ভারতকী প্রধানমন্ত্রী

শরুক য়াবিরিবা স্বচছাগ্রহী ইচিল ইনাও ইচল ইচে পুম্নমকপু ।

ঙসি অসি ওক্তোবর ২নি; পুজ্য বাপুগী মপোক নুমীৎ, লাল বহাদুর শাস্ত্রীগী মপোক নুমীৎ । চহি অহুম অসিদা ঐখোয় কদায়দগী কদাইদা য়ৌরবগে । ঐহাক্না নিংশিংলি মদুদি য়ুএনগী মীফমগীদমক ঐহাক অমেরিকাদা লৈরুই অমসুং ওক্তোবর ১গী নুমীদাং অথেংবদা হল্লকখি, অমসুং ওক্তোবর ২দা অয়ুক শুমজীৎ পাইদুনা ৱাই শিৎপা থোকখি । অদুবু মতম অদুগী পাওচে, মেদিয়া পুম্নমক, ঐখোয়গা মপাং ওইনা চৎমিন্নরিবা মরুপশিং, হায়বদি রাজনীতী দল পুম্নমক্না ঐহাকপু য়াম্না চৈ থাংখি, ওক্তোবর ২ অসি ছুতি নুমীৎনি হায়না চৈ থাংখি; ঐহাক্না অঙাংশিংগী ছুতি মাংহল্লে । অঙাংশিং স্কুল চৎকদ্রা চৎলোয়দ্রা, অঙাংশিংবু করিগী থবক শুহল্লিবা; কয়া কয়া থোকখি ।

 হৌজিক ঐহাক্কী মওং মতৌ অসি থবক কয়াদা তুমিন্না খাংদুনা লৈরি মরমদি ইথৌদাংশু মদুমক্নি খাংবা তাবনি তপ্না তপ্না ঐহাক্কী খাংবগী কেপাসিতীশু হেঙ্গৎলক্লি । অদুবু ঙসি চহি অহুমগী মতুংদা নিংহন্নবা য়াওদনা থবক অসি পাংথোক্তুনা লাক্লি অমসুং পংথোক্তুনা লাকপগী মরমদি ঐহাক্না থাজবা থম্মী মদুদি মহাত্মাজীনা হায়বিরম্বা অদু, বাপুনা হায়বিরম্বা লম্বী অদু কৈদৌনুংদা লালোই । মদু শ্রদ্ধা অমনি, মসিনা তাকলিবসি মখল অমত্তগী অয়েৎপা অমত্তা লৈত্রে হায়বা নত্তে । অয়েৎপশিং লৈরি, অদুবু অয়েৎপশিং লৈরিবা অদুনা মরম ওইরগা লৈবাক অসি মতৌ অসুম্না অসুম লৈহল্লসি হাইব্রা? অসিগুম্বা থবক অসিদগী মায় লৈদুনা চৎলশি হায়ব্রা? ঐহাক্না থাজবা লৈ মদুদি ঙসিদি লৈবাক মীয়াম্না খোঞ্জেল অমত্তা ওইনা ৱাফমশিং ফোংদোক্লে । ঐখোয়গী ইমাংদা অমোৎ অকায় লৈরমদবা নত্তে । অমোৎ অকায়দা ঐখোয়শু শরুক য়াখিদবা নত্তে অমসুং ঐখোয়না লু নানবা পামদবা নত্তে । লু নানবা পামদবা মীওই অমা ফাওবা লৈরমলোয় ।

