ভারতকী প্রধানমন্ত্রী

হিমাচল প্রদেশকী রাজ্যপাল শ্রী বন্দারু দত্তাত্রেয়জী, মুখ্যমন্ত্রী জয়রাম থাকুরজী, সিক্কিমগী মুখ্যমন্ত্রী প্রেম সিংহ সমাঙ্গজী, কেন্দ্র মন্ত্রীমন্দলগী ঐগী তেংবাংলোই প্রহলাদ পতেলজী, অনুরাগ থাকুরজী, নীতি আয়োগকী ভাইস চেয়রমেন দাক্তর রাজীব কুমারজী, য়ু.এ.ই.দা ভারতকী এম্বেসেদর ওইবীরিবা দাক্তর অহমদ অলবানা, ইন্দস্ত্রীগী লমগী শক্নাইরবা মরূপশিং, মফম অসিদা লেংশিনবীরিবা অতৈ খঙ-হৈরবা অমসুং ঐগী নুংশিরবা মরূপশিং দর্মশালাদা গ্লোবেল ইনভেস্তর সমিৎ !!!

মসি মঙলান নত্তে, তাইবঙনি, অমুক্তা ওইখিদ্রিবনি, অঙকপনি, অদোমদা নুংঙাইবা ফোংদোকচরি। মসি হিমাচল প্রদেশকী স্তেৎমেন্ত অমনি, লৈবাক অপুনবগী, মালেম পুম্নমক্কী, মদুদি ঐখোয়সু হৌজিক্তি খ্বাংচেৎ লাকখ্রে।

ঙসি হিমাচলনা হায়রি – য়েস, ৱি হেব এরাইব!!! মরম অসিনা ইহান হানবদা ঐ হিমাচল প্রদেশ সরকার, জয়রামজী অমসুং মহাক্কী তীম্বু ইমা জ্বালাজীগী মশাইকোন অসিদা পাংথোক্লিবা থৌরম অসিগীদমক্তা হন্না হন্না নুংঙাইবা ফোংদোকচরি।
মরূপশা, ঙসি ঐখোয় শক্তিতনা থল্লবা মফম অমদা পুল্লরি।

মফম অসিদা লাকপদা তোঙানবা থৌনা অমা ফংলি। দেবীশিংনা, দেবতাশিংনা, ঋশিশিংনা, লাইনীংবশিংনা মফম অসিবু লাইওইরবা মশক অদুসু পীরি অমসুং মহৌশাগী মপুং ফাবা অদুগী থৌজালসু ফংজরি। অসিগুম্বা ফিভম অসিদা অদোম ৱেল্থ ক্রিয়েতর পুম্নমকপু তরামনা ওকচবা অসিদা ঐহাক নুংঙাইবা পোকচৈ।

ইচিল ইনাওশিং, হান্নদি অসিগুম্বা মখলগী ইনভেস্তর্স সমিৎ অসি লৈবাক অসিগী রাজ্য খরা খক্তংদা পাংথোক্লম্মি। মফম অসিদা হান্নগী ফিভম অদু উখ্রবা খোংলোই ময়াম অমা য়াওরি। অদুবু ফিভম অদু হোংলক্লি অমসুং মদুগী খুদম অমদি মফম অসিদা হিমাচলদা পাংথোক্লিবা সমিৎ অসিসুনি। হৌজিক রাজ্যশিংদা বিজিনেসপু পাম্নহন্নবগীদমক, ইনভেস্তপু পাম্নহন্নবগীদমক্তা অনৌবা খোংজং অমা হৌদোক্লে।

