ভারতকী প্রধানমন্ত্রী

নমস্তে শিঙ্গাপুর !

গুদ ইভনীং

ললোন-ইতিক্কী লুচীংবশিং,

ঐগী শিঙ্গাপুরগী মরূপশিং,

শিঙ্গাপুরদা লৈরিবা ভারত মচাশিং,

অদোম পুম্নমকপু খুরুমজরি !

ঙসি ফজরবা মফম অসিদা, ঐখোয়না শক্তি লৈরবা ভারত অমসুং শিঙ্গাপুরগী মরি অদু উবা ফংলে। মসি ঐখোয়গী চৎনবীনি, ঐখোয়গী মীয়াম্নি অমসুং ঐখোয়গী মতম অসিগী অচৌবা মরূপনি। মসি অচৌবা নোংশা অসিনা ঙংবনি। শিঙ্গাপুর অসি অপীকপা ইথৎ অমা ওইরবসু মসিগী মতিক মগুন অসি মালেম শীনবা থুংনা চৎলি। মালেমদা লৈবাক অমগী পাঙ্গল অমসুং শক্তি উৎপদা লৈবাক অমগী পীকপা নৎত্রগা চাউবগী মথৌ তাদে হায়বদু লৈবাক অসিনা ঐখোয়দা উৎলে।

অখন্নবা শিঙ্গাপুরগী মশক অমগা লোয়ননা শিঙ্গাপুরগী মাইপাকপা অসি মসিগী কাংলুপ কয়াগী মীওইশিং অমত্তা ওইনা নুংশিংননা লৈমিন্নবা অসিনা ওইরি। অসিগুম্বা অঙকপা মরক অসিদা থায়নগী লংলা অমনা ভারত অমসুং শিঙ্গাপুর অসি অমত্তা ওইনা পুন্সিল্লি।

মরূপশিং,

চহী-চা কয়া শুরবা ভারতনা খা-নোংপোক এসিয়াদা চৎনবগী লম্বী অসি শিঙ্গাপুর ফাওদুনা চৎলি। মীওইবগী লৈনরিবা মরি অসি চেৎলি অমসুং শাংনা চৎলি। মসি শিঙ্গাপুরদা লৈবা ভারতমচাশিংদা য়াওরি। ঙসিগী নুমিদাংৱাইরম অসি অদোম শরুক য়াবা, অদোমগী হৈশিংবা অমসুং মাইপাকপা অদুনা পুমথন থল্লে।
পুৱারীগী তাঙ্কক অমদা অদোম্না মফম অসিদা লাকখিবা ওইরবসু নৎত্রগা মালেমগী অওনবনা মফম অসিদা লাকখিবা ওইরবসু, অদোমগী অহল-লমনশিংনা চহি কয়াগী মমাংদা লাকখিবা ওইরবসু নৎত্রগা অদোম চহিচা অসিদা লাকখিবা ওইরবসু, অদোম অমমম অসি শিঙ্গাপুরগী শরুক অমা ওইরবনি অমসুং মসিগী চাউখৎপদা থৌদাং য়ারিবনি।

অদোমগী হৈশিংবা অমসুং থবক কন্না শুবা অদু শিঙ্গাপুরনা তরাম্না ওক্লি। মখল কয়া শুবা ভারত অদু শিঙ্গাপুরদা অদো্ম্না মহুৎ শিল্লি। শহর অমদা ভারতকী কুম্মৈ খুদিংমক লোইনা য়েংবা অদোম্না পাম্লবদি নৎত্রগা চয়োল অমা চুপ্না পাংথোকপা পাম্লবদি মদুগী মফম অদু শিঙ্গাপুরনি।

ভারতকী চিঞ্জাক্কী ওইনসু মদু অচুম্বা ওইগনি। লিত্তল ইন্দিয়াদা প্রধান মন্ত্রী লীনা ঐগী চাক্লেন অমা খাংখিবা অদু ঐ নীংশিংলি।

