ভারতকী প্রধানমন্ত্রী

ঙসি সেবা তির্থদা ইন্দিয়ান ফোরেন সর্বিসেস (আই এফ এস) গী ২০২৫ বেতচগী ওফিসার ত্রেনিশিংনা প্রধান মন্ত্রী শ্রী নরেন্দ্র মোদী উনখ্রে। কাংবু অদুদা লৈবাক অসিগী তোঙান তোঙানবা রাজ্যশিং অমসুং য়ু.তিশিংদগী লাকপা আই.এফ.এস ওফিসার ত্রেনি ৫০ য়াওখি।

উনবা অদুদা, মখোয়না থবক তৌরবা লৈবাকশিংগী মীয়ামগা য়াম্না নকশিন্ননা থবক তৌনবা অমসুং লমদম অদুগী মীয়ামদা ভারতকী মরমদা মপুংফানা খঙহন্নবা নহা ওইরিবা দিপ্লোমেতশিংদা প্রধান মন্ত্রীনা খঙহনখ্রে। প্রধান মন্ত্রীনা হায়খি মদুদি ভারতকী মিসনশিংনা সরকারশিং অমসুং ইন্সতিতুসনশিং খক্তগা নত্তনা মীয়ামগা লৈনবা মরীশিং হেন্না ফগৎহনগদবনি। ওফিসার ত্রেনিশিংনা মমাংঙৈদগী চৎন্দুনা লাক্লবা দিপ্লোমেতিক সর্কলশিংগী মথক্ত মখোয়গী নেতৱার্কশিং চাউথোকহনগদবনি অমসুং মীয়ামগা লোয়ননা অচেৎপা মরী থমগদবনি। ভারতনা মালেমগী লৈবাকশিংগা থবক তৌমিন্নবা মখা তানা মপাঙ্গল কনখৎহন্নবা ভারতকী সভেত্যগী মপাঙ্গল অসি তেক্নোলোজি, ইন্নোবেসন অমসুং ই-পাউ ফজনা ফাওনবগা পুনশিনগদবনি।

ভারতনা মালেমগা শেন-থুমগী থবকশিং পায়খৎনবগীদমক মথৌ হাপখৎনবা মীহুৎশিং ওইনা থবক তৌনবা ওফিসার ত্রেনিশিংদা প্রধান মন্ত্রীনা খঙহনখ্রে। ভারতকী মিসনশিংদা দিজিতেলগী থবকশিং মপাঙ্গল কনখৎহনবগী মরুওইবা প্রধান মন্ত্রীনা থমখ্রে। মহাক্না হায়খি মদুদি মীয়াম্না ইন্সতিতুৎ অমগা পাউ ফাওন্নবা অহানবা থোঙ্গাল অসি ৱেবসাইত অমনি অমসুং হেন্না ফজনা, য়াংনা অমসুং মীয়ামগী য়াইফনবা অতোপ্পা থবকশিং অমসুং কন্সুলারগী থবকশিং পাংথোক্নবা তেক্নোলোজি হেন্না শীজিন্নগদবনি।

লৈবাক অসিগী সভেত্য, নাৎ অমসুং লম্মিৎ-তুম্মিৎকী ফজবশিং উৎতুনা ভারত মালেমগী পুক্নিং চিংশিন্নিঙাই ওইরবা লমকোয়ফম অমা ওইহন্নবা মাইকৈদা থবক তৌনবা ওফিসার ত্রেনিশিংদা প্রধান মন্ত্রীনা তকশিনখ্রে। মহাক্না হায়খি মদুদি মালেম শীনবা থুংবগী নহারোলশিং ভারতকী মরমদা হেন্না পামহন্নবা “ভারত কো জানিয়ে” (ভারত খঙউ) কুইজ পাংথোক্কদবনি অমসুং অসিগুম্বা থবকশিং হেন্না পাংথোক্নবা এ.আই অমসুং গেম শীজিন্নগদবনি।

ত্রেনিং অমসুং ভারত দর্শন্দগী মখোয়না থেংনরকপশিং ওফিসার ত্রেনিশিংনা পাউদমখি। ভারতকী সভেত্য অমসুং নাৎকা মালেমগী লৈনবা মরীশিং খঙবগী মরুওইবগী মতাংদসু মখোয়না ফোঙদোকখি।

***