ভারতকী প্রধানমন্ত্রী

ফম্বাক্ত ফম্লিবা য়ু পিগী রাজ্যপাল রাম নাইক জি, য়ু পিগী চীফ মিনিস্তর য়োগী অদিতিয়ানাথ, দিপুতি চীফ মিনিস্তর কেসাব প্রসাদ মৌরয়া জি , য়ু পি কেবিনেতকী মেম্বরশিং অমসুং সংসদকী ঐগী মরুপ শ্যামাচারন গুপ্ত জি , বিনোদ কুমার সোনাকর জি অমসুং বিরেন্দ্র জি , প্রায়াগ্রাজগী মেয়োর অবিলাস গুপ্ত জি , মফম অসিদা মশীং য়াম্না তিল্লিবা মরুপশিং,ইচলশিং অমসুং ইচেশিং ।

কৎথোকপা, কলচর অমসুং ভেলুগী লমদম অমা ওইরিবা প্রায়াগ্রাজগী মীয়ামদা ঐনা কোক নোঞ্জরি । প্রায়াগ্রাজদা চৎনবগী খুদোংচাবা অমা হেক ফংলকপদা ৱাখল অসি তোঙানবা থৌনা অমা হেক্ত লাকই । নিংশিংবা থোক্ত্রিঙৈ মতমদগী হৌনা লমকোয়বশিংগী পুক্নিং চিংশিনফম ওইরিবা লাইনিংবা সাধুশিংগী শেংলবা শক্তমশিং অদু মফম অসিগী কাচিন-কোয়া শিনবা থুংনা মমি তারি ।

মসিগী শেংলবা লাইখুরুমফম অসিনা ভাতবান রামদা লোম্বা নাইদ্রবা নুংঙাইবা ফংহল্লি অমসুং মহাক মশামক নুংঙাইবগী সমুদ্রা ইপাক্নি।

মরুপশিং,

আর্ধ-কুম্ভগী মমাংদা ঐ মফম অসিদা লাক্লি । মতম অসিদা মীয়াম্না আর্ধ-কুম্ভদা অক্ষয়াবাত উবা ফংগনি । মীরোল কয়া , অক্ষয়াবাত অসি লানবন্দ মনুংদা শো লোনশিন্দুনা থমখি অদুবু হৌজিক মীয়াম্না প্রায়াগ্রাজগী ত্রিবেনিদা ইরুপ্লবা মতুংদা অক্ষয়াবাত উবা ফংলগনি ।

হৌজিক মীয়াম্না অক্ষয়াবাতগা লোয়ননা সারাশ্বাতি কুম্ভ উবা ফংলগনি । ঙাইহাক্কী মমাংদা ঐ অক্ষয়াবাত য়েংলুরবা মতুংদা হল্লকপনি। মসিগী উ অসিনা ঐখোয়দা পুন্সি অসি হঞ্জিন-হঞ্জিন লৈশাৎ তম্নবগী ৱাখল্লোন অমা শেমগৎনবা ইথিল পীরি ।

মরুপশিং,

ঙাইহাক্কী মমাংদা, লুপা ক্রোর ৪৫০০গী প্রোজেক্তশিং শঙ্গাখ্রে অমসুং উরেপ-উয়ুং তমখ্রে অমসুং মসিনা প্রায়াগ্রাজ অসি মতমগা চুনবা মওংদা শেমগৎলগনি । মসিদা লম্বী, রেলৱেজ, স্মার্দ সিতি অমসুং গঙ্গা লু-নান্না থম্নবা প্রোজেক্তশিং য়াওরি । মখোয়গী পুন্সি হিংবদা নুংঙাইনবা খুদোংচাবশিং অসি শেমগৎপগীদমক ঐনা প্রায়াগ্রাজগী মীয়াম থাগৎচরি । মসিগী প্রোজেক্তশিং অসিনা কুম্ভ খক নত্তনা কালপভাসিসসু কান্নবা ফংহল্লগনি ।