মফম অসিদা তমিল অসি ওফিসিয়েল লোন অমা ওইরি। শিঙ্গাপুরগী স্কুলগী মহৈরোইশিং ফাওবা ভারতকী লোন মঙা তম্লি। ভারতকী ফজরবা কলচরশিং শহর অসিদা উবা ফংলি। মসি হৈশিংলবা ভারতমচাশিংদা শিঙ্গাপুর সরকারনা শৌগৎপদগী পাংথোকপনি।

শিঙ্গাপুরদা অদো্ম্না ভারতগী থায়নগী মশান্নশিং অসি ফজনা শান্নবা হৌরে। মসিনা অদোমগী অঙাং ওইরিঙৈগী মতম অদু নীংশিংহল্লে অমসুং অঙাংশিংনা খো-খো অমসুং কাবাদী শান্নবা ফংলে।

২০১৭তা শহর অসিগী মফম ৭০দা মালেমগী য়োগগী নুমিৎ পাংথোকখি। মফম অসিগী স্ক্যার কিলোমীতর ১০ খুদিংগী সেন্তর অমমম হাংদোকখি।

মালেমগী অতৈ শহর অমত্তদা মসিদা লৈরিবা য়োগগী ইহৌ অসিগুম্না লৈতে। মফম অসিদা শ্রী রামকৃষ্ণ মিশন অমসুং শ্রী নরায়ন মিশন অসি চহী কয়াগী মমাংদগী লৈরক্লে। মীগী মরক্ত খেন্নবা লৈতনা মখোয়না মীওইবা খুন্নাইগী য়াইফনবা থবক তৌরকপা অদুনা ভারত অমসুং শিঙ্গপুরগী মরূপ ওইবা মরি অদু উৎথোক্লে।

শিঙ্গাপুর অমসুং লমদম অসি ফাওরগা চৎখিবা মখোয়গী খোঙচৎশিংদা, ভারতকী স্বামী ভিবেকানন্দা অমসুং কবি গুরুদেব রবিন্দ্রনাথ তেগোরনা ভারত অসি নোংপোক্কা শম্নহনখি। ভারতগী নীংতম্নবা নেতাজী সুভাশ চন্দ্রা বোসনা শিঙ্গাপুরগী লৈমাইদগী দিল্লী চৎসিগী খোঙচৎ হৌখিবা অসি ভারত মচা খুদিংমক্কী থম্মোয়দা নীংশিংলি।

মফম অসিগী ৱাংমদা লৈবা বে অমদা, ১৯৪৮দা ক্লিফোর্দ পীয়রদা মহাত্মা গান্ধীগী উৎ থাদখি। থৌরম অদু খুন্নাই অসিগী কাংলুপ কয়াগী মীওই লিশিং কয়ানা শরুক য়াখি। উৎ থাদবা অদুদা প্লেন অমনা গুলাপকী লৈনাশিং চাইখি। মফম অদুগী সমুদ্রগী ঈশিং মীয়াম্না থকখি।

হাংচিৎ, ঐখোয়গী পুৱারীগী থৌদোক অদু নীংশিংবা ওইনা ঐনা ক্লিফোর্দ পীয়রদা প্লেগ অমা হাংদোক্কনি। মুৎনাইদ্রবা অমসুং মালেম্না পাম্নরবা মহাত্মা গান্ধীগী ৱাখল্লোন অদুগী মফম ঙসিসু লৈরি।

মরূপশিং,

অসিগুম্বা তোখাইরবা চৎন-লোনচৎশিং অসিদা য়ুমফম ওইদুনা মীওইবগী লন-থুমশিং অমসুং ঐখোয়না শরুক য়ারিবা থাজবশিং অসিনা ভারত অমসুং শিঙ্গাপুরগী মরি অসি চহী কয়াদগী শাগৎতুনা লাক্লি। মসি তশেংনা মরুওইবা মরূপ-মপাং অমনি।

ভারতনা মালেমগা শম্নদুনা নোংপোকলোমদা মাইওনলকপা মতমদা ভারত অমসুং আসিয়ানগী মরক্তা শিঙ্গাপুরনা থোং ওইনা লৈখি। ভারত অমসুং শিঙ্গপুরগা লৈনরিবা রাজনিতীগী মরি অসি খ্বাইদগী ফবনি। মসিদা মুক্নবা নৎত্রগা য়ানদবা অমত্ত লৈতে।

