ভারতকী প্রধানমন্ত্রী
লৈবাক অপুনবদগী লাকখিবী চাউরাক্না আশাগী মীহুৎ ৯০ রোমগী কাংবু অমনা ঙসি প্রধান মন্ত্রী শ্রী নরেন্দ্র মোদীগা উনদুনা হন্দক্তা ইন্সেন্তিব হেনগৎনবা অমদি ইন্সুরেন্স কভর তৌনবগীদমক লাওথোকখিবা অদুগীদমক মফমদা থাগৎপা ফোংদোকখি।
প্রধান মন্ত্রীনা হন্দক্তা ভিদিও কনফ্রেন্সকী থোংদা লৈবাক অপুনবদা আশা অমসুং আঙ্গনৱারী ৱাকরশিংগা ৱারী শানখিবা অদু নীংশিংখি। মহাক্না নুমিৎ অদুদা আশাগী মীহুৎশিংনা শেয়র তৌরকখিবা থেংনরকখিবশিং অদুবু শিংথাখি। মহাক্না হায়খি মদুদি থেংনরকখিবশিং অদু তশেংনমক মশিং থিঙমদ্রবা মীওই কয়াদা ইথিল পোক্নীংঙাই শোইদনা ওইরগনি।
ঙসি আশা ৱাকরশিংনা মখোয়গী থেংনরকখিবশিং অমসুং লনাইগী ওইবা ৱারী খরা ফোংদোক্লদুনা মতৌ করম্না মখোয়না তশেংনা অচুম্বা মতমদা অচুম্বা খোংথাং লৌখৎতুনা লাইরবা মমাশিং অমসুং মখোয়গী মচাশিংগী মমল য়ামলবা পুন্সি কন্ননবা হোৎনবদা মরুওইবা থৌদাং য়াখিবগে হায়বদু পাউদমখি।
প্রধান মন্ত্রীনা আশা ৱাকরশিংগী অঙকপা লৌশিং অমসুং কৎথোকপা অদুবু থাগৎখি অমসুং মসিগা লোইননা মহাক্না নীংশিংখি মদুদি বিল অমসুং মেলিন্দা গেৎনা ফাওবা কালাজারগুম্বা থৱাই মাংনীংঙাই ওইরবা লাইনাশিং মুথৎনবগী মাইকৈদা আশা ৱাকরশিংনা লৌখৎলিবা খোংথাংশিং অদুবু অদুক্কী মতিক থাগৎলি।
প্রধান মন্ত্রীনা মাগী মাগী খুঙ্গংশিংদা মীয়ামগী হিংবগী থাক ফগৎহন্নবগীদমক অতৈ সরকারগী এজেন্সীশিংগা লোইননা থবক তৌমিন্নদুনা মখোয়গী থৌনা উৎথোক্নবা পুক্নীং থৌগৎখি। মহাক্না ময়েক শেংনা মসিসু ফোংদোকখি মদুদি মতৌ অসুম্না সরকারগী স্কিম পুম্নমক অমসুং খোংথাংশিং অসিগী পান্দম অসি লাইরবা হায়বদুগা মায়োক্ননবগীদমক লাইরবশিংবু মপাঙ্গল কলহনবনি।
কেন্দ্রগী হকশেল অমসুং য়াইফ-য়ুম্বাল মন্ত্রী শ্রী জে.পী. নদ্দাসু থৌরম অদুদা শরুক য়াখি।
***
