ভারতকী প্রধানমন্ত্রী

কেন্দ্রগী মন্ত্রীমন্দলগী ঐগী মরুপ, প্রাহলাদ জোসি জি, দি.য়ু ভি.সি য়োগেস সিংহ জি, এস.আর.সি.সি প্রিন্সিপাল সিমরিত কৌর জি, অজয় জি, মাল্লিকা জি, রজাত জি, এস.আর.সি.সিগী মরুপশিং, ওজা, ষ্টাফ, এস.আর.সি.সি এলুম্নাই অমসুং ঐগী নহা ওইরিবা মরুপশিং!

ঐ মহুৎ শীন্নবা লৈবা শান্নরোয় অমনি। ঙসিগী থৌরম অসি শ্রী রাম কোলেজ ওফ কম্মর্সকী পুৱারি ওইরবা থৌরমনি অমসুং মসি লৈবাক অসিগী লাইরিক-লাইশুগী হিরমগীদমক চপ মান্না মরুওই। শ্রী রাম কোলেজ ওফ কম্মর্সতগী হৌখিবা মীরোল কয়া মফম অসিদা তিল্লে। শ্রী রাম কোলেজ ওফ কম্মর্স চহি ১০০ মপুংফারকপগী থৌরম অসিদা অদোম ময়ামগী মফমদা ঐনা থাগৎপা ফোঙদোকচরি। কোলেজ অসি লিংখৎলম্বা সার শ্রী রাম জি অমসুং মহাক্কী পান্দমদা ঐনা ইকায়খুম্নবা উৎচরি।

মরুপশিং,

মীওই অমনা চহি ১০০ হিংবা মতমদা, মখোয় থৌদোক-ৱাথোক কয়া থেংনরে হায়না খন্নৈ। মহৈলোয়শঙ অমনা চহি ১০০ শুরকপা মতমদা, মসি মাইপাকপশিং অমসুং ইথিলগী সমুদ্র অমা ওইরকই। মসিগী চহি ১০০ গী খোঙচত্ত, শ্রী রাম কোলেজ ওফ কম্মর্সনা মীরোল কয়া শেমখ্রে, মখোয়গী অফবা তুংলমচৎ অমা লৈহনখ্রে। লাইরিক তম্বা লাকখিবশিং, লোইদুনা চৎখ্রবশিং শেমখি। দর্য়াগঞ্জগী অপীকপা মফম অমদা কোলেজ অসিগী খোঙচৎ হৌখি অমসুং ঙসিদি অপীকপা কোলেজ অদু অচৌবা পাম্বী অমা ওইরে। মীরোল কয়াদা উরুম পীখিবা অচৌবা উ পাম্বী অমনি অমসুং মসিগী অইংবনা মখোয় ফগৎহনখি। ঙসি ফাওবা, দি.য়ুদা, কনাগুম্বা অমনা করি কোলেজদা তম্বগে হংলকপদা, শ্রী রাম কোলেজ ওফ কম্মর্স পনবদা চাউথোকচবা অমা ওইরি।

মরুপশিং,

শ্রী রাম কোলেজ ওফ কম্মর্সকী মহৈরোয়শিং য়াম্না তোপ-তোপ্পনি। মসি অদোমগী লোলদা হায়বা মতমদা, মখোয় ওজিশিংনি, মালেমদা শ্রী রাম কোলেজ ওফ কম্মর্সকী মমিং তাকখিবা অমসুং তোঙান তোঙানবা হিরমশিংদা মখোয় মশামক মমিং তাকখিবা মহৈরোয়শিংনি। রজাত জিনা শাংলবা মমিং পরেং অমা উৎলে। মখোয় খরগা থবক তৌমিন্নবগী খুদোংচাবা ঐ ফংলে। ঐখোয়গী অরুন জেতলি জি কোলেজ অসিদা তমখি। শ্রী রাম কোলেজ ওফ কম্মর্সদগী থৌদোক অমগী মরমদা মহাক্না পনখিদবা অমতা লৈখিদে। চপ মান্নবা থৌদোক অদু হঞ্জিন হঞ্জিন পনবদা করিগুম্বদা ঐ পেনবা য়াওখি। হৌজিক ঐগী কাংবুদা, মফম অসিদা তমখিবা ইনাও সঞ্জিব সনয়াল য়াওরি। মফম অসিদা ঐগী অতোপ্পা মরুপ কয়াসু য়াওরি। কোলেজ অসিদগী থোকখিবা অসি ললোনবশিং খক্ত নত্তে; কলাকার কয়া, রাজনিতিৱালাশিং, উকিলশিং অমসুং জর্জশিং কোলেজ অসিদগী থোকখি। অতোপ্পা ৱাহৈশিংদা, হিরম খুদিংমক্ত শ্রী রাম কোলেজ ওফ কম্মর্সগী মেম্বরশিং মখোয় মশামক মশক তাকচরে। মখোয় অফাওবা ওইদবা য়াই, অদুবু মখোয় মশামক্কী মফম অমদি কল্লে।