ঐখোয়না প্রায়াগ্রাজগী লম্বী-থোং, রেলৱেজ অমসুং এয়রপোর্ত কন্নেক্তিবিতি ফগৎহন্নবা থবক পায়খৎলি । কুম্ভগী ওইনা রেলৱেজ মিনিস্ত্রিনা অনৌবা ত্রেনশিং চেনবা হৌরে । ঐনা ঙসি হৌদোক্লিবা অচৌবা লৈকংথোংশিং, রেলৱেজ ওভর-ব্রিজ অমসুং অন্দরপাস, মৈ অমসুং ঈশিংগী প্রোজেক্তশিং অসিনা মফম অসি ফগৎহল্লগনি ।

মসিগী থৌরম অসিগী মতুংদা , ঐনা প্রায়াগ্রাজ এয়রপোর্তকী অনৌবা তরমিনেল বিল্ডিং অমা শঙ্গাগনি । তরমিনেল অসিনা প্রায়াগ্রাজদগী অতোপ্পা সহরশিংদা চৎপদা খুদোংচাবা হেন্না ফংহল্লগনি । মসিগীদমক ঐনা প্রায়াগ্রাজগী মীয়াম থাগৎচরি।

মরুপশিং,

লুপা ক্রোর ১০০ চংনা লিংখৎলিবা ইন্তেগ্রেতেদ কমান্দ কন্ত্রোল সেন্তর অসি প্রায়াগ্রাজগী অরিবা শক্তম অমসুং অনৌবগা পুনশিন্নবগী খুদম অমনি । মসিগী সেন্তর অসিদগী লম্বী, মৈ অমসুং ঈশিং মথৌ তৌহনগনি । মফম অসিদা শেমগৎলিবশিং অসি মতম খরগী নত্তে, মতম চুপ্পগী ওইনা লৈহৌরগদবশিংনি ।

মরুপশিং,

মালেমগী মফম কয়াগী কুম্ভ য়েংবা লাকপশিংনা স্পিরিতচুয়েলিতি অমসুং তেক্নোলোজিগী নুংঙাইবা ফংলগনি । মফম অসিদা লাকপা মীওই খুদিংমক স্পিরিতচুয়েলিতি, থাজবা অমসুং অনৌবা মতমগী লাম্বা  লৈতনা পুনসিনবগী নুংঙাইবা অদু ফংহন্নবা ঐখোয়না থবক পায়খৎলি ।

মফম অসিদা সেলফি পোইন্ত শেমগৎলে । ঙাইহাক্কী মমাংদা ঐনা দিব্যা কুম্ভ, বাভ্য কুম্ভ সেলফি পোইন্তদা সেলফিশিং নমখি ।

মরুপশিং,

ইমা গঙ্গা অসি শক্তি পুম্নমক্কী হৌরকফম্নি । ইমা গঙ্গা অসি লু-নান্না থমগদবনি  অমসুং মসিগী ইচেল অসি অপুনবা লৈহল্লোইদবনি । মসিগী পান্দম অসি ফংনবা সরকারনা থবক কন্না পায়খৎলি । লুপা ক্রোর কয়াগী ঙসি হৌদোক্লিবা প্রোজেক্তশিং অসিগী মনুংদা ইমা গঙ্গা ফজহন্নবা অমসুং মসিগী ঘাতশিং শেমগৎনবা প্রোজেক্ত অমা য়াওরি । লুপা ক্রোর ১৭০০ চংনা শাবা সিৱেরেজ ত্রিদমেন্ত প্লান্তনা সহরগী নালাশিং গঙ্গাজিদা হকথেংননা তাগদবা অদু ঙাকথোক্লগনি । মসিগা লোয়ননা নামামি গঙ্গে প্রোজেক্কী মখাদা ঘাত ১৫০ ফজনবা শেমগৎলে । মসিগী মনুংদা ঘাত ৫০ শেমগৎপা লোইশিল্লে অমসুং মদুগী মনুংদা ঙসি ঘাত ৬ শঙ্গারে ।