লৈবাক অনিগী ওইনা ঐখোয়গী লৈনরবা ঙাকশেলগী মরি অসি খ্বাইদগী ফবনি। শিঙ্গাপুর লান্মীগী ইকায়খুম্নবা অমসুং পামজবগী মরমদা ঐগী লান্মীনা ৱারী লিখি। ভারতকী খ্বাইদগী শাংবা ঈশিংগী লাল ঔরাইবা অসি শিঙ্গাপুরগা লোয়ননা পাংথোকখি।

হৌজিক মখোয়গী সিলভর জুব্লী থৌরম পাংথোক্লি। ভারত্তা শিঙ্গাপুর লান্মী অমসুং নোংথক্কী লান্মীগী ত্রেনিং পাংথোকলিবা অসি ঐখোয়গী চাউথোকচবনি। ঐখোয়গী জহাজশিং চৎথোক চৎশিন তৌনরি।

অদোম অয়াম্বা ঐখোয়গী লালগী জহাজশিং তোংলে। হংচিৎ ঐনা চেঙ্গী নেভেল বেজদা শিঙ্গাপুর নেভী শিপ অমসুং ভারতকী নেভী শিপ অমদা চৎকনি।

মালেমগী ফোরমশিংদা, নিয়ম ঙাক্না, লৈবাকশিংগী মনীংতম্বা চপ মান্ননা লৌদুনা, মনীং তৌনা ললোন-ইতিক্কী লম্বী পীনবা ঐখোয়না তকশিল্লি। ইকনোমীক্স অসি মরূপ-মপাং ওইবগী মীহুলনি।

ভারতনা মালেমগী ওইনা থেংনরকপদা মসি অসিনা মাংজিল থারি। ভারত্তা শেল থাদরকপদা শিঙ্গাপুরনা মাংজিল থাবা লৈবাক অমা ওইরি। ঐখোয়না কমপ্রিহেন্সিব ইকনোমীক কোওপরেসন এগ্রিমেন্ত খুয়েক পীনবা অহানবা লৈবাক শিঙ্গাপুরনা ওইরি।

নাকল অনিমক্তগী চয়োল অমদা চাউরাক্না ফ্লাইত ২৫০ রোম শিঙ্গাপুরদগী ভারতকী শহর ১৬কা শম্নরি। শিঙ্গাপুরদা লমকোইবা লাকপশিংগী মরক্ত ভারতনা অহুমশুবদা লৈরি। শিঙ্গাপুরনা স্মার্ত ওইনা অমসুং চাংদম্নদুনা লৈবদা ঐখোয়গী আই তি কম্পেনীশিংনা মতেং পাংলি।

স্মার্ত সিতী, আর্বান, শেল-থুম, স্কিল ত্রেনিং, হিথাংফম, পুথোক পুশিন, এভিয়েসন অমসুং ইন্দস্ত্রিয়েল পার্কগী লম য়াওনা হীরম কয়াদা শিঙ্গাপুর অসি য়াম্না মরু ওইবা মরূপ অমা ওইরি।

নুংঙাই য়াইফবগী থবকশিংদা ভারত অমসুং শিঙ্গাপুরনা অমনা অমগী মতেং পীনরি। হৌজিক ঐখোয়না দিজিতেল ৱার্ল্দগী অনৌবা মরূপ অমা শেমগৎলি। তেক্নোলোজী, ইনোবেসন অমসুং ইন্তর্প্রাইজগী লমদা অখন্নবা এগজিবিসন অমা প্রধান মন্ত্রী লী অমসুং ঐনা য়েংখ্রে।

ভারতকী হৈশিংলবা মীওই কয়া শিঙ্গাপুরদা মখোয়গী ময়ুম ওইরে। মখোয়না অনৌবা পুথোকপগী লমদা ভারত, শিঙ্গাপুর অমসুং আসিয়ানগী মরক্তা থোং অমা ওইরগনি। ঙাইহাক্কী মমাংদা ঐখোয়না মালেমগী ওইনা রুপে, ভীম অমসুং য়ু পি আই হাংদোকপা উখ্রে।

