ভারতকী প্রধানমন্ত্রী

মন্ত্রিমন্দলগী ঐগী মরূপলোই শ্রীপাদ নাইকজী, থৌরম অসিদা লৈবাক শিনবদগী শরুক য়াবা লাকপীরিবা য়োগাচার্য, আয়ুর্বেদগী অখঙ-অহৈশিং, ওজাশিং, মহৈরোইশিং অমসুং মফম অসিদা লেংশিনবীরিবা অখঙ-অহৈ পুম্নমক,

ধন্বন্তরী জয়েন্তী অমসুং আয়ুর্বেদ নুমিৎকীদমক অদোম পুম্নমক্তা, অমসুং লৈবাক অপুনবদা হন্ন-হন্না য়াইফ-পাউজেল পীজরি। লৈবাক অসিগী অহানবা ভারতকী আয়ুর্বেদগী সংস্থান অসিগীদমক অদোম পুম্নমক্তা হন্না হন্না নুংঙাইবা ফোংদোকচরি।

ঐনা ধন্বন্তরী জয়েন্তী অসি আয়ুর্বেদগী নুমিৎ ওইনা পাংথোপা অমসুং সংস্থান অসি লিংখৎখিবা অসিগীদমক আয়ুষ মন্ত্রালয়বু থাগৎপা ফোংদোকচরি।

মরূপশা, কনাগুম্বা লৈবাক অমনা অদুক্কী মতিক চাওখৎনবা হোৎনরবসু, মকোয়গী পুৱারী, মখোয়গী মমাংঙৈদগী লৈজরক্লবা লন-থুম অদুদা চাওথোকচবা হৈত্রিমখৈদি খক ওইথোক্লোই। মখোয়গী মমাংঙৈদগী লৈজরক্লবা লন-থুম অদুবু হুন্দোক্লমদুনা মাংদা চখৎনবা হোৎনরিবা লৈবাক অদু শোইদনা মাংখ্রগদবনি।

মরূপশা, করিগুম্বা ঐখোয়গী লৈবাক অসিগী পুৱারী য়েংলুরগদি অদুগুম্বা খোংজেল অদু অদুক্কী মতিক মপাঙ্গল লৈবা ওইরম্মি মদু অতৈ মালেমগী লৈবাকশিংনা উরুরগা ভারতকী লৌশিং অমসুং
হৈ-শিংবা অসিগা খক মায়োক্নবা ঙম্লোই হায়না লৌখি। মরম অসিনা অতোপ্পা লম্বী অমা লৌজখি। ঐখোয়দা লৈরিবা খ্বাইদগী অথোইবা অসি য়ৈখাই-থিনগাইবনা মখোয় হেন্না লাইরম্মি।

মীখা পোল্লিঙৈগী মনুংদা ঐখোয়গী ঋষি পরম্পরা, ঐখোয়গী আচার্য, লৌমী, ঐখোয়গী বৈগ্যানিক লৌশিং, ঐখোয়গী য়োগ, ঐখোয়গী আয়ুর্বেদ, পুম্নমক অসিবু নোক্নবীখি, মসিবু মপাঙ্গল শোন্থহন্নবা হোৎনখি অমসুং অসিগুম্বা পাঙ্গলশিং অসিগী মফমদা ঐখোয়গী মীয়ামদা থাজবা হন্থহন্নবা ফাওবা হোৎনখি।

মীনাই ওইবা কোক্লবা মতমদদি পাম্বৈ অমখক লৈখি মদুদি লেমহৌরিবা খরা অসি খোমজিন্দুনা মতমগী মতুং ইন্না শেমদোক-শাদোক্কনি। অদুবু মসিসু মরু ওইবা অমা ওইবা ঙমখিদে। লৈরিবা ফিভম অদুদা অদুম্মক হুন্দোকলমখি।