প্রায়াগ্রাজ য়াওনা গঙ্গা তুরেল মপান্দা লৈবা কাসি, কানপুর অমসুং য়ু পিগী অতৈ সহরশিং মসিগী মান্নবা খুদোংচাবশিং শেমগৎলে । হৌজিক ফাওবদা নামামি গঙ্গে প্রোজেক্কী মখাদা লুপা ক্রোর ২৪৫০০ হেনবগী প্রোজেক্তশিং অয়াবা পীরে । লুপা ক্রোর লিশিং ৫ হেনবগী প্রোজেক্ত ৭৫ লোইশিল্লে । লুপা ক্রোর লিশিং কয়াগী প্রোজেক্ত ১৫০ হৌজিক থবক য়াংনা চৎথরি ।

ইমা গঙ্গা লু-নান্না থম্বদা শ্বাছগ্রাহি ক্রোর কয়াগী থৌদাং য়াম্না মরুওই  । মসিগী খোঙজং অসিদা মীয়ামসু শরুক য়ারি । গঙ্গা তুরেল নান্না থম্নবা থবকশিংদা মীয়াম শরুক য়াবা অসিনা ঐখোয়গী থবকশিংদা ইনোৎ পীরে । হৌজিক গঙ্গা তুরেল মপান্দা লৈবা খুঙ্গং খুদিংমক লমহাংদা খোঙহামদ্রে হায়না লাউথোক্লে ।

মরুশিং,

কুম্ভ মনুংদা ঈশ্বর লাকই । মরম অদুনা কুম্ভগীদমক ইমা গঙ্গা শেংদোক্নবা নৎত্রগা অনানবা কুম্ভ অমা ওইহন্নবা ঐখোয়না পায়খৎপা য়াবা থবকশিং পায়খৎলি । ঐনা মফম অসিদা লাক্ত্রিঙৈদা শ্বাছ কুম্ভগী একজিবিসন অমা য়েংশি । কুম্ভ মনুংদা লু—ান্না থম্নবা ঐখোয়না পোর্তেবল কম্পেক্তর অমসুং মতমগী অনৌবা তেক্নিকশিং শীজিন্নবা হৌরে ।

মরুপশিং,

কেন্দ্র সরকার অমসুং য়ু পি সরকার অনি খুৎশম্নদুনা মালেমগী মীয়ামদা ভারতকী মমাংঙৈগী ফজখ্রবা শক্তমশিং অমসুং তুংগী অঙকপশিং উৎনবা থবক পায়খৎলি। মসিগী থবকশিং অসিদা নখোয় নশামক মতেং পাংগনি হায়না ঐনা থাজবা থম্লি । সহর অসিগী লু-নানবগী অমসুং মীয়াম তরাম্না ওক্নবগী নখোয়না অচৌবা থৌদাং লৌগনি । একজিবসন্দা ঐনা সহর অসি লৈতেংনবা ফজরবা অয়েকপা লাইশিং উবা ফংখি । মসিগী থবক অসিনা লমকোয়বা লাকপশিংদা অঙকপা মহাও অমা পীবা ঙমগনি ।

মরুপশিং,

অর্ধ-কুম্ভ শরুক য়ানবা ঐনা মালেমগী মফম কয়াগী মীয়াম চেবাউ পীরি। হৌখিবা চহী ১-১.৫ অসিদা ঐনা চৎলুবা মফমশিংদা লৈরম্বা ভারতমচাশিংদা মখোয়গী মপান লৈবাক্কী মরুপশিংগা লোয়ননা প্রায়াগ্রাজদা লাক্নবা খঙহনখি ।

সঙ্গমদা ঙরাং লৈবাক ৭০গী ফিরালশিং পাইবা নখোয়না উরম্লগনি ।ভারতনা হাপ্পা লৈবাক ৭০গী মীহুৎশিং অমসুং দিপ্লোমেতশিংনা কুম্ভগী মফমশিং য়েংখি অমসুং মফম অদু অঙকপা ফংনা নুংঙাইখি ।

মরুপশিং,

মালেমদা খ্বাইদগী লিরবা সহর অনি প্রায়াগ্রাজ অমসুং কাসিদা মালেমগী খ্বাইদগী মরুওইবা থৌরম অনি মতম অমত্তদা পাংথোক্কনি । মফম অসিদা অর্ধ-কুম্ভগী মালেমগী মীওইশিং পুনগনি অমসুং কাসিদা প্রাভাসি ভারতিয়া দিৱাসকী মালেমগী মফম কয়াদগী ভারতমচাশিং পুনগনি ।