মরূপশা, চহি তরাগী খুজিং খরগী মমাংদা ঐখোয়গী লৈবাক্তা ফিভম অসি ওইরম্মি মদুদি করম্বা রাজ্যনা চেরিতী য়াম্না তৌবা ঙমগনি, কনানা হেন্না ইন্সেন্তিব পীগনি, কনানা তেক্স কোকপীগনি, কনানা মৈ কোকপীগনি, কনানা লম হোংনা য়োনগনি মসিগী অথোই-অহেন তান্নবা অসি চৎথদুনা লৈরম্মি। খঙলু-উরুবশিং অদুনা মসি হায়রি মদুদি অসিগুম্বা মখলগী অথোই-অহেন তান্নবা অসিনা খল্লুবা ফল অদু পুরকপা ঙমদ্রে। মতম অদুদা ইনভেস্তরশিংনা করম্বা রাজ্যনা কন্সেসন য়াম্না পীগনি, ইন্সেন্তিব য়াম্না পীগনি হায়বসিদা ঙাইদুনা লৈনরম্মি। মসিনা মরম ওইদুনা ইনভেস্তরশিংসু রাজ্যশিংদা ইনভেস্ত তৌবা অদু য়ৈথোক্নদুনা লৈরম্মি। মখোয়সু খনখি, চাদা ৫দা করিগী য়াদোইনো কোন্না চাদা ১০ চাদা ১৫ পীরকপসু য়াইনা।
অদুবু মরুপশা, ঐহাক অপেনবা পোকই মদুদি হৌখিবা চহি খরা অসিদা, ফিভম অসিদসু মশক থোক্না অহোংবা পুরক্লে। হৌজিক রাজ্য সরকারশিংনা খঙবা হৌরক্লে মদুদি কন্সেসনগী অথোই-অহেন তান্নবনা রাজ্যশিং নত্ত্রগা ইন্দস্ত্রীশিংগী কান্নবা অমত্তা পুরক্তে।

মরূপশা, ইনভেস্তরগীদমক্তদি মতিক চাবা ইকোসিস্তেম ফংবা, ইন্সপেক্তর রাজদগী নান্থোকপা, খুনীংথেক খুদিংগী সরকারগী পরমিৎ রাজগী শিকার ওইদবা, মসি মথৌ তাই। হৌজিক সরকারশিংনা মসিগী ইকো-সিস্তেম অসি শেম্ননবগী অথোই-অহেন তান্ননবা চোংথোক্নরক্লি, থৌরাংশিং লাইথোক্নহল্লক্লি, কাংলোনশিং শেমদোনরক্লি, কান্নদ্রবা কাংলোনশিং লোইশিন্নরক্লি। রাজ্যশিংদা কম্পিতিসন অসি অদুক্কী মতিক হেল্লিমখৈ, ঐখোয়গী ইন্দস্ত্রীসু গ্লোবেল প্লেৎফোর্মদা কম্পিৎ তৌনবগীদমক্তা মতিক চাবা ওইগদৌরিবনি,

অতোপ্পা ইন্দস্ত্রীশিংগা অথোই-অহেন তান্নবগী মখোয়গী মপাঙ্গল অদু হেনগৎলক্কনি। মসিগী কান্নবা রাজ্যশিংনা ফংগনি, রাজ্যগী মীয়াম্না ফংগনি অমসুং হিন্দুস্তান খোংজেল য়াংনা মাংদা চখৎলক্কনি।

মরূপশা, ইন্দস্ত্রীগী তাইবঙ অসিসু নুং-পান উবা অমসুং তরু-তনানবা থৌরাং অদু পাম্মি। মথোং-মরম খঙদবা চৎনবী-কাংলোন, সরকারনা কা হেন্না খুৎ থিংজিনবা অসিনা কদাইদনো ইন্দস্ত্রীনা চাউখৎলকপগী লম্বীদা অপনবা পীরিবনি। ঐহাক নুংঙাইবা পোকই মদুদি ৱাখল্লোন অসিগা লোইননা হিমাচল প্রদেশকী সরকারসু অনৌবা ইন্সেন্তিব কয়া লৌরক্লি, মরু ওইবা ৱারেপ কয়া লৌরক্লি, মাইকৈ অসোমদা সরকারসু থবক পাইখৎলি। মফম অদুদা সিঙ্গল ৱিন্দো ক্লিয়রেন্সকী থৌরাং তৌরবা, লেন্দ এলোৎমেন্ত অসি ত্রান্সপেরেন্স ওইহল্লবা নত্ত্রগা সেক্তর স্পেসিফিক ইন্দস্ত্রী পোলিসী শেম্লবা, খোংথাংশিং অসিনা মফম অসিগী ফ্রেন্দলী এনভাইরনমেন্তপু বিজিনেস ফ্রেন্দলীসু ওইহল্লি।