মরুপশিং,

হৌখিবা নুমিৎ খরদা থৌরম অসিগী মতাংদা য়াম্না খন্ন-নৈনখি। মরুওইনা মীয়াম্না ঐগী ২০১৩ গী ৱারোল নিংশিংখি। মীয়াম্না মসি অমুক হন্না তাখি, মসি অমুক হন্না পাখি অমসুং অনৌবা মীরোল অসিনা মসি অমুক নিংশিংবা য়াই। ৱারোল অদুনা ইথক অমা হৌহনখি হায়না ঐনা হায়বা ঙম্মী। ঙসি ফাওবা, চহি ১৩-১৪ গী মতুংদা, তিনখিবা মীয়াম অমসুং মদুদা পীখিবা ৱারোলগী ইথিল লেংদনা লৈরি।

মরুপশিং,

মতম অদুদা অদোমগী মহুত্ত অদোমগী সেনিয়ারশিং লৈখি। ঐনা চীফ মিনিষ্টর ওইরিঙৈদা, ঐসু লৈবাক অসিগী মরুওইবা ওপোজিসন দলগী মেম্বর অমা ওইখি। মতম অদুগী কেন্দ্র সরকারদা ঐনা মতম য়াম্না লৌদুনা চৈগনি অমসুং মরাল কয়া শীগনি হায়না মীয়াম্না থাজনখি।

মরুপশিং,

ওপোজিসন্দা লৈজরবসু অমসুং মতম অদুগী সরকারগী ক্রিতিক অমা ওইরবসু, মদুগীদমক মফম অসি ঐনা শীজিন্নখিদে। ঐনা পান্দম অমা থমখি অমসুং অফবা ৱা ঙাংখি। মতম অদুদা ঐনা হায়খিবশিং অদু ঐগী থাজবশিংনি। ঐনা মতম পুম্নমক্ত ৱাহৈশিং, মঙলানশিং অদুগা হিংখি অমসুং লম্বী অদুদা মখা তানা চৎখি। ঐগী থৱায় অমসুং হকচাং লৈবাক্ত কৎথোকখি, লৈবাক্কীদমক হিংনবা ঙাউজখি, ঐগী নুঙদা পুক্নিংগী ইহুলশিংনা থনখি, ২০১৩ গী নুমিৎ অদুদা, ফম্বাক অসি মক্তদা, ৱাহৈ কয়াদা অমগী মথংদা অমদা ঐগী পুক্নিংগী ইহুলশিং ফোঙদোকপা হৌরকখি। ঐ মতম শাংনা ঙাংখি, ঐ মখা চৎথখো হায়বরা হায়না ঐনা মহৈরোয়শিংদা হংখি অমসুং মখোয়না হৌনা হায়খি, “হোয়, মখা চৎথবীয়ু”।

মরুপশিং,

অতোপ্পা নুমিত্ত, ঐনা ঈশিং গ্লাস অমগী খুদম পীখি অমসুং মদু লৈবাক শীনবা থুংনা খন্ন-নৈনখি। ঈশিং তঙ্খায় অমা য়াওবা গ্লাস অমগী মীৎয়েং অহুম ঐনা শন্দোক্না পনখি: গ্লাস অদু তঙ্খায় থল্লি হায়না উবা মীওইশিং, অনিশুবদা, গ্লাস অদু তঙ্খায় হাংই হায়না উবশিং অমসুং অহুমশুবদা, গ্লাস অদু মপুংফানা থল্লি, ঈশিং তঙ্খায় য়াওই অমসুং তঙ্খায় অমা নুংশিৎনি হায়না উবা মীওইশিং।

মরুপশিং,

লৈবাক অসি নিংবা কায়বা মতম অমা লৈখি। তঙ্খায় থনবা গ্লাস অমা ঐনা উখিদে হায়না মতম অদুদা ঐনা হায়খি, মসি মপুংফাদে হায়না ঐনা উখিদে; ঐনা মসি থনবা ওইনা উখি। তঙ্খায় অমা ঈশিং, তঙ্খায় অমা নুংশিৎ। মতম অদুদা নখোয় ময়াম স্কুল তম্লমখিগনি, করিগুম্না অদোম্না ওনলাইন্দা চঙলবা অমসুং ২০১৩ গী পাউ পারবদি, মতম অদুগী ফিবমগী ৱাখল্লোন অমা অদোম খঙগনি। নহারোলশিং ওনলাইন্দা চঙনবা অমসুং ২০১৩ গী হেদলাইনশিং য়েংনবা ঐনা নহারোলশিংদা হায়জরি। ২০১৩ দা পীখিবা ঐগী ৱারোলগী হেদলাইনশিং পাউ-চেশিং নত্ত্রগা তি.ভি চেন্নেলশিংদা য়াওখি। হায়রিবা হেদলাইনশিং অদুগী চাউরাকপা অমা ঐনা অদোমদা খঙহনবা পাম্মি। ঐনা হায়খিবা ৱাফমশিং মচেৎ কয়া থোক্না থুগায়বা অমসুং মদু ঐনা থোকহনবনি হায়বা হৌজিক মীওই কাংবু অমা লৈরি। ২০১৩ গী মতম মনুংদা মেদিয়াদা য়াওখিবা পাউশিং অদু ঐনা ফোঙদোকপনি হায়না মাঙজৌননা ঐনা অদোমদা হায়রিবনি। পাউশিং অদুদি:

•        এল.ও.সিদা ভারতকী লান্মীশিং হাৎপা, হৌজিক্কী মীরোলদা ঙক্না থোকপা য়াই। হৌজিক মসি থোক্ত্রে।

•        ভারতকী জি.দি.পি গ্রোথ হন্থবগী মতাংদা ৱার্ল্দ বেঙ্কনা মাঙজৌননা ফোঙদোকখি

•        করেন্ত একাউন্ত দিফিসিত ৱাংনা লৈরে

•        পোৎ-চৈগী মমল হেনগৎপা চাদা ১০ ওইরে

•        উদ্যোগকী থবকশিং মনিং হল্লে

•        হেলিকোপ্তর লৈবদা শেঞ্জা-থুমজা তৌবা শাবাক ফাকখি

•        হাদ্রবাদতা বোম্ব পোকখায়খি

মখোয় অসি মতম অদুগী হেদলাইনশিংনি। ঙসি ঐখোয়গী মহৈরোয়শিংনা পুম্নমক অসি খঙদ্রে হায়না ঐনা থাজৈ। থবকশিং অসিনা মতম অদুদা লৈবাক্কী ফিবম মশক তাকখি। গ্রোথ মনিংদা লৈখি অমসুং পোৎ-চৈগী মমল অতিয়া য়ৌনা ৱাংখি। ৱাথোকশিংনা পীক থনখি অমসুং মনিং তম্না শেঞ্জা-থুমজা পাংথোকখি। শেন্মিৎলোন ফিবম শোকখি অমসুং অশোইবা থৌশিলশিং মীয়াম্না তোইনা ঙাংনবা ৱাফমশিং ওইখি। মালেমগী লৈবাকশিংনা ভারত ফ্রেজাইল ফাইবকী মনুংদা চনহনখি। তেরোরিষ্টশিংনা থনখি অমসুং পাকিস্তান লাকশিনবা ঙমখিদে। অতোপ্পা ৱাহৈশিংদা, মতম অদুদা নিংকাইবা অমসুং খোইদৌ শাওগৎপা নত্তনা করি অমতা লৈরমদে।

মরুপশিং,

মাইকৈ খুদিংমক্ত লৈবাক অসিনা লান্থেংনবা মতম অমা লৈরমখি, ঙসিদি তেরোরিজম শন্দোকপা মীওইশিং মাইথিবা পীরে। করিগুম্বা পাকিস্তান্না ফত্তবা থবক অমা পাংথোক্লবদি, ভারতকী ফোর্সশিংনা য়ুমদা চঙলে অমসুং হাৎলে। জম্মু অমসুং কাস্মিরদগী হৌরগা অৱাং-নোংপোক ফাওবা শান্তি হেনগৎলক্লে। মাওইষ্ট তেরোরিজম অমসুং নেক্সালিজমগী য়াংলেন শরুক থুদেক্লে। মতম অমদা ভারতকী থৌশিল শোইবগী ৱানখিবা মালেমগী লৈবাকশিংনা ঙসিদি ভারতকী অফবা থৌশিলগী মরমদা খন্ন-নৈনরে। মতম অদুদা মালেম্না ভারত অসি ফ্রেজাইল ফাইবকী মনুংদা অমনি হায়খি, ঙসিদি ভারত খ্বাইদগী য়াংনা চাউখৎলক্লিবা অচৌবা ইকোনোমি ওইনা উরে। চয়োল অসিদা, ভারতকী শেন্মিৎলোনগী অফবা পাউ অমা লৈরে। ক্বারতরগী ওইনা চাদা ৭.৮ গ্রোথ লৈবা অসিনা লৈবাক্কী হরাওবা হেনগৎহল্লে অমসুং চৈরক অসিদা, জপানিস ক্রেদিৎ রেতিং এজেন্সিনা ভারতকী রেতিং ৱাংখৎলে।

মরুপশিং,

নোংচুপ এসিয়াদা লাল অমা থোক্লিবা মতম অমদা, ললোন-ইতিক্কা মরী লৈনবা অপনবা কয়া লৈরিঙৈ মতম অমদা চাদা ৭.৮ গ্রোথ লাকপনি, মতম অসিদা অসিগুম্বা গ্রোথ লাকপা অসিনা ভারতকী মপাঙ্গল উৎলে।