মরুপশিং, অর্ধ-কুম্ভ অসি মীওই ক্রোর কয়া তিনবা কুম্মৈ অমা ওইবতা নত্তনা মীয়াম উনবগী খুদোংচাবা অমা পীরি । মীওই ক্রোর কয়া কুম্ভদা লাকপদা ভারত অসি নুংঙাইহনগনি অমসুং অমসুং শক্তি লৈহনগনি ।

কুম্ভ অসি ভারতকী অচৌবা ময়ামগী খুদম্নি । কুম্মৈ অসিনা লোন তোঙানবা অমসুং লাইনিং মান্নদবগী খেন্নবশিং কাউথোকহল্লি । মসিগী কুম্মৈ অসিনা ঐখোয় অমত্ত ওইহল্লি । ‘এক ভারত শ্রেস্থা ভারত’ অসি কনাগুম্বনা মফম অসিদা উবা ফংগনি ।মীয়াম্না ভারতকী অনৌবা শক্তম অসি মখোয়না হনখিবা মতমদা পুদুনা চৎখিনবা ঐখোয়না দাইত্ব খঙনা থবক তৌগদবনি ।

মতম অসিদা মহৈরোই লিশিং কয়া মেনেজমেন্ত তম্বা লাক্কনি । মালেমগী খ্বাইদগী চাওবা মেনেজমেন্ত য়ুনিভর্সিতিগী মহৈরোইশিং মনেজমেন্ত তম্নবা লাক্কনি ।

মরুপশিং,

ভারত অসি মসিগী কলচরেল হেরিতেচ অমসুং লৌশিংগী মতাংদা খঙনরি । শ্বামি বিবেকানন্দা য়াওনা লাইনিংবা কয়ানা মসিগী শক্তি অসি মালেমদা খঙহন্নবা মখোয়গী পুন্সি কৎথোকখি । হৌখিবা চহী ৪ অসিদা লৈবাক অসিগী কলচর অমসুং স্পিরিতচুয়েলগী মমি অসি ফগৎহন্নবা কেন্দ্র সরকারনা হোৎনদুনা লাক্লি ।

মরুপশিং,

মতম শাংনা লৈবাক ঙাকখিবা দলনা মখোয় অসি আইন, জুদিসিয়ারি, ইন্সতিতুৎ অমসুং লৈবাক অসিদগী হেন্না চাওই হায়না মতম চুপ্পদা খনদুনা লৈ । দল অদুগী অপাম্বদা থবক তৌদবগীদমক মসিগী দল অসিনা ইন্সতিতুৎ খুদিংমক মাংহনখি ।

মরুপশিং,

মসিগী মীচং-মীখাই নাইবা থবক অসিনা লৈবাক অসিগী জুদিসিয়ারি সিস্তেম অসি মপাঙ্গল শোন্থহনখি । জুদিসিয়ারি অসি দল অসিগী শেঞ্জা-থুমজা অমসুং মপু শাবগী থবকশিংগী মায়োক্ত লৈবা ইন্সতিতুৎশিংগী মরক্ত অমা ওইরি। কংগ্রেসনা করিগীদমক জুদিসিয়ারি পামদ্রিবনো হায়বদু প্রায়াগ্রাজ অমসুং য়ু পিগী মীয়ামদগী হেন্না খঙবা কনা লৈরবগে ?