মখোয় অসি শিঙ্গাপুরদা হৌদোকপা অসি তৌফম থোকপনি। লৈবাক ঙাকপদা ঐখোয়না পুন্না মোবাইল তেক্নোলোজী অমসুং দিজিতেল তেক্নোলোজী শীজিন্নগনি। অনৌবা মতম অসিদা ঐখোয়না পুন্না শেল-থুমগী মরি শেমগৎকনি।

শিঙ্গাপুর মশাগী তুংগী ফিবম অমা শেমগৎচবগা লোয়ননা ,মালেমগী ওইনা অনৌবা খুদোংচাবশিং ফংবদা ভারতসু নৌনা হৌগৎলক্লি। জি এস তি চৎনখিবা চহি অমগী মনুংদা ঐখোয়গী লৈবাক অসি মালেমগী মরুওইবা ইকনোমী অমা ওইনা ফগৎলক্লি।

লম্বী অসিদা চৎনবা ঐখোয়গী অপাম্বা লৈরি। ঐখোয়গী শেল-থুম অসি ফিবম চেৎলে। শেল পুৎথবা হন্থরে। মমল হন্থরে। করেন্ত একাউন্ত দিফিজিৎ অসি ফিভম ফরে। করেন্সী লেংদনা লৈরি। ফোরেন্ত একচেঞ্জ রিজার্ব অসি খ্বাইদগী ৱাংলে।

হৌজিক ভারত অসি খোংজেল য়াংনা হোংলক্লি। অনৌবা ভারত অমা শেমগৎলি। মসিগী মরম কয়া লৈ। অহানবা মরমদি, শেল-থুমগী অওনবা অসি য়াম্না য়াংনা পায়খৎলি। হৌখিবা চহী ২ অসিদা কেন্দ্র অমসুং রাজ্য সরকারশিংনা থৌশিল ১০,০০০ হেন্না পায়খৎতুনা ললোন-ইতিক পাংথোকপদা লাইবা লৈবাকশিংগী রেঙ্ককী ৪২শুবা মফমদা হাইগৎলে।

মতমগা চুনদ্রবা কাংলোন ১,৪০০ শেমদোক্লে। মালেমদা ভারতকী ইকনোমী অসি খ্বাইদগী মনীং তম্বা অমা ওইরে। চাদা ১০০ ইকুইতী ওইদুনা মালেমগী শেল থাদবশিংনা অপাম্বা সেক্তরদা থাদবা য়ারে। ভারত্তা শেল থাদরকপা খুদিংমক চাদা ৯০ লম্বী অসিদা লাক্লি।

তেক্সকী অনৌবা কাংলোন অনি হোংলে, তেক্স রেত হন্থরে, তেক্সগী য়াদবশিং য়াম্না থুনা লোইশিল্লে অমসুং ইলেকত্রোনিক্স ফাইলিং সিস্তেম লৈরে। নীংতম্লবা মতুংদা পায়খৎপা খ্বাইদগী চাউবা তেক্সকী অওনবা গুদস এন্স সর্বিসেস তেক্স অসিনা লৈবাক অসি কৈথেল অমতা ওইহল্লে অমসুং তেক্স হেন্না খোমগৎলে।
মসি অরাইবা থবক অমা নত্তে। অদুবু মসি মাইপাক্না পাংথোক্লে। মসিনা অনৌবা শেল-থুমগী খুদোংচাবা ফংলে। ঐখোয়গী লনাই মীওইগী ইনকম তেক্স থিবা অসি মিলিয়ন ২০ য়ৌরে।

অহুম শুবদা, ঐখোয়গী ইনফ্রাস্ত্রকচর সেক্তর অসি য়াম্না য়াংনা চাউখৎলক্লি। হৌখিবা চহীদা ঐখোয়না কিলোমীতর লিশিং ১০ রোমগী নেস্নেল হায়ৱেশিং শেমগৎলে, চহী খরগী মমাংদা ওইখিবা চাংদগী শরুক অনি হেন্না নোংমদা কিলোমীতর ২৭ শেমগৎলি।

