ভারতকী প্রধানমন্ত্রী

ঐগী নুংশিরবা ইরৈচাশিং,

খুরুমজরি। মন কি বাত্ত অমুক হন্না তরাম্না ওকচরি, অদোমগী মফমদা য়াইফ পাউজেল পীজরি। চহি ২০২৬ থোঙজিলদা থিল্লরে অমসুং ঙসি, ঐনা অদোমদা ৱা ঙাংবদা, অপুনবা চহি অমগী নিংশিংবশিং ঐগী ৱাখলদা উংদুনা লৈরে- অঙকপা শক্তমশিং, খন্ন-নৈনবা কয়া, মাইপাকপা কয়ানা লৈবাক অসি অমতা ওইনা পুনখি। ২০২৫ না ভারতমচা খুদিংমক চাউথোকচবা ফাওহনখিবা তাঞ্জা কয়া ঐখোয়দা পীখি। লৈবাক্কী ঙাক-শেন, শান্নবা, সাইন্সকী অনৌবা থবকশিং নত্ত্রগা মালেমগী খ্বাইদগী চাউবা প্লেতফোর্মশিং ফাওবদা, মফম খুদিংমক্ত ভারতনা অকনবা মফম অমা কনখি।

চহি অসিদা, ‘ওপরেসন সিন্দুর’ ভারতমচা খুদিংমক চাউথোকচনবা খুদম অমা ওইখি। ঙসিগী ভারতনা মসিগী সেকুরিতিদা শন্তাইনবা তৌদে হায়বা ঙসিগী মালেম্না নাখৈ শেংনা উরে। ‘ওপরেসন সিন্দুর’ মনুংদা, লৈবাক্কী মফম কয়াদগী ইমা ভারত নুংশিবা অমসুং কৎথোকপগী শক্তম কয়া উবা ফংখি। মখোয় মশাগী ওইবা তোপ-তোপ্পা মওংশিংদা মীয়াম্না মখোয়গী অনিংবশিং ফোঙদোকখি।

মরুপশিং,

মসিগা চপ মান্নবা ৱাখল্লোন ‘বন্দে মাতারম’ চহি ১৫০ মপুংফারকপদসু উবা ফংখি। ‘#VandeMataram150’ গা লোয়ননা অদোমগী পাউজেলশিং অমসুং পাউতাকশিং থারক্নবা ঐনা অদোমদা হায়জরি। খোঙজং অসিদা লৈবাক অসিগী মীয়াম থৱায় য়াওনা শরুক য়ারে।

মরুপশিং,

শান্নবগী লমদা ২০২৫ অসিসু নিংশিংনিঙাই ওইবা চহি অমনি। ঐখোয়গী নুপাগী ক্রিকেত তিম্না আই.সি.সি চেম্পিয়ন ত্রোফি লৌখি। অহানবা ওইনা নুপীশিংগী ক্রিকেত তিম্না ৱার্ল্দ কপ লৌখি। নুপীশিংগী ব্লাইন্দ তি-২০ ৱার্ল্দ কপ থোইদুনা ভারতকী ইচানুপীশিংনা পুৱারি শেমখ্রে। এসিয়া কপ তি-২০দা মচু অহুমগী ফিরাল ৱাংনা পাইখি। ৱার্ল্দ চেম্পিয়নশিপতা পেরা-এথেলেতশিংনা মেদল কয়া ফংদুনা হোৎনবা অমসুং খাংবা কনবগী লম্বীদা কনা অমতনা অপনবা পীবা ঙমদে হায়বা উৎখ্রে। সাইন্স অমসুং স্পেসকী লমদসু ভারতনা অচৌবা থবক অমা পাংথোকখ্রে। সুভান্সু সুক্লা ইন্তরনেসনেল স্পেস ষ্টেসনদা চৎপা অহানবা ভারতমচা ওইরে। মহৌশাগী অকোয়বগী ফিবম ঙাক-শেন্নবা অমসুং লম্লক্কী শা-উচেকশিং ঙাক্নবগা মরী লৈনবা থবক কয়া ২০২৫ দা মশক থোক্নবা উবা ফংলে। হৌজিক ভারত্ত চিতা মশিং হেনগৎলক্তুনা ৩০ হেল্লে। ২০২৫ দা, লাইনিং, নাৎ অমসুং ভারতকী অঙকপা হেরিতেচ অমতা ওইনা পুনখি। চহি অসিগী অহৌবদা পাংথোকখিবা প্রায়াগ্রাজ মহাকুম্ভ মালেম শীনবা থুংনা অঙকপা পোক্নখি। চহি লোইশিল্লকপদা, অয়োধ্যাদা রাম মন্দিরদা ধৱাজারোহন থৌরম পাংথোক্তুনা ভারতমচা খুদিংমক চাউথোকচবা ফাওহল্লে। মীওই খুদিংমক্ত শ্বাদেসিগী হরাওবা উবা ফংলে। ভারতমচা অমগী হুমাংনা পুথোকপা অমসুং ভারতকী লৈবাক-লৈহাওগী মনম চেনবা পোৎথোকশিং খক্ত মীয়াম্না লৈরে। ঙসিদি, ২০২৫ না ভারত হেন্না থাজবা লৈহল্লে হায়না ঐনা চাউথোকচবা হায়রি। চহি অসিদা মফম কয়াদা ঐখোয়না মহৌশাগী ওইবা অমাং-অতা কয়া মায়োক্নখি হায়বা অচুম্বনি। অনৌবা থাজবশিং অমসুং অনৌবা ৱাশকশিংগা লোয়ননা ২০২৬ দা খোঙ থাংজিন্নবা হৌজিক লৈবাক অসিনা থৌরাং তৌরে।

