প্রিভেন্তিব হেল্থকেয়ারগী থবক্নি, অদুগা অতোপ্পা মায়কৈ অমদা লৈবাক অসিগী মীপুম খুদিংমকপু ফিৎ ইন্দিয়া মুবমেন্তকী শরুক ওইহন্দুনা মখোয়বু ফিৎ ওইনা লৈহন্নবগীদমক ইথিল পীবা, মসিগা লোয়ননা আয়ুর্বেদপু পুক্নিং থৌগৎপা, মরমদি হৌজিক অসি হোলিস্তিক হেল্থকেয়রগী দিমান্দ হেঙ্গৎলক্লি।

মীপুম খুদিংমক সাইদ ইফেক্ততগী নান্থোকপা পামই অমসুং মদুদা আয়ুশ, আয়ুর্বেদ, মসিনা য়াম্না চাউবা থৌদাং লৌবা য়াই। মতৌ অসুম্না মীকুপ খুদিংমক অনা-অয়েক চংলক্তনবা মশাগী থৌদাংলৌরি। প্রিভেন্তিব হেল্থকেয়ারগীদমক ঐখোয়না ইনোৎ পীরিবা মখৈ হেল্থ সেক্তরদা ঐখোয়গী চিন্তা হন্থরক্লি।

মরূপশিং,

হেল্থ কেয়ারগী অনিশুবা দাইমেন্সন, হায়বদি এফোর্দেবিলিতীবু পুক্নিং থৌগৎনবগীদমক, মসিগীদমক সরকারনা পুৱারী ওইরবা খোংথাং কয়া লৌখৎখ্রে।

আয়ুশ্মান ভারতনা মরম ওইদুনা লৈবাক অসিগী লাইরবা অনাবা মীওই চাউরাক্না লাখ ৭০ লেম্না লায়েংখ্রে। আয়ুশ্মান ভারত য়োজনা অসি মালেমগী খ্বাইদগী চাউবা স্কিমনি। অমেরিকা, কানাদা অমসুং মেক্সিকোগী অপুনবা মীশিং অদুদগী হেন্না ভারত্তা আয়ুশ্মানগী বেনিফিসরীশিংগী লিস্ত লৈরি। অসুক তেনখ্রবা মতমগী মনুংদা মীওই লাখ ৭০না মসিগী কান্নবা লৌখ্রে, অদুগা মখোয়শিং অদু খরা থুনা শিবনা হেন্না ফরে খন্দুনা অয়াম্বনা শিবা ঙাইরম্বা ঙাক্তনি।

অদুবু আয়ুশ্মান ভারত য়োজনা লাক্লবা মতুংদা মখোয়দা অনৌবা পুন্সি অমা, অনৌবা থাজবা, অনৌবা থৱায় য়াওবা ফংলে অমসুং লুপা অমা ফাওবা চাদিং তৌদনা মীওই লাখ ৭০গী ত্রিৎমেন্ত তৌখ্রে। স্কিম অসি খুমাং চাউশিলহনবদা উত্তর প্রদেশনা চাউনা থৌদাং লৌখিবদা ঐহাক নুঙাইবা ফাওই। উত্তর প্রদেশ খক্তদা চাউরাক্না মীওই লাখ ১১না মসিগী কান্নবা লৌখ্রে।

মতৌ অসুম্না জন ঔশধি য়োজনা- মসিদগী অহোংবা মমলদা হিদাক-লাংথকশিং ফংলি। হায়বদি অদোম্না হিদাক অমা বজারদা চত্তুনা লুপা ১০০দা লৈরুরিবা অদু জন ঔশধি কেন্দ্রদা মদু লুপা ৩০-৪০দা ফংলি। নুমীৎ খুদিংগী হিদাক চাদবা য়াদবা মীওইশিংনা থা অমদা লুপা ৮০০, ১০০০, ১২০০, ১৫০০ ফাওবা বিলগী সেভিং তৌবা ঙম্লে। হায়বদি লৈবাক পুম্বদা জন ঔশধি কেন্দ্র অসি য়াম্না পোপুলর ওইরে অমসুং মীয়াম্না জন ঔশধি কেন্দ্রগী হিদাকশিং পাম্নরি। মদুমক স্তেন্তস অমসুং নী কেপসকী মমলশিংসু য়াম্না হন্থরে।