করিগুম্বা অদোম্না রেলৱে স্তেসনদা চৎপা তারগদি, বেনচ মরি থারমগনি, অদুবু অনি অমদা অমোৎপা লৈরমলগদি অদোম ফমলুদে, অফবা মফম অদুদা চৎতুনা ফমগনি, করিগীনো? মদুগী মরমদি মহৌশানা লু নানবা পাম্বগীনি । অদুবু ঐখোয়গী লৈবাক্তা গেপ অমখক লৈখ্রে অমসুং গেপ অদু ঐহাক্না লোইশিনগনি । লু নান্না লৈগদবনি মসিদা লৈবাক অসিদা ৱাখল্লোন মান্নদবা লৈতে । কনানা পাংথোক্কনি হায়বদুগী সমস্যানি । অমসুং ঐহাক্না ৱাফম অমা ফোংদোকপা পাম্লি, ঐহাক্কী ৱাফম অসিগী মতুংদা হয়েংদি ঐহাকপু হেন্না ঙাং শকলকলগসু লৈবাক মচাশিংদা করিগী লোৎলুনি । করিগুম্বা মহাত্মা গান্ধী ১০০০ লাক্তুনশু, নরেন্দ্র মোদী লাখ অমা লাকলগশু, মুখ্যমন্ত্রী পুম্নমক পুন্সিল্লগশু, সরকার পুম্নমক পুন্সিল্লগশু, লু নানবগী মংলান অসি কৈদৌনুংদা মহৈ য়াল্লোই । অদুবু প্রজা কোতি চামগা কুনমঙা অসি লাক্লগদি, মীকুপতা মংলান অসি মংফাওনগনি । লাইবক থিবনা ঐখোয়না পোৎ কয়া অমদি সরকারগী ওইহল্লে । মীচম প্রজাশিংগী ওইরিবা মখৈ অসুম্না অৱাবা মায়োক্নরোই । অদোম্না য়েংবিয়ু কুম্বগী মেলা পাংথোক্লি । কুম্বগী মেলাদা নুমীৎ খুদিংগী গঙ্গা তোর্বান্দা য়ুরোপকী অপিকপা লৈবাক অমগী মীওইশিং পুল্লি । অদুবু মখোয়না পুম্নমক য়েংশিল্লি, মশাগী পোৎচৈশিং পাংথোকই অমসুং মসি চহি কয়াদগী চৎনদুনা লাক্লি ।

সমাজকী শক্তিবু করিগুম্বা ঐখোয়না য়াদুনা চৎলগদি, মীয়ামনা শরুক য়াদুনা চৎলগদি, সমাজপু মাংলোমদা পুদুনা চৎলগদি, অদু ওইরগদি মসিগী অন্দলোন অসি ৱাহং অমগী মতুংদা ফাওবা মায় পাক্কনি হায়বা ঐহাক্কী থাজবা লৈ । মরম অদুনা ঙসি ঐহাক্না নুঙাইবা ফাওই মদুদি হৌজিক ফওবা মীওই খরনা মসিদা করেম্নরি, লাও খোংলি, মখোয়না কৈদৌনুংদা লু নানবগী থৌরমদা শরুক য়াদ্রি । মখায়গী অপাম্বনি, নখোয়দা খুদোং চাদবা খরা লৈরমগনি । অদোম্না য়েংবিয়ু চহি ৫ চংশিল্লকপগা লোইন লোইননা লু নানবদা কনানা থবক তৌরিবগে হায়বদু মেদিয়ানা পাও অসি নমলরোই । মসিদগী কনা কনা মায় লৈদুনা চেনবগে হায়বগী ফোতো, মসিগী মায়োক্তা কনা লেপলিবগে হায়বা অদু পাও চেদা হাপলক্লগনি । ঙসিদি স্বচত অভিয়ান অসি পুজ্য বাপুগী ওইদ্রে, মসি ভারত সরকারগী ওইদ্রে, মসি রাজ্য সরকারশিংগীশু ওইদ্রে, ম্যুনিসিপালিতীশিংগীশু ওইদ্রে । ঙসিদি স্বচত অভিয়ান অসি লৈবাক অসিগী মীচম প্রজাগী মংলান ওইরে । ঐখোয়না স্বরাজ্য ফংলে, স্বরাজ্য অদুগী খুৎলাইদি সত্যগ্রহ ওইখি । মকোক থোংবা ভারতকী খুৎলাইদি স্বচতা অমসুং স্বচছাগ্রহিনি । অমসুং ঐখোয়না খংলে মদুদি মালেম অসিদা লৈবাক অমা হেক্তদা চৎপা মতমদা, মফম অদুগী লু নানবা অদু উরুরগা হলকপা মতমগা মদুগী মতাংদা ৱারি তৌনৈ । মীওইশিং অদুদা ঐহাক্না হংনিংলিবদি মফম অদুগী লু নানবা অদু উরগা নুঙাইবা ফাওরমগনি অদুবু কনাগুম্বা অমত্তনা অমোৎ অকায় লংথোকপা উরকপরা? ঐখোয়গী সমস্য অদু মদুনি । মরম অদুনা ফোংনা মসিগী মতাংদা খন্ন নৈনবদা ঐখোয় অকিবা ফাওখি, করি মরমগী খন্ন নৈনদ্রিবনো খংদে, সরকারশিংনা মসিগী মতাংদা খন্ন নৈনখিদবগী মরমদি, মখোয়গী কোকথক্তা তারক্কদ্রা খনবদগীনি । তারগা তারেদনা নত্রো? ঐখোয় পাওখুম পিবা ঙমবা মীওইশিংনি, ঐখোয়গী একাউন্তেবিলিতী লৈরি । 

