ভারতকী প্রধানমন্ত্রী

ঐহাক্কী নুংশিজরবা ইরৈবাকচাশিং, খুরুমজরি। মরূপশিং ঙসিদি মন কী বাত্তা লৈবাক অসিগী অফাওবা অমগী মরমদা হায়জগে। ঐখোয় হিন্দুস্তানিশিংগী থমোয়দা মহাকপু অসুক্কী মতিক ইকায় খুম্ননা নুংশিনা থমনৈ। মহাকপু ইকায় খুম্নদবা মীওই অমত্তা লৈবাক অসিদা লৈরম্লোয়। চহীসু অহল ওইরবনিনা লৈবাক অসিগী থেংখাং কয়া মাগী মীৎমাংদা থোকখিবনি। ঐখোয়না মাবু ইচে কৌই… ইচে লতা।

হন্দক্কী সেপ্তেম্বর ২৮ অসিদা চহী ৯০ শুরে। মীরৈবাক্কী খোংচৎ চৎত্রিঙৈ মমাংদা মহাক্কা ফোন্দা ৱারী শান্নবগী তঞ্জা ফংজখি। ৱারীদুসু মচেগা মৌপ্বাগা য়াম্না নুংশিননা ৱারী শান্নবা অদুনি। ঐনা লনাই ৱারী শান্নবা অসি অমুক্তা হায়দোকচদবনি, অদুবু ঙসিদি ময়ামসু ইচে লতাগী ৱাহৈসি তাহন্নিংই। চহী মতাং অসিদা ইচেনা লৈবাক্কী ৱাফম কয়াদা লাংতক্নবা পোক্লিবা, খঙনীংলিবা অমদি পুন্সিগী নুংঙাইবা, ভারতকী চাউখৎ খোংথাং, হোংলক্লিবা শক্তম, চাউখৎলক্লিবা ভারতকী মরমদা ৱারী শান্নখি।

লতা মঙ্গেশকরগা লোয়ননা ৱারী শানবা

মোদী জী : লতা দিদী, খুরুমজরি। ফোন তৌজরক্লিবা ঐহাক নরেন্দ্র মোদীনি।

লতা দিদী : খুরুমজরি।

মোদী জী : ঐহাক্না ফোন তৌরক্লিবা অসিগী মরমদি হন্দক্কী অদোমগী ইপোক নুমীৎতা ঐহাক এরোপ্লেন তোংদুনা চৎপা তঞ্জা ওইরগনি।

লতা দিদী : ফরে।

মোদী জী : অদুনা, চৎত্রিঙৈ মাংওইননা মাংজৌননা অদোমগী ইপোক নুমীৎকী য়াইফ–পাওজেল পীজরি। হকচাং ফনা লৈবা ওইরসনু। অদোমগী থৌজাল অদু ঐখোয় পুম্নমক্কী মফমদা লৈবা ওইরসনু।

লতা দিদী : অদোমগী ফোন লাক্কনি তাবদা ঐহাক অপেনবা ফাওখি। নহাক করম কান্দা হল্লক্কনি?

মোদী জী : ঐহাক ২৮গী অহিং অমসুং ২৯গী অয়ুক্তা হল্লক্কনি, অদোমগী ইপোক নুমীৎ থৌরম পাংথোকপা লোইরম্লগনি।

লতা দিদী : ফরে, ফরে। ইপোক নুমীৎ করিবু পাংথোকলুগনি! অশোয় অঙাম য়াওদনা য়ুমদা হল্লকউ।

মোদী জী : দিদী, অদোম য়েংবীয়ু…

লতা দিদী : অদোমগী থৌজাল নিজরি।

মোদী জী : থৌজালদি ঐখোয়না অদোমগী লৌজরি, অদোম ঐখোয়দগী য়াম্না অহল ওইরবনি।

লতা দিদী : চহীদা অহল ওইবদি মীওই কয়া অমা লৈরি, অদুবু অচৌবা থবক তৌবশিংগী থৌজাল লