ভারতকী প্রধানমন্ত্রী

ইং ২০১৯গী সেপ্তেম্বর ২৪দা প্রধান মন্ত্রী শ্রী নরেন্দ্র মোদীনা স্বচ্ছ ভারত অভিয়ানগীদমক বিল অমসুং মেলিন্দা গেতস ফাউন্দেসন্না পীবা ‘গ্রোবেল গোল কীপর্স এৱার্দ’ লৌখ্রে। মনা য়েন্থোকপগী থৌরম অসি ন্যু য়োর্ক্তা পাংথোক্লিবা য়ুনাইতেদ নেসন্স জেনরেল এসেমব্লী মীফমগী নাকলদা পাংথোকখি।

প্রধান মন্ত্রীনা মনা অসি স্বচ্ছ ভারত অভিয়ানবু অচৌবা খোংজং অমদা ওন্থোকখিবা অমসুং মসিবু পুন্সীগী শরুক অমা ওইহনখিবা অদুগুম্লবা ভারত মচা পুম্নমক্কী মফমদা কত্থোকখি।

মনা অসি লৌরবা মতুংদা প্রধান মন্ত্রীনা হায়খি, “ভারতকী মীয়াম্না মরম ওইদুনা স্বচ্ছ ভারত মিশন অসি মায় পাকপনি। মখোয়না মসিবু মখোয় মশাগী খোংজং ওইহনখি অমসুং মতিক চাবা মহৈ ফংনবা হোৎনখি।”

মহাত্মা গান্ধীগী ১৫০শুবা মপোক কুমওন্দা মনা লৌবা অসি মশামক্কী ওইনা য়াম্না মরুওইবা মীকুপ অমনি হায়না ফোংদোক্লদুনা প্রধান মন্ত্রীনা হায়খি ভারত মচা কোতি ১৩০না ৱাশক অমা লৌখিবা মতমদা শিংনরকপা অমা হেক্তা খুদুম চনবা ঙম্মি হায়বদু স্বচ্ছ ভারত অভিয়ান্না খুদম ওইরে। মহাত্মা গান্ধীনা মংলম্বা স্বচ্ছ ভারতকী মংলান অদু মংফাওনহনবদা ভারতনা শিংথানিঙাই ওইরবা খোংজং চংশিল্লি হায়না মহাক্না মখা তাখি।

প্রধান মন্ত্রীনা ফোংদোকখি, “হৌখিবা চহী মঙাদা তোইলেৎ কোতি ১১ হেন্না শাদুনা রেকোর্দ অমা থমখ্রে। মিশন অসিনা লৈবাক্কী লাইরবা অমসুং নুপীশিংদা খ্বাইদগী য়াম্না কান্নবা ফংহল্লে।” সেনিতেসন অমসুং হেল্থ ফগৎহনবগী মথক্তা তোইলেৎ কোতি ১১শাবনা খুঙ্গংশিংগী ইকোনোমিক এক্তিবিতীদসু ইনোৎ পীরে হায়না প্রধান মন্ত্রীনা মখা তাখি।

গ্লোবেল সেনিতেসন কোভরেজ ফগৎহনবগী মতাংদা ঙাংলদুনা প্রধান মন্ত্রীনা হায়খি মদুদি ভারতনা অতোপ্পা লৈবাকশিংদা মসিগী এক্সপার্তশিং অমসুং এক্সপরিয়েন্সশিং সেয়ার তৌনবা থৌরাং তৌদুনা লৈরি, মদুনা সেনিতেসন কোভরেজ হেঙ্গৎহনবগী মায়কৈদা পুন্না হোৎনমিন্নবা ঙমগনি।

ফিৎ ইন্দিয়া মুবমেন্ত অমসুং জল জীবন মিশনগুম্বা মিশন মোদ খোংজংশিংগী খুত্থাংদা প্রিভেন্তিব হেল্থকেয়ারগী মায়কৈদা ভারতনা হোৎনরিবশিং অদুসু প্রধান মন্ত্রীনা ফোংদোকখি।

*******