মরূপশিং,

লাইরবগী লাইরবসু হেল্থকেয়রগী খুদোংচাবা ফংলবনিনা হেল্থকেয়রগী দিমান্দসু হেঙ্গৎলক্লি। দিমান্দ হেঙ্গৎলকপগী মতুং ইন্না অনৌ-অনৌবা হোস্পিতালশিং, অনৌবা ক্লিনিক, অনৌবা নর্সিং হোম শাগৎনবা লম্বী হাংদোক্লে।

মমাংগী চহী মঙাদা রেকোর্দ ওইবা মওংদা মেদিকেলগী সিৎশিং হেঙ্গৎহনখ্রে। চহী অসিদা লৈবাক পুম্বদা অনৌবা মেদিকেল কোলেজ ৭৫ অয়াবা পীনবা ৱারেপ লৌখ্রে। মতৌ অসুম্না মসি লোক সভাগী সিৎ অহুম খুদিংগী মরক্তা মেদিকেল কোলেজ অমা শানবা ঐখোয়গী মীৎয়েং অদু মাংলোমদা পুখৎকদবা মায়পাক্না হোৎনবা অমনি। অমসুং মসিনা উত্তর প্রদেশতা য়াম্না চাউনা কান্নবা ফংলি। হৌখিবা চহী ২-৩ অসি খক্তদা উত্তর প্রদেশতা মেদিকেল কোলেজ দর্জন অনি হেন্না অয়াবা পীখ্রে। মদুগী মনুংদা কয়া অমদি মথৌ তৌবা হৌখ্রে অদুগা খরনা শেমগৎ শাগৎপগী থবক চত্থরি।

মরূপশিং,

সরকারনা নুপীশিং অমসুং অঙাংশিংগী হকশেল হেন্না ফগৎহন্নবগীদমক মিশন মোদতা রাস্ত্রিয়া পোশন অভিয়ান য়াওনা অনৌবা প্রোগ্রাম কয়া অমা পায়খৎলি। তি.বি.বু ভারত্তগী ২০২৫ ফাওবদা মপুং ফানা মুত্থৎখিনবসু রাস্ত্রিয়া অভিয়ান চত্থরি। লৈবাক অসিগী মীয়ামগী হকশেলগী ফিভম ফগৎহনবদা, অনা লায়েংদা চংবা চাদিং হন্থহনবদা দাইমেন্সন মরি অসিনা য়াম্না মরুওইবা থৌদাং লৌরি।

মরূপশিং,

২০১৪দগী হৌরগা ২০১৯ ফাওবগী মতম মনুংদা ঐখোয়না শিংনরিবশিংবু শিংনরক্নবগী তঞ্জা অমত্তসু পীখিদে। ২০১৪গী মমাদা লৈবাক অসিগী মীশিং তঙ্খাই অমা হেনবগী মফমদা তোইলেৎ লৈরমদে, হৌজিক্তি তোইলেৎ য়ৌরকখ্রে।

লাইরবা ইমুং কোতি কয়া, ঐখোয়গী ইমাশিং, ইচে-ইচলশিং, চাকখুমদা মৈখু মরক্তা পুন্সী লেল্লম্মী, হৌজিক্তি ইমুং খুদিংদা গ্যাস য়ৌরক্লে।

খুঙ্গং লিশিং কয়া, ইমুং লিশিং কয়া অমম্বদা পুন্সী লেলম্বা অদু হৌজিক্তি মখোয়গী য়ুমদা ইলেক্ত্রিসিতী য়ৌরে।