ঐগী নুংশিরবা ইরৈচাশিং,

ঙসিদি অচৌবা থাজবা অমগা লোয়ননা মালেম্না ভারত্ত য়েংলি। ভারত্ত থাজবা থম্বগী অচৌবা মরমদি ঐখোয়গী যুব শক্তি অসিনি। সাইন্স, অনৌবা থবকশিং অমসুং তেক্নোলোজি পাক-থোক চাউথোকপগী লমদা ঐখোয়গী মাইপাকপশিং অসিনা মালেম শীনবা থুংনা লৈবাক অসি অঙকপা ফাওহল্লে।

মরুপশিং,

ভারতকী যুব শক্তিদা করিগুম্বা অনৌবা অমা পাংথোক্নবা পামজবা অমা য়াওরি অমসুং মখোয় চপ মান্ননা ৱাখল তারে। লৈবাক শেমগৎপদা কমদৌনা মখোয়না মখা তানা মতেং পাংগনি হায়না ঐগী মরুপ নহারোলশিংনা ময়াম্না তোইনা হংখি। কমদৌনা মখোয়না মখোয়গী অনৌবা ৱাখলশিং শরুক য়াগনি? কমদৌনা মখোয়না মখোয়গী অনৌবা ৱাখলশিং ঐঙোন্দা য়ৌহনগনি হায়না মখোয় কয়ানা হংখি। ঐখোয়গী নহা ওইরিবা মরুপশিংগী খৌরাংবা অসিগী পাউখুমদি ‘বিকসিত ভারত য়ং লিদর্স দাইলোগ’ নি। মসিগী অহানবা ইদিসন হৌখিবা চহিদা পাংথোকখ্রে অমসুং নুমিৎ খরগী মনুংদা মসিগী অনিশুবা ইদিসন পাংথোক্লগনি। মথং থাগী ১২ দা, শ্বামী বিবেকানন্দগী মপোক নুমিত্ত ‘নেসনেল য়ুথ দে’ পাংথোক্কনি। নুমিৎ অসিদা ‘য়ং লিদর্স দাইলোগ’ অমা পাংথোক্কনি অমসুং মসিদা ঐ শরুক য়াগনি। থৌরম অসিদা ইন্নোবেসন, হকচাং ফবা, ষ্টার্দঅপশিং অমসুং লৌউ-শিংউবগুম্বা মরুওইবা হিরমশিংদা ঐখোয়গী নহারোলশিংনা মখোয়গী অনৌবা ৱাখলশিং শরুক য়াগনি। থৌরম অসিগীদমক ঐ য়াম্না খৌরাংনা ঙাইরে।

মরুপশিং,

থৌরম অসিদা ঐখোয়গী নহারোলশিং শরুক য়াবা হেনগৎলকপা উবদা ঐ হরাওই। নুমিৎ খরগী মমাঙদা মসিগা মরী লৈনবা কুইজ চাংদম্নবা অমসু পাংথোকখ্রে। মসিদা নহারোল লাখ ৫০ হেন্না শরুক য়াখি। এসে চাংদম্নবা অমা পাংথোক্তুনা তোঙান তোঙানবা হিরমশিংদা মহৈরোয়শিংনা মখোয়গী ৱাখলশিং ফোঙদোকখি। চাংদম্নবা অসিদা তামিল নাদুনা অহানবা অমসুং উত্তর প্রদেসনা অনিশুবা তাখি।

মরুপশিং,

ঙসিদি লৈবাক অসিদা নহারোলশিংনা মখোয়গী হৈথোই-শিংথোইবা উৎথোক্নবা অনৌবা খুদোংচাবশিং ফংলে। মখোয়না তৌবা ঙম্বশিং অমসুং পামজবশিংগী মতুংইন্না নহারোলশিংনা মখোয়গী হৈথোই-শিংথোইবা উৎথোক্নবা মফম কয়া শেমগৎলে। অসিগুম্বা মফম অমা ‘স্মার্ত ইন্দিয়া হেক্কাথোন’ নি; অনৌবা ৱাখলশিং থবক ওইনা পাংথোক্নবা অতোপ্পা পাম্বৈ অমনি।