মরুপশিং,

প্রায়াগ্রাজ হায় কোর্তনা লৈবাক অসিগী অচুম্বা অমসুং সংবিধানগীদমক লেপখিবা অদু লৈবাক অসিনা কৈদৌঙৈদা কাউবা ঙম্লোই । মখোয়না লৈবাক অসিদা ইমর্জেন্সি লাউথোকখি । তশেংনা মখোয়না লৈবাক অসিগী সংবিধানসু শেমদোকখি । ইলেক্সনগী পেতিসনশিং হিয়ারিং তৌনবা জুদিসিয়ারিগী হকশিং ফাওবা মুন্নবা হোৎনখি ।

মরুপশিং,

কংগ্রেসকী লুচিংবশিংগী চৎনবী অমা লৈ । মসিগী চৎনবী অসিগী মতুংইন্না, লৈবাক অসিগী সংবিধানগী বোদিশিং অসি মখুৎ পুনশিন্দুনা থম্বা অসিনি । মখোয়গী অপাম্বগী মায়োক্ত থবক তৌবশিং মাংহন্নবা মখোয়না হোৎনৈ । মখোয়গী ফিউদেল অমসুং মোনার্কিকেল ওইবা ৱাখল্লোনশিং অদুনা নিউত্রিয়েল ওইবা ইন্সিতিতুৎশিং মাংহন্নবা হোৎনৈ । জুদিসিয়ারিগী চিংলেম্বা মরু ফুদোক্নবা দল অসিনা পাঙ্গল শক্তি শীজিন্নখি ।

মরুশিং,

অরুবা কেসাভানন্দ ভারতি কেস অদু লৈবাক অসিনা নিংশিংবা ঐনা পাম্মি । ৱায়েন পীগদবা জর্জশিং অদু মখোয়না হায়বা ইল্লক্তবা মতমদা মখোয়না চহি কয়া কুইরবা জুদিসিয়েলগী কাংলোনশিং অদু থুগাইখি ।

খ্বাইগী সেনিয়র ওইবা জজ অমবু চীফ জজতিস ওইনা হাপ্পগী মহুৎ, সেনিয়ররিতিগী অহুমসুবদা লৈবা জজ অমা খনখি । মসিগী মখোয়গী থবক তৌবগী মওংনি । মসিনা কমদৌনা মখোয়না জুদিসিয়ারিদা প্রেসর পীবগে হায়বদু ।মখোয়গী ইমর্জেন্সি লাউথোক্নবা ৱারেপ অদু জজতিস খান্নানা য়াদবদগী মখোয়না মহাক য়াখিদে । মহাক্কী সেনিয়রলিতি অদু মীরাইখি ।

মখোয় মশাগী য়াইফনবগীদমক মখোয়না লৈবাক অসি নৎত্রগা গনতন্ত্রগী য়াইফনবা থবক পায়খৎখিদে । মখোয়গী লুচিংবা অমনা হায়খি, ঐখোয়গী অপাম্বশিং মতুংইন্না, ঐখোয়গী ৱাখল্লোন অমসুং মীৎয়েংশিং খঙনবা থবক তৌবা মীওই অদু চীফ জজতিস ওইহনগনি ।

মরুপশিং,

অর্ধ-কুম্ভদা নখোয়না অরিবা ভারতকী ফজবা মশক অমসুং অনৌবা ভারতকী হোংলক্লিবা মশক অদু উবা ফংগনি। কুম্ভ অসি মাইপাক্নবা পাংথোকহন্নবা ঐনা প্রায়াগ্রাজগী মীয়ামদা অপীল তৌরি । অসিগুম্বা অচৌবা থৌরম অসি সরকার খক্তনা মাইপাক্না পাংথোকপা ঙম্লোই । য়োগীজি অমসুং নখোয় ময়াম্না খুৎশম্নদুনা অর্ধ-কুম্ভ অসি মাইপাক্নবা হোৎনরি।

ঐনা অমুক হন্না নখোয় ময়াম থাগৎচরি । প্রায়াগ্রাজগী চাউখৎ-থৌরাংগী প্রোজেক্তশিং অসিগীদমক ঐনা নখোয় ময়াম অমুক হন্না থাগৎচরি ।

জয় গঙ্গা মাইয়া-জয় !

জয় জমুনা মাইয়া-জয় !

জয় শারশ্বাতি মাইয়া-জয় !

জয় তির্থারাজ-জয় তির্থারাজ !

জয় তির্থারাজ-জয় তির্থারাজ !

ইমা ভারতনা য়াইফরে !

ইমা ভারতনা য়াইফরে !

ইমা ভারতনা য়াইফরে !

ময়াম পুম্নমক থাগৎচরি !