মরূপশা, মফম অসিদা ইন্দস্ত্রীগী অফাও অফাওবা মীওইশিং পুল্লরি। অদোম পুম্নমক, ইন্দস্ত্রীগী তাইবঙগী অতৈ মরূপশিংসু মসি নীংথিজনা খঙই মদুদি কম্পনীগী তোঙান তোঙানবা য়ুনিৎশিংনা অফবা রিজল্ত পীরবদি কম্পনীগীসু রিজল্ত মশানা অদুম ফজরকই। মরম অদুনা রাজ্যশিংদা করিগুম্বা খরা ফরকপা মতমদা,

মদুগী ফল হকথেংননা লৈবাক অসিদা তারকই। হিমাচলগুম্বা রাজ্য কয়ামরুমদা পুরক্লিবা অহোংবশিংনা মরম ওইদুনা ঙসি ভারতকী শক্তাক, হান্নদগী হেন্না ফনা বিজিনেস ফ্রেন্দলী দেস্তিনেসনগী মওংদা ওইরক্লি।

মরূপশা, ঙসি ভারত্তা চাউখৎপগী গারী অসি অনৌবা ৱাখল, অনৌবা এপ্রোচকা লোইননা ৪ হ্বিল্সতা থৌরি। হ্বিল অমনা সোসাইতীগী, এস্পিয়রিং ওইরি। হ্বিল অমনা সরকারগী, অনৌবা ভারতকীদমক্তা এনকরেজিং ওইরি, হ্বিল অমনা ইন্দস্ত্রীগী, দ্যারিং ওইরি অমসুং হ্বিল অমনা লৌশিংগী, শেয়রিং তৌরি। মতৌ অসুম্না ৪ হ্বিলদা ঐখোয় খোংজেল য়াংনা মাংদা চখৎলি।
ঙসি সরকারনা লৌরিবা ৱারেপশিং অসি, মদু ভারতকী কান্ননবগী মতুং ইন্না, ভারতকী খুন্নাইগী অনীংবা অপাম্বগী মতুং ইন্না লৌরি। ঙসি সরকারনা লাইরবগী য়ুম, হকশেল, স্কিলদা মিৎয়েং থম্লি, অদুনা মসিগা লোইননা ইনভেস্তমেন্ত অমসুং সেল্ফ-এম্প্লোইমেন্ততসু পাঙ্গল হাপ্লি। ঙসি কয়াদা মরু ওইখ্রবা সর্বিস দেলিভরীদা লৈরিবা অসিগুম, বিজিনেসকী ফিভম হোংদোকপদসু অদুক্কী মতিক মিৎয়েং থম্লি। মসিগী পলসু অদোমগী মাংদা লৈরে। ২০১৪দগী ২০১৯ ফাওবদা ভারতনা ইজ ওফ বিজিনেস রেঙ্কিংদা রেঙ্ক ৭৯ কাখৎলে। হন্দকসু ঐখোয় মালেমগী মকোক থোংবা পর্ফোর্মর ১০গী মনুংদা অমা ওইরে। চহি খুদিংগী ঐখোয় অনৌবা পেরামীতর অমদা খোংজেল য়াংনা অহোংবা পুরক্লি। হৌখিবা চহিদা ঐখোয়না ১০গী মনুংদগী ইন্দিকেতর ৬ মদুদা ফগৎহনবগী থবক্তা মাই পাকপা ফংখ্রে। হন্দক ইন্সোলভেন্সীগী লমদা ভারতনা য়াম্না শাংনা জম্প তৌরে। কেতগোরী অসিদা ঐখোয়না রেঙ্ক ৫০দগী হেন্না ফগৎহনবা ঙমলে।