মরুপশিং,

থা অসিদা ‘স্মার্ত ইন্দিয়া হেক্কাথোন ২০২৫’ লোইশিনখ্রে। হেক্কাথোন মনুংদা সরকারগী ভিবাগ ৮০ হেনবগী খুদোংচাদবা ২৭০ হেনবদা মহৈরোয়শিং থবক তৌখি। ত্রাফিক্কা মরী লৈনবা খুদোংচাদবশিংগুম্বা পুন্সিগা মরী লৈনবা অৱাবশিংগী পাম্বৈশিং মহৈরোয়শিংনা পুথোকখি। ‘স্মার্ত ত্রাফিক মেনেজমেন্ত’ গী মতাংদা নহারোলশিংনা নুংঙাইরবা ৱাফমশিং শরুক য়াখি। শেন-থুমগী নামথাক তৌবশিং অমসুং দিজিতেল এরেষ্টশিংগুম্বা খুদোংচাদবশিং কোকহন্নবগী মতাংদা নহারোলশিংনা মখোয়গী অনৌবা ৱাখলশিং পুথোকখি। পাউতাকশিং অদুদা খুঙ্গংশিংদা দিজিতেল বেঙ্কশিংগীদমক সাইবর সেকুরিতিগী থবকশিং য়াওবা য়ৌখি। লৌউ-শিংউগী থবকশিংগী অৱাবশিং কোক্নবা নহারোল কয়া থবক পায়খৎখি। হৌখিবা চহি ৭-৮ দা ‘স্মার্ত ইন্দিয়া হেক্কাথোন’ দা মহৈরোয় লাখ ১৩ হেন্না অমসুং মহৈলোয়শঙ ৬,০০০ হেন্না শরুক য়াখ্রে। খুদোংচাদবা চা কয়াগী পাম্বৈশিংসু নহারোলশিংনা পুথোক্লে। অসিগুম্বা হেক্কাথোনশিং মতম মতমগী পাংথোক্লি। অসিগুম্বা হেক্কাথোনশিং শরুক য়ানবা ঐনা ঐগী মরুপ নহারোলশিংদা তকশিল্লি।

মরুপশিং,

ঙসিগী পুন্সি তেক্নোলোজিনা চিংদুনা পুরে অমসুং চহি চা কয়াদা লাক্কদবা অহোংবশিং চহি খরা অহোংবা লাকপা উরে। রোবোতশিংনা মীওইবগী মহুৎশীল্লগদরা হায়না মীওই খরনা নুংনাংবা ফোঙদোক্লি। অসিগুম্বা অহোংবা লাক্লিবা অসিদা, মীওইবা চাউখৎনবা ঐখোয়গী থবকশিংগা শম্নবা অসি য়াম্না মরুওই। অনৌবা ৱাখল্লোন অমসুং অনৌবা থবকশিংগা লোয়ননা ঐখোয়গী তুংগী মীরোলশিংনা ঐখোয়গী নাৎকা শম্নবা অসিদা ঐ য়াম্না হরাওই।

মরুপশিং,

অদোম ইন্দিয়ান ইন্সতিতুৎ ওফ সাইন্সকী মমিং তারম্লগনি। রিছার্স অমসুং ইন্নোবেসন্না ইন্সতিতুৎ অসিগী মশক তাক্লি। চহি খরগী মমাংদা, লাইরিক তম্বা অমসুং থিজিনবগী মরক্ত ঈশৈগী মফম অমা পীগদবনি হায়না মহৈরোয় খরনা খনখি। মফম অদুদা অপীকপা ঈশৈগী ক্লাস অমা হৌখি। অচৌবা ফম্বাক অমা নত্ত্রগা অচৌবা শেনফম অমা লৈবা লৈতে। তপ্ন তপ্না, থবক অসি চাউখৎলকখি অমসুং ঙসিদি মসি ‘গীতাঞ্জলি আই.আই.এস’ হায়না খঙনরে। মসি মখা তানা ক্লাস অমা ওইদ্রে; মসি কেম্পসকী কলচরেল সেন্তর অমা ওইরে।

মফম অসিদা হিন্দুস্তানি ক্লাসিকেল ম্যুজিক, ফোক্কী চৎনবীশিং, ক্লাসিকেলগী থবকশিং লৈরে; মহৈরোয়শিং মফম অসিদা পুন্না ফম্লে অমসুং তম্লে। প্রোফেসারশিং লাকখি অমসুং মখোয়গী ইমুং-মনুংশিং শরুক য়াখি। ঙসিদি, মসিদা মীওই ২০০ হেন্না শরুক য়ারে। য়াম্না মরুওইবা অমনা মপান লৈবাকশিংদা চৎখিবশিং ওনলাইন্দা শরুক য়ারে অমসুং কাংবু অসিগী লংলাশিংদা য়াল্লি।