ঐখোয়গী পাঙ্গলশিং মীনাই ওইরিঙৈগী মতম অদুদা মাংহন্নবা হোৎনখি অমসুং নীং তম্লবা মতুংদা শাংলবা মতম অমা অসিগুম্বা পাঙ্গলশিং অসিবু কাওথোক্নবা হোৎনখি। অমরোমদা ঐখোয়গী থাইনদগী লৈজরক্লবা লন-থুম অসিদগী শমাই লৈরখি। অসিগুম্বা মরমশিং অসিনা ঐখোয়না ইবেনবোক্কী শিদ-হিদাক ওইনা য়ুমথোং খুদিংদা শিজিন্নরম্বা অসিগুম্বা ৱারোল ময়াম অসিগী পেতেন্ত অতোপ্পা লৈবাকশিংদা চৎখি।

ঙসি ঐহাক চাওথোকচরি মদুদি হৌখিবা চহি অহুম অসিদা ফিভম অসি অঙকপা ফংনা অহোংবা পুরক্লে। থাইনদগী লৈজরক্লবা লন-থুম, খ্বাইদগী অথোইবা অসি মীপুম খুদিংমক্কী পুক্নীংদা ইহুল তম্বা হৌখ্রে।

ঙসি ঐখোয় পুম্নমক আয়ুর্বেদ নুমিৎ অসিদা পুল্লরি, নত্রগা জুন ২১দা লাখকী খুজিংদা থোরক্তুনা য়োগ নুমিৎ পাংথোক্লি, অদুনা থাইনদগী লৈজরক্লবা লন-থুম অসিগী চাওথোকচবা অসি পীক থল্লি। তোঙান তোঙানবা লৈবাকশিংদা নুমিৎ অসিদা মীওই লাখ কয়ানা য়োগ তৌবদা অদুম্বা শক্তমশিং অদুবু উরুবদা খল্লকই মদুদি, মীওই লাক-লাখশিংবু পুলহল্লিবা য়োগ অসি ভারতনা পীবনি। ইচিল-ইনাওশা, ভারতকী লিরবা লন-থুম ওইরিবা য়োগ অসি পাক-থোক চাওথোকখিদুনা মীওইবা খুন্নাই অসিগী লন-থুম ওইররে।

অহোংবা অসি শুপ্নগী চহি অহুম অসিগী খুদোলনি অমসুং তশেংনমক মসিদা আয়ুষ মন্ত্রালয়গী য়াম্না চাওরবা থৌদাং য়াওই।

মরূপশা, আয়ুর্বেদ শুপ্নগী অনা-লায়েং অমখক্তা নত্তে। মসিগী চাগোইনুংদা খুন্নাইগী হকশেল, মীয়ামগী হকশেল, অকোইবা ফিভমগী হকশেলগুম্বা হিরম কয়ামরুমশু য়াওরি। অসিগুম্বা তঙাইফদবশিং অসিবু খঙজিল্লদুনা সরকার অসিনা, য়োগ অমসুং আয়ুষকী লম্বেলগী পাব্লিক হেল্থক্যার সিস্তেমদা ইন্তিগ্রেসনদা শাফু পীরি। আয়ুষপু সরকারনা মখোয়গী প্রায়োরিতী এরিয়া মরিদা থম্লি। তোহানবা মন্ত্রালয় শেম্বগা লোইননা ঐখোয়না নেশ্নেল হেল্থ পোলিসী শেমগৎপা মতমদা, হকশেলগী থবকশিং অমসুং আয়ুষ সিস্তেমগী ইন্তিগ্রেসনগীদমক্তা পাক চাওরবা কাংলোন শেম্মি, লমজিং-লমতাক পী।

