ভারতকী প্রধানমন্ত্রী

লৈবাক্কী লন-থুম অমসুং ইকাই খুম্নববু ঙাক শেল্লিবা,

সেক্যুরিতীদা থৌদাং লৌরিবা সি.আই.এস.এফ.কী মরূপলোয়শিং,

মফম অসিদা তিনবীরিবা থৌনা ফরবা ইমুং-মনুংগী মীওইশিং,

ইবুংঙো অমসুং ইবেম্মশিং!!!

গোল্দন জুব্লীগী অসিগুম্লবা মরুওইবা তাঙ্কক য়ৌরকপদা ময়াম পুম্নমকপু হন্না-হন্না নুংঙাইবা ফোংদোকচরি!!

ওর্গনাইজেসন অমা ওইনা অদোম্না চহী ৫০ মপুং ফারকপা অসি য়াম্না ফজবা এচিবমেন্ত অমনি। অদুবু মসি ফাওবা য়ৌহনবদা, ঙসি লৈরিবা সি.আই.এস.এফ.কী সিস্তেম, থৌদাং লৌখিবা মখোয়শিং, অদুবু চহী ৫০গী মতমদা মশা-মশাগী থৌদাং লৌদুনা মসিবু লমজিংখিবশিংনা ইন্সতিত্যুসন অসিবু লেপ্পা লৈতনা অনৌবা থাক্তা পুখৎপগী থবক তৌখি। মদুনা মরম ওইরগা ঙসি ঐখোয়না মসিগী গোল্দন জুব্লীগী থৌরম পাংথোক্লি। চহী ৫০ ফাওবা ইন্সতিত্যুৎ অসিবু মাংলোমদা পুখৎপদা থৌদাং লৌখিবা মখোয়শিং অদুবু তৌবীমল খঙবা উৎচরি।

মরূপশিং, সি.আই.এস.এফ.কা মরী লৈনরিবা ময়াম পুম্নমক্না লৈবাক অসিগী লন-থুম্বু অশোই-অঙাম য়াওহন্দনা ঙাক্তুনা থম্বদা মরুওইবা থৌদাং লৌরি। অনৌবা ভারতকী অনৌবা সিস্তেমশিংবু অশোই-অঙাম য়াওহন্দনা ঙাক্তুনা থম্নবগীদমক, লৈবাক্কী আশা অমসুং অপাম্বা অদু ওইরক্নবগীদমক অদোম্না লেপ্পা লৈতনা মাংলোমদা চংশিল্লি।

সেক্যুরিতীগী সিস্তেম কয়া অমা লৈরি হায়বা ঐখোয় খঙই, মদুগী ফোর্মেশন, মেকানিজম, স্ত্রকচর, মসি ব্রিতিশকী মতমদগী ঐখোয়না ফংদুনা লাক্লে। মতমগী মতুং ইন্না মদুদা শেমদোক-শাদোকপগী থবকসু পাংথোকখ্রে। অদুবু দরকার ওইরকপগী মতুং ইন্না নিংতম্বা ফংলবা মতুংদা লিংখৎখিবা সংস্থান খরদি লৈরি। মখোয় অদু অমরোমদা নিংতম্লবা ভারতনা পোকপীবনি। নিংতম্লবা ভারতকী ৱাখল্লোন্না পোকপীবনি। নিংতম্লবা ভারতকী মঙলানবু মঙফাওহন্নবা পোকপীবনি। অমদি মদুদা সি.আই.এস.এফ. অসি য়াম্না মরু ওইবা য়ুনিৎ অমনি।

চহী য়াঙ্খৈগী তপস্যা অসি খজিক খরাক নত্তে। য়াম্না চাউবা তপস্যানি অদুগা থৌদোক অমা অনি হায়বদি নুমিৎ ৩৬৫ মিৎ পাংদুনা লৈদুনা, এলর্ত ওইদুনা, খোং, খুৎ, হকচাংবু পুং নিপাল-নিপাল, মাপল-মাপল ফাওবা মতিক চানা থৌরাং তৌদুনা থম্লগা খুদোংথিবা কয়া অমদগী লৈবাক অসিবু ঙাকথোক্লি। অদুগা খুদোংথিবা থৌদোক অমা অনি থোকপদা তপস্যা পুম্বা অরেম্বা তাগদৌরিবা অদুগুম্লবা অরুবা ফিভমদা অদোম অদোম্না থবক তৌবা তারি, মসি অচম্বা থবক নত্তে।