মরুপশিং,

কনাগুম্বা অমগী হৌরকফমগা শম্ননবা থবক অসি ভারত্ত মপান নাইদে। মালেমগী তোঙান তোঙানবা মফমশিংদা লৈরিবা ভারতমচাশিংসু মসিদা থৌদাং পাংথোক্লি। লৈবাক অসিগী ৱাংমদা ঐখোয়গী শক্তম উবগী অতোপ্পা খুদম দুবাইনি। মফম অদুনা লৈরিবা কন্নরা ইমুংশিংনা মখোয় মশাদা মরুওইবা ৱাহং অমা হংজরি: তেক্নোলোজিগী তাইবংদা ঐখোয়গী অঙাংশিং মাংজিল থাদুনা চৎলি, অদুবু মখোয়গী মখোয়গী লোলদগী নাথৈদবরা? মসিদগী ‘কন্নরা পাথসালে’ লিংখৎখি। অঙাংশিং কন্নরা তম্নবা, ইনবা অমসুং ঙাাংনবা থবক অমনি। ঙসিদি মসিদা অঙাং লিশিং অমা হেন্না শরুক য়ারে। তশেংনা, কন্নরা নাদু, নুদি নাম্মা হেম্মে।

 (লম অমসুং কন্নরা লোল ঐখোয়গী চাউথোকচবনি)

মরুপশিং,

থায়নগী হায়নবা ৱাফম অমা লৈরি: ‘নিংবু নিংলবদি, লম্বী অমা লৈ’। হায়নবা ৱাফম অসি অচুম্বনি হায়বা মনিপুরগী নহা ওইরিবা মোইরাংথোম সেথনা তাক্লে। মহাক চহি ৪০ শুদ্রি। মোইরাংথেম সেথনা লৈরিবা মনিপুরগী মনুং-হুঞ্জিনবা মফম অদু ইলেক্ত্রিসিতি ফংদবগী অচৌবা অৱাবা অমা থেংনৈ। খুদোংচাদবা অসি কোক্নবা, মহাক্না পাম্বৈ অমা অমা মীৎয়েং চঙখি অমসুং মহাক্না পাম্বৈ অদু সোলার পৱারদগী ফংখি। ঐখোয়গী মনিপুরদসু, সোলার ইনর্জি পুথোকপা য়াম্না লাই। মরম অদুনা সেথনা সোলার পেনেলশিং থম্নবা খোঙজং অমা হৌদোকখি অমসুং খোঙজং অসিনা মরম ওইদুনা, ঙসি লমদম অসিগী য়ুম চা কয়া সোলার ইনর্জি ফংলে। হকশেল অমসুং হিংনবগী লম্বীশিং ফগৎনবা মহাক্না সোলার পৱার শীজিন্নবা অসি তোপ-তোপ্পনি। ঙসিদি, মহাক্কী থবকশিং অসিনা মরম ওইদুনা, মনিপুরগী হেল্থ সেন্তর কয়াসু সোলার পৱার ফংলে

থবক অসিদগী মনিপুরগী নুপীশিংসু কান্নবা কয়া ফংলে। থবক অসিগী খুৎথাংদা লৈকায়গী ঙামীশিং অমসুং খুৎহৈবশিংসু মতেং পাংলে।

মরুপশিং,

ঙসিদি, পি.এম সুর্য়া ঘর মুফ বিজলি য়োজনাগী মখাদা, সোলার পেনেলশিং থম্নবগীদমক বেনিফিসরি ইমুং অমমমদা লুপা ৭৫,০০০ দগী ৮০,০০০ ফাওবা সরকারনা পীরে। মোইরাংথেমগী থবকশিং মশাগী ওইজরবসু, মখোয়না সোলার পৱারগা মরী লৈনবা খোঙজং খুদিংমক অনৌবা ইনোৎ অমা পীরে। ‘মন কি বাত’ কী খুৎথাংদা ঐনা মহাক্কী মফমদা ঐগী য়াইফ পাউজেল পীজরি।

ঐগী নুংশিরবা ইরৈচাশিং,

হৌজিক ঐখোয় জম্মু অমসুং কাস্মিরদা ওনশিল্লসি। জম্মু অমসুং কাস্মিরগী ইনাকখুল্লবা নাৎ অমসুং পুৱারিনা ভারতমচাশিং চাউথোকচহল্লিবা অসিগী মতাংদা ঐনা ৱাফম অমা ফোঙদোক্নিংই। জম্মু অমসুং কাস্মিরগী বরামুল্লাদা জেহানপোরা কৌবা মফম অমা লৈ। চহি কয়া, মীয়াম্না মফম অদুদা অৱাংবা লৈপুং খর উদুনা লাকখি। মখোয় ইচম চম্বা লৈপুংশিং নত্তে, মখোয় করিনো হায়বা কনা অমতা খঙদে। মতম অদুনা, নোংমদা, আর্কিওলোজিষ্ট অমনা মখোয় থেংনখি।

