ভারতকী প্রধানমন্ত্রী

অর্জেন্তিনাগী কৎথোক্লবা য়োগ-পর্ফোমর,

ভারত অমসুং ভারতকী সংস্কৃতিবু পামজবা অর্জেন্তিনাগী প্রজাশিং,

অর্জেন্তিনাদা লৈরিবা ভারতকী ইচল-ইচে অমসুং ইচিল ইনাওশিং,

আর্ত ওফ লিভিংগী থৌমীশিং অমসুং মীহুৎশিং,

খুরুমজরি!

বুয়েনাস তাদর্স। বুয়েনোস আইরেসদা ঐহাক্না অয়ুক, নুংথিল অমসুং নুমিদাংৱাইরম বুয়েনোস, হায়বদি য়াইফরবা মহৌশা অদুমকনি। মহর্শি পতঞ্জলিগী ত্রেদিসনগা শম্নরিবা ময়াম পুম্নমকপু ভারতমচা কোতি চামগা কুনমঙাগী মায়কৈদগী ঐহাক্না হন্না হন্না নুঙাইবা ফোংদোকচরি। ঐহাক্না আর্ত ওফ লিভিংগী মীহুৎশিং অমসুং ময়াম পুম্নমকপু অসিগুম্লবা চিং লেম্লবা থৌরম অসিগীদমক থমোয় শেংনা হন্না হন্না নুঙাইবা ফোংদোকচরি।

মরূপশিং,

ঐহাক পুং ২৪দগী হেন্না ঐহাক কিলোমীতর লিশিং ১৫ হেনবা খোংচৎকা লোয়ননা ঙাইহাক্কী মমাংদা বুয়েনোস আইরেস য়ৌরক্লে। অদুবু ময়ামগী থৱাই য়াওবা মতৌ অমসুং নুংশিবিরিবা অদুনা ঐহাক ভারতকী ৱাংমদা লৈরি হায়বা থাজবা ঙমদে। মফম অসিদা মীওই কয়া অমনা য়াম্না স্কিল লৈনা ইকায় খুম্ননা সুর্য় নমস্কার তৌরি। অর্জেন্তিনাগী অসিগুম্লবা নিংথিরবা সন্ধ্য মতম অসিদা অদোমগী য়োগ সাধনানা ঐহাকপু তেকখৎহল্লে অমসুং পুক্নিং চিংশিল্লে।

মরূপশিং,

ঙসিগী প্রোগ্রাম অসিগী মমিংদি “য়োগ ফোর পিস” কৌই। য়োগগী প্রোগ্রামদা মসিদগী হেন্না ফজবা মমিং থিবা অৱাবা ওইগনি। য়োগদগী ঐখোয়না হকচাং অমসুং পুক্নিং অনিমক ফহল্লি। য়োগনা ঐখোয়গী হকচাংবু শক্তি পীরি অমসুং পুক্নিংবু শান্তি ফংহল্লি। মীওইবগী পুক্নিংদা শান্তি লৈরবা মতমদা ইমুং মনুংদা, সমাজদা, লৈবাক্তা অমসুং মালেমদসু শান্তি পুরক্কনি। হেল্থ, ৱেলনেস অমসুং শান্তিগীদমক মালেমদা য়োগ অসি ভারতকী খুদোলনি। ঐহাক্না মসি খংবদা নুঙাইবা ফাওই মদুদি চহি অসিদা বুয়েনোস আইরেসতশু য়োগ দিবসতা মীওই লিশিং ১০না শরুক য়াখি।

মরূপশিং, 

শম্নহনবা অসি য়োগগী অর্থমক্নি। মসিনা ঐখোয়বু ৱেলনেসকা শম্নহল্লি। হরাও তয়াম্বগা শম্নহল্লি। অমদি ঙসি, ভারত অমসুং অর্জেন্তিনাগী মরক্তা লৈরিবা কিলোমীতর লিশিং কয়াগী অরাপ্পা অসি য়োগনা হন্থহল্লে, অমসুং ঐখোয়গী লৈবাক অনিমকপু, ঐখোয়গী মীয়াম্বু শম্নহল্লে। ঐখোয়বু আত্মাগী ওইবা মরী অমনা পুন্দুনা থম্লে। ভারত অমসুং অর্জেন্তিনাগী মরক্তা কিলোমীতর লিশিং ১৫ লাপ্নৈ। ঐখোয়গী লৈবাক অনিগী মরক্তা পাক চাওখ্রবা মহাসাগর অনি অমসুং মহাদ্বীপ অনি লৈরি। লৈবাক অনিমক্কী মতমদা পুং ৮ অমসুং মিনিৎ ৩০গী খেৎনবা লৈ। হায়বদি হৌজিক অদোমগী নুমিদাংৱাইরম ওইরি অদুবু ভারত্তদি প্রজাশিং ব্রহ্ম মুহুর্তকী সাধনা হৌগদৌরে।

