ভারতকী প্রধানমন্ত্রী

অহানবা মক্তদা ঐহাক্না লৈবাক মীয়াম্বু ঐখোয়গী বৈগ্যানিকশিংগী চাওনা মায় পাকপা অমগীদমক থাগৎপা ফোংদোকচরি । ঙাইহাক্কী মমাংদা ইসরোনা পিএসএলভি-সি৪০ মায় পাক্না থাগৎখ্রে ।

পিএসএলভি শিজিন্নদুনা কার্তোসেত-২ সেরিজকী সেতেলাইত য়াওনা অপুন্বা সেতেলাইত ৩১ শুন্দ্রংদা থাগৎখ্রে । মদুগী মনুংদা সেতেলাইত ২৮দি অতোপ্পা লৈবাকশিংগীনি । ঙসি ইসরোনা অতোপ্পা রেকোর্দ অমগা থমলে । ঙসিগী অসিনা ইসরোনা থাগৎপা চামা শুবা রোকেতশু ওইরি ।

ঙসিগী ইসরোগী মায় পাকপা অসিনা লৈবাক অসিগী লৌমীশিং, ঙামীশিং, বৈগ্যানিকশিংদা মতেং ওইরগনি । মায় পাকপা অসিনা অনৌবা ভারতকী মায়কৈরোমদা চংশিল্লি । ঐখোয়গী লৈবাক অসিগী মগুণ হেঙ্গৎহল্লিবা অমসুং লৈবাক্কী শেল-থুমগী ফিভম ফগৎহনবদা শরুক য়ারিবা ইসরোগী বৈগ্যানিকশিংবু ঐহাক্না অমুক হন্না নুঙাইবা ফোংদোকচরি ।

অনৌবা চহি অসিদা, বিবেকানন্দ জয়েন্তি অসিদা, নেস্নেল য়ুথ দে অসিদা ঐখোয়গী বৈগ্যানিকশিংনা লৈবাক মীয়ামদা মমল নাইদবা খুদোল অমা তম্লরে । 

মরুপশা, ময়ামগা হকথেংননা উন্নরগা ৱারি শান্নবা অদু ঐহাক পাম্বনি,

হৌজিক অপিকপা ভারত অমা গ্রেতর নোইদা তিল্লরিবা অসিদা,

এক ভারত-শ্রেষ্ঠ ভারতকী ৱাখল্লোন অদু উবা ফংলি, অসিগুম্লবা অপিকপা ভারত অসিবু হকথেংননা উজবা ফংজরম্লগদি নুঙাইগদবনি ।

অদুবু খুদোং চাদবা খরা লৈবনা তেক্নোলোজীগী মতেংনা ময়ামগা উন্নজরে ।

অসিগুম্বা মখলগী থৌরমশিংদা ঐহাক ইশামক য়ৌরকপা ঙমদ্রগশু, মফম অদুদা করি করি পাংথোকখি, করি খন্ন-নৈনখি, করি করম্বা ৱারেপ লৌখিবগে হায়বশিং অদু ঐহাক চপ চানা খংজিল্লি । মফম অসিদা ময়াম পুম্নমক্না খন্ন-নৈনগদৌরিবশিং অদু খংননবশু ঐহাক হোৎনগনি ।

মরূপশিং, ঙসিদগী নেস্নেল য়ুথ ফেস্তিবেলশু হৌগদৌরি । নেস্নেল য়ুথ এৱার্দ ফংলবা মহৈরোইশিং অমসুং সংস্থানশিংবু ঐহাক্না থাগৎচরি, মখোয়গী মফমদা য়াইফ পাওজেল পিজরি ।

লাক্কদৌরিবা নুমীৎ মরিনি অসি মফম অসিদা থৌরম কয়া অমা পাংথোক্লগনি হায়না ইফমদা খংহনবিরক্লে, নেস্নেল য়ুথ পার্লিয়ামেন্তশু পাংথোক্কদৌরি । হন্দক্কী “মন কী বাত” থৌরমদা জিলা খুদিংমক্তা মোক পার্লিয়ামেন্ত পাংথোক্নবা ৱাফম থমখি । মসিনা ৱাখল্লোন অদুগী শরুক অমা ওইরগনি ।