মহাক্না মফম অদু য়াম্না চেকশিন্নবা য়েংবা মতমদা, লৈপুংশিং অদু করিগুম্বা খরদা তোঙান্নবা উবা ফংখি। মখা তারকপদা, হায়রিবা লৈপুংশিং অদু সাইন্তিফিক ওইনা থিজিনবা হৌখি। মথক্তগী ফোতোশিং লৌনবা দ্রোনশিং শীজিন্নখি অমসুং লম অদুগী মেপ শেমখি। মফম অদুদা অঙকপা খর ফংবা হৌখি। হায়রিবা লৈপুংশিং অদু মহৌশাগী ওইবা নত্তে হায়বা খঙবা ঙমখি। মখোয় মীওইবনা শেম্বা অচৌবা ষ্ট্রকচর অমগী লেমহৌবশিংনি। চৈরক অসিদা, অতোপ্পা য়াম্না নুংঙাইবা মরী লৈনবা অমা থোক্লকখি।

কাস্মিরদগী কিমি লিশিং কয়া থাপ্না, ফ্রান্সকী ম্যুজিয়ম অমগী আর্কাইবসতা অরিবা, ময়েক শেংদবা ফোতোগ্রাফ অমা ফংখি। বরামুল্লাগী ফোতোগ্রাফ অদুদা বুদ্ধিষ্ট ষ্টুপা অহুম উবা ফংখি। মতমগী মতুংইন্না, কাস্মিরগী ফজরবা হৌদ্রবা মতম ঐখোয়দা মশক তাকখি। মসি চহি লিশিং ২ রোমগী পুৱারিনি। কাস্মিরগী জেহানপোরাগী বুদ্ধিষ্ট কমপ্লেক্স অসিনা কাস্মিরগী হৌখিবা মতম অমসুং মসিগী ইনাকখুল্লবা শক্তম ঐখোয়দা নিংশিংহল্লে।

ঐগী নুংশিরবা ইরৈচাশিং,

ভারত্তগী কিমি লিশিং কয়া থাপ্না পায়খৎপা থবক অমা ঐনা হৌজিক অদোমগী মফমদা ফোঙদোকপা পাম্মী। ফিজিদা, ভারতকী লোল অমসুং নাৎ শন্দোক্নবা থাগৎনিঙাই ওইবা থবক অমা পায়খৎলে। মতম অদুদা লৈরিবা অনৌবা তামিল মীরোলশিং তামিল লোল খঙনবা মখা তানা থবক কয়া পায়খৎলে। হৌখিবা থাদা, ফিজিগী রাকি-রাকিদা স্কুল অমদা অহানবা ওইনা তামিল দে থৌরম পাংথোকখ্রে। নুমিৎ অদুদা, মখোয়না মনিংতম্না মখোয়গী লোল ঙাংনবগী মফম অমা অঙাংশিংনা ফংখি। অঙাংশিংনা তামিলদা শৈরেংশিং থিখি, ৱা ঙাংখি অমসুং থাজবগা লোয়ননা ফম্বাক্ত মখোয়গী নাৎ উৎখি।

মরুপশিং,

তামিল লোল চাউখৎনবা লৈবাক মনুংদসু লেপ্তনা থবক কয়া পায়খৎলি। নুমিৎ খরগী মমাংদা, ঐগী সংসদকী কেন্দ্র কাসিদা মরিশুবা ‘কাসি তামিল শঙ্গমম’ পাংথোকখ্রে। হৌজিক ঐনা খোঞ্জেল মতেক অমা খোঙগনি। মসি তাবীয়ু অমসুং তামিল ঙাংনবা হোৎনরিবা অঙাংশিং অসি কদাইদনো হায়বা খঙবা ঙম্বরা য়েংউ?

(খোঞ্জেল মতেক) # (পায়াল)

মরুপশিং,

তামিলদা ফজনা ঙাংলিবা অঙাংশিং অসি বরানাসীগী কাসিদগী হায়বা খঙবদা অদোম অঙকপা ফাওগনি। মখোয়গী মমালোল হিন্দীনি, অদুবু মখোয়না তামিল লোল পাম্বদগী তামিল তম্নবা ইথিল পীখি। বারানাসীদা পাংথোকপা চহি অসিগী কাসি তামিল শঙ্গমমদা তামিল লোল তম্নবা অখন্নবা থবক পায়খৎখি। ‘তামিল তমসি-তামিল করাকালাম’ গী মখাদা বারানাসীগী স্কুল ৫০ হেনবদা অখন্নবা কেম্পেনশিংসু চৎথখি।

মদুগী ফল খোঞ্জেল মতেক অসিদা তাবা ফংগনি।

(খোঞ্জেল মতেক) # (বৈষ্ণবী)