অর্জেন্তিনানা ভারতকী শক্তম, কলা, ম্যুজিক অমসুং জগোইদা পুক্নিং চংই, অদুগা ভারত্তা অর্জেন্তিনাগী ফুতবোল স্তারশিংগী ফেন লাখ কয়া লৈরি। মারাদোনাগী মমিংদি ঐখোয়গী লৈবাক্কী ৱাহৈ ৱাতা অমসুং ৱাফমশিংদা য়াওরে।

হৌজিক ভারতকী রাজ্য অমা ওইরিবা ওরিশাদা হোক্কী ৱার্ল্দ কপ পাংথোক্লি মদুনা মরম ওইরগা ভারত্তা থৱাই য়াম্না য়াওনরি। ঙসিমক অর্জেন্তিনানা হোক্কী ৱার্ল্দ কপতা মখোয়গী অহানবা মেচ মাই পাকলে। শান্নখিবা অদু য়েংবা য়াম্না নুঙাইখি হায়বা ঐহাক তাজরে। ঐহাক্না অর্জেন্তিনাগী হোক্কী তিমবু মথংগী মেচশিংগীদমক য়াইফ পাওজেল পীজরি।

ভারত অমসুং অর্জেন্তিনাগী প্রজাশিংগী মংলান অমসুং দরকার ওইবশিং মান্নৈ। লৈবাক অনিমক্কী মরী অসি থমোয়শেংবা অমসুং পুকচেল শেংই। ঐখোয় অনিমক চাওখৎলক্লিবা অমসুং দেমোক্রেতিক ওইবা লৈবাক্নি অমসুং ঐখোয়গী কোপার্তনরশিপ মমল ৱাংই। অনিমক মালেমদা অমনা অমগী থৌদাং অমসুং ইমপেক্তনা মতেং ফংই।

ঙসি ভারতকী মরূপ লৈবাক ওইরিবা অর্জেন্তিনানা জি ২০গী য়ুম্বু ওইরিবা অসিদা ঐখোয়গীসু হরাওনিঙাই অমসুং চাওথোকচনিঙাই ৱাফমনি। সমিৎ অসিদা খন্নগদৌরিবা ৱাফম ওইরিবা গ্লোবেল ইকোনোমী, সস্তেনেবল দিবেলপমেন্ত, ক্লাইমেৎ চেঞ্জ, ইকোনোমিক ফ্যুজিতিব ক্রিমিনেল, মদুনা ভারত নত্রগা অর্জেন্তিনা খক্তা কান্নহনবতা নত্তনা মালেম পুম্বগী কান্নবগা মরী লৈনৈ।

ঐখোয়গী লৈবাক অনিগী মরক্তা অমনা অমগী তেংবাং পীনবগী ওইথোকপা চাওনা লৈ। ললোন ইতিক, ফার্মা, থাও অমসুং গ্যাস, আই.তি. অমসুং স্পেস, অসিগুম্লবা লম কয়া অমা লৈরি মদুদা ঐখোয়না অমনা অমগী কানবা লৌবা য়াই।

মরূপশিং,

অর্জেন্তিনাদা লৈরিবা ভারত মচাশিং অমসুং ভারতকী মরূপশিংবু ঐহাক্না ভারতপু হেন্না ময়েক শেংনা খংননবা বার্তন তৌজরি। অর্জেন্তিনাদা লৈরিবা  ভারত মচা পুম্নমক, জনুৱারি থাদা কাশিদা পাংথোক্কদৌরিবা প্রবাসী ভার্তিয়া পালন্দা শোয়দনা লাকপীয়ু অমসুং অর্জেন্তিনাগী অদোমগী মরুপশিংবুশু পুদুনা লাকপীয়ু।

তঞ্জা অসিদা প্রয়াগরাজদা অর্দ্ধকুমভশু পাংথোক্লি। অদুগুম্লবা অঙকপনা থল্লবা তঞ্জাদা, ভারতকী সংস্কৃতিগী প্রোস্পেরিতীগী, হোংলক্লিবা ভারতকী, ন্যু ইন্দিয়াগী শক্তম অদুশু অদোম্না উবা ফংগনি। ঐহাক্না ময়ামগী লমন তোনশিনজরে মদুদি ময়াম্না ঐহাকপু ভারতকী য়োগগী ৱাফম তমজনবা তঞ্জা পীনবিরে। ঐহাক্না আর্ত ওফ লিভিংবু মখোয়না হোৎরিবশিং অদুগীদমক থাগৎপা ফোংদোকচরি।

সুশ্রী পাত্রিসিয়া সোসাগীসু লমন তোনশিনজরে মদুদি মহাক্না য়োগগী অসিগুম্লবা নিংথিরবা সন্ধ্যা অসিবু মপুং ফাহল্লে। অদোম য়োগগা মতম পুম্নমক্তা লোয়নদুনা লৈবিয়ু। য়োগনা মালেম অসিবু মতৌ অসুম্না পুন্সিনবা ওইরসনু। হরাও তয়াম্না লৈবিয়ু, নে তানা লৈবিয়ু, নুঙাইনা লৈবিয়ু।

মুচাস গ্রাসিয়াস।

থাগৎচরি।