ন্যু ইন্দিয়াগী ওইবা মরমশিংদা খন্ন-নৈন্নবা, ৱারেপ লৌনবা খ্বাইদগী ফবা তঞ্জা অদু লাক্লে । হন্দক্কী অসিনা ২২শুবা ফেস্তিবেলনি, ২৫শুবা য়ুথ ফেস্তিবেল পাংথোকপা মতমদা মদুগী মওং মতৌ অদু করম তৌহনগনি হায়বদুগী মতাংদশু খন্ন-নৈনবিবা অদুনি ঐহাক্না পামজরিবা । মতৌ অসুম্না ২০২২দা লৈবাক অসিনা নিং তম্বা ফংখিবগী ৭৫শুবা চহি পালন পাংথোক্কদৌরি, চহি অদুদা য়ুথ ফেস্তিবেল অসি মতৌ করম্না পাংথোক্কদগে হাবগী মতাংদশু ময়াম্না খন্ন-নৈনবিয়ু ।

ঐহাক্কী নহা ওইরিবা মরূপশিং, হন্দক্কী থৌরম অসিগী থিম অসি “সংকল্প সে সিদ্ধি” হায়বা অসিনি । হৌখিবা থা ৬-৭ অসিদা ৱাহৈ অসি ময়াম্না তোয়না তাবিরম্লগনি । সংকল্প সে সিদ্ধি, মসিবু করিনো? দাউনলোদ তৌরগা ইনস্তোল তৌরগা শিজিন্নবা য়াবা মোবাইল এপ্লিকেসন অমা ওইরজাৎলা । অদুনা ঙসিদি ঐহাক্না ময়ামদা সংকল্প অমসুং সিদ্ধিগী মতাংদা ৱাফম খরা থমজগে ।

মরূপশিং, ইং ২০২২দা ঐখোয়গী লৈবাক অসিনা নিং তম্বা ফংখিবা চহি ৭৫ মপুং ফারগনি । ময়াম্না নিং-তম লানগী মতাংদা তারুবা পারুবা খক্তনি, চহিগী খেৎনবা লৈরবশু হিরম অসিদদি ময়ামগা ঐহাক্কা খেৎনবা লৈতে ।

ঐহাক্কী নহা ওইরিবা মরূপশিং, নিং-তম্বগী লানফমদা ঐখোয় শরুক য়াখিদে, মরম অদুনা মতম অদুদা নিং-তম্বদা ঙাওজখিবশিং অদুনা মংবিরম্বা মংলান অদু মংফাওহন্নবা হোৎনবা অসি ঐখোয়গী অচৌবা ইথৌদাং অমনি ।

জেল মনুংদা ব্রিতিশ পুলিসকী মীওৎ মীনৈ খাংখিবা ঐখোয়গী থৌনা ফরবা লান্মীশিং অদুনা মংবিরম্বা ভারতকী মংলান অদু মপুং ফাহনবা ঐখোয় পুম্নমক্কী ইথৌদাংনি । ঙসিগী থৌরম লোইরবা মতুং নুমিদাং তুম্বা চংবা মতমদা ঙাইহাক্তং খন্থবিয়ু । অদোম্না অহোংবা পুরকপা পাম্লিবা অদোমগী অকোইবদা থোক্লিবা থৌদোকশিং অদু খন্থবিয়ু ।

মরূপশিং, ময়াম্না হৌজিক লৈরিবা য়ুনিবর্সিতী অসিগী মমিং গৌতম বুদ্ধ কৌই । ময়াম্না হৌজিক লৈরিবা গ্রেতর নোইদা শহর অসিগী মমিংশু গৌতম বুদ্ধ নগর কৌই । মরম অদুনা ঐহাক ময়ামগী মফমদা গৌতম বুদ্ধগা মরি লৈনবা ৱারি মচা অমা লিজগে । অতেনবা ৱারিনি, অদুক হকনা শাংবা নত্তে ।

অমুকখক ভগবান বুদ্ধগী মফমদা মহাক্কী তুংইনবা অমনা ৱাহং অমখক হংজখি মদুদি অদোমগী মফমদা মহৈ মশিং তম্লিবা পুম্নমক মঙাল ফংগদ্রা? ভগবান বুদ্ধনা পাওখুম পিরকখি- ফংলোই, খর অমনা ফংগনি, খরা অমনা ফংলোই । তুংইনবা অদুনা হংজরম্মী- মতৌ করম্না? মতম অদুদা ভগবান্না হায়রক্লম্মী মদুদি ঐহাক্না তাকপি তম্বিরিবা অসিবু অচুম্বা মওংদা লৌশিনবা ঙম্বা মখোয় অদু মঙাল ফংবা ঙমগনি, লেমহৌরিবশিং অদুনা লমুক্নদুনা লৈহৌগনি ।