রেল ত্রেক শেম্বগী থবক শরুক অনিদা হেনগৎলে। রেল সেক্তর অসি শহরশিংদা মেত্রো শেমগৎপা, অয়াংবা রেল প্রোজেক্ত ৭, অখন্নবা ফ্রাইৎ কোরিদোরশিং অমসুং রেলৱে স্তেসন ৪০০ নৌনা শেমগৎপা য়াওনা অহোংবা কয়া পুরক্লি।

অতোপ্পা প্রোজেক্তশিংগী মরক্ত গ্রিন ফিল্দ এয়রপোর্ত ১০, অনৌবা হিথাংফম ৫, নেস্নেল ৱাতর-ৱেজ ওইনা তুরেল ১১১ শেমগৎপা অমসুং লোজিস্তিক পার্ক ৩০ য়াওরি। শুপ্নগী চহী ৩দা ঐখোয়না মেগৱাৎ লিশিং ৮০গী মৈ পুথোকপা ঙম্লে।

ঐখোয়না মালেম অসিদা রিন্যুএবল ইনর্জী পুথোকপা খ্বাইদগী চাউবা তরুকশুবা লৈবাক ওইরে। মসি ঐখোয়না লু-নান্না লৈনবা অমসুং তুং-কোইনা চাউখৎনবা থবক পায়খৎপদগীনি। ইচম চম্না হায়রবদা, মালেমগী খ্বাইদগী চাউবা শেমগৎ-শাগৎপগী থবক অসি ভারত্তা চৎথরি।

মরি শুবদা, ঐখোয়গী মেন্যুফেকচরিং সেক্তর অসি নৌনা ফগৎলক্লি। হৌখিবা চহী ৩ অসিদা এফ দি আই হেনগৎলক্লি – ২০১৩-১৪দা য়ু এস দোল্লর বিলিয়ন ৩৬ ওইরম্বদগী ২০১৬-১৭তা য়ু এস দোল্লর বিলিয়ন ৬০দা হেনগৎলকখি। মাইক্রো, স্মোল অমসুং মেদিয়ম ইন্তর্প্রাইজশিংদসু অখন্নবা মীৎয়েং থম্লি।

ঐখোয়না সেক্তরগী অখন্নবা মতমগা চুন্নবা অমসুং পোৎথোক হেনগৎনবা থৌরাংশিং পায়খৎলে, কোর্পোরেত তেক্স হন্থহল্লে, তেক্স থিবা লাইথোকহল্লে অমসুং কান্নবা হেন্না ফংহল্লে। ভারতকী স্তার্অপ সেক্তর অসি ফগৎলক্লি অমসুং মালেমদা অহুমশুবদা লৈরে।

লায়রবা অমসুং নমথবীরবশিংদা অপীকপা শেন্থং পীরিবা মুদ্রা স্কিম অসি ঐনা খ্বাইদগী পামজবা স্কিমনি। হৌখিবা চহী অহুম অসিদা য়ু এস দোল্লর বিলিয়ন ৯০ হেনবগী লোন মিলিয়ন ১২৮ পীখ্রে, মসিদা চাদা ৭৪না নুপীশিংদনি। হোই, চাদা ৭৪ নুপীশিংনি।

মঙা শুবদা, ঐখোয়না মীপুম খুদিংমক শেল-থুমগী কান্নবা ফংহন্নবা মীৎয়েং থম্লি। হৌখিবা চহী অহুম অসিদা মপুন্সিগী বেঙ্ক একাউন্ত লৈত্রিবশিংগী বেঙ্ক একাউন্ত মিলিয়ন ৩১৬ হাংদোক্লে। হৌজিক ভারতকী য়ুমথোঙশিংগী চাদা ৯৯ বেঙ্ক একাউন্ত অমমম লৈরে।

