ভারতকী প্রধানমন্ত্রী

ঐগী মরূপ রাস্ত্রপতি মাক্রী অমসুং আর্জেন্তিনাদগী লাকপা শক্নাইরবা মীওই পুম্নমক।

খুরুমজরি

ঐনা রাস্ত্রপতি, মহাক্কী ইমুং-মনুং অমসুং মীহুৎ কাংবু তরাম্না ওকচরি। ঐখোয়ন বিউনোস আইরিসতা উনখ্রবা থা অনিগী মতুংদা ভারত্তা অদোম্বু তরাম্না ওক্নবা ঐনা খুদোংচাবা অসি ফংবশি য়াম্না নুংঙাইবা অমনি। ২০১৮দা জি-২০ সমিৎ মাইপাক্না য়ুম্বু ওইবগীদমক ঐনা রাস্ত্রপতি মাক্রী অমসুং মহাক্কী কাংবুবু অমুক হন্না থাগৎলি। বিউনোস আইরিসতা জি-২০ সমিৎ মনুংদা রাস্ত্রপতি মাক্রীনা ২০২২দা ভারতকী নীংতম্বা চহি ৭৫শুবদা ভারতনা জি-২০ সমিৎ য়ুম্বু ওইগনি হায়না লাউথোকখি। মদুগীদমক ঐনা মহাক থাগৎলি।

মরূপশিং,

রাস্ত্রপতি মাক্রীগা লোয়ননা ঐনা মঙারকশুবা ওইনা উনবা অসি লৈবাক অনিগী মরক্তা লৈনরবা মরুওইবা মরি অদু উৎলে। লৈবাক অনিগী মরক্ত লৈনরিবা কিলোমীতর ১৫,০০০গী অরাপ্পা অসি শুপ্নগী মশিং খক্তনি হায়বা ঐখোয়না উৎলে। লৈবাক অনিগী মরক্ত দিপ্লোমেতিক্কী মরি লৈনবা চহি ৭০সুরকপা অখন্নবা চহি অসিদা রাস্ত্রপতি মাক্রীগী খোঙচৎ অসি পাংথোক্লি। ঐখোয়গী মীয়ামগী মরক্ত লৈনরিবা মরি অসি মসিদগী হেন্না কুইরে। ১৯২৪দা গুরুদেব রবিন্দ্রনাথ তেগোরনা আর্জেন্তিনাদা চৎখি।

মহাক্কী পোৎথোকশিংগী খুৎথাংদা খোংচৎ অদু মুৎনাইদ্রবা অমা ওইখি। শান্তি থম্নবা, তুংদু লৈতবা লৈনবা, শেন-থুম চাউখৎনবা অমসুং নুংঙাই-য়াইফনবা লৈবাক অনিমক্না লৈনরিবা মরি অদু অখন্নবা মীৎয়েং চংলি। মালেমগী শান্তি থম্বা অমসুং তংদু লৈতাবদা তেরোরিজম্না অচৌবা চৈথেং অমা ওইরে হায়বা ঐ অমসুং রাস্ত্রপতি মাক্রীনা য়ানরে। পুলৱামাগী তমথিরবা তেরোরিস্তশিংনা লান্দারকপা থৌদোক অদুনা হৌজিক ৱারী শানবগী মতম লোইরে হায়বা উৎলে। হৌজিক মালেম শীনবা থুংনা তেরোরিজম অমসুং মখোয় শৌগৎপশিং থেংননবা অকনবা ৱারেপ লৌবা দরকার ওইরে। তেরোরিস্তশিং অমসুং মখোয় শৌগৎপশিংগী মথক্ত খুৎথাবদা চিংনবা অসি তেরোরিজম শৌগৎপগা মান্নৈ। জি-২০ লৈবাকশিংগুম, তেরোরিজম থেংননবা ঐখোয়না হমবার্গ লিদর্সকী পোইন্ত ১১গী ৱাফম অদু চৎনহনবা অসি য়াম্না মরুওই। মসিগী মতাংদা লৈবাক অনি অসিনা ঙসি ৱারী শানরবা মতুংদা তেরোরিজম থেংননবা অপুনবা ৱারোল অমা লাউথোক্লে। শান্তি ওইবা থবকশিংদা স্পেস অমসুং ন্যুক্লিয়র ইনর্জী শীজিন্ননবা ঐখোয়গী মতেং পীনবা অসি মখা তানা হেনগৎলক্লি। ঙাকশেনগী লমদা মতেং পীন্নবা ঙসি খুৎয়েক পীনখিবা এম ও য়ু অদুনা দিফেন্স সেক্তরদা ঐখোয়গী মতেং পীনবা অদুগী অনৌবা মাইওন অমা উরগনি।