অদুনা ঙসিদি লু নানবনা মরম ওইরগা করি মতাং য়ৌরে । লু নানবগীদমক্তা রেঙ্কিং লৈরে অমসুং খ্বাইদগী লু নানবা সহর অদু করম্বনো, অনিশুবনা করম্বনো, অহুমশুবা; অমদি মদুগী মশিং অদু লাওথোরকপগা সহরশিং অদুদা খন্ন নৈনবা হৌরকই । মখাদগী হৌরগা লুচিংবশিদা প্রেসর পিরকই, সরকারশিদশু মদুদি য়েঙু সহর অদুদি লু নানবদা নম্বর ফংলে, নখোয় করি তৌরিবগে? মথংদা সিভিল সোসাইতিশিংশু ফিলদা কুমথরকই মদুদি মসিদি ঐখোয়গী মখাদা লৈরম্বনি, ঐখোয়গী মাং থাদুনা চৎখ্রে; ঐখোয়শু করিগুম্বা খরা পাংথোক্লশি চৎলো । অমসুং মদুগীশু অফবা মহৈ অমা উবা ফংলি । মসি অচুম্বা ৱাফমনি মদুদি তোইলেত শেমলগশু মদু শিজিন্নদে । করিগুম্বা মখোয়দা মসি খংহল্লগদি অফবা ওইগনি মদুদি ইচিল ইনাওশি মসি সমাজগী তৌদবা য়াদবা অমনি, মসি ইমুং মনুংগী তৌদবা য়াদবা অমনি, মীপুম খুদিংমক্কী তৌদবা য়াদবা অমনি ।