মরূপশা, রেঙ্কিং ফহনবা অসিগী ৱাহন্থোক অসি শুপ্নগী দেতা হোংদোক-হোংজিন তৌবা অদুখক্তা নত্তে। রেঙ্কিং ফহনবা অসিগী ৱাহন্থোক্তি ঐখোয়গী সরকারনা মখোংদা কুমথদুনা, মখাগী মথৌ তাবশিং অদু খঙজিল্লগা ৱারেপ লৌরি, কাংলোনশিং শেম্লি। মফম অসিদা ফম্লিবা মীওইশিং অসিনা খঙলি মদুদি হান্নদি পর্মিসন অমগীদমক্তা থা কয়া কয়া ঙাইনবা তারম্মি, থৌওং কয়ামরুম চৎথবা তারম্মি।

মরূপশা, শুপ্নগী রেঙ্কিং ফগৎলকপদা নত্তে, ভারত্তা বিজিনেস তৌবগী মওংদা রিবোলুসন অমা লাক্লে অমসুং রিবোলুসন অসিদা চহি চহিগী ঐখোয় অনৌবা থৌওং হাপচিল্লি, নৌনা শেমদোক-শাদোক্লি। ঙসিগী গ্লোবেল সিনারিও অসিদা, ভারতনা ঙসি অচেৎপা খোংফমদা লেপ্লিবা অসিগী মরমদি, ঐখোয়না ঐখোয়গী শেনমিৎলোনগী ফন্দামেন্তেল অদু শোন্থহন্দ্রে।
ঐখোয়না মেক্রো-ইকোনোমিক্তা ঐখোয়না ফোংদোকখিবা ৱাফম অদু মতম চুপ্পা ঙাক্তুনা থম্লি অমসুং ফিস্কেল দিসিপ্লিন অদু চেৎনা ঙাক্লি। ঙসি গ্লোবেল ইকোনোমিক এক্তিবিতী চাদা ৩ হায়থরে, ভারতনা চাদা ৫ হেনবগী চাংদা খোংজেল য়াংনা হায়গৎলি। হন্দক্তা লাকখিবা রিপোর্ত্তা, ভরত অসি লাক্কদৌরিবা থা খরা অসিদা খোংজেল য়াংনা হায়গৎলক্কনি হায়বগী থাজবা থম্লি।

মরূপশা, ঐখোয়গী পান্দম অসি পুকচেল শেংই অমসুং সেন্সিতিব ওই। ঐখোয়গী ৱারেপশিং অমসুং অনীংবশিংদসু অচেৎপা য়াওরি। কনানসু খল্লুবা ঙমখিদে মদুদি জি.এস.তি. অসি ভারত্তা চৎনরক্কনি হায়বা। ঐখোয়না মসি তৌদুনা উৎলে। মাং তাক্লমগদবগী মওংদা লৈবাক অসিগী কম্পনীশিংগী মফমদা ময়েক শেংবা এগজিৎ রুৎ অমত্তা লৈরমদে।

