ভারতকী প্রধানমন্ত্রী

মন্ত্রীমন্দলনা হান্নগী কেন্দ্রগী মন্ত্রী শ্রীমতী সুশ্মা স্বরাজনা ২০১৯গী ওগস্ত ৬কী নুমিদাং নই দিল্লীগী এইম্সতা লৈখিদবদা থম্মোই শোক্না অৱাবা ফোংদোকখ্রে। মহাক্না লৈখিদবা অসিদা লৈবাক অসিনা শক্নাইরবী লুচিংবী অমসুং থোইদোক হেন্দোকপা পর্লিয়ামেন্তরিয়ান অমা মাংজরে।

রিজোলুসনগী ৱাফমশিং মখাদা লৈরে:-

“হরিয়ানাগী অম্বালাদা ১৯৫২গী ফেব্রুৱারীদা পোকখিবা শ্রীমতী সুশ্মা স্বরাজ অম্বালা কেন্তোমেন্তকী সনাতন ধর্ম কোলেজদগী গ্রেজুয়েৎ লোইশিনখি অমদি চন্দিগরগী পঞ্জাব য়ুনিবর্সিতীদগী লোগী দিগ্রী ফংখি। কানপুরগী এগ্রীকলচরেল য়ুনিবর্সিতীনসু মহাকপু দোক্তরেৎ পীদুনা ইকায় খুম্নখি। ১৯৭৩দা মহাক্না ভারতকী সুপ্রিম কোর্ত্তা এদভোকেৎ অমা ওইনা প্রেক্তিস তৌবা হৌখি।

শ্রীমতী সুশ্মা স্বরাজ চহী নৌনা পব্লিক্কী পুন্সিদা খোংদারকখি অমসুং মশাগী চহী ২৫ শুরকপা ১৯৭৭তা হরিয়ানা লেজিস্লেতিব এসেমব্লিগী মীখলদা মায় পাকখি অমদি হরিয়ানা রাজ্য সরকারদা লেবর অমসুং এম্প্লোইমেন্তকী কেবিনেৎ মন্ত্রী ওইরকখি। মহাকপু হরিয়ানা লেজিস্লেতিব এসেমব্লিগী মীহুৎ অমা ওইনা অমুক হন্না খল্লকখি অমদি ১৯৮৭তগী ১৯৯০ ফাওবগী মতম মনুংদা এজুকেসন, ফুদ অমসুং সিভিল সপ্লাইগী কেবিনেৎ মন্ত্রী ওইরকখি।

১৯৯০দা মহাক রাজ্য সভাগী মীহুৎ ওইনা খনখি অমদি ১৯৯৬তা ১১শুবা লোক সভাগী মীহুৎ অমা ওইনা খনখি, মতম অদুদা মহাক ইনফোর্মেশন অমসুং ব্রোদকাস্তিংগী কেন্দ্রগী মন্ত্রী ওইখি। ১৯৯৮দা মহাক ১২শুবা লোক সভাদা মহাক অমুক হন্না খল্লকখি অমসুং ইনফোর্মেশন অমসুং ব্রোদকাস্তিংগী কেন্দ্রগী মন্ত্রী ফমগা লোয়ননা তেলেকম্যুনিকেসনগী অহেনবা থৌদাংসু লৌখি। ১৯৯৮গী ওক্তোবরদা মহাক দিল্লীগী অহানবা নুপী মুখ্য মন্ত্রী ওইখি। মদুগী মতুং ২০০০গী এপ্রিলদা মহাকপু রাজ্য সভাদা অমুক হন্না খল্লকখি অমদি ২০০০গী সেপ্তেম্বরদগী ২০০৩গী জনুৱারী ফাওবা ইনফোর্মেশন অমসুং ব্রোদকাস্তিংগী মন্ত্রী ওইখি মদুগী মতুং ২০০৩গী জনুৱারীদগী ২০০৪গী মে ফাওবা হকশেল অমসুং য়াইফ–য়ুম্বাল অমদি পর্লিয়ামেন্তরী এফিয়র্সকী মন্ত্রী ওইখি। ২০০৬তা মহাক রাজ্য সভাদা অমুক হন্না খল্লকখি। ২০০৯দা মহাক ১৫শুবা লোক সভাগী মীহুৎ অমা ওইনা খল্লকখি অমদি ২০০৯গী দিসেম্বরদগী ২০১৪গী মে ফাওবা ওপোজিসনগী লুচিংবা ওইখি। ২০১৪দা মহাক ১৬শুবা লোক সভাদা খল্লকখি। ২০১৪গী মে থাদগী ২০১৯গী মে থা ফাওবা কেন্দ্রগী মপাল থৌরম পুবা মন্ত্রী ওইনা মহাক্না থৌদাং লৌখি।

শ্রীমতী সুশ্মা স্বরাজপু মহাক্কী থোইদোক হেন্দোকপা হৈ–শিংবা অমসুং নুংশি হৈবা মতৌ অদুগীদমক মতম পুম্নমক্তা নীংশিংদুনা লৈহৌরগনি। মহাক মতিক চাবা এদমিনিস্ত্রেতর অমসুং মীয়ামগা শোক্ন–শম্নবা মীওই অমা ওইবীরম্মি মহাক্না মীরমদা অৱাবা তারবা ভারতম চাশিংবু মতেং পাংদুনা মীপুম খুদিংমক্কী পুক্নিং শুমহৎখি। অসিগুম্ললবা মগুনশিং অসিনা মহাকপু ২০১৭তা য়ু.এস. দেল্লী ‘ৱাল স্ত্রীৎ জর্নেল’না “ভারতকী খ্বাইদগী নুংশিবা পোলিতিসিয়ান” ওইনা লাওথোকখি।

শ্রীমতী সুশ্মা স্বরাজনা তোঙান তোঙানবা কেপাসিতীশিংদা লৈবাক্কীদমক তৌবীরম্বশিং অদুগীদমক তৌবীমল খঙবা উৎখি। মন্ত্রীমন্দলনা লৈখিদবগী ইমুং মনুংগী অৱাবদা সরকার অমসুং লৈবাক মীয়াম পুম্বগী মায়কৈদগী থম্মোই শোক্না অৱাবসু ফোংদোকখি।”