মরুপশিং,

তামিল মালেমগী খ্বাইদগী লিরবা লোলনি। তামিল সাহিত্যসু য়াম্না ইনাকখুল্লি। কাসি তামিল শঙ্গমম শরুক য়ানবা মন কি বাত্ত ঐনা অদোমগী মফমদা হায়জরি। অঙাংশিং অমসুং নহারোলশিংগী মরক্ত ঙসি লৈবাক্কী মফম কয়াদা অমুক হন্না তামিল লোল পাম্নরকপদা ঐ হরাওই- মসি লোলগী শক্তিনি, মসি ভারতকী অপুনবনি।

মরুপশিং,

মথং থাদা ঐখোয় লৈবাক অসিগী ৭৭ শুবা গনতন্ত্র দিবস থৌরম পাংথোক্কনি। অসিগুম্বা থৌরমশিং লাকপদা, নিংতম্ব লান্মীশিং অমসুং সংবিধান শেমখিবশিংগী মফমদা তৌবীমল খঙবা উৎনবা ঐখোয়গী থম্মোয়শিং পীক থল্লে। নিংতম্বা ফংনবগীদমক ঐখোয়গী লৈবাক মতম শাংনা লান্থেংনখি।

নিংতম ইহৌদা লৈবাক অসিগী মফম খুদিংমক্কী মীওই শরুক য়াখি অদুবু লাইবক থিবদি, নিংতম্বগী অথৌবশিং, নুপা অমসুং নুপী অনিমক মখোয়না ফংফম থোকপা ইকায়খুম্নবা ফংখিদে।

অসিগুম্বা নিংতম লান্মী অমা ওরিসাগী পর্বতি গিরি জিনি। জনুৱারি ২৬ দা মহাক্কী চহি ১০০ শুবা মপোক নুমিৎ পাংথোক্কনি। মশাগী চহি ১৬ শুবদা মহাক ভারত থাদোকউ ইহৌ শরুক য়াখি। নিংতম্বা ফংলবা তুংদা মীয়ামগী থবক অমসুং ত্রাইবেলগী য়াইফনবা মহাক্কী পুন্সি কৎথোকখি। মহাক্না ওর্ফানেজ কয়া লিংখৎখি। মহাক্কী পুক্নিং থৌগৎনিঙাই ওইরবা পুন্সিনা মখা তানা মীরোল কয়া ইথিল পীগনি।

“मूँ पार्वती गिरि जिंकु श्रद्धांजलि अर्पण करुछी |”

“ঐনা পর্বতি গিরিগী মফমদা ইকায়খুম্নবা উৎচরি”।

মরুপশিং,

ঐখোয়গী নাৎ অমসুং চৎনবীশিং কাউদবা হায়বসি ঐখোয়গী দাইত্বনি। ঐখোয়দা নিংতম্বা শীন্নরম্বা অথৌবা নুপা অমসুং নুপী অনিমক্কী ৱারি ঐখোয়না তুংগী মীরোলচদা শীন্নরমগদবনি। ঐখোয়না নিংতম্বা চহি ৭৫ শুবগী থৌরম পাংথোকখিবা অদু অদোম নিংশিংলমগনি, সরকারনা অখন্নবা ৱেবসাইত অমা শেমখি। মসিগী সেক্সন অমা ‘শকখঙবীদ্রবা অথৌবশিং’ দা কৎথোকখি। ঐখোয়গী লৈবাক নিংতম্বা ফংনবা মরুওইবা থৌদাং অমা লৌখিবা শক্নাইরবা মীওইশিংগী মরমদা খঙনবা ঙসি ফাওবা অদোম ৱেবসাইত অদুদা চঙবা য়াগনি।

ঐগী নুংশিরবা ইরৈচাশিং,

খুন্নাইগী য়াইফনবগা মরী লৈনবা মরুওইবা হিরমশিং খন্নবা মন কি বাতনা ঐখোয়গী অঙকপা খুদোংচাবা অমা পীরে। ঙসিদি, ঐখোয় পুম্নমক্না লুম্না লৌরিবা অসিগুম্বা ৱাফম অমা ঐনা ফোঙদোকপা পাম্মী।