মরূপশিং, গুরু অমখক্তদগী মহৈ অমখক্তমক ফংগনি, অদুবু অদোম্না মদু মতৌ করম্না লৌশিল্লি হায়বা অদু অদোমগী মায় পাকপা অমসুং মায়থিবনা লেপ্পি । কৌরব অমসুং পান্দবশিংবু য়েংবিয়ু, অনিমক্কী গুরুদি অমখক্তা ওইরম্মী । অনিমক্না চপ মান্নবা মহৈ ফংলম্মী, অদুবু অনিমক্কী শাজৎ লিচৎ কয়াদা খেৎনরিবা । মদুগী মরমদি কৌরব অমসুং পান্দবকী ৱাখল্লোন অদু তোঙান তোঙানলম্মী । পুন্সি খোংচৎতা অদোম্বু তাকপি তম্বিরকপা কয়া অমা থেংনগনি, অদুবু মহৈ মশিং তম্লগা করম্বা লম্বীদা চৎকনি, করম্বা মখলগী ৱারেপ লৌগনি হায়বা অদু ইশানা লেপচগদবনি ।

মসিমক গৌতম বুদ্ধগী “অপ্প দীপো ভব:” হায়বা ৱাফমদুনি । ইশাগী মৈরি ইশানা চুখৎচগদবনি । ইশাগী ৱারেপ ইশানা লৌজগদবনি । কনানশু নফমদা ৱাশকপা লাকলোই, কনানশু নিংশিংবিরকলোই । পুম্নমক নশা নথন্তা পাংথোকচগদবনি ।

ইচল ইচে অমসুং ইচিল ইনাওশিং, স্বামী বিবেকানন্দনা হায়বিরম্মী মদুদি হৌখ্রবগী নিঙমদবা তৌরুদনা তুংগী পান্দম অদুগী মায়কৈরোমদা থবক তৌরিবা অদু নহারোলশিংনি । ঙসি নহারোলশিংনা তৌরিবা থবকশিং অসিনা লৈবাক্কী তুংদা ওইরক্কদবা মওং মতৌ অদু লেপ্পি ।

মরূপশিং, মীপুম খুদিংমক মতম অমা নত্রগা অমদা মশা মথন্তনা থবক তৌবা তারকই । নখোয়গী অসিগুম্লবা খোংচৎ অসিদা ভারত সরকার অমসুং হিন্দুস্থান অপুনবনা নখোয়গা লোয়ননা লেপ্লি । মশানা হোৎনজদুনা করিগুম্বা খরা পাংথোক্নিংলিবা নহাশিং অদুদা মখল খুদিংগী মতেং ফংহনবা অদু ঐহাক্না পাম্মি ।

মহাক্না থবক হৌদোকপা মতমদা মঙোন্দা বেঙ্ক গরেন্তীগী অৱাবা মায়োক্নহন্দবা, তেক্সকী অৱাবা লৈহন্দবা, মখল মখা কয়াগী চে চাংগী অৱাবা লৈহন্দবা অসিনি। ঐখোয়গী নহাশিংবু থবক পীবা ঙম্বা ওইহনবা, অনৌবা খোংথাং পায়খৎনবা মাংলোমদা খোং থাংজিল্লকপা ওইহনবা অদু ঐহাক পাম্মী মরম অদুনা মায়কৈ অসোমদা লেপ্পা লৈতনা থবক তৌরি । মরূপশিং, ঐখোয়গী সরকার অসিনা হৌজিক ফাওবদা প্রধানমন্ত্রী মুদ্রা য়োজনাগী মখাদা চাওরাক্না মীওই কোতী ১০গী লোন অয়াবা পিখ্রে ।

বেঙ্ক গরেন্তী য়াওদনা মীয়ামদা কোতী লাখ ৪ হেনবা শেনফম পিথখ্রে । খন্থবিয়ু, বেঙ্ক গরেন্তী য়াওদনা, শেনফম অদু করম্না শিংলক্কনি হংলুবা তৌদনা, কোতী লাখ ৪ হেনবা শেনফম মীয়ামদা পিথখ্রে ।

শেনফমশিং অসিনা খুঙ্গংশিংদা, শহরশিংদা, মীয়াম্না মশাগী ওইবা ললোন ইতিক খরা খরা তৌরি । মখোয়গী মংলান অদু মপুং ফাহন্দুনা থবক পিবা ঙম্বা ওইরি ।