অতোপ্পা সেন্ত্রেল ফোর্সশিংগা য়েংনরুবদা সি.আই.এস.এফ.না নুপী মশিং খ্বাইদগী য়াম্লি, মসিনা লৈবাক অসিগী পাঙ্গল শক্তি হেঙ্গৎহল্লি, মরম অদুনা লম অসিদা শরুক য়াবগীদমক ইচানুপীশিং অসিবু তৌবীমল খঙবা উৎচরি, মখোয়বু পোকপীরিবা অপোকপা অমসুং অপোকপীশিংবুসু তৌবীমল খঙবা উৎচরি। অসিগুম্লবা ইচানুপীশিং অসি হঞ্জিন-হঞ্জিন থাগৎনীংঙাইনি।

মরূপশিং, সেক্যুরিতী অমসুং সেবাগী ৱাখল্লোনগা লোয়ননা অদোম্না মাংলোমদা চংশিল্লিবা অদু য়াম্না মরু ওই। অনৌবা ভারতকীদমক থৌরাং তৌরিবা অনৌবা থাক্কী ইনফ্রাস্ত্রকচর, হিথাংফম শেমগৎলিবা, এয়রপোর্ত শেমগৎলিবা, মেত্রো পাকথোক চাউথোক্লিবা, অচৌ-অচৌবা ইন্দস্ত্রীশিং, পুম্নমক অসিগী সেক্যুরিতীগী থৌদাং অদু নখোয় ময়ামদা লৈরি। লাখ অমমখায় হেনবা পর্সোনেলশিংগী অসিগুম্লবা অচেৎপা শক্তি অসিনা ঙসিদি লৈবাক মীয়াম্বু, ভারত্তা লাক্লিবা মালেম পুম্বগী মীয়াম্বু অশোই অঙাম য়াওদবা এতমোসফিয়র ফংহন্নবা হোৎনরি।

মরূপশিং, মীপুম খুদিংমক্না এয়রপোর্ত অমসুং মেত্রোদা মপুংফানা অশোই অঙাম লৈতে হায়না লৌনৈ। মসি পুম্নমক অসি ওইথোকপা ঙম্লিবা অসিগী মরমদি অদোমগী কত্থোকপা, অদোমগী ঙাকশেল, মীয়াম্না অদোমদা থম্লিবা থাজবা অদুনি। হৌজিক্তি এয়রপোর্ত ওইগেরা নত্রগা মেত্রো সর্বিস ওইগেরা মসিদা য়াম্না চাউনা পাকথোক চাউথোকপগী থবক চত্থরি। লম অনি অসিদা ঐখোয় মালেমদা অসিগুম্বা মখলগী সর্বিস তৌরিবা খ্বাইদগী চাউবা লৈবাক ওইরক্নবগী মায়কৈদা মাংলোমদা চংশিল্লি।

মরূপশিং, ঐহাক ইশামকসু মেত্রো তোংদুনা চৎপগী তঞ্জা কয়া অমা ফংজখ্রে। নখোয়না কয়া য়াম্না কন্না থবক তৌবগে হায়বদু ঐহাক্না উবা ফংই। মতৌ করম্না পুং কয়া কয়া লেপ্পা লৈতনা অদোম্না মীপুম খুদিংমকপু, পোৎ-চৈ খুদিংদা মীৎয়েং থম্বগে হায়বা ঐহাক খঙই। মেত্রো নত্রগা এরোপ্লেন তোংদুনা চৎলিবা মীচম প্রজাশিংনা অদোম অদোম্না পাংথোক্লিবা থবকশিং অদু উবা ফংলি। অদুবু ৱাফম অসিমসু অচুম্বনি মদুদি, অদোম্না তৌরিবা থবক অসি লাক্লিবা মীওই অদু য়েংশিনবা অদুগা চৎনখিবা অসি খক্তনি হায়না করিগুম্বা মতমদা মীওই খরনা খল্লি।

মরূপশিং, লৈবাক অসিনা মসি খঙজিনবসু দরকার ওইরি মদুদি সি.আই.এস.এফ.কী সেক্যুরিতী পর্সোনেল খুদিংমক চেক তৌবগী থবক খক্তগা মরী লৈনবা নত্তে মদুগী মথক্তা সেক্যুরিতীগী মওং-মতৌ পুম্নমক অমদি হ্যুমেন সেনসেসনগী মায়কৈ খুদিংমক্তা মখোয়না থৌদাং লৌরি।