মরুপশিং,

ভারতপু ফ্রেজাইল ফাইবতা ইন্থখিবা ফত্তবা মীওইশিংনা হায়রিবা মশিংশিং অসি খঙবা ৱানা থোকখি হায়বা ঐ অমসুং অদোম খঙলে। অদুবু অদোম ময়াম্না হায়রিবা মশিং কয়া অসি লুম্না লৌরি। এপ্রিল অমসুং জুনগী মরক্ত, মৈ পুথোকপা চাদা ৯ হেনগৎখি অমসুং গারিশিং য়োনবা চাদা ২০ হেনগৎখি। মখা তানা, চকা অনি পানবা গারিশিং য়োনবা চাদা ২০ অমসুং চকা অহুম পানবা গারিশিং য়োনবা চাদা ৩০ রোম হেনগৎখি। কঞ্জুমরশিংনা মখা তানা পোৎ লৈরি অমসুং ললোন-ইতিক্কী থবক মখা তানা ফৎলক্লি হায়বা মসিনা তাক্লে। ষ্টিল অমসুং সিমেন্ত শীজিন্নবা চাদা ৮ হেনগৎলে। শেমগৎ-শাগৎপা, য়ুম শাবা, ইনফ্রাষ্ট্রকচর অমসুং উদ্যোগকী থবকশিং হেনগৎলক্লি হায়বা তাকপনি। ভারত চাউখৎলক্লি অমসুং অনৌবা থবকশিং ফংহল্লে হায়বা মসিনা তাক্লি। মসি ওইজরবসু,  ২০১৩দা গ্লাস অসি তঙ্খায় হাংই হায়না উখিবা মীওইশিং ঙসি ফাওবা চপ মান্নবা মিৎয়েং লৈরি। মখোয়গীদমক, মতম পুম্নমক্ত গ্লাস অসি তঙ্খায় হাংলি। ঐনা হায়রিবা অসি গ্লাসনি, হাংদুনা লৈবগী করিগুম্বা অমতা নত্তে।

মরুপশিং,

২০১৩ দা শ্রী রাম কোলেজ ওফ কম্মর্সতা ৱা ঙাংবদা, ঐনা পি২জি২ নত্ত্রগা প্রো-পিপল গুদ গভর্নান্সকী মরমদসু খন্নখি। লৈবাক অসি মতম শাংনা সরকার পায়খিবা মীওইশিংগী থৌওং অমা লৈখি: “মৈ চাক্লবা মতম খক্তদা ঙন্না হৌখৎখি অমসুং ইকং থোক্লবা মতম খক্তদা গুহা অমা তৌখি”। থৌওং অসি হোংদোক্নবা ঐনা তকশিনখি। ২০১৪ দা সরকার শেম্লবা মতুংদা, মসি ঐখোয়না থবক ওইনা উৎখি। ঐ অদোমদা খুদম অমা পীগে।

মরুপশিং,

হন্দক, জন ধন য়োজনা চহি ১২ মপুংফারে। ঙসি ঐখোয় ফিনতেক্কী তোঙানবা যুগ অমদা লৈরে, অদুবু ২০১৩ গী মতমদা, খুঙ্গংশিং অমসুং পীকপা সহরশিংগী মহৈরোয়শিং সেভিং বেঙ্ক একাউন্তশিং হাংদোকপা ফাওবদা খুদোংচাদবা মায়োক্নখি। মতম অদুদা ঐখোয়গী অপুনবা মীশিং বিল্লিয়ন ১.২৫ ওইখি, অদুবু মার্চ ২০১৪ দা, লৈবাক অসিগী অপুনবা মীশিংগী চাদা ৫০ বেঙ্ক একাউন্তশিং লৈখিদে। বেঙ্কগী থবকশিংগা শম্নদ্রিবা মীওইশিং অদু অয়াম্বনা লায়রবা, নুপীশিং, শিন্মীশিং অমসুং মহৈরোয়শিংনি। মরম অদুনা ঐখোয়না জন ধন য়োজনা হৌদোকখি অমসুং হৌখিবা চহি ১২ দা, অনৌবা বেঙ্ক একাউন্ত মিল্লিয়ন ৬০০ রোম হাংদোক্লে অমসুং জন ধন য়োজনা থাগৎচরি। ঙসিদি, লৈবাক অসিগী ইমুং খুদিংমক বেঙ্কগা শম্নরে। মসিনা ভারতকী ফিনতেক য়াওলগী য়ুম্ফম ওইরে।

মরুপশিং,

মীওই করোর কয়া বেঙ্কগা শম্নবগী মায়োক্ত লৈখিবা মীওইশিংগী মরমদা হৌজিক খল্লু। অসিগুম্বা মীওইশিংনা তঙ্খায় হাংবা গ্লাস অমা পামখি, লৈবাক অসিগী লায়রবা, মীচম মীয়ামশিং মখোয়গী তুং ইন্নহনবা পামখি। মখোয়না চহি কয়া মসিগা চপ মান্নবা মমা-মপা অমসুং মচাগী চৎনবী অসি থমখি। অদুবু মচানা মপা-মমাগী মতুংইন্নবগী চৎনবী পামজবা মীওইশিংগী মমাঙদা মোদীনা অচৌবা নুংজাউ অমগুম্না লেপখি।

মরুপশিং,

থায়নগী হায়নবী অমা লৈরি: “অচুম্বা মাইথিবা পীবা ঙমদে”। ঐগী থৌনা লৈখি, অমসুং মরম অদুনা নুমিৎ অদুদা ঐনা হায়খিবা ৱাফম অদু অদোমদা নিংশিংলিবনি। ঐনা অদোমদা ঐগী রিপোর্ত কার্দ উৎলে। অচুম্বগী অকনবা খোঞ্জেলগী মমাঙদা অরানবশিংগী খোন্থাংশিং লেপ্পা ঙমদে হায়বা ঐ খঙই।

