ভারতকী প্রধানমন্ত্রী

ঙসি প্রধান মন্ত্রী নরেন্দ্র মোদীনা লুচিংবা অৱাংবা থাক্কী মীফম অমনা ললোন-ইতিক নুংঙাইনবা পায়খৎলিবা থবকশিং অমুক হন্না য়েংশিনখ্রে ।

মীফম অদুদা শেন-থুমগা মরি লৈনবা সেনিয়র য়ুনিয়ন মিনিস্তরশিং, মহারাস্ত্রাগী চীফ মিনিস্তর দেবেন্দ্র ফদনাবিস, দেল্লিগী লেফতনেন্ত গভর্নর অনিল বাইজাল অমসুং কেন্দ্র সরকার, মহারাস্ত্রা সরকার অমসুং দিল্লি সরকারগী সেনিয়র ওফিসিয়েলশিং শরুক য়াখি ।

ললোন-ইতিক চৎথবদা নুংঙাইনবা পায়খৎলিবা থবকশিংগী মতাংদা প্রধান মন্ত্রীদা পাউদমখি । মীফম অদুদা কন্সত্রক্সন পর্মিত পীবা, কন্ত্রেক চৎনবা, লন-থূম রেজিস্তার তৌবা, ললোন-ইতিক হৌবা, মৈ শম্বা, শেন্থং লৌবা অমসুং ইন্সোলভেন্সিগী ৱাথোক লোইশিনবগী মতাংদা খন্নখি ।

হৌখিবা চহি মরি অসিদা ৱার্ল্ড বেঙ্কগী ইজ ওফ দুইং বিউজিনেস রেঙ্কিংদা ভারতনা রেঙ্ক ১৪২দগী ৭৭ দা হাইগৎলকখিবা অদু মীফম অদুদা খন্নখি ।

ললোন-ইতিক্কী অওনবশিং পুরক্নবা হোৎনবা থেংনরিবা খুদোংচাদবশিং লোইশিনবদা মায়োক্নরিবা অৱাবশিং অদু ওফিসিয়েলশিংনা শন্দোক্না তাকখি ।

ললোন-ইতিক তৌবা নুংঙাইনবা থবক পায়খৎপদা নত্তনা অপীকপা ললোন-ইতিক্কী থবকশিং অমসুং মীচম মীয়াম হিংবদা নুংঙাইনবা থবক পায়খৎনবা প্রধান মন্ত্রীনা অকনবা ৱাফম থমখি । মহাক্না হায়খি, চাওখৎলক্লিবা অমসুং মশা মরেং শন্দোরক্লিবা ইকনোমি অমা ওইনা মসি ভারতকী ওইনা য়াম্না মরুওইবা অমনি । ভারতকী ললোন-ইতিক তৌবদা নুংঙাইবগী রেঙ্কিং হাইগৎলকপা অসিদা মালেমগী লৈবাক কয়ানা থৱায় য়াওবা হেনগৎলক্লি ।

***