মরূপশিং, দিজাস্তরগী মতমদসু অদোমগী থৌদাং অদু থাগৎনীংঙাই ওইদুনা লাক্লি। মমাং চহীদা কেরলাদা লাকখিবা তমথিরবা ঈশিং ইচাউদা অদোমগী মরক্তগী মরূপ কয়া অমনা মী কনবা অমসুং তেংবাংবগী থবক্তা অয়ুক নুমিদাং অমত্তা ওইদুনা মীওই লিশিং কয়াগী পুন্সি কনবদা মতেং পাংখি। লৈবাক মনুং খক্তদা নত্তনা মীরৈবাক্তসু মীওইবা জাতিদা অৱাবা তারকপা মতমদা সি.আই.এস.এফ.না মখোয়গী থৌদাং অদু মপুংফানা পাংথোকখি। নেপাল অমসুং হাইতিদা য়ুহা হাখ্রবা মতুং অদোম্না ইন্তর্নেস্নেলগী থাক্তসু থৌদাং লৌখি।

মরূপশিং, ঙসিগী অসিগুম্লবা তঞ্জা অসিদা ঐখোয়না অসিগুম্লবা মরুওইবা তাঙ্কক অসিদা য়ৌরকপা মতম অসিদা ঐখোয়না মশাগী মথৌগীদমক, লৈবাক্কী সেক্যুরিতীগীদমক মাংজিল থানা থৱাই থারিবা ঐখোয়গী অদুগুম্লবা তেংবাংলোয়শিংবুসু নিংশিংগদবনি। অকি-অখঙ অমসুং হিংসাবু পুক্নিং থৌগৎলিবা শক্তিশিংদগী, ঐখোয়গী লৈবাক অসিবু, ঐখোয়গী মমল নায়দ্রবা স্ত্রকচর, ঐখোয়গী রিসোর্সশিংবু কন্নবগীদমক অৱাংবা থাক্তা কত্থোকখি। সি.আই.এস.এফ. ওইগেরা, সি.আর.পি.এফ. য়াওনা অতোপ্পা সেক্যুরিতী ফোর্স ওইগেরা, অদোমগী কত্থোকপা অদুনা ঙসিদি ঐখোয়না অনৌবা ভারতকী মঙলান অদু উবা ফংলিবনি। হৌজিক ফাওবদা সেন্ত্রেল পুলিস ফোর্সকী থৱাই থাখ্রবা অথৌবা লিশিং ৪ হেনবা য়াওনা পুলিসকী মরূপলোয় লিশিং ৩৫ হেনবনা অৱাংবা থাক্তা থৱাই কৎখ্রে। ঐহাক্না অথৌবশিং অসিগী মফমদা ইকোক নোন্দুনা ইকাই খুম্নজরি।

মরূপশিং, কালেনগী মৈশা ওইগেরা, ইংথমথাগী অইংবা ওইগেরা, নোংজুথা ওইগেরা, অদোম্না অদোমগী ফ্রন্ত অদুদা পুক্নিং লৌশিং মাংদনা লেপতুনা লৈরি। লৈবাক অসিদা য়াওশং, দীৱালি অমদি ইদ য়াওনা কুমহৈ কয়া অমা পাংথোক্লি, অদুবু অদোম অদোমগীদমক্তদি ইশাগী দ্যুতী অদুমক কুমহৈ ওইরি। ঐখোয়গী সেক্যুরিতী পর্সোনেলশিংগী ইমুং-মনুংসু অতোপ্পা ইমুং-মনুংগা অদুমক মান্নৈ। মখোয়গীসু মশাগী ওইবা মঙলান লৈজৈ, এস্পিরেসন লৈজৈ। অদুবু লৈবাক অসিবু ঙাক শেনবগী ৱাখল্লোন অদু পুক্নিংদা লাকপা মতমদা অৱাবা পুম্নমক খুদুম চনবা ঙম্লি। করিসু খঙজদ্রিবা কনাগুম্বা অঙাং অমনা মচু অহুমগী ফিরালনা য়োম্লিবা মহাক্কী অপোকপগী মফমদা ইকাই খুম্নবা উৎপগী শক্তম ইমাংদা লাকপা মতমদা, থৌনা ফরবী কনাগুম্বী ইচানুপী অমনা মহাক্কী পুন্সি খোংলোয়না লৈখিদবগী অৱাবা অদু, মীৎলুগী পীরাং অদু থক্তুনা, ………………