মসি অনৌবা চিংলেম্বা অমসুং নাগরিক খুদিংমক্কী মশক তাকপনি, শিংথানীংঙাই ওইবা মওংদা খুদিংমক কান্নবা ফংহনবনি। হায়রিবা একাউন্তশিং অসিদা য়ু এস দোল্লর বিলিয়ন ১২ হেন্না দিপোজিৎ তৌখ্রে।
য়ু এস দোল্লর বিলিয়ন ৫০ হেনবগী শেলফম কান্নবা ফংলবশিংদা হকথেংননা পীখ্রে। মতম অমদা মঙ ওইনা লৌনরম্বা পেন্সন অমসুং ইন্সুরেন্স হৌজিক ইরাই লাইনা ফংলে। বেঙ্কগী থবক য়াম্না য়াংনা পাকচাউনা শন্দোকপা মফম অমত্ত মালেম অসিদা লৈরম্লোই।

তরুক শুবদা, ভারত শীনবা থুংনা দিজিতেলগী অওনবা পুরক্লে। মীপুম খুদিংগী বাইওমেত্রিক আইদেন্তিতী লৈরে, ফুরিৎখাও খুদিংদা মোবাইল ফোন অমমম য়াওরে, মী খুদিংমক বেঙ্ক একাউন্ত লৈরে, ভারতমচা খুদিংমক্কী পুন্সি অওনবা পুরকলে।

ভারত্তা খুদিংমক্ত অওনবা পুরক্লে, লৈঙাক্তা, লায়রবশিংদা কান্নবশিং য়ৌহনবদা, খ্বাইদগী লায়রবশিংদা বেঙ্ক অমসুং পেন্সনগী কান্নবা ফংহনবদা। খুদম ওইনা, দিজিতেল ত্রান্সেক্সন অসি ফজনা চাউখৎলক্লি।

২০১৭তা,য়ু পি আইদা য়ুম্ফম ওইবা ত্রান্সসেক্সন অসি চাদা ৭০০০০ গ্রোথ লৈখি। জনুৱারী থাদা দিজিতেল ত্রান্সসেক্সন অসি য়ু এস দোল্লর ত্রিলিয়ন ২ য়ৌখি। ভিলেজ কাউন্সিল লাখ ২.৫দা ঐখোয়না ব্রোদবেন্দ কন্নেক্সন পীনবা হোৎনরি।হায়রিবা ভিলেজ কাউন্সিলশিং অসিদা কমন সর্বিস সেন্তর অমমম ঐখোয়না লিংখৎলে।

মসিনা দিজিতেলগী থবক কয়া পাংথোক্লগনি অমসুং খুঙ্গংদা থবক লিশিং কয়া ফংহল্লগনি। অতল ইন্নোবেসন মিশনগী মখাদা ঐখোয়না ইক্যুবেসন সেন্তর ১০০ হাংদোক্লে অমসুং ঐখোয়গী অঙাংশিং অসি অনৌবা পুথোকপা ঙম্বশিং অমসুং থবক পীবা ঙম্বা ওইনবা লৈবাক শীনবা থুংনা তিনকরিং লেবস ২৪০০ হাংদোক্লে। ঙসিগী একজিবসিন অসিদা হায়রিবা লেবশিং অসিগী শরুক অমা য়াওরি।

তরেৎ শুবদা, লাক্কদৌরিবা মথং চহি ২০ অসিদা মালেমগী খ্বাইদগী চাউবা শহর শেমগৎপগী থবকশিং ভারত্তা উবা ফংগনি। মসি শিংনবা অমনি, অদুবু অচৌবা থৌদাং অমসুং খুদোংচাবা অমনি।

শহর ১০০ স্মার্ত সিতী ওন্থোক্নবা ঐখোয় থবক পায়খৎলি অমসুং মচিন তুমখৎলক্লিবা জিলা ১১৫ নৌনা শেমগৎলি।

মীয়াম চৎথোক-চৎশিন, অমোৎ-অকাই লোইশিনবা, পোলুসন লাকশিনবা অমসুং তুংকোইনা চৎনগদবা অহোংবা মমলদা মীয়ামদা লৈনবা য়ুম ফংহনবা হায়বসি ঐখোয়না অহানবা ওইনা পায়খৎলিবা থবকশিংনি।
নিপাল শুবদা, নহারোল মিলিয়ন ৮০০ থবক-ইনখাংগী খুদোংচাবা ফংহন্নবা অৱাংবা-থাক্কী মহৈ-মশিং তম্বগী থবক ফগৎহন্নবা অমসুং হৈশিংবা হেনগৎহন্নবা ঐখোয়না শেল থাদরি। শিঙ্গাপুরদগী মতৌ তমদুনা ঐখোয়না স্কিল দিবলপমেন্তগী এদভান্স ইন্সতিত্যুৎ লিংখৎলে। চৎলিবা শেনবা চহী অসিদা ঐখোয়না অৱাংবা-থাক্কী মহৈ-মশিং তম্বগী থবক ফগৎহন্নবা য়ু এস দোল্লর বিলিয়ন ১৫গী থৌরম অমা হৌদোক্লে।