আই.সি.এম.আরনা হন্দক রিপোর্ত অমা ফোঙখ্রে। ন্যুমোনিয়া অমসুং য়ু.তি.আইগুম্বা লায়না কয়াদা এন্তিবাইওতিকশিং কান্নদ্রে হায়না রিপোর্ত অদুনা ফোঙদোক্লি। মসি ঐখোয় পুম্নমক্কী অচৌবা নুঙনাংবগী মচাক অমনি। রিপোর্ত অদুগী মতুংইন্না, মসিগী অচৌবা মরম অমদি মীয়াম্না মথোং-মরম খঙদনা এন্তিবাইওতিকশিং শীজিন্নবদগীনি। এন্তিবাইওতিকশিং অসি পংচা চাবা য়াবা হিদাকশিং নত্তে। দোক্তরশিংগী পাউতাকশিং ফংলবা মতুংদা মখোয় চাগদবনি। হৌজিক, গুলি অমা চারগা মখোয়গী অনাবশিং ফরগনি হায়না মীয়াম্না থাজবা হৌরে। ইশা ইথন্তা হিদাক থাবগী থবক অসিগী লাপথোক্নবা ঐনা অদোমগী মফমদা হায়জরি। মসি এন্তিবাইওতিকশিং চাবা মতমদনা হেন্না মরুওই। ঐনা চম্না হায়নিংই: হিদাক-লাংথকশিংগী মরমদা খঙবা দরকার ওই অমসুং এন্তিবাইওতিকশিং দোক্তর দরকার ওই। থবকঅশিনা অদোমগী হকচাং ফগৎপদা য়াম্না কান্নগনি।

ঐগী নুংশিরবা ইরৈচাশিং,

ঐখোয়গী মমাংঙৈগী কলাশিংনা খুন্নাইগী ফিবম ফগৎহল্লি অমসুং মীয়ামগী শেন-থুম চাউখৎনবগী মরুওইবা গারি অমা ওইরে। অন্ধ্র প্রদেসকী নারাসাপুরাম জিলাগী লেস ক্রাফ লৈবাক শীনবা থুংনা মমিং চৎলে। ক্রাফ অসিদা মীরোল কয়াগী নুপীশিংগী খুৎশিং য়াওরি। য়াম্না খাংবা কনবা অমসুং চেকশিনবগা লোয়ননা লৈবাক অসিগী নুপীশিংনা মসি ঙাক-শেল্লি। ঙসিদি, মসিগী চৎনবী অসি অনৌবা মশক অমগা লোয়ননা মাঙলোমদা চঙশিল্লে। অন্ধ্র প্রদেস সরকার অমসুং নাবার্দনা পুন্না খুৎহৈবশিংদা অনৌবা দিজাইনশিং তম্বীরি, অফবা স্কিল ত্রেনিংশিং পীরে অমসুং মখোয় অনৌবা কৈথেলশিংগা শম্নহল্লে।

নারাসাপুরম লেসসু জি.আই তেগ ফংলে। ঙসিদি, মসিদগী পোৎথোক ৫০০ হেন্না শারে অমসুং মসিনা খুঙ্গং ২৫০ হেনবগী নুপী লাখ ১ রোম থবক পীরে।

মরুপশিং,

মখোয়গী থবক কন্না শুবনা মমাংঙৈগী কলাশিং য়োকখৎপা খক নত্তনা মসিগী খুৎথাংদা মফম অমগী মীওইশিংগী ফিবম ফগৎহনবা অসিগুম্বা মীওইশিং মশক তাক্নবা মফম অমা মন কি বাতসু ওইরে। মনিপুরগী চুরাচান্দপুরদা, মারগ্রেত রামথারসিয়েমগী থবকশিংসু চপ মান্নৈ। অচৌবা পান্দম অমগা লোয়ননা, মহাক্না মনিপুরগী মমাংঙৈগী পোৎথোকশিং- মফম অদুগী খুৎ-শা হৈবগী পোৎলমশিং, অমসুং ৱা অমসুং উদগী শাবা পোৎলমশিং উখি। মহাক্কী পান্দম অসিনা মরম ওইদুনা, খুৎহৈবা অমা ওইনা লৈরম্বা মীওই কয়াগী পুন্সি অহোংবা পুরক্নবা পাম্বৈ অমা মহাক্না ওইরে”। ঙসিদি, মারগ্রেত জিগী য়ুনিতনা মীওই ৫০ হেন্না থবক পীরে অমসুং মহাক্না কন্না হোৎনবদগী, দিল্লি য়াওনা লৈবাক্কী রাজ্য কয়াদা মহাক্কী পোৎলমশিংংগী কৈথেল অমা মহাক্না শেমগৎলে।

মরুপশিং,

মনিপুরগী অতোপ্পা খুদম অমনা সেনাপতি জিলাদগী চোখোনে কিচেনানি। মহাক্কী ইমুং হুপ্না লৌ উবগী থবক তৌই। কিচেনানা মমাংঙৈদগী তৌরক্লবা থবক অসি হেন্না ফগৎহনখি। মহাক্না পামজবা লৈ থাবগী থবক তৌখি। ঙসিদি, থবক অসিদগী, মহাক্না তোঙান তোঙানবা কৈথেলশিংদা য়োল্লে অমসুং মহাক্কী লৈকায়গী মীওইশিংসু ফিবম ফগৎলে। মমাংঙৈগী লৌশিং অসি অনৌবা মীৎয়েং অমগা লোয়ননা শীজিন্নরবদি, মসিনা শেন-থুম চাউখৎনবগী অচৌবা গারি অমা ওইবা য়াই হাববা মসিনা খুদম অমা ওইরে। করিগুম্বা অদোম্না মসিগা মান্নবা মাইপাকপগী ৱারিশিং তারবদি, চানবীদুনা মখোয়গী ৱারি ঐঙোন্দা লিবীয়ু।