মীশিং তঙ্খাই অমা হেন্না বেঙ্কতগী লাপ্না লৈরম্মি, মখোয়গীদমক্তা বেঙ্কশিংগী থোং হাংদোক্লে।

লাইরবা ইমুং কোতি কয়াগী নাক্তা মশাগী ময়ুম লৈজরমদে, লাইরবা ইমুং চাউরাক্না কোতি ২গী য়ুম শাখ্রে। ২০২২ ফাওবদা ময়ুম লৈজদবা লাইরবা খুদিংমকপু মশাগী ওইবা পক্কগী য়ুম পীনবগীদমক খুমাং চাওশিন্না থবক তৌরি।

খুঙ্গং খুদিংমক্তা লম্বী-থোং য়ৌহনবগী থবক, রেলৱে কনেক্তিবিতী য়ৌহনবগী থবক খুমাং চাওশিন্না চত্থরি। অমসুং ২০২৪ ফাওবদা য়ুমথোং খুদিংদা ঈশিং য়ৌহন্নবা পন্দম অদু ফংনবগীদমকসু ঐখোয়না থবক তৌরি।

সোলুসন অসিমক, অনৌবা ভারতকী প্রোগ্রেসকীদমক অচেৎপা ফাউন্দেসন শেমগৎলি।

অচেৎপা ফাউন্দেসন অসিদা ঐখোয়না দোলর ত্রিলিয়ন ৫গী ইকোনোমীগী পান্দম অদু ফংনবগীদমক হোৎনবা য়াবা হোৎনদুনা লৈবাক অসি পুদুনা মাংলোমদা চংশিল্লি। মদুনা মরম ওইরগা ভারত মচা কোতি কয়াগী পুন্সীগী থাক হেঙ্গৎকনি, লাইরবদগী লাইরবসু চিং লেম্বা অমসুং ইকায় খুম্নবা ফংগনি।

মরূপশিং,

মসিনি অফবা গবর্নান্স হায়বদু, মসিমক স্বরাজনি, মসিগী মংলান অসিনি অতল বিহারি ভাজপেয়ীজী অমসুং মহামনা মালবীয়জী য়াওনা নেস্নেল বিলদর কয়ানা মংবীরমখিবা।

ঐখোয়গী সরকারগী ওইনা অফবা গবর্নান্সকী আর্থদি-

পুম্নমক্কী ৱাফম তাবা।

নাগরিক পুম্নমক্তা খুদোংচাবা য়ৌহনবা।

ভারত মচা খুদিংমক্না ওপোর্চুনিতী ফংবা।

সুরক্ষা, লৈবাক মীয়াম পুম্নমক্না ফাওবা।

অমসুং একসেস, সরকারগী মেকানিজম পুম্নমকপু শোইহন্দবনি।

ঐখোয়গী ওইনদি অফবা গবর্নান্সকী মন্ত্র অমখক্তনি, সবকা সাথ, সবকা বিকাস অমসুং সবকা বিশ্বাস।

মসিগী ইমোসন মসুং নেচর অসিগা লোয়ননা ঐখোয় পুম্নমক ৱাশক্তুনা ফাজিন্দুনা থম্লি।

মরূপশিং,

উত্তর প্রদেশতা মীওই খরনা য়ানিংদবা ফোংদোকপগী মিংদা চত্থখিবা হিংসাগী মওং মতৌ, সরকারগী মরন মথুম মাংহন তাকহনখিবা, মখোয় অদু মশাগী ময়ুমদা ফমদুনা অমুক হন্না মশা মথন্তা ৱাহং হংবিয়ু মদুদি মখোয়না চৎখিবা লম্বী অদু অচুম্বরা? মখোয়গী ত্রেন্দ অদুবু মতিক চাবরা? মৈ থাদোকখিবশিং, মাংহন তাকহনখিবশিং অদু মখোয়গী মচা-মশুশিংগী কান্নগদবা নত্রা?