মাপন শুবদা, চহি কয়াগী মমাংদা পাংথোকখিবা গ্রিন রিভোলুসনগী মতুংদা অমুক্তা ওইখিদ্রিবা মওংদা ঐখোয়না লৌউ-শিংউগী লমদা অকনবা মীৎয়েং থম্লি। নীংতম্লবা ভারতনা চহী ৭৫ শুবা ২০২২ ফাওবদা লৌমীশিংগী ইনকম শরুক অনিদা হেনগৎনবা পান্দম থম্লি অমসুং অনৌবা ভারত অমা শেম্লগনি।

মসিগীদমক ঐখোয়না তেক্নোলোজী, রিমোত সেন্সিং, ইন্তর্নেত, দিজিতেল ফাইনান্সিং সিস্তেম, সোফ ক্রেদিৎ, ইন্সুরেন্স, লৈবাক লৈহাও ফগৎনবা থবক, ইথৈ-লৌখোং, মমল অমসুং কনেক্তিবিতী শিজিন্নরি।

তারা শুবদা, ঐনা পল্লিবা ‘২০২২ ফাওবদা হিংবদা লাইহনবা’ হায়রিবা অসিগী কান্নবা মীপুম খুদিংমক ফংহনবা ঐনা পাম্মি। ২০২২ ফাওবদা মীপুম খুদিংমক্কী য়ুম লৈহন্নবা য়ুম মিলিয়ন ৫০ শারগনি।

হৌখিবা থাদা, ঐখোয়গী অচৌবা মাইপাকপা অমা পাংথোক্লে। হৌজিক ঐখোয়গী খুঙ্গং ৬০০ মক মৈগী লাইন তিংলে। য়ুমথোং খুদিং মৈ ফংহন্নবা ঐখোয়না থবক পায়খৎলি।

ঐখোয়না চহি অসিদা, নেস্নেল হেল্থ ইন্সুরেন্স স্কিম, অয়ুসমান ভারত হৌদোক্লে। মসিনা ভারত মচা মিলিয়ন ৫০০ নৎত্রগা ইমুং মিলিয়ন ১০০ কোনশিনগনি অমসুং চহিগী ওইনা য়ু এস দোল্লর ৮০০ কবরেজ তৌগনি।

পুন্সি নুংঙাইনা হিংবা হায়বসি লু-নানবা অমসুং তুংকোইনা চাউখৎপগা মরি লৈনৈ। মসি ঐখোয়গী মরুওইবা পান্দমশিংগী মনুংদা অমনি। মসি ঐখোয়গী লু-তোংদা য়াওরবা চৎনবীনি অমসুং গর্হ অসিগী তুংগীদমক ঐখোয়না পীরিবা থাজবা অদুনি। মসিনা ভারত্তা হৌজিক চৎথরিবা মীয়ামগী থৌশিলশিং অমসুং শেল-থুমগী থবকশিং উৎলে।

মসিদা ঐখোয়গী অনানবা ভারত, তুরেলশিং শেংদোকপা, অশেংবা নুংশিৎ অমসুং শহরশিংগী পান্দম য়াওরি। অহোংবা ময়াম অসি ঐখোয়গী মীয়াম্না মরম ওইদুনা পাংথোকপা ঙাক্তনি। অপুনবা মীশিংগী চাদা ৬৫না চহি ৩৫গী মখা ওইবা, মীওই বিলিয়ন ১.২৫ লৈবা লৈবাক অসিনা অনৌবা ভারত অমা শেমগৎনবা মাংলোমদা চংশিল্লি। মসিনা লৈঙাক অমসুং রাজনিতীদা অওনবা পুরকখিবনি।