মরুপশিং,

ঐখোয়গী লৈবাক্কী খ্বাইদগী ফজবদি চহি চুপ্পা লৈবাক্কী মফম অমা নত্ত্রগা মফম অমদা কুহ্মৈগী ফিবমদা লৈবা অসিনি। তোঙান তোঙানবা মখলগী কুহ্মৈশিং খক নত্তনা, তোঙান তোঙানবা রাজ্যশিংদা মফম অদুগী কুহ্মৈশিংসু লৈরি। মসিনা তাক্লিবদি, করিগুম্বা অদোম লম কোয়বা চৎনবা অদোম ৱাখল খল্লবদি, অদোম্না লৈবাক অসিগী মফম অমদা হেক্ত মতম অমদা হেক্ত অঙকপা থৌরমগী শেম-শাবা উবা ফংগনি। অসিগুম্বা কুহ্মৈ অমা কচ্ছগী রন্নদা পাংথোক্লি। চহি অসিদা, নবেম্বর ২৩ দগী কচ্ছ রন্ন কুহ্মৈ হৌদোকখ্রে অমসুং মসি ফেব্রুৱারি ২০ ফাওবা চৎথগনি। মফম অসিদা কচ্ছগী নাৎকী চৎনবীশিং, খুনুং ঈশৈ, জগোয় অমসুং হেন্দিক্রাফ উৎলি। কচ্ছগী অঙৌবা রন্ন য়েংবা অসিমক অপেনবা নুংঙাইবা অমনি। নুমিদাংদা অঙৌবা রন্নদা থাবল মঙালদা উবা শক্তম অঙকপনি। রন্ন উৎসবকী তেন্ত সিতি য়াম্না মমিং চৎলি। হৌখিবা থাদা রন্ন উৎসবতা মীওই লাখ ২ হেন্না শরুক য়াখি হায়বা ঐ খঙলে, লৈবাক্কী মফম কয়া অমসুং মপান লৈবাকশিংদগী ফাওবা লাকখি। অদোম্না খুদোংচাবা ফংবা মতমদা, অসিগুম্বা কুহ্মৈশিং শরুক য়াগদবনি অমসুং ভারতকী খেন্নবা মহাও লৌগদবনি।

মরুপশিং,

মসি ২০২৫ গী মন কি বাতকী অরোইবা তাঙ্কক্নি। হৌজিক, চহি ২০২৬ লাকপদা, অনৌবা হরাওবা অমসুং থৌনাগা লোয়ননা ঐখোয় মন কি বাত থৌরম শরুক য়াগনি। ইরৈচাশিংগী অনৌবা থৌনা, অনৌবা হিরমশিং অমসুং মশিং থিঙমদ্রবা ৱারিশিংনা ঐখোয়দা ইথিল পীগনি, ঐখোয় মন কি বাতকা শম্নগনি।

থা খুদিংগী, বিকসিত ভারত অমগী মখোয়গী মঙলানশিং শরুক য়াবা মীয়ামগী অসিগুম্বা পাউজেল কয়া ঐনা ফংখি। মীয়ামগী পাউতাকশিং অমসুং মাইকৈ অসিদা মখোয়গী থবকশিং উবদা, মসিগী থাজবা হেন্না মপাঙ্গল কনখৎলে অমসুং হায়রিবা পাউজেলশিং ঐনা ফংবদা, বিকসিত ভারত অমগী ৱাশক শোইদবা ফংবা ঙমগনি। মসিগী থাজবা নোংম নোংমগী হেনগৎলক্লি।

ৱাশক অসি ঙাক্নবা মাইকৈদা চঙশিল্লিবা খোঙচত্ত চহি ২০২৬ অসি মরুওইবা খুমাঙচাউশিনবা অমা ওইরসনু। অদোম অমসুং অদোমগী ইমুং নুংঙাইবা পুন্সি অমা ফংবা ওইরসনু। মসিগী পাউজেল অসিগা লোয়ননা, তাঙ্কক অসিদা কায়নদ্রিঙৈদা, ঐনা শোইদনা হায়গনি, ‘ফিত ইন্দিয়া মুভমেন্ত’… অদোম হকচাং ফনা লৈগদবনি। হন্দক্কী নিংথম থা অসি শাজেলগা য়াম্না চুনরে… শাজেল তৌরো। নুংঙাইরবা ২০২৬ গীদমক অদোমগী মফমদা য়াইফ পাউজেল পীজরি। অদোম থাগৎচরি। বন্দে মাতারম।

***