ঙসি ইন্সোলভেন্সী এন্দ বেঙ্কক্রপ্সী কোদ – আই.বি.সি. অসি শুপ্নগী অচুম্বা অদুতা নত্তনা লাখ-করোর কয়াগী পন্দুনা লৈরুরবা শেনফমশিং হল্লক্নবগী মরম ওইরি। বেঙ্কিং রিফোর্মসু চহি কয়া পন্দুনা লৈরম্মি। মসিগী মাইকৈদা খোংজেল য়াংনা, অচেৎপা থৌনাগা লোইননা ঐখোয়গী সরকার অসি মাংদা চখৎখি। ঙরাং মক্তদা ঐখোয়না লৈবাক অসিগী ময়াই ওইবা থাক্তা লৈবা কাংলুপশিংদা মিৎয়েং থম্লদুনা অদুবু ঙরাং নুমিদাংৱাইরম ঐখোয়না কেবিনেৎতা ময়াই ওইবা থাক্তা লৈবা ইমুংশিংদা মিৎয়েং থম্লদুনা য়াম্না চাউবা ৱারেপ অমা লৌখি। ৱারেপ অসিদগী লাখ মরি মখাইদগী হেনবা ইমুংশিংগী, মখোয়গী য়ুমগী মঙলান অদুবু, মখোয়গী চহি কয়াদগী মপুং ফাদনা লৈরক্লবা মঙলানশিং অদু মপুং ফাহনবদা মতেং ওইরগনি। অমসুং মসিগী ৱাখল্লোন অসিগা লোইননা হৌজিক ঐখোয়না লৈবাক অসিবু দোল্লর ত্রিলিয়ন ৫গী শেনমিৎলোন ওইহন্নবা পান্দম থম্লি। ঐখোয়গী সরকার অসি সরকারগী থৌওংশিংগী দে-বোত্তল-নেক্কিংদা শাফু পীরি, ইন্তর দিপার্তমেন্ত কো-ওর্দিনেসন্দা ইনোৎ হাপ্লি, তাইম লিমিৎতা ৱারেপ লৌরি।

ঐখোয়না হোৎনরিবা অসি তেক্স রেজিম্বু কম্পিতিতিব অমসুং ত্রান্সপরেন্ত ওইহন্নবনি। মসিগী মতাং মক্তদা কোর্পোরেৎ তেক্সকা মরী লৈনবা পুৱারী ওইরবা ৱারেপ লৌখ্রে। ঙসি ভারত অসি মালেমগী খ্বাইদগী তাবা কোর্পোরেৎ তেক্সকী থৌরাংশিংগী মনুংদা অমা ওইরে। চহি অসিদা ওক্তোবর অমগী মতুংদা হাংদোকপা অনৌবা দোমেস্তিক কম্পনীশিংগীদমক্তা কোর্পোরেৎ তেক্স হন্থহন্দুনা শুপ্নগী চাদা ১৫ ওইহল্লে।

মরূপশা, হৌখিবা থামক্তদা ই-এসেসমেন্ত স্কিম চৎনহনখ্রে। হায়বদি তেক্স সিস্তেমদা হৌজিক হ্যুমেন ইন্তর্ফেস অসি খ্বাইদগী য়ামদনবা হোৎনরি। মসিদগী হেন্না ত্রান্সপরেন্সী ওইবা হেল্লগনি অমসুং তেক্সকা মরী লৈনবশিংগী মতাংদসু খোংজেল য়াংনা লোইশিনবা ঙম্লগনি।

মরূপশা, ত্রিলিয়ন ৫গী পান্দম অসি শুপ্নগী সরকার খক্তগী নত্তে। পান্দম অসি লৈবাক অসিগী রাজ্য খুদিংমক্কী মতেংদগী ঙমগদৌরিবনি। ঐখোয়গী অসিদা রাজ্য পুম্নমক্তা ওইথোকপা ময়াম অমা লৈ, রাজ্যগী জিলা খুদিংমক্তা ওইথোকপা য়াবা ময়াম অমা লৈ, পোতেন্সিয়েল য়াম্না লৈ। পোতেন্সিয়েল অসিগী কান্নবা অদুক্কী মতিক য়াম্না সারকারশিং, ঐখোয়গী ইন্দস্ত্রীগী তাইবং, ঐখোয়গী স্মোল স্কেল ইন্দস্ত্রী, ঐখোয়গী সর্বিস সেক্তরনা লৌরগদি, অদুক্কী মতিক খোংজেল য়াংনা মাংদা চখৎকনি।