………… অসিগুম্বা তোঙান-তোঙানবা য়ুনিৎশিংগীদমক নুমিৎ লেপথোকপা, অদুগা মফম অদুদা য়াম্না মওং তানা নুমিৎ চুপ্পা অমা দ্রীলগী থৌরম পাংথোক্কদবনি। মদুগীদমক ব্লু বুক অমগী মতৌদা প্রোতোকোল থৌরাং তৌগদবনি, মদুনা মরম ওইদুনা মহৌশাগী ওইবা মওংদা ঐখোয়না মীয়াম্বু মসিগীদমক থৌরাং তৌবা ঙমগনি। ঐখোয়না মাংলোমদা চংশিনবা য়াবা অসিগুম্লবা ৱাফম কয়া অমা লৈরি। অতোপ্পা থবক অমগা পাংথোকপা মথৌ তারি, ঐহাক্না পাম্লিবা অসি সি.আই.এস.এফ.কী মনুং মক্তদা তাক্স ফোর্স অমা শেমগৎপনি।

মালেম অসিদা তেরোরিস্তশিংনা করম-করম্বা মখলগী অনৌবা থৌওংশিং থিরিবগে, মতৌ করম্না অনৌবা থৌওংশিংনা ওপরেৎ তৌরিবগে, করম্বা মখলগী তেক্নোলোজী শিজিন্নরিবগে, হায়রিবশিং অসি মতম চানা স্তদী তৌগদবনি, মোনিতর তৌগদবনি। গ্যাস পাইপলাইন শিজিন্নদুনা তেরোরিস্তশিংনা কয়া য়াম্না তমথিবা খুদোংথিবা থৌদোক থোকহল্লকপা য়াবগে, মালেম অসিদা থোক্লিবা থৌদোক্নি। ঐখোয়না তেরোরিস্তশিংগী মায়কৈদগী মালেমদা শিজিন্নরিবশিং অদু স্তদী তৌদুনা ঐখোয়গী সিস্তেমশিংবু মতমগী মতুং ইন্না দিবেলপ তৌবা মথৌ তাই। হৌজিক্তি তেরোরিস্তশিংগী পনখৈ অমত্তা লৈত্রে। কিলোমীতর লিশিং অমদা তেরোরিস্তশিং লৈরি, কিলোমীতর লিশিং অনিদা তেরোরিস্তশিং লৈরি, হৌজিক্তি মদু ওইদ্রে, মখোয়না মালেম অসিগী মফম অমা হেক্তদা চৎতুনা অকি-অখং থোকহল্লি অমদি মীওইবা জাতিদা শিংনরি, মরম অদুনা অদোম অদোম্না তৌরিবা থবক অদুদা চাউনা শিংনবা লৈরি।

ঐহাক্না পাম্লিবদি অসিগুম্বা সিস্তেমশিংদসু সরকারনসু দরকার ওইবা থবক অদু তৌবা তাবনি, অদোমদী দরকার ওইরিবশিং অদু মপুং ফানা পাংথোকপদা ঐহাক্কী মায়কৈদগী অৱাৎপা অমত্তা লৈহল্লোই, থাজবা অসিগা লোয়ননা অমুক হন্না অসিগুম্লবা গোল্দন জুব্লী চহী অসিদা, চহী ৫০ মপুং ফারকপা অসিদা, ইন্সতিত্যুৎ অসিবু অসিগুম্লবা অৱাংবা থাক্তা পুখৎনবগীদমক অদোম অদোম্না সংস্থানগীদমক তৌখিবা থবক, ইন্সতিত্যুসনগীদমক তৌখিবা থবক অদু থাগৎনিঙায়নি, মদুগা লোয়ননা লৈবাক অসিদা ঙাকশেলগী অনৌবা থাজবা অমা পীনবিরিবা, অদোম্না লৌরিবা থৌদাং অদুগীদমক ঙসি অসিগুম্লবা গোল্দন জুব্লীগী থৌরম অসিদা ঐহাক্না অদোম্বু হন্না-হন্না নুংঙাইবা ফোংদোকচরি, হন্না-হন্না য়াইফ পাওজেল পীজরি। অদুগা ইন্সতিত্যুৎ অসিবু হৌজিক ফাওবা মাংলোমদা পুখৎলক্লিবা শক্নাইরবা পুম্নমকপুসু হন্না-হন্না নুংঙাইবা ফোংদোকচবগা লোয়ননা ঐহাক্কী ৱাফমসু অসি মতাং অসিদা লোয়শিঞ্জরি।

য়ুনিফোর্ম শেৎপশিংসু অদুগা শেৎতবশিংসু ঐহাক্কা লোয়ননা অহৌবা খোংজেলদা লাওমিন্নরসি, ময়াম পুম্নমক খোঞ্জেল হৌনা লাওমিন্নরশি-

ভারত ইমানা য়াইফরে।  

ভারত ইমানা য়াইফরে। 

ভারত ইমানা য়াইফরে। 

হন্না-হন্না থাগৎচরি।