মরূপশা, সরকারনা মসি থাজদুনা চৎলি মদুদি আয়ুষনা হকশেলগী থবক-থৌরমশিংদা ইন্তিগ্রেসন অসি হান্নগুম্না ফাইল খক্তদা অরেপ্পা ওইহল্লরোই মসি লৈমাই ফাওবা য়ৌহনগনি। মাইকৈ অসোমদা আয়ুষ মন্ত্রালয়গী মাইকৈদগী অনৌবা খোংথাং কয়া পাইখৎলি। রাষ্ট্রীয় আয়ুষ মিশন হৌদোকপা, হেল্থ ক্যার প্রোগ্রামশিং পাইখৎপা, মিশন দাইবেতিস, আয়ুষ গ্রামগী ৱাল্লোন অসিগুম্বা হিরম কয়ানি মসিগী মতাংদা হৌজিক মফম অসিদা শ্রীপাদ নাইকনা ৱারি শাবীখিবদুনি।

মরূপশা, আর্য়ুবেদ পাকথোক-চাওথোকহন্নবগীদমক মসি য়াম্নমক তঙাইফদে মদুদি লৈবাক অসিগী জিলা খুদিংমক্তা মসিগা মরি লৈনবা অফবা, খুদোংচাবশিং পুম্নমক ফংবা হোস্পিতাল অমা মথৌ তাই। মসিগী মতাংদা আয়ুষ মন্ত্রালয়না খোংজেল য়াংনা থবক পাইখৎলি অমসুং চহি অহুম অসি মক্তদা আয়ুষ হোস্পিতাল ৬৫ হেন্না লিংখৎখ্রে।

ঙসি দিল্লীদা এম্সকুম্না ওল ইন্দিয়া  ইন্সতিত্যুৎ ওফ আর্য়ুবেদ শঙ্গারিবা অসিসু পরিং অসিগী শরুক অমনি। হৌজিক অহৌবগী ওইনা মসিদা নুংতিগী অনাবা ৭৫০দগী হেন্না লাক্লি। লাক্কদৌরিবা মতম অসিদা অনাবা মশিং শরুক অনি হেনগৎলকপগী থাজবা থম্লি। সংস্তান অসিদাঅনৌবা ইনফ্রাস্ত্রকচরশিং ফংহল্লে। মসিগী মতেংনা অরুবা অনাবা কয়াগী আর্য়ুবেদগী ওইবা লায়েংদসু মতেং ওইনরগনি। ঐহাক অপেবা পোকচৈ মদুদি ঙসি আর্য়ুবেদ ইন্সতিত্যুৎ লিংখৎপা অসিনা আয়ুর্বেদগী মহৈ, আয়ুর্বেদগী লৌশিং অসিবু অমুক হন্না মপাঙ্গল হাপ্লগনি।

মসিশু য়াম্না আশা তৌনীংঙাই ওইবা ফিভমনি মদুদি আয়ুর্বেদিক সংস্থান অসি এম্স, ইন্দিয়ন কাউন্সিল ওফ মেদিকেল রিসর্স অমসুং অতৈ মালেমগী ওইবা সংস্থান খরগা লোইননা পুন্না থবক তৌমিন্নগনি। ঐনা থাজৈ মদুদি লম্বী অসিদা চৎলদুনা ওল ইন্দিয়া ইন্সতিত্যুৎ ওফ আয়ুর্বেদ অসি ইন্তর-দিসিপ্লিনরী অমসুং ইন্তিগ্রেতিব হেল্থ প্রেক্তিসকী মরুওইবা মফম অমা ওইরগনি।

মরুপশা, আয়ুর্বেদগী মগুনগী শাংলবা পরেং লৈ। মৈলেম অসি হৌজিক হেল্দী খক্তা ওইবা পামদ্রে, হৌজিক মসি ৱেলনেল পাম্লে অমসুং পোৎশক অসি মখোয়না আয়ুবেদ অমসুং য়োগদগী ফংবা ঙম্মি। ঙসি মালেমগী লৈবাক পুম্নমক্তা বেক তু নেচর হায়বদি ‘ অমুক হন্না মহৌষাগী মাইকৈদা হল্লকপা’গী পাউজেল অসি পাম্নরি। মীয়ামগী মায়োল লিক্লম অসিগী মাইকৈদা ওল্লক্লি, মদু চুমদ্রিং মহৌষাদা য়ুম্ফম ওইরি। মতাং অসিদা আয়ুর্বেদগীদমক্তা নাতৈ চাবা ফিভম শেম্বা অরুবা নত্তে। শুপ্নগী ঐখোয় ঙসিগী তঙাইফদবশিংদা আয়ুর্বেদ শিজিন্নবা অসি অদুক্কী মতিক হেনগৎহনবা তাই।