ইচিল-ইনাওশা, পোতেন্সিয়েল অসি পোলিসীগা পুনশিল্লকপা মতমদা, পর্ফোর্মেন্স হেনগৎলকই। পর্ফোর্মেন্স অসিমক প্রোগ্রেসকা মান্নৈ। হায়বদি জিলাগী, রাজ্যগী, লৈবাক্কী প্রোগ্রেস ইন্তর-কনেক্তেদ ওই। ঐহাক অদোমদা অতোপ্পা খুদম অমগা পীজগে। খুদম অসিদা ইন্তর্নেস্নেল রেঙ্কিংসু য়াওরি, পোতেন্সিয়েলসু য়াওরি। অমসুং হিমাচলগীদমক্তদি মসি য়াম্নমক মরু ওই। হিমাচল প্রদেশকীদমক্তা ঙসি ঐখোয়না তুরিজম সেক্তরদা রেঙ্কিং তৌরিবা অসিগী হকথেংননা কান্নবা ঙসি হিমাচলনা ফংবা য়াবগী ওইথোকপা লৈরে।

মরূপশা, কুমজা ২০১৩দা ভারত, ৱার্ল্দ ইকোনোমিক ফোরমগী ত্রাবেল এন্দ তুরিজম কম্পিতিতিবনেস ইন্দেক্সতা মশিং ৬৫শুবদা লৈখি। ঙসি ঐখোয় মশিং ৩৪শুবদা লৈরে। মসিগী অহোংবা অসি করম্না লাকখিবনো? চহি মঙাগী মমাংদা ভারত্তা চহিগী চাউরাক্না মীরমগী তুরিস্ত লাখ ৭০-৭৫ রোম লাকখি। হৌখিবা চহিদা দেতা অসি মীরমগী তুরিস্ত করোর ১ হেনদোকখ্রে। অসুম্না চাউখৎপা অসি করম্না ওইখ্রিবনো?

মরূপশা, ২০১৪দা ভারতকী মীয়াম্না তুরিজম সেক্তরদগী ফোরেন করেন্সীদা লুপা ক্রোর লাখ ১ লিশিং ২০ তানখ্রে। মসিমক হৌখিবা চহিদা ফোরেন করেন্সী অদু হেনগৎতুনা চাউরাক্না লুপা করোর লাখ ২ য়ৌখ্রে। অহোংবা অসিসু করম্না ওইরকখ্রিবনো?

মরূপশা, ঐখোয়না তুরিজম সেক্তরগী পোতেন্সিয়েল অদু খঙখি, ত্রাবেল অমসুং তুরিজম সেক্তরদা পোলিসী ইন্তর্বেন্সন তৌখি, অনৌবা লৈবাক কয়াবু ই-ভিসাগী খুদোংচাবা পীখি অমসুং মসিনা মরম ওইদুনা পর্ফোর্মেন্স হোংদোকখি, রেঙ্কিং হোংদোকখি।

মরূপশা, ঙসি ভারত্তা তুরিজম অসি পেকেজ অমগুম্না প্রমোৎ তৌরি। নেচরবু ওইরো, এদভেঞ্চরবু ওইরো, স্পিরিচুএলবু ওইরো, মেদিকেলবু ওইরো, ইকোবু ওইরো, মখল কয়াগী তুরিজমদা শাফু পীরি। অমসুং হিমাচল অসি মসিগী মতাংদা ওইথোকপা য়াবশিংনা পীক থন্না লৈ। কয়াদা ফবা থৌরাং ঙসি মফম অসিদা পাখৎলিবনো। মরম অসিনা কনফ্রেন্স তুরিজমগী ওইথোকপদুদি ঐখোয়না ময়েক শেংনা উরি। ঐখোয় মসিগী পোতেন্সিয়েল অসিবু খঙলবদি প্রোগ্রেস য়াম্না লাপ্পা ওইদ্রে।

মরূপশা, হৌজিক মফম অসিদা কোফী তেবল য়াম্না রিলিজ তৌখ্রে হায়বদি ফিল্ম উৎখ্রে, মদুদা হিমাচলগী পোতেন্সিয়েল অদু শন্দোক্না উৎখ্রে। ঐ নীংশিংলি ঐনা সোলন্দা চৎপা মতমদা,