ইচল ইচে অমসুং ইচিল ইনাওশিং, সরকারনা পায়খৎলিবা চাওরবা প্রোজেক্ত অসিগী হৌরকফম অসি শুপ্নগী অমা খক্তনি । নখোয়দা, লৈবাক্কী নহাশিংদা থাজবা থম্বনি । ঐখোয়না থাজবা থম্মী মদুদি লৈবাক অসিগী নহাশিংনা করিগুম্বা অমা পাংথোক্কে হায়না লেপখিবদা মদু শোয়দনা পাংথোকই । ইনর্জীনা থন্না য়াওরবা অসিগুম্লবা নহাশিং লৈবাক অসিগী কাচিন কোয়া থুংনা লৈরি । কনাগুম্বা অমনা চিংথক্তগী চেনথরক্লিবা অপিকপা ইচেলদগী মৈ পুথোক্লি, কনাগুম্বা অমনা অমোৎ অকায়দগী য়ুম শান্নবা পোৎ চৈ শেম্লি, কনাগুম্বা অমনা তেক্নোলোজী শিজিন্নদুনা খুঙ্গংশিংদা হকশেলগী খুদোংচাবা ফংহল্লি, কনাগুম্বা অমনা মশাগী লৌবুক্তা ফুদ প্রোসেসিং য়ুনিৎ লিংখৎলি ।

মরূপশিং, ঙসিগী মথৌতারিবশিং অসিগী মতুং ইন্না স্কিল ত্রেনিং ফংহন্নবশু সরকারনা পুক্নিং চংলি । স্কিলগী ৱাফম অসিবু মমাংদা সরকার অমত্তনা লুম্না লৌখিবা লৈব্রা । মমাংদদি স্কিল অমসুং এদুকেসনগী মরক্তা খেৎনবা হংলুবদা তুমিন্না লৈনরম্মী ।

ইচল ইচে অমসুং ইচিল ইনাওশিং, এরোপ্লেন্না মতৌ করম্না পাইবগে হায়দুনা লাইরিক্তা কুপ্না তম্লিবা অদু এদুকেসন্নি, অদুবু এরোপ্লেন পাইদুনা চৎলিবা অদুনা স্কিলনি । এদুকেসন খক্তমক খংলগা স্কিল য়াওদ্রবদি থবক ফংবদা অৱাবা মায়োক্নৈ । মরম অদুনা ঐখোয়না স্কিল হেঙ্গৎহনবদা মীৎয়েং থম্দুনা মাংলোমদা চংশিল্লি । নহাশিংবু এদুকেসনগা লোয়ননা স্কিলগী ত্রেনিং ফংহন্নবা মীৎয়েং থম্লি ।  

স্কিল ইন্দিয়া মিশনগী মখাদা নহারোল লাখ কয়াদা ত্রেনিং পিখ্রে । সরকার অসিনা লৈবাক্কী মফম খুদিংদা প্রধানমন্ত্রী কৌশল কেন্দ্রশিং লিংখৎলি । ইন্দিয়া ইন্তরনেস্নেল স্কিল সেন্তরশু হাংদোক্কদৌরে । মশিং য়াম্লবা মল্তি স্কিল ত্রেনিং ইনস্তিত্যুতশিংদশু থবক পায়খৎলি । অহানবা ওইনা নহাশিংবু এপ্রেন্তিসশিপ পিরিবা কম্পেনিশিংদশু শেলগী তেংবাং পিরি । কম্পেনিশিংনা মহৈরোইশিংদা এপ্রেন্তিসশিপকী পিরিবা শেনফম অদুগী শরুক খরা সরকারগী মায়কৈদগী কম্পেনিশিংদা পিরি ।

নেস্নেল এপ্রেন্তিসশিপ স্কীমগী মখাদা হৌজিকফাওবদা চাওরাক্না নহারোল লাখ ৭ রেজিস্তার তৌরে । লাক্কদৌরিবা চহি অনি অহুম অসিদা নহারোল লাখ ৫০বু এপ্রেন্তিসশিপ ত্রেনিং ফংহন্নবা সরকারনা পান্দম থম্লি । প্রধানমন্ত্রী য়ুবা য়োজনাগী মখাদশু সংস্থান লিশিং অহুম হেনবদা মহৈরোইশিংবু ত্রেনিং পিবগী থবক চৎথরি ।