মরুপশিং,

২০১৩ গী থৌরম অদুদা, ঐখোয়না মেদ ইন ইন্দিয়াদা থবক তৌবা দরকার ওই হায়না ঐনা হায়খি, অরিবা চৎনবীদা থবক তৌরিবা মীওইশিংনা মদু খঙখিদে। নিংবা কাইবা যুগ অদুদা মেদ ইন ইন্দিয়া থবক ওইনা পাংথোকপা ঙম্লোই হায়না মখোয়না খনখি। ঙসি ফাওবা, মদুগী ৱাখল্লোন্দা হৌরকখিবা মীওইশিং মেদ ইন ইন্দিয়া করেম্নরি।

মরুপশিং,

ঙসি অদোম্না মেদ ইন ইন্দিয়াগী ব্রান্দ ভেলু উরে। খুদম অমগা লোয়ননা শন্দোক্না তাকপা ঐ পাম্মী। ঙসি মীওই খুদিংমক মখোয়গী খুৎশিংদা স্মার্দফোনশিং পায়রে। মালেমগী খ্বাইদগী চাউবা ফোন ব্রান্দশিং ভারত অসি মখোয়গী খোঙদাফম ওইখি। মেদ ইন ইন্দিয়া স্মার্দফোনশিং মালেমগী মফম খুদিংমক্ত য়ৌরে। ২০১৪ দা, ভারতনা মশাগী শীজিন্ননবা মোবাইল ফোনশিং মপান লৈবাকশিংদগী পুশিল্লকখি। ঙসিদি, ভারতনা লুপা করোর লাখ ২.৫ হেনবগী মোবাইল ফোনশিং মপান্দা থাদোক্লে।

মরুপশিং,

অপীকপা, অরাইবা পান্দমশিং থম্বা মীওই অমা ঐ নত্তে। ঐনা লৈবাক্কীদমক অচৌবা পান্দমশিং থমখি অমসুং মখোয় ফংনবা ঐগী থৱায় অমসুং হকচাং য়াওনা হোৎনখি। দিফেন্স সেক্তর য়েংউ। মমাংদা, ভারতকী আর্মদ ফোর্সশিংগী পোৎলম অয়াম্বা মপান লৈবাকশিংদগী লৈখি। ঐ হেক লাকপগা, নেগেতিপ লিষ্ট অমা শেম্নবা দিফেন্স ওফিসিএলশিংদা ঐনা হায়খি। অহানবদা মখোয়না নেগেতিপ লিষ্ট ৫০০ শেমখি, পোৎলমশিং অসি মখোয়না মপান্দগী লৈদে হায়খি। মতম অদুদা মখোয়না লিশিং অমা শেমখি, লিশিং অহুম শেমখি। খ্বাইদগী পীকপা অপীকপা পোৎলম অমা ফাওবগী লান্মী, নেভি অমসুং এয়র ফোর্সনা থা কয়া ঙাইখি। লৈবাক্কী আর্মদ ফোর্সশিংগা পুন্না থবক তৌমিন্ননবা থৌরাং অমা ঐখোয়না শেমগৎখি, পোৎলমশিংগী লিষ্ট অমা শেমখি অমসুং মখোয় শানবা ভারতকী কম্পেনিশিংদা হায়খি। ঙসিদি, ভারতকী দিফেন্স মেনুফেকচরিং খ্বাইদগী ফিবম ফগৎপা অদোম উরে। ঙসি, ভারতনা লুপা করোর লাখ ২ রোমগী ঙাক-শেনগী পোৎলমশিং মপান লৈবাকশিংদা থাদোক্লে। ২০১৩-১৪ দা ঐখোয়না লুপা করোর ৬০০-৭০০ রোমগী ঙাক-শেনগী পোৎলমশিং মপান্দা থাদোকখি। ঙসিদি, মশিং অসি লুপা করোর ৪০,০০০ রোম য়ৌরে। লৈবাক অসিদা অফবা দিফেন্স মেনুফেকচরিংগী থবক অমা পায়খৎলকপদগী ঙসি মাইপাকপশিং অসি পুরকপা ঙম্বনি। 

মরুপশিং,

ঐনা লৈবাক অসিদা থাজবা থম্লি, ঐনা লৈবাক অসিগী তৌবা ঙম্বশিংদা থাজবা থম্লি, ঐনা নহারোলশিংদা থাজবা থম্লি অমসুং থাজবা অসিদা য়ুম্ফম ওইদুনা ঐনা বিকসিত ভারত অমগী ৱা ঙাংলিবনি। ঐখোয় ভারতমচা বিল্লিয়ন ১.৪ না পুন্না ঐখোয়গী লৈবাক চাউখৎলবা অমসুং মশা মরোমদোম লেপচবা লৈবাক অমা ওইহনবা ঙমগনি হায়না ঐনা থাজৈ।

•        তুংদা, ভারত মেনুফেকচরিংগী মফম অমা ওইগনি।

•        তুংদা, ভারত থিজিনবা অমসুং অনৌবা থবকশিংগী মফম অমা ওইগনি।

•        লৌউ-শিংউগী পোৎথোকশিং মপান্দা থাদোকপদা ভারত সুপরপৱার অমা ওইগনি।

ঐগী নহারোল মরুপশিং,

ভারতনা মশাগী স্পেস ষ্টেসন শেমগৎকনি।

মালেম শীনবা থুংনা য়েংগদবা ওলেম্পিক্সগুম্বা অচৌবা থৌরম অমা ভারতনা পাংথোকপা নুমিৎ অদু অদোম উগনি।