মরূপশিং,

ভারত অমসুং আর্জেন্তিনানা হিরম কয়াদা অমনা অমগী মতেং পাংনরি। ঐখোয় অনিমক্কী কান্ননবা মসিগী খুদোংচাবা ঐখোয়না লৌগদবনি। আর্জেন্তিনা অসি লৌউ-শিংউগী লমদা শক্তি য়াম্না লৈবা লৈবাক অমনি। লৈবাক অসিগী চিঞ্জাক কোন্ননবা আর্জেন্তিনা অসি ভারতকী মরুওইবা মরূপ অমনি হায়না লৌরি। ঙসি ঐখোয়গী মরক্ত লৈনখিবা এগ্রো-ইন্দস্ত্রিয়েল কোওপরেসগী থৌরাং অদু মসিগী মাইকৈদা য়াম্না মরুওইবা খোঙথাং অমনি। আই সি তিগী লমদা ভারতকী মাইপাকপা হায়বদি জনধন-আধার-মোবাইল অমসুং দিজিতেল পেমেন্ত ইনফ্রাস্ত্রকচর অসি আর্জেন্তিনাগা লোয়ননা শরুক য়ামিন্ননবা ঐখোয়না থৌরাং তৌরি। ২০৩০ ফাওবগী মনুংদা ভারত্তা য়ামদ্রবদা ঐখোয়গী গারীশিংগী চাদা ৩০ ইলেকত্রিক বেত্তরীশিংনা চেন্নবা ঐখোয়না পান্দম থমলি। মালেমগী লিথিয়ম রিজার্ব চাদা ৫৪ লৈরিবা আর্জেন্তিনানা লিথিয়ম ত্রাইএঙ্গলগী শরুক অমা ওইরি। মাইনীং সেক্তরদা আর্জেন্তিনাগা মতেং পীন্নবা ঐখোয়গী অপুনবা ভেঞ্জর কাবিল থবক হৌরে।

মরূপশিং,

হৌখিবা চহি ১০ অসিদা, ঐখোয়গী নাকল অনিগী ললোন-ইতিক্কী থবক শরুক অনি হেনগৎলে অমসুং য়ু এস দোল্লর বিলিয়ন ৩ হেল্লে। লৌউ-শিংউ, মেতেল, মিনরেল, থাও, গ্যাস, ফর্মাস্যুতিকল, কেমিকেল, গারী অমসুং সর্বিসশিংদা মতেং পীনবা হেনগৎলবা য়াবা খুদোংচাবা কয়া লৈরে। ঐখোয়গী ললোন-ইতিক্কী থবকশিং হেনগৎহন্নবা ঙসি ঐখোয়না মরুওইবা থৌরাং কয়া মশক খঙদোক্লে। রাস্ত্রপতি মাক্রীগা লোয়ননা আর্জেন্তিনাগী মরুওইবা কম্পেনীশিংগী মীহুৎশিং লাকপদা ঐ হরাওই। দিল্লী অমসুং মুম্বাইদা ললোন-ইতিক্কী লুচিংবশিং ৱারী শানবা অদু মহৈ য়ানগনি হায়না ঐনা থাজৈ। মেরকোসুরগা লোয়ননা প্রিফরেন্সিয়েল ত্রেদ এগ্রিমেন্ত অমা ২০০৪দা খুৎয়েক পীনবা অহানবা লৈবাক ভারতনা ওইরে। হৌজিক লৈরবা আর্জেন্তিনাগী রাস্ত্রপতিগী মতম অসিদা ইন্দিয়া-মেরকোসুর ত্রেদ পাকথোক—চাউথোক্নবা ঐখোয়না ৱাফম কয়া খন্নরে।

মরূপশিং,

ভারতকী আর্ত, কলচর অমসুং স্পিরিচুয়েলিতী পামজবা মীওই মিলিয়ন কয়া আর্জেন্তিনাদা লৈরি। আর্জেন্তিনাগী তাঙ্গো জগোই অমসুং ফুৎবোল অসি ভারত্তা য়াম্না পাম্নৈ। মীয়াম মরক্ত নকশিন্নবা হেনগৎনবা তুরিজম অমসুং পব্লিক ব্রোদকাস্তিং এজেন্সীশিংগী মরক্ত মতেং পীন্নবা অমসুং কলচরগী থৌরমশিং পীথোক-পীশিন তৌননবা য়ানচেশিং খুৎয়েক পীনরে।

মরূপশিং,

মালেমগী লুপশিংদা ভারত অমসুং আর্জেন্তিনা মতেং পীনরি। মালেমগী শান্তি, সেক্যুরিতী, শেন-থুম চাউখৎপা অমসুং খুন্নাইগী চাউখৎপা পুরক্নবা মালেমগী লুপশিং নৌনা শেমদোকপগী তঙাইফদবা অদু ঐখোয়না পাম্লি। ভারতনা মিসাইল তেক্নোলোজী কন্ত্রোল রেজিম, ৱাসেনর এরেঞ্জমেন্ত, ওস্ত্রেলিয়া গ্রুপ, ন্যুক্লিয়র সপ্লায়র গ্রুপকী মেম্বর ওইবদা আর্জেন্তিনানা কন্না শৌগৎলি। সাউথ-সাউথ কোওপরেসন অসি ঐখোয়না য়াম্না মরুওইনা লৌরি। ২০১৯দা বিউনোস আইরিসতা য়ু এনগী সাউদ-সাউদ কোওপরেসনগী অৱাংবা থাক্কী মীফমদা ভারত শরুক য়াগদবা অসিদা ঐনা হরাওবা ফোংদোক্লি। আর্জেন্তিনানা ইন্তর্নেস্নেল সোলর এলাইন্সকী অনৌবা মেম্বর ওইরকপদা ঐনা হরাওবা ফোংদোক্লি।

ইকায়খুম্নজরবা,

ভারত্তা লাক্নবা ঐনা চেবাউ পীবদা য়াবগীদমক ঐনা অমুক হন্না থাগৎচরি। মসিগী খোঙচৎ অসি অদোম অমসুং অদোমগী ইমু-মনুংদা নুংঙাইবা ফাওবীগনি হায়না ঐনা থাজজৈ।

থাগৎচরি।