ঙসি ৱাফম অসিগীদমকসু তঙাইফদবা ওইরি মদুদি আয়ুর্বেদগা মরি লৈনবা অখঙ-অহৈশিংনা আয়ুবেদগী থবক-থৌরমশিং পাকথোক-চাওথোকহনবীবা তাই। মখোয় অদুগুম্বা আয়ুর্বেদনা হেন্না শাফু পিবা য়াবা লমশিং অদুগী মরমদসু খনগদবনি। অসিগুম্বা লম অমদি স্পোর্তনি। অদোম্না উবীরমগনি মদুদি হৌখিবা চহি খরা অসিদা ফিজিয়োথেরাপী তৌবা দোক্তরশিংগী থৌদাং কয়াদা হেনগৎলবগে হায়বা। অচৌ-অচৌবা শান্নরোইশিংনা মখোয় মশাগী ওইবা ফিজিয়োথেরাপী থম্নৈ। অচৌ-অচৌবা শান্নরোইশিংনা খঙনা অমদি খঙদনা অনাবগী হিদাক-লাংথকশিংগী লাংদা থুরি। অদোম্না ঐনা ঐখোয় পুম্নমক্না মসি খঙই মদুদি আয়ুর্বেদ অমসুং য়োগ হিরম অসিদা হেন্না শাফু পীবা য়াই। আয়ুর্বেদ অমসুং য়োগতা য়ুম্ফম ওইবা ফিজিয়োথেরাপীদা করিগুম্বা মখল অমত্তগী অথিংবা হিদাক-লাংথক শোইদুনা শিজিন্নগনি হায়বগী অকিবা অমত্তা লৈতে।

স্পোর্তকুম্না ঐখোয়গী লান্মীশিংগীদমক্তসু য়োগ অমসুং আর্য়ুবেদ অসি অদুক্কী মতিক মরু ওই। ঐখোয়গী জৱান অদুক্কী মতিক লুরবা ফিভমদা লৈবাক অসিবু ঙাক-শেল্লি। করিগুম্বদা পোস্তিং চিংদা, করিগুম্বদা লৈঙোই লমদা, করিগুম্বদা সমুদ্রগী তোর্বান্দা, করগুম্বদা শুক্লবা উমংদা তাই। তোঙান তোঙানবা নোংজু-নুংশা, তোঙান তোঙানবা ফিভমশিংদা। অসিগুম্বা মতাংদা য়োগ অমসুং আয়ুর্বেদনা মখোয়বু অনাবা কয়া মরুমদগী কঞ্জবা ঙম্মি। ৱাখল নুংঙাইতবা কোকহনবা, পুক্নীং লেপ্পা ঙমহনবা, ঐখোয়গী জৱানশিংগী ইম্যুন সিস্তেম কলহনবদা য়োগ অমসুং আয়ুর্বেদ অসি কান্নবা ফংলি।

ক্বালিতী লৈবা আয়ুর্বেদগী মহৈ-মশিংদসু পুক্নীং চংবগী তঙাই ফদবা লৈ। মসিগী পাক চাওবা অসি হেনগৎনগদবনি। পঞ্চকর্ম থেরেপিস্ত, আয়ুর্বেদিক দাইতিশিয়ন, পরাকৃত এনালিস্ত, আয়ুর্বেদ ফামাসিস্ত, আয়ুর্বেদগী সপোর্তিং চেন পুম্নমক হেন্না পাকথোক-চাওথোকহনগদবনি।