মরূপশিং, ঙসিগী নহাশিং অসি ঙাইঙমদে হায়না মীওই খরনা হায়রি । ঐহাক্না হায়নিংলিবদি ৱাফম অসিনা ঙসিগী নহারোলশিংদা অনৌবা ৱাখল্লোনগী মরম অমা ওইরকই । স্বচ্ছ ভারত অভিয়ান ওইগেরা, বেতী বচাও-বেতী পরাও অভিয়ান ওইগেরা, ৱেস্ত তু ৱেল্থ ওইগেরা, নখোয়গী অনৌবা খোংথাংশিং অদু সমাজকা মরি লৈনরি । নখোয়গী অকোয়বদা লৈরিবা খুদোংচাদবশিং, মায়োক্নরিবশিং অদু নখোয়দগী হেন্না অতোপ্পা কনা অমত্তনা মমুৎ তানা খংবা ঙম্লোই । অনৌবা খোংথাংদা নখোয়গী থোইদোক হেন্দোকপা অদু ৱাখলদা থম্দুনা সরকার অসিনা “অতল ইনোভেশন মিশন” হৌদোক্লে । লৈবাক অসিগী স্কুলশিংদা, কোলেজশিংদা ইনোভেশনগী ইকো-সিস্তেম অমা শেম্নবা কন্না হোৎনরি । মহৈরোইশিংদা সাইন্তিফিক তেম্পর হেঙ্গৎহন্নবা অমসুং ক্রিয়েতিবিতীদা অচুম্বা প্লেতফোর্ম ফংহন্নবা লৈবাক পুম্বদা অতল তিনকরিং লেব চাওরাক্না লিশিং অনিগী ময়াদা অয়াবা পিখ্রে ।

মেন্যুফেকচরিং, ত্রান্সপোর্ত, ইনর্জী, এগ্রীকলচর, ৱাতর অমসুং সেনীতেশন অসিনচিংবা সেক্তরশিংদা ইনোভেশন-এন্তরপ্রিনরশিপ পুক্নিং থৌগৎনবা অতল  ইনকুবেশন সেন্তরশিংশু হাংদোকপা হৌরে । সেন্তর অসিনা অনৌবা স্তার্ত অপ্সতা শেলগী মতেংশু পিগনি অমসুং অচুম্বা লম্বীশু তাক্কনি ।

মরূপশিং, ঙসি ঐহাক্না ময়ামদা হায়নিংলিবদি শান্ন-খোৎনবশু পুন্সিগী শরুক অমা ওইহনবিয়ু । হৌজিক রাজ্যবর্ধনজী ফমফমলাংদা লেংশিনবিরি, মহাক মন্ত্রী কোন্না ওইরকপনি অহানবদা মহাক ওলেমপিক্তা শরুক য়ারুরবা অফাওবা সুত্তরনি ।

শান্নবুংনা ঐখোয়বু মায়থিবা করিনো খংহল্লি । শান্নবুংনা ঐখোয়বু ঐখোয়গী পান্দম অদু ফংনবা হোৎনবা তমবিরি । অপুনবগী ৱাখল্লোন অদু অহানবা ওইনা শান্নবুংদা উবা ফংই । পোবু পোরবশু কাবু কারবশু শান্নবুংদা তমখিবা স্পোর্তসমেন স্প্রিত অদু পুন্সি চুপ্পা কান্নবা পুরকই । শান্ন-খোৎনবগা ইরোইননা পুন্সিদা যোগশু তৌবিয়ু । যোগ তৌবনা নখোয়গী হকচাং অমসুং ৱাখল্লোন অদু হেন্না অফবা ওইগনি ।

য়ুথ ফেস্তিবেল অসিদা তোঙান তোঙানবা রাজ্যশিংদগী লাক্তুনা শরুক য়ারিবা মরূপশিং অদুগা লোয়নবিয়ু, ৱারি শান্নবিয়ু, মখোয়গী লোন তম্বিয়ু, মখোয়গী চাকচা য়ুথক, য়ুমলৈ কৈরৈ খংজিনবিয়ু । ঐহাক্না খংজবদা, ফেস্তিবেল অসিদা নখোয়না তম্লিবা খুদিংমক, নখোয়না শেম্লিবা মরিশিং অদু পুন্সি চুপ্পা নখোয়দা কান্নবা ওইগনি ।

অমুক হন্না ময়াম পুম্নমকপু য়ুথ দে অমসুং য়ুথ ফেস্তিবেলগী য়াইফ পাওজেলগা লোয়ননা স্বমী বিবেকানন্দবু অমুক হন্না ইকায় খুম্নজদুনা, মহাক্না তাকপিরম্বা লম্বী অদুদা মাংলোমদা চংশিন্নবা য়াইফ পাওজেল পিজবগা লোয়ননা মতাং অসিদা লোইশিনজরে । হন্না হন্না থাগৎচরি!!!

জয় হিন্দ!!!