পুম্নমক অসি ৱাহৈশিং খক নত্তে, মখোয় ঐখোয়গী ৱাশকশিংনি। ৱাশকশিং অসি থবক ওইনা পাংথোক্নবা লৈবাক শীনবা থুংনা মখা তানা থবক পায়খৎলি।

মরুপশিং,

হৌজিক, অদোমগী পুন্সিশিং এস.আর.সি.সিগী মওংদা থবক তৌরি। চা থকপদা খন্নবা, কোল্দ কোফি থক্লগা খন্নবা, একজামগী নোতশিং অমসুং চে-চাংশিং নমথোকপা নত্ত্রগা ক্রোসরোদশিং অমসুং ললোন-ইতিক্কী মীফমশিংদা অদোম কন্না হোৎনবা ওইবা য়াই, অদোম্না মফম অসিদা পাংথোকখিবা থবক খুদিংমক নিংশিংদুনা লৈহৌরগদবা অমা ওইরগনি। অদুবু কেম্পসকী ৱাংমদা, অদোম্না অনৌবা মালেম অমা উগনি। অদোম ময়াম্না মীওইবা মখল অনি উগনি। মীওই অমনা, খুন্নাইগী শক্তি অসি লৈবাক্কী অফবা শক্তি ওন্থোকপা মীওইশিং। অতোপ্পনা প্রোজেক অমা হেক পায়খৎলকপদা অশাওবা মীওইশিং। মতম লেনবগী মখোয়গী খ্বাইদগী পামজবসি থবক খুদিংমক্ত অপনবা পীবনি। মখোয়গী অমতা ঙাইরবা দাইলোগতি, “করিগী মসি দরকার ওইরিবনো? করিগী মসি দরকার ওইরিবনো? করিগী মসি দরকার ওইরিবনো?” মসি খুরা খুদিংমক্কী লেংদ্রবা দাইলোগনি। ঐখোয়না মালেমগী খ্বাইদগী ৱাংবা মীতম শাগৎপা মতমদা, খুরানা মহাক্কী খ্বাংচেৎ লাকশিনখি অমসুং হংখি, “করিগী মসি দরকার ওইরিবনো? ঐখোয়না য়াম্না য়াংবা ত্রেনগী থবক হৌরকপা মতমদা, খুরানা অমুক হায়খি, করিগী মসি দরকার ওইরিবনো? ঐখোয়না য়ু.পি.আই হৌদোকপা মতমদা, খুরাশিংনা হায়খি, করিগী য়ু.পি.আইনো? করিগী মসি দরকার ওইরিবনো? চিপশিং শানবা ঐখোয়না ৱারি শানবা মতমদা, মতম অদুদা মখোয়না অমুক হায়খি, করিগী মসি দরকার ওইরিবনো? ঐখোয়না অনৌবা সংসদকী বিল্দিং শাখি অমসুং মতম অদুদা মখোয়না হায়খি- করিগী মসি দরকার ওইরিবনো? লৈবাক্কীদমক থৱায় থাখ্রবা ঐখোয়গী থৌনা ফরবা লান্মীশিংগীদমক ঐখোয়না মেমোরিএল শাখি, মতম অদুদা খুরাশিং থোক্লকখি, করিগী মসি দরকার ওইরিবনো? অসিগুম্বা খুরাশিংদা ভারতনা পাউখুম অমা পীরে, লৈবাক অসিগী দরকার ওইবশিং পায়খৎপা মতমদা কনাগুম্ব অমতনা ভারত থিংবা ঙম্লোই।

মরুপশিং,

ঙসিদি ভারত তোঙানবা ৱাখল্লোন অমগা লোয়ননা মাংলোমদা চঙশিল্লি। চহি কয়া চঙলম্বা থবকশিং হৌজিক চহি খরদা পাংথোক্লে। মপুংফাবা খুদমশিংগা লোয়ননা ঐনা অতোপ্পা খুদম অমা পীগনি। ১৯২৫ দা ভারতকী অহানবা ইলেক্ত্রিক ত্রেন চেনবা হৌখি। ১৯২৬ দা অদোমগী কোলেজ লিংখৎখি অমসুং ১৯২৫ দা ইলেক্ত্রিক চেন চেনখি। মসিগী মতুংদা ২০১৪ ফাওবা, চহি ৯০ দা থবক চাদা ৩০ গী মখাদা পায়খৎখি। রেলৱে লাইনশিংগী চাদা ৩০ য়ৌদনা ইলেক্ত্রিক ফংহনখি। ঐখোয়না শুপ্নগী চহি ১২ দা রেলৱে লাইনশিং চাদা ১০০ মৈ ফংহল্লে।