মসিদা নত্তনা ঐনা ৱাফম অসিমসু থমজরি মদুদি আয়ুর্বেদগী মহৈ-মশিংদা পাইখৎলিবা তোঙান-তোঙানবা কোর্সশিংগী তোঙান-তোঙানবা থাক অসি অমুক হন্না য়েংশিল হন্নীংঙি। মহৈরোইশিংনা বেচেলর ওফ আয়ুর্বেদ, মেদিসিন অমসুং সর্জরী – বিএএমএসগী কোর্স তম্লবদি পরাকৃতি, আয়ুর্বেদিক দাইতরী, আয়ুর্বেদিক ফার্মাস্যুতিকেলগী মতাংদা তম্মি। চহি মঙা – চহি মঙা মখাই তম্লবা মতুংদা মখোয় দিগ্রী ফংই অমসুং মতুংদা মখোয় মশাগী প্রাক্তিস নত্রগা মখা তমথনবা হোৎনৈ।

মরূপশা, মহৈরোইশিংনা চাংয়েং খুদিংগী মাই পাক্লবা মতুংদা করিগুম্বা সর্তিফিকেৎ অমা ফংনবা মওংদা বিএএমএসকী কোর্স অসি দিজাইন তৌবা য়ারোইদ্রা। অসুম্না তৌবদা কান্নবা ফংগনি। মখা তম্না তম্না মশাগী প্রাক্তিস হৌনীংবা মহৈরোইশিংগী কান্নবা ফংলগনি লোইননা মরম অমদগী মখা তমথবা ঙমদ্রবা মহৈরোইশিংসু আয়ুর্বেদগী করিগুম্বা থাক অমগী সর্তিফিকেৎ অমদি শোইদনা পাইরগনি। মসিদসু নত্তনা চহি মঙাগী কোর্স মপুং ফানা লোইশিন্দুনা থোরকপা মহৈরোইশিংগী মফমদা থবক ফংজনবগী হেন্না পাম্বৈ লৈরগনি।

হৌজিক ঙৈহাক্কী মমাংদা শ্রীপাদ নাইকজীনা স্পোলিং রিহেব হোস্পিতাল অমসুং হার্বর্দ মেদিকেল স্কুলগা লোইননা কোলাবোরেসন তৌবগী মতাংদা পনখি। মসি তাবদা ঐহাক য়াম্না নুংঙাইবা পোকই অমসুং নাকল অনিমক্তা হন্না হন্না থাগৎপা ফোংদোকচরি। ঐনা থাজৈ মদুদি কোলাবোরেসন অসিনা স্পোর্ত মেদিসিন, রিহেবিলিতেসন মেদিসিন, চৈনা ঙাকথোকপদা আয়ুর্বেদগী লায়েংগী ওইথোকপশিং অদু থিদোকপদা মতেং ওইরগনি।

আয়ুর্বেদদা স্তেন্দর্দ গাইদলাইনশিং অমসুং স্তেন্দর্দ তর্মিনোলোজী য়াওবা অসি মসিগীদমক্তা মরু ওই মরমদি মসি য়াওদবনা মরম ওইদুনা এলোপেথীগী তাইবং অমসুং মসিগী থবক-থৌওংশিংনা লাইনা আয়ুর্বেদবু খুদুম চনশিনখি। মতম অমদা ভারত সরকারগী কমিশন অমনসু মখোয়গী রিপোর্ত্তা ময়েক শেংনা হায়খি মদুদি ঐখোয়গী মফম অসিদা আয়ুর্বেদ অসি মীয়ামগী ইমুংদগী লাপ্না লৈ মরমদি মসিগী থৌওং অসি মতম অসিগা চুনদে। 