বোর্দ কয়ামরুম থেৎলম্বা থেংনখি মদুদি মশরুম সিতীদা অদোম্বু তরাম্না ওকচরি। মতৌ অসুম্না লাহৌল স্পীতিগী আলু, কুল্লুগী শাল, কাংঙ্গরাগী পেন্তিংসু ফাওরিবনি। অদুবু অনম্বা মতমদা মপান্দগী লাকপা মীওইশিংদা মসি ৱাৎনতা থোক্লমগনি। জিলা খুদিংমক্কী মশক তাক্লিবা পোৎশকশিং অসিবু করম্না প্রমোৎ তৌগনি, মসিগী মতাংদসু অনৌবা থৌওং অমা খনবগী মথৌ তাই। মরম অসিনা ঐ মসিসু হায়জগে মদুদি হিমাচলগী পোতেন্সিয়েল হৌজিকসু অনতেপ ওইরি।

হৌজিক খনবীয়ু, হিমাচলদা আই.আই.তি. লৈরে, ত্রিপল আই.তি. লৈরে, এন.আই.তি. লৈরে, সি.আই.পি.ই.তি. লৈরে, আই.আই.এফ.তি.গী থবক পাইখৎলি। মসিদা মফম অসিদা তেক্নোলোজী পাকথোক-চাউথোকহন্নবা পোতেন্সিয়েল লৈরে। মফম অসিগী সেম, নাশপাতি, প্লমগুম্বা উহৈশিংদগী হৌরগা খামেন অশিনবা, চেঙ্গুম, চরুয়েন, শিমলা মির্চগুম্বা মনা-মশিং ফাওবা দিমান্দ লৈরি। মরম অসিনা মফম অসিগী ফুদ, ফুদ প্রোসেসিং, ফার্মিং অমসুং ফার্মা সেক্তরদা অদুক্কী মতিক পোতেন্সিয়েল লৈরি।

মরূপশা, মফম অসিদা মতম পুম্নমক্তা ওর্গানিক ফার্মিং তৌই। হিমাচলদা হিদাকশিংগী মেন্যুফেকচরিং তৌদবা লৈবাক অসিগী ফার্মা কম্পনী অমত্তা লৈরম্লোই। সেক্তর খুদিংমক্কী পাকথোক-চাউথোকহন্নবগীদমক্তসু মফম অসিদা অদুক্কী মতিক ওইথোক্নীংঙাই লৈ।

হোই, ঐনা য়াজৈ মদুদি অসিগুম্বা ওইথোক্নীংঙাই কয়া মরুম অসিগী মরক্তা, হান্নদি হিমাচলদা গেপ অমা লৈরম্বগুম তৌরম্মি। গেপ অসি ক্বালিতী ইনফ্রাস্ত্রকচর অমসুং সরকারগী থৌওংশিং লাইথোকহনবগীনি। কেন্দ্র সরকারনা রাজ্য সরকারগা পুন্দুনা গেপ অসি মেনশিন্নবা কন্না হোৎনখি। মফম অসিদা জয়রামজীগী তীম্না তাঞ্জা ফংলকখিবগা, থৌওং অসি হেন্না খোংজেল য়াংশিল্লকখি।

ঙসি হিমাচলদা ইনফ্রাস্ত্রকচর অমসুং কনেক্তিবিতীগা মরী লৈনবা প্রোজেক্ত কয়ামরুম মখা চৎথরি। হাইদ্রোপাৱরগা লোইননা রেন্যুএবল ইনর্জীগী অতোপ্পা হৌরকফম নত্ত্রগা ফিররোদ, রেল নত্ত্রগা এয়র কনেক্তিবিতী থাক খুদিংমক্তা খোংজেল য়াংনা থবক পাইখৎলি। ঐঙোন্দা তমখি মদুদি উরান য়োজনাগী মখাদা হিমাচল প্রদেশনা হেলী-তেক্সী সর্বিস হৌদোক্লে। শিমলা, ধর্মশালা, কুল্লু, চন্দীগর অসি খুদোংচাবা অসিগা শম্নখ্রে।