মরূপশিং,

ভারতকী শেল-থুমগী অওনবা অমসুং মাইকৈ অসি তশেং তশেংলে অমসুং থাজবা লৈরে। ভারত্তা ললোন-ইতিক্কী থবক লাইনা চৎথবা ঐখোয়না য়াহল্লে। মালেমগী ওইনা য়ানরবা অফোংবা, অচেৎপা অমসুং ফজবা ললোন-ইতিক্কী থবক ঐখোয়না শেমগৎকনি। ঐখোয়গী নোংপোক্ত লৈরিবশিংগা ঐখোয়গা অচেৎপা মরি লৈনরি, শেল-থুম অসি ঐখোয়গী এক্ত ইস্ত পোলিসীগী শরুক অমনি।

লৈবাক খুদিংমক ললোন-ইতিক অমসুং শেল থাদবগী থবকশিংদা চাউখৎনবা থোং মান্নবা অমসুং ফজবা য়ান-ৱারোলশিং লৈবা ঐখোয়না পাম্মি। ইন্দিয়া-শিঙ্গাপুর কমপ্রেহেন্সিব ইকনোমীক কোওপরেসন এগ্রিমেন্ত অসি ঐখোয়না অমুক হন্না য়েংশিল্লে অমসুং মসি ফগৎহন্নবা ঐখোয়না থবক পায়খৎকনি।

রিজনেল কমপ্রিহেন্সিব ইকনোমীক পার্তনরশিপকী ৱারোইশিন অমা পুরক্নবা ঐখোয়না আসিয়ান লৈবাকশিংগা পুন্না থবক তৌমিন্নগনি। লমদম অসিগা ভারতকা লৈনবা মরি ফগৎলকপগা লোয়ননা আসিয়ান অমসুং নোংপোক্ত শিঙ্গাপুরনা থোঙ্গাল ওইগনি। চহি অসিদা শিঙ্গাপুরনা আসিয়ানগী চেয়রমেন ওইরি অমসুং মসিনা ভারত অমসুং আসিয়ানগা লৈনরিবা মরি ফগৎহল্লগনি।

মরূপশিং,

লোইশিল্লকপদা, শিঙ্গাপুরগীদমক ভারত্তাগী হেন্না ফবা খুদোংচাবা অমত্তা লৈতে। ভারত অমসুং শিঙ্গাপুরগী মান্নবা লৈরিবা অসি নত্তনা লৈবাক অয়াম্বদা লৈতে। ঐখোয়গী খুন্নাই অসিদা লৈবাক অমনা অমগী মতৌ তম্নরি অমসুং লমদম অসিগী তুংদা অফবা পুরকপা ঐখোয়না পাম্লি।

কাংলোন্দা য়ুমফম ওইবা মালেম, সমুদ্রনা শম্নবা অমসুং লেংদবা ললোন-ইতিক পাংথোকপা মালেম অমা ঐখোয়না শেমগৎলি। পুম্নমক্কী মথক্তা, মালেমদা খ্বাইদগী হৈশিংবা, মগুন লৈবা, প্রোফেস্নেল অমসুং থাজবা য়াবা ভারত মচাশিং অসিনা শিঙ্গাপুরগী নাগরিক ওইরিবা অসি চাউথোকচনীংঙাইনি। মখোয়গী ভারতকী চৎন-লোনচৎশিং অসিনা ভারত অমসুং শিঙ্গাপুগী মরক্ত থোং ওইরি।

লাক্কদৌরিবা মতম অসিদা মপান নাইদ্রবা খুদোংচাবা কয়া লৈরি। মসি ঐখোয়গী ঙাক্তনি। মসি ফংনবা হোৎনগদবনি অমসুং লৌনবা থৌনা লৈগদবনি। ঐখোয় অচুম্বা লম্বীদা চৎলি হায়বা ঙসিগী নুমিদাংৱাইরম অসিনা তাক্লে। তুংগীদমক নোংশা অনিনা পুন্না চৎমিন্নগনি।

থাগৎচরি

অদোম্বু ঙমখৈ লৈতনা থাগৎচরি।