মরুপশিং,

ভারতকী থৌশিলগী ৱারেপ লৌরিবশিং অসি মালেম্না য়েংলি অমসুং খঙলি। মরম অদুনা মখোয়না ভারতকা লোয়ননা থবক তৌমিন্নবা হেনগৎলক্লি। হৌখিবা চহি ১০ দা, লৈবাক ৪০ রোমগা ত্রেদ এগ্রিমেন্তশিং, ফ্রি ত্রেদ এগ্রিমেন্তশিং খুৎয়েক পীনখ্রে। মসিনা শাউন, তেক্সতাইলশিং, উহৈশিং অমসুং ইন্সাং-নাপীশিং, শেম-শারবা চীঞ্জাকশিং অমসুং খজিংগী অনৌবা কৈথেলশিং ফংলে। অনৌবা কৈথেলশিং ফংবা অমসুং ভারতকী পোৎথোকশিং অমসুং থবকশিংগী তারিফশিং হন্থরকপনা করি হায়রিবনো হায়বা অদোমদগী হেন্না খঙবা কনা লৈগনি। মসিনা ভারতকী নহারোলশিংগী খুদোংচাবশিংগী অনৌবা পনখৈ অমা শেম্লে।

মরুপশিং,

ঙসিদি, ২০১৩ দা ওইরম্বা ফিবম অদুদগী লৈবাক অসি শেন-থুম অমসুং খুন্নাইগী ফিবম হেন্না ফগৎলে। অদুবু মসি উবদা মীওই খর লৈতাদবা অমসুং শাওবা হেনগৎলক্লে। ওগষ্ট ১৫ গী ঐগী ৱারোল অদোম তারমগনি। অসিগুম্বা মীওইগীদমক, ঐনা লাল কিলাদগী হোমিওপেথিগী দোজ অমা থাখি, অপীকপা হোমিওপেথিগী গুলি অমা। অদোম খঙলে, অহানবা হৌরকপদা লায়না হেনগৎহনবগী ফিবম অমা হোমিওপেথিগী লৈ। মসি হোমিওপেথিগী মওংনি। মরম অদুনা, ঐনা লাল কিলাদগী হোমিওপেথিগী গুলি অমা থাখি-মেন্তেল নেক্সাল। মসিগী মেন্তেল নেক্সাল লাইয়েং অসিনা, ঙাইহাক্কী ওইনা লায়না হেনগৎহল্লি, অমসুং তুংদা মসি লাইয়েংবা হৌরকই। চপ মান্ননা, ঐনা মেন্তেল নেক্সালগীদমক হোমিওপেথিগী গুলি থাবদা, মেন্তেল নেক্সালশিং থোক্লকপা হৌরকখি। হৌজিক লায়না অসি শৌগৎলিবা মীওইশিংগী অশেংবা শক্তমশিং মীয়াম্না উরে।

মরুপশিং,

ঐনা ৱাফম কয়া পনখি অমসুং মীওই খরনা খনখি, “ও, মসি মীওই বিল্লিয়ন ১.৪ গী লৈবাক অমনি, মসি ফজনা লৈরি। মোদীনা করি অনৌবা পাংথোক্লবগে? মসি তশেংনা অরাইবা অমরা? থায়নগী মতমশিং নিংশিবা ঐনা পাম্মী। অদোম স্কুল তম্লিঙৈ মতম নিংশিংবরা? ২০১৩ দা কেদরনাথকী অমাং-অতা থোকখি। সরকার নিকখি। করি তৌগদবনো হায়বা মখোয় খঙখিদে। কমদৌনা মসি পাংথোকখিবগে? ২০০৮ দা বেঙ্কগী অৱাবশিং মায়োক্নবা মতমদা, মতম অদুগী সরকারনা ২০১৪ ফাওবা অৱাবা অদু লোৎশীন্নবা হোৎনখি, থবক পায়খৎনবা হোৎনখিদে। ভারতকী অপুনবা বেঙ্কগী থবক তুবা য়াবগী ফিবমদা লৈখি।  ২০০৮ দা, মুম্বাইদা তমথিরবা তেরোরিষ্টকী এক্তেক চৎথখি অমসুং মতম অদুগী সরকারনা মপানগী শাফু মায়োক্নখি, সরকার অদুনা পাকিস্তান্দা পারা অমা ফাওবা তম্বীনবা থৌনা লৈখিদে।

মরুপশিং,

হৌখিবা চহি ১২ দা, লৈবাক অসিনা অমাং-অতা কয়া মায়োক্নখি। ঐখোয়না অকনবা নোংলৈ-নুংশিৎ কয়া থেংনখি, অদুবু লৈবাক অসিনা অকনবা থৌনাগা লোয়ননা মখোয় মায়োক্নখি। হৌখিবা চহি তরুক অচৌবা অৱাবশিং মায়োক্নখি। অহানবদা, কোরোনা ভাইরস লাইচৎ থেংনখি, মালেম শীনবা থুংনা চপ লেপখি। মতম অদুদা, রুসিয়া অমসুং য়ুক্রেনগী মরক্ত লাল থোক্লকখি। তুংদা, ললোন-ইতিক অমসুং সপ্লাই চেনশিং খুৎলায় ওইনা শীজিন্নবা হৌরকখি। তুংদা নোংচুপ এসিয়াগী লাল হৌরকখি। মতম খুদিংমক্ত, ভারত হিংলরোই হায়নখি। ঐবু খ্বাইদগী নুংশিজবা মীওইশিং হরাওখি, হৌজিক মোদী চপ্লে হায়না খনখি, হৌজিক মোদী তুরে, হৌজিক মহাক চপখায়রে। অদুবু ঐগী লৈবাক্কী মীয়ামগী বর অসুক্কী মতিক য়াম্না ফংখি, ভারত অৱাবা তানবা খনখিবা মীওই খুদিংমক্কী অনিংবশিং অরেম্বা তাখি।