অমরোমদা এলোপেথীগী হিদাকশিংনা, হাংদোকপগা শৎ চাবা য়াবা। অদুগা অমরোমদা আয়ুর্বেদ অসি মসিনা মাইথিহল্লি মদুদি হিদাক শেম্বা অমসুং চাবগী থৌওং অসি অদুক্কী মতিক শাংই, কনানবু মতম অসুক মাংহল্লুগদগে হায়না মীচম মীয়াম্না খল্লি। ফাস্ত ফুদকী মতম অসিদা আয়ুর্বেদগী হিদাংশিংগী অরিবা মতমগী ময়োম অসি চৎনবা য়ারোই। আয়ুর্বেদগী হিদাংশিংগী খুৎয়োম্না অসুম অসুম অনৌবা মওংদা লাক্লিবমখৈ লায়েংবগী থৌওংগী থাক লেপ্পক্কনি, তর্মিনোলোজী কমন ওইরক্কনি, অদোম য়েংবীয়ু অদুক্কী মতিক থুনা অহোংবা পুরক্কনি।

ঙসিগী মতম অসিদা মীয়াম্না খুদক্তা ফল পাম্মি। খুদক্তা ইফেক্ত ফংলবদি মীয়াম্না সাইদ ইফেক্তকী ফাওবা নাচুংদে। ৱাখল অসি অরানবা নত্তে, অদুবু মসি মাইকৈ খুদিংদা উনরি। মরম অদুনা আয়ুর্বেদগী অখঙ-অহৈশিংনা ইফেক্ত হায়বদি খুদক্তা ফল ফংবা অমসুং অদুম ওইনমক সাইদ ইফেক্তগী ঙাকথোক্কদবা হিদাকশিং থিদোকপীগদবনি, অসিগুম্বা হিদাকশিংগী মতাংদা খনবীগদবনি, মদু পুথোকপীগদবনি।

ইচিল-ইনাওশা, আয়ুষ মন্ত্রালয়গী মখাদা আয়ুর্বেদগী হিদাক্কী ফার্মাসী স্তেন্দর্দ ৬০০ হেন্না পাব্লিশ তৌখ্রে হায়না ঐঙোন্দা তম্মি। মসিবু অদুক্কী মতিক য়াম্না শন্দোক্লিমখৈ আয়ুর্বেদগী হিদাকশিংগী মগুনসু হেনগৎকনি। হর্বলগী হিদাকশিং ঙসিদি মালেমদা য়াম্না চাওনা মার্কেৎ শেম্লি। ভারতসু মসিদা ঐখোয়গী পাঙ্গল পুম্নমক শিজিন্নগদবনি। হর্বল অমসুং মেদিসিনেল প্লান্তশিং অসি শেনদাল লম্বীগী চাওরবা পাম্বৈ অমা ওইরে।

আয়ুবেদদদি অসিগুম্বা ঈশিং য়াম্না মথৌ ওইদবা অমদি লৈহাউ য়াম্না লৈবা লমগী মথৌ তাদবা পাম্বীশিংদগী হিদাক শেম্মি। হিদাক পাম্বী কয়ামরুমদি অসুম্না মসা মথন্তা হৌজবসু য়াওই। অদুবু হায়রিবা পাম্বীশিং অসিগী মগুন খঙদবনা মরম ওইদুনা নাপী-শিংনাং ওইনা লৌদুনা ফুক্তোক্তুনা মাংহল্লি। খঙবা ৱাৎপনা মরম ওইদুনা ওইহল্লিবা অমাংবা অসিদগী করম্না কঞ্জগনি হায়বসিগী মরমদসু খন্নবগী মথৌ তাই।

মেদিসিনেল প্লান্তশিং থাদুনা থবক পীজবগী অনৌবা তাঞ্জা অদুসু পুরক্লে। আয়ুষ মন্ত্রালয় অমসুং স্কিল দিব্লপমেন্ত মন্ত্রালয় অনিনা খুৎশম্নদুনা মাইকৈ অসোমদা লৌমীশিং অমসুং মহৈরোইশিংগীদমক্তা শোর্ত-তার্ম কোর্শ অমা দিব্লপ তৌবা ঐনা পাম্মি। থাইনদগী চৎনরক্লবা লৌউগা লোইননা লৌমীশিংনা লৌবুক্কী মপান্দা লেম্না লৈবা মফমশিংদু মেদিসিনেল প্লান্তশিং থাবদা শিজিন্নরবদি মখোয়গী আইসু হেনগৎহনগনি।