হিংশাগী থৌদোক অদুদা লৈখিদ্রবা মীওইশিং, অশোক অপন নংখিবা মীচম প্রজা, অশোক অপন নংখিবা পুলিসকী মীওইশিং, মখোয় অমসুং মখোয়গী ইমুং মনুংগী মরমদা মীকুপ অমত্তা ওইরবসু ঐখোয় খন্থসি, করি ওইরমগনি? মরম অদুনা ঐহাক্না হায়জরি মদুদি অরানবা তোকঙাদা থাজদুনা হিংসা তৌরিবশিংবু, সরকারগী মরন-মথুম মাংহন তাকহল্লিবশিংবু ঐহাক্না য়াম্না নোলুক্না হায়জরি মদুদি হেন্না ফবা লম্বী-থোং, হেন্না ফবা ত্রান্সপোর্ত সিস্তেম, খ্বাইদগী ফবা সীৱেজ লাইন, নাগরিকশিংগী অধিকারনি, অদুনা মসিবু অমাং অতা থোকহন্দনা থম্বা, লুনা নান্না থম্বসু নাগরিকশিংগী থৌদাংনি।

অধিকার অমসুং থৌদাংবু ঐখোয়না পুন্না মতম পুম্নমক্তা নিংশিংগদবনি।

খ্বাইদগী ফবা এজুকেসন, লাম্বদা ফংনিঙাই ওইবা এজুকেসন অসি ঐখোয়গী হকনি, অদুবু এজুকেসনগী ইন্সতিত্যুৎশিংগী সেফতী, ওজাশিংবু ইকায় খুম্নবা অসিসু ঐখোয়গী থৌদাংনি।

মেদিকেল কেয়ার অসি ঐখোয়গী অধিকারনি, অদুবু দোক্তরশিংবু তেংবাংবা অমসুং ইকায় খুম্নবা অসিসু ঐখোয়গী থৌদাংনি।

সেফ ওইবা এতমোস্ফিয়ার ফংবা অসি ঐখোয়গী অধিকারনি, অদুবু সুরক্ষাগীদমক থৌদাং লৌরিবা পুলিস মেকানিজমগী থবকপু ইকায় খুম্নবা, মসি নাগরিক পুম্নমক্কী থৌদাংনি।

মরূপশিং,

ৱাখল্লোন অসি নাগরিকশিংগা লোয়ননা সরকারগীদমক, সরকারগী মেকানিজম পুম্নমক্কীসু অদুক য়াম্না মথৌ তাই।

সরকারগী তৌদবা য়াদবা মথৌদি চহী ৫গীদমক্তা নত্তনা জেনরেসন ৫গী খন্দুনা মশাগী মথৌ তৌবদা হৈনবি থম্বনি। উত্তর প্রদেশকী সরকারনা মশাগী তৌদবা য়াদবা মথৌ অসি পাংথোক্নবগীদমক হোৎনবা য়াবা হোৎনরিবা অসিদা ঐহাক অপেনবা ফাওই।

ঐখোয়না ঐখোয়গী তৌদবা য়াদবা ইথৌদাং পাংথোকপা, ইশাগী পান্দম অদু ফংনবা হোৎনবা, মসিমক অফবা গবর্নান্স অমসুং মসিমক ঙসিগী থৌরম অসিগী পান্দম। অতলজীবু নিংশিংলদুনা, ঐখোয় পুম্নমক্না রিজোল্ব তৌগদবনি, মসিমক মীয়ামগী থাজবনি, মসিমক ঐখোয় পুম্নমক্কী মফমদা অতল বিহারী ভাজপেয়ীগী এজুকেসন্নি।

অমুক হন্না উত্তর প্রদেশকী মীয়াম্বু অতল মেদিকেল য়ুনিভর্সিতীগীদমক হন্না-হন্না নুঙাইবা ফোংদোকচবগা লোয়ননা ময়াম পুম্নমকপুসু অনৌবা চহী ২০২০গী য়াইফ পাউজেল পীজরি।

হন্না-হন্না থাগৎচরি।