মরুপশিং,

হৌজিক ২১শুবা চহিচা অসিদা, ঐখোয়গী মাঙদা অনৌবা খুদোংচাবশিংগী মালেম অমা তাদুনা লৈরে। অদোম থাজবা য়াম্না লৈবদা ঐ হরাওই, মরমদি থাজবা থম্বা অসি তম্নরিবা লাইরিক অমতদগী তম্বা ঙমদে। অদোম অচৌবা মঙলান অমা মঙনবা ইথিল পীবা ফিবম অমনা থাজবা লৈহল্লি। ঙসি, করিগুম্বা মখোয় মশাগী করিগুম্বা খর পাংথোক্নবা ঐখোয়গী নহারোলশিংদা হায়বা মতমদা, মখোয়না ষ্টার্দঅপ অমা হৌগনি, করিগুম মখোয়না কম্পেনি অমা শেমগৎপদা, মখোয় য়ুনিকোর্ন অমা ওইগনি। মখোয়না স্পেস অমসুং দ্রোনগুম্বা হিরশিং শরুক য়াগনি অমসুং করিগুম্বা অচৌবা খর পাংথোক্কনি। মখোয়না অনৌবা এ.আইগী থবকশিং পায়খৎকনি অমসুং মখোয়না লৌউ-শিংউদা অনৌবা থবকশিং পায়খৎকনি। চহি ১৩ গী মমাঙদা, অদোমগী সেনিয়ারশিংনা অসিগুম্বা অচৌবা মঙলানশিং মঙখিদে। অদুবু ঙসিদি, অসিগুম্বা মঙলানশিং শৌগৎনবা ফিবম অমা ভারতকী লৈরে, মরম অদুনা অদোমসু হায়রিবা মঙলানশিং অসি মঙলি।

মরুপশিং,

হৌজিক অসি অচৌবা পান্দমশিং থম্বা অমসুং মখোয় ফংবগী মতম্নি। হন্দক ঐনা লাল কিলাদগী ৱা ঙাংখ্রে। ঐনা অদোমদা অমুক হঞ্জিল্লরোই। ৱাশক অমা শক্লসি: করিগীদমক ভারতকী মালেমগী কন্সলতিং ফার্মশিং লৈত্রিবনো? করিগীদমক ঐখোয়গী একাউন্তিং ফার্মশিং, ঐখোয়গী লিগেলগী ফার্মশিং, ঐখোয়গী ফাইনান্সিএল ফার্মশিং মালেমগী লুচিংবশিং ওইদ্রিবনো? ঙসিদি ভারতমচাশিংনা মালেমগী অচৌবা কম্পেনিশিং লুচিংলি হায়না ঐখোয়না চাউথোক্না হায়রি। করিগুম্বা ভারতমচাশিংনা মালেমগী অচৌবা কম্পেনিশিংগী লুচিংবা ওইরগা, করিগীদমক ভারতমচাশিংনা লিংখৎপা কম্পেনিশিংনা মালেমগী লুচিংবা ওইরোইদৌরিবনো?

মরুপশিং,

নেতৱার্কশিং অমসুং লৌশিং অনিমক লৈরবা নহারোলশিংনা মসি পাংথোকপা ঙমগনি।

মরুপশিং,

শ্রী রাম কোলেজ ওফ কম্মর্সকী কোলেজ ক্রেষ্ট অসি ঐখোয়গী ইথিলনি। মসিদা ফজরবা খুদম অনি য়াওরি। অমনা নুমিৎ থোক্লকপা অমসুং অতোপ্পনা সমুদ্রদা জহাজ অমা হোনবনি। নুমিৎনা মাইকৈ তাক্লি অমসুং জহাজনা মাইকৈ অদুদা মাঙলোমদা চঙশিল্লি। নুমিৎ অসি ঐখোয়গী ওইবা, সমুদ্রসু ঐখোয়গী ওইবা, অনৌবা লম্বী অমদা ঐখোয় চৎকদবনি। হি অসি ঐখোয়গীনি, হিরোয়শিংসু ঐখোয়নি। ইথকশিংদা মাইপাক্নবা থৌনা লৈবা ঐখোয় ওইসি। পাইরিবা অদু ঐখোয় ওইসি, অতিয়া অসি ঐখোয়গী ওইসি। অকনবা নুংশিৎ মায়োক্নবা ঙম্বা ঐখোয়গী থৌনা অদু ঐখোয়গী ওইসি। মঙলান অদু ঐখোয়গী ওইসি, ৱাশক অদু ঐখোয়গী ওইসি, অত্মনির্ভরগী ফিরাল অদু ঐখোয়গী ওইসি। বিকসিত ভারত অমগী লম্বীদা, বিকসিত ভারত অমগী লম্বীদা, য়াংনা থাংজিল্লিবা খোঙথাং খুদিংমক ঐখোয়গী ওইসি। অমুক হন্না, অখন্নবা থৌরম অসিদা, শ্রী রাম কোলেজ ওফ কম্মর্সকা মরী লৈনবা মীওই খুদিংমক ঐগী য়াইফ পাউজেল পীজরি।

বন্দে মাতরম

*****