ইচিন-ইনাউশা, সেক্তর অসি চাওখৎহনবা অমসুং পাকথোক-চাওথোকহন্নবগীদমক্তা হৌজিক ইনবেস্ত কয়ামরুমগী মথৌ তাই। সরকারনা হেল্থ ক্যার সিস্তেমদা ফোরেন দাইরেক্ত ইনবেস্তমেন্ত – এফদিআই শরুক চাম্মগী অয়াবা পীরে। হেল্থ ক্যারদা এফদিআইগী কান্নবা আয়ুর্বেদ অমসুং য়োগনা করম্না ফংগনি, মসিগী মতাংদসু হোৎনবা মথৌ তাই।

ঐনা লৈবাক অসিগী কম্পেনী পুম্নমক্তা অমসুং প্রাইবেৎ সেক্তর পুম্নমক্তা হায়জগনি মদুদি মখোয়না এলোপেথিদা বেজ তৌবা অচৌ-অচৌবা হোস্পিতালশিংগীদমক্তা থোরক্লিবা অসিগুম্না য়োগ অমসুং আয়ুর্বেদগীদমক্তসু থোকপীরকউ। মখোয়গী কোর্পোরেৎ সোসিএল রেসপোন্সিবিলিতী হায়বদি সিএসআর ফন্দগী শরুক খরদি আয়ুর্বেদ অমসুং য়োগদসু থাদবীয়ু।

ঐখোয়না মসিসু খঙজিনগদবনি মদুদি চহি লিশিং কয়াগী মমংদা ঐখোয়গী ইপা-ইপুশিংনা ফংলম্বা লৌশিং অসিগী মরুমদা চোকথবা নাইদ্রবা হোৎনবা অদু য়াওরিবনি, মীওইবা খুন্নাইগী য়াইফনবগী ইথিল অদু লোইনরিবনি। অনৌবা এক্সপেরিমেন্ত খরা তৌবা, ইন্নোবেতিব খরা তৌবগী ৱাখল্লোন অদুমক্না য়োগ অমসুং আয়ুর্বেদকুম্বা অঙকপশিং অসি পোকখিবনি। অদুবু ঐখোয়না ইন্নোবেসন অসিদগী হন্দোকখিবদা, ফিভমশিং অসি হোংলকখি, ঐখোয়গী শাফু হন্থরকখি।

প্রিভেন্ত হেল্থ ক্যারদা শাফু পীরদুনা ঐখোয়না মিশন ইন্দ্র ধনুষ হৌদোকখি, মসিনা ২০২০ ফাওবগী মনুংদা হৌনবী হিদাক কাপথোকপগী থৌরমদগী চিৎথহৌবা অঙাং পুম্নমক হিদাক কাপথোকপা ঙমগনি। সরকারনা লেপখি মদুদি অসিগুম্বা অঙাংশিং অসিবু মপুং ফানা হিদাক কাপথোক্তুনা লাইনা মখল ১২ দগী কনগনি। মিশন ইন্দ্রধনুষকী মখাদা হৌজিক ফাওবদা অঙাং কোতি অনি মখাইদগী হেনবদা অমসুং চাওরাক্না মীরোনবী নুপী লাখ ৭০ রোমদা হিদাক কাপখ্রে।