হৌজিক হিন্দুস্থানদা দরকারগী মতুং ইনা স্কুলশিং শাগৎপরা শাগৎতব্রা হায়বা অদু কনাগুম্বা অমত্তা ঐঙোন্দা খংহনবিয়ু? দরকারগী মতুং ইন্না ওজাশিং থম্ব্রা থমদব্রা? দরকারগী মতুং ইনা শকুলদা লাইরিকশিং লৈরি । য়াম্লবদা চাদা অমাদা লৈরি । মদুগা য়েংনরুবদা মহৈ মশিংগী ফিভম অসি শোথরি । সরকারনাশেল থাদরবা ফাওবা, বিলদিং শেমলবা ফাওবা, ওজা থমলবা ফাওবা, সমাজকী মতেং ফংলবা মতমদা মহৈ মশিং অসি চাদা চামা ওইরকপদা মতম কুইনা চংলোই । মসিগী ইনফ্রাস্ত্রকচর অসিনা ওজা খরা অসিনা চাদা চামাগী মায়কৈদা চংশিনবা ঙমগনি । সমাজনা শরুক য়াদনদি মশি ওইথোক্লোই । সরকারনা খল্লি মদুদি ঐখোয়না বিলদিংশিং শেমলগা, ওজাশিংবু তোলোপ পিরগা থবক লোইরে । ঐখোয় পেল্লনি, হান্নদি য়ামলমদবনি হৌজিক্তি মশিং হেঙ্গৎলে । অদুবু মীয়াম্না শরুক য়াগনি, স্কুলশিংদা অঙাং মীং চল্লনি অদুদগী লাকপা তোকখ্রগনি । হৌজিক্তি মমা মপানশু মখোয়দা হংলরোই । মসিগী তোইলেতকী ৱাফম অসিশু মদুগুম্বনি । অদুনা হৌজিক্তি লু নানবা অসি ইথৌদাংগী মওংদা, তৌদবা য়াদবা অমগী মতৌদা, ঐখোয়না ইনভাইরোনমেন্ত অমা শেমলিবা মখৈ মপুম খুদিংমক্না ৫০ থোক্না খনথগনি । অমসুং ময়াম্না য়েংবিয়ু ঐখোয়গী অঙাং মচাশিং অসি, য়ুমশিংদা পিক্লিবা অঙাংশিং, ইচা লৈরি, ইশু লৈরি । মখোয় অদু মওং অমদা ঐহাক্কী লু নানবগী খ্বাইদগী চাওবা এম্বেসেদরনি । শুপ্নগী খুৎ হাম্বা খুৎ হামদবনা, অঙাং কয়া অমা চাক চাদ্রিঙৈ মমাদা সাপোন শিজিন্নদুনা খুৎ হাম্বা ফংদবনা মরম ওইদুনা অঙাং কয়া অমা শিরি । অদুবু ৱাফম অসি অদোম্না হায়বগা, সপোন কদায়দগী লৌরুগনি, মীয়াম্না ইশিং কদায়দগী লৌগনি? মোদীগীদী ৱা ঙাংলগা লোইরে । মীয়াম্না খুৎ কদায়দা হামগনি? হাম্বা ঙমদবদু হামদ্রবশু অঙম্বশিং অদুদি হামজসনু । হৌজিক্তি মোদীগী মফমদা চৈ থাংনবা হিরম কয়া অমা লৈরে । নুমীৎ খুদিংগী ময়ামগী মফমদা করি করিনো খরদি পিরি, ময়াম্না মদু শিজিন্নবিয়ু । অদুবু সমাজদা অহোংবা পুরকপা মথৌ তাবা অদুদি ফাগি তাহন্দুনা নত্রগা রাজনিতীগী অখুবা মীৎয়েংদা য়েংবিগনু । অপুনবা তৌদবা য়াদবা খোংথাং অমগী মায়কৈদা ঐখোয় চংশিনশি, অহোংবা শোয়দনা উবা ফংগনি ।