মসিদা নত্তনা লুপা করোর লিশিং কয়াগী ইনভেস্ততগী নেস্নেল হাইৱেজসু পাকথোক-চাউথোকহল্লি। রোহতাঙ্গ শুরুংগী থবক মপুং ফাবগী কান্নবদি লাহৌল-স্পিতি অমসুং লদাখ ফাওবা ফংগনি। মদুমক ‘নঙ্গল দাম তলৱারা’ রেল লাইন, ‘চন্দীগর-বদ্দী’ রেল লাইন, ‘উনা-হমীরপুর’ রেল লাইন অমসুং ‘ভানুপল্লী-বিলাসপুর-বেরী’ রেল লাইন্না লমদম অসোমগী কনেক্তিবিতীদা অনৌবা মশক অমা পীরগনি। মথংগী চহি খরদা লৈবাক অসিগী ইনফ্রাস্ত্রকচরদা লুপা করোর লাক ১০০গী ইনভেস্তকী কান্নবা হিমাচলনসু ফংগদৌরি।

মরূপশা, ঙসি অচুম্বা মওংদা হিমাচল, ভারতকী গ্রোথ স্তোরীদা অনৌবা মঙাল পীননবা শেম শারে অমসুং ঐনা থাজবা অসিগী মরুমদা হিমাচলগী মতাংদা ঐনা খঙজবা লৈ। হিমাচল বিজিনেসকীদমক্তা মরু ওইবা কন্দিসন পুম্নমক মপুং ফাহল্লি। বিজিনেসকীদমক্তা পীচ মথৌ তাই, মদু মতম পুম্নমক্তা হিমাচলগী পাঙ্গল ওইরি। দাইবর্সিতীবু য়াবা সোসাইতী মথৌ তাই, মদু হিমাচলদা মতম পুম্নমক্তা য়াওজরি। মফম অসিদা জিওগ্রাফিকেল অমসুং লিঙ্গুইস্তিক দাইবর্সিতীসু য়াম্না লৈরি। অমনা অমগী লোন খঙনদবা কয়ারক য়াওই, অদুবু অমনগা অমগা লোইনবদি অঙকপগী মশক্নি।

মরূপশা, হিমাচলগী কম্যুনিতী অমসুং মফম অসিগী পোতেন্সিয়েল, অদোমগী কেপিতেল, অমসুং মফম অসিগী পোলিসীদা ক্লিয়রিতীনা, য়াম্না চাউবা অহোংবগী মরম ওইরগনি। অমসুং অদোম্না মফম অসিগী নহারোলশিংদা অদুক্কী মতিক তাঞ্জা পীরবদি, মখোয়গী তেলেন্ত শিজিন্নরবদি, কান্নবা অসি শরুক কয়া হেনগৎলক্কনি।

অরোইবদা অদোম পুম্নমকপু অমুক্কা হন্না সমিৎ অসিদা শরুক য়াবীবগীদমক হন্না হন্না থাগৎপা ফোংদোকচরি অমসুং ঐ ঙসিদি মীথুংলেন নত্তে, ঐসু মখল অমরোমদা হিমচলী মকনি। অমসুং মরম অসিনা অদোম ঐগী মফম অসিদা লাকপীরিবনি, অদোম পুম্নমক ঐগী মীথুংলেন্নি অমসুং ঐনা অদোমদা থাজবা পীজরি মদুদি অদোম হিমাচলগী লৈমাইদা অদোমগী লাইবক য়েংবীয়ু, হিমাচলনা অদোম্বু থৌজান পীনবীদুনা লৈগনি অদোম নুংঙাই য়াফবতা ওইগনি, য়াম্না চাউখৎপা ওইগনি, হিমাচলসু চাউখৎকনি, হিন্দুস্তানসু চাউখৎকনি অমসুং অদোমসু চাউখৎকনি। থাজবা অসিগা লোইননা অমুক্কা হন্না অদোম পুম্নমকপু, জয়রামজীগী তীম্বু হন্না হন্না নুংঙাইবা ফোংদোকচরি।

থাগৎরি

থেঙ্ক য়ু!