হৌজিক থা অসিদা সরকারনা মিশন অসিদা হেন্না মীৎয়েং থম্লি। ইন্তেন্সিপাইদ মিশন ইন্দ্রধনুষ হৌদোকখি মসিগী মখাদা হিদাক কাপ্পগী থৌরম অদুর্রী মতিক হন্থনা য়ৌবা অদুগুম্বা জিলা-শহর-অমসুং মফমশিংদা ফোকস তৌগনি। মথংগী চহি অমা ফাওবদা লৈবাক্কী জিলা ১৭৩ দা থা খুদিংগী চয়োল অমদা নুমিৎ ৭ নি লেপ্তনা হিদাক কাপ্পগী খোংজং চংশিনগনি। সরকারগী পান্দমদি দিসেম্বর ২০১৮ ফাওবদা লৈবাক অসিদা ফুল ইম্যুনাইজেসন কবরেজ তৌবনি।

মরূপশা, অহানবদা মসি খন্নরম্মি, হেল্থ ক্যারগী থৌদাং অসি শুপ্নগী হকশেল মন্ত্রালয় খক্তগীনি। অদুবু ঐখোয়গী ৱাখল্লোন্দি তোঙাল্লি। ইন্তেন্সিফাইদ মিশন ইন্দ্রধনুষতা হৌজিক সরকারগী তোঙান তোঙানবা মন্ত্রালয় ১২ গী, ঙাকশেল মন্ত্রালয় ফাওবগী মতেং লৌরি।

প্রিভেন্তিব ঙেল্থ ক্যারবু য়োকখৎপগা লোইননা সরকারনা হেল্থ সবিস্তা এফোর্দেবিলিতী অমসুং এক্সেস হেনগৎহন্নবগীদমক হৌবদগী হৌনা হোলিস্তিক এপ্রোচ পুদুনা চৎলি। মেদিকেল কোলেজশিংদা দোক্তর তম্লিবা মহৈরোইশিংগীদমক্তা পিজি মেদিকেল সীত্তা মশিং হেনগৎলে। মসিগী কান্নবা অসি হকথেংননা ঐখোয়গী নহরোলশিংনা ফংবগা লোইননা লাইরবশিংনা লায়েংনবগীদমক দোক্তরসু লাইনা ফংলগনি। লৈবাক পুম্বগী মীয়ামদা হেন্না ফবা লায়েং অমসুং অফবা হকশেল ফংহন্নবগীদমক তোঙান তোঙানবা রাজ্যশিংদা অনৌবা এম্সসু হাংদোক্লি। স্তেন্তকী মমলদসু চাওনা হন্থবা, নী ইম্প্লান্তশিংগী মমল চাং অমদা থম্বনচিংবা ৱারেপশিংসু লৌরে। জন ঔষধি কেন্দ্রশিংগী থোংদসু লাইরবশিংদা অহোংবা হিদাকশিংসু ফংহন্নবা থবক পাইখৎলি। মরূপশা, ঐঙোন্দা তমখি মদুদি চহি অসিদা চাওরাক্না লৈবাক ২৪ রোমদা ঐখোয়গী মীরমদা লিংখৎপা মিশনসু আয়ুর্বেদ নুমিৎ পাংথোক্লি। হৌখিবা চহি ৩০ রোমদা মালেমদা আইতিগী ইহৌ উরক্লি। হৌজিক আয়ুর্বেদগী লমজিং মখাদা হকশেলগী ইহৌ পাইখৎপা তাই। লাকপীরো ঐখোয় য়ইফরবা নুমিৎ অসিদা ৱাশক লৌরসি –

‘ঐখোয় আয়ুর্বেদ শিজিন্নগনি, ঐখোয় আয়ুর্বেদ হিংহনগনি অমসুং ঐখোয় আয়ুর্বেদগীদমক্তা হিংগনি।’

ইচিল–ইনাওশা, অদোম পুম্নমকপু আয়ুর্বেদ নুমিৎ, ওল ইন্দিয়া ইন্সতিত্যুৎ ওফ আয়ুর্বেদগী হন্না হন্না নুংঙাইবা ফোংদোকচবগা লোইননা ঐগী ৱাফম মসিদা লোইশিঞ্জরি।

হন্না হন্না থাগৎচরি!!!