ময়াম্না য়েংবিয়ু অঙাংশিং অসিনা তৌবা থবক অসি । ঐহাক্না নুমীৎ খুদিংগী অঙাংশিং অসিগী অয়েকপা লাইশিং অসি সোসিয়েল মেদিয়াদা ঐহাক্না পোস্ত তৌরম্মী, য়াম্না চাওথোক্না পোস্ত তৌরম্মী । ঐহাক্না অঙাংশিং অদু মশক খংবশু নত্তে । অদুবু ঐহাক্না অয়েকপা লাইশিং অদু উরম্মী, অঙাংশিংনা স্বচতাগী মতিং ফোংদোক্লি, ঐহাক্না মদু পোস্ত তৌদুনা মীওই কোতি কয়াগী মফমদা য়ৌখিরম্মী । মসি করিগীদমক তৌরিবনো । অয়েকপা লাইনা লু নালহনবা য়াব্রা, য়াদে । লু নানবগীদমক্তা বৈচারিক অন্দলোনশু মথৌ তাই । সিস্তেম চাওখৎহনবনা অহোংবা পুরকপা ঙমদে বৈচারিক অন্দলোন অদু পাংথোক্ত্রিবা ফাওবা । মসিগী হোৎনরিবশিং অসিনি, ফিল্ম শেম্বা, ক্রিয়েতিবিতী পুরকপা, এসে ইবিয়ু; মসিগী পুৎলম পুম্নমক অসি মসিদা পুক্নিং থৌগৎনবা হোৎনবনি । অমসুং করিগুম্বা ৱাফম অমা ঐখোয়গী শিংলি নাওরিদা ৱাখল্লোনগী শক্তমদা চংখি, পোৎশক অমগী মওংদা মফম কল্লি, অদু ওইরগদি মদু পাংথোকপদা লাইহল্লি । অদুনা মসিগা লোইননা এক্তিবিতী অমা শম্নখি, মদুগী তুংদা লৈরিবা ৱাখল্লোন অদুশু মদুনি । অমসুং ঐহাক্না পাম্লিবদি, হৌজিক ময়াম্না য়েংবিয়ু, কমর্সিয়েল ৱার্ল্দনি, মদুদগী শেন্দোং ফংই মদুবু মাংলোমদা খরা পুখৎনবা মীপুম খুদিংমক্না অপাম্বা লৈ, মীপুম খুদিংমক্না শেল তান্নিংবগী অপাম্বা অদুদি শোয়দনা লৈগনি । ঙসিদগী চহি মরি মঙাগী মমাংদা স্কুল অমদা তিভিদা অঙাংশিংনা শিৎ শেংবা থেংনরগদি অচৌবা ৱাফম অমা ওইরম্মী, অঙাংশিংবু স্কুলদা সিৎ শেংহনবগী ওজাশিংদা চৈ থাংলম্মী । মমা মপাশিংশু নুঙাইনা খুদোং চাবা ফংলে হায়দুনা মখোয়শু য়ৌশল্লমী । ঐহাক্কী ইচাবু লাইরিক তম্বীরিরা শিৎ শেংবা তৌহল্লিব্রা ? ঙসিদি অহোংবা কয়া অমা লাক্লে মদুদি করিগুম্বা স্কুল অমদা অঙাংশিংনা শিৎ শেংবা পাংথোক্লগদি তীবিগী মরুওইবা পাও ওইরে । মসি অচম্বা ৱাফম নত্তে । মসিগী অন্দলোন অপুনবা অসি লৈবাক অসিগী মীদিয়ানা মখোয়গী মথক্তা থোনগৎতুনা পুরমদ্রগদি; প্রিন্ত মীদিয়া, ইলেক্ত্রোনিক মীদিয়ানা লু নানবগা লোয়ননা মখোয় মশাবু শম্নহল্লে, খোংথাং অমা অনি ঐখোয়দগী হেন্না চৎলি হায়বা ঐহাক্না য়াজৈ । মরাল লৈরিবা অসি কনানো হায়বদু ঐহাক্কী ৱাফম নত্তে । ঐখোয় পুম্নমক পুল্লগা তৌরগদি মসি ওইথোক্কনি; মসি হৌখিবা চহি অহুম অসিদা ঐহাক্কী ইরৈবাকচাশিংনা উৎলরে, সিভিল সোসাইতিশিংনা উৎলরে, মীদিয়ানা উৎলরে । করিগুম্বা ঐখোয় অমত্তা ওইনা পুনশিল্লবশু করিগুম্বা থবক্তা খুমাং চাওশিন্দ্রবদি ঐখোয় পুম্নমক্না ইশা ইথন্তা পাওখুম পিবা তাই ।

খুঙ্গংদা মন্দির লৈ অদুবু মীপুম খুদিংমক মন্দিরদা চৎতে । মীওইবগী হৌনশিনি, চৎনদে । মন্দির লৈরগশু চৎতে । মসজিদ লৈরগশু চৎলোয়, গুরুদ্বারা লৈরগশু চৎলোয়, করিগুম্বা উৎসব লৈবা মতমদা চৎকনি । মসিদি সমাজকী চৎনবিনি, মালেম অসি চৎলি মখোয়শু মখোয়গী দুনিয়া অমদা চৎলি । ঐখোয়না মদুগা শম্নহনবা মথৌ তাই, হোৎনবা মথৌ তাই । হোৎনবা মতমদা মওং তানা গারি চৎলি । মশিং অসি য়েংলুরগদি স্পিদ অসিশু ফরিবা মাল্লী, মায়কৈশু চুম্লিবা মাল্লী । স্কুলশিংদা তোইলেতকী মায়কৈদা প্রোজেক্ত পায়খৎলে । হৌজিক্তি স্কুলশিংদা নুপীমচাশিংনা চৎপা মতমদা ৱাফমশিং অসিদা য়াম্না খনথৈ । হংঙি, মওং মতৌ য়েঙই, মদুগী মতুংদা এদমিসন তৌই । হান্নদি লৈত্রদি ফরে খাংবা তাবনি । করিগীদম্কা খাংগদৌরিবনো? ঐখোয়গী ইচানুপীশিংনা করিগী অৱাবা মায়োক্নগদৌরিবনো? অমসুং মসিগী স্বচতাগী হিরম অসি অদোম্না নুপী ওইবি অমগী মীৎয়েংনা য়েংদ্রিবা ফাওবদি স্বচতাগী মপাঙ্গল অদু অদোম্না খংবা ঙমলোয় । ময়াম্না থবক, স্কুল চৎখ্রবা মতুং মমা অদু খক্তনা পুং অনি চংনা শিৎ শেংদুনা লৈ । মখ্বাং নারবা ফাওবা তৌদুনা লৈ, মমা অদুদা হংবিয়ু মদুদি ঐখোয়না চৎত্রিঙৈ মমাংদা ঐখোয় ঐখোয়গী পোৎশিং অদু মফম চানা থমলমলগদি নঙোন্দা করি ফাওবগে? ইমানা শোয়দনা হায়রক্কনি ইবুঙো খ্বাংগা লোইনা তেকপা জাতনি, ফরে হৌজিক্তি নহাক্না পোৎ চৈ শিং অদু মফম চানা থমলমলবনিনা ঐহাক্কী থবক অদু মীনিৎ তরাদা লোইশিনবা ঙমলে । ইনাক খুনবা ওইগেরা লাইরবা ওইগেরা মমা পুম্নমক্না য়ুমগী শিৎ শেংবদা নুমীৎ তঙ্খাই অমদি হৌখি; করিগুম্বা ইমুংগী মীপুম খুদিংমক্না মশাগী পোৎচৈশিং অদু মশাগী মফমদা থমলগদি, অমোৎ অকায় শেংবদা মমাবু মতেং পাংগেরা পাংলোয়গেরা; শুপ্নগী মশাগী পোৎ চৈ অদু মসা মশাগী মফমদা থমলগদি মমা অদুদা অৱাবা কয়া অমা হন্থরমগনি, থবক অসি ঐখোয়না পাংথোকপা ঙমদব্রা? 

অদোম্না খন্দুনা য়েংবিয়ু খুঙ্গংগী লমদমদা লৈরিবা ইমা ইচল ইচেশিং, শহরশিংদশু খাংপোকশংদা লৈরিবা ইমা ইচল ইচেশিং অয়ুক ঙন্না হৌগৎলগা নুমীৎ থোরক্ত্রিঙৈ মমাংদা নেচর কোলগীদমক মপান্দা চৎকনি, জঙ্গলদা চৎকনি । অকিবনা মরম ওইদুনা মমান্নবি মঙা তরুক পুদুনা চৎকনি অমসুং করিগুম্বা নুমীৎ থোকলকলবা মতুং মথৌ তারক্লবদি, অমম্বা ঙাইদিনা লৈগনি, হকচাংদা কয়া য়াম্না নুঙাইরম্লোই হায়বদু অদোম খন্দুনা য়েংবিয়ু । ৱাফম অসি খংলগদি স্বচতাগী হিরমদা কনাগুম্বা তিবী চেনেল অমা য়েংলুবা মথৌ তাদে, কনাগুম্বা প্রধানমন্ত্রী অমগী মথৌ ওইরোই, রাজ্য সরকার অমত্তগী মথৌ ওইরোই, মসা মশা মথন্তা মথৌদাং অমগী শরুক ওইগনি । মরম অদুনা ইরৈবাকচা পুম্নমক্তা হায়জরিবা অসিনি । হন্দক্তা য়ুনিসেফনা রিপোর্ত অমা থাগৎলক্লি, মখোয়না ভারত্তা চাওরাক্না ইমুং মনুং লিশিং ১০দা সর্বে তৌখি, মখোয়না হৌজিক তোইলেত শারবা অমসুং মমাংগা চাংদম্নদুনা য়েংখি । মখোয়গী মতুং ইন্না ইমুং অমনা তোইলেত লৈতবনা মরম ওইদুনা, লু নানবা ৱাৎপনা মরম ওইদুনা লৈনা চেলহন্দুনা চহিদা চাংচৎতা লুপা ৫০,০০০ চাদিং তৌহল্লি । ইমুং অদুগী মরুওইবা মীওই অদু নাবা মতমদা লেমহৌরিবা থবক পুম্নমক চপ লেপ্লে । হেন্না কন্না নারগনা মহাক্কী শেবাগীদমক মীওই অমা অনিদি লৈরগনি । অনাবা অদু লায়েংনবা শেন্দোয় চাওনা শেল পুশিল্লুরগনি । মতৌ অসুম্না লাইরবা ইমুং অমদা লুপা লিশিং ৫০গী পোৎলুম অমা হাপকৎলনি । করিগুম্বা ঐখোয়না লু নানবা অসি ঐখোয় ইশাগী ধর্মনি খল্লগদি, লু নানবা অসি ঐখোয় ইশাগী ইথৌনি খল্লগদি, লাইরবা ইমুং অমমমদা লুপা লিশিং ৫০গী পোৎলুম অদুদগী কনবা ঙমগনি ।

ঐহাক্না প্রধানমন্ত্রী ওইরবা মতুং মীওই কয়াগা উন্নখ্রে । রাজনিতীগী থবক তৌবশিং উন্নরে, থবক্তগী পোথারবা ওফিসরশিংগা উন্নরে, সমাজকীদমক্তা থবক তৌবা কয়াগা উন্নরে । অমসুং য়াম্না নোকলুক্না অমসুং চিং লেম্না উন্নৈ, য়াম্না নুংশিননা উন্নৈ । অমসুং চৎখিবা মতমদা বায়োদতা অমা ঐঙোন্দা পিরদুনা খোন্থাং পিক্না হায়রম্মী ঐহাক্কীদমক থবক লৈরবদি নিংশিংবিরকউ । অদোম্না হায়রকপগা ঐহাক লাকচগে । য়াম্না নুংশিনা হায়রক্কনি, মতম অদুদা ঐহাক্না তপ্না হায়খি, লু নানবগীদমক্তা মতম খরা কায়থোকপিয়ু; মখোয় অমুক হন্না লাকখিদ্রে । ঐঙোন্দা হায়বিয়ুনে ঐহাক্কী ইফমদা ফজ ফজবা বায়োদাতা পুদুনা থবক থিবা লাক্লি, মদু উরগা ঐহাক্না তৌরো হাইবা মতমদদি লাক্ত্রে । থবক অমত্তা মচা লৈতবনি । করিগুম্বা ঐখোয়না পাংথোক্লগদি চাওথোরক্কনি অদুনা ঐখোয়না চাওথোকহনবা তাবনি । মসি সমাজ পুন্সিগী মরালনি । অদুনা ঐখোয় পুম্নমক্কি থৌদাং ওইফম থোকই । পুজ্য বাপু অমসুং লাল বহাদুর শাস্ত্রীগী মপোক নুমীৎ অসিদা ঐখোয় অমুক হন্না ইশাবু লৈবাক্কীদমক কৎথোক্লশি, লু নানবা অসি অহান্বা খোংথাং ওইনা পায়খৎলশি । মসি য়াম্না লায়বা থবক্নি । নিং তম অন্দলোনদা গান্ধীনা হায়বিরম্বা অদুনি “করিগুম্বা অমত্তা তৌবা ঙমদ্রবদি, ইচম চম্না তকলি পায়দুনা ফম্মু” মসিশু নিং তম্বগী থবক অমনি । নুমীৎ খুদিংগী মিনিত ৫, মিনিত ১০, মিনিত ১৫, পুঙখায় অমা করি করিনো খরদি ঐহাক পাংথোক্কনি । ময়াম্না য়েংবিয়ু, লৈবাক অসি অহোংবা শোয়দনা লাক্কনি অমসুং ৱাফম অসি অচুম্বনি মদুদি মালেমগী মমাংদা ঐখোয়না ভারতপু মালেমগী মীৎয়েংদা য়েংহন্নবা হোৎনগদবনি, মদুমক পাংথোক্কদবনি অমসুং পাংথোক্তুনা লৈগনি ।

হায়নিঙায় লৈতনা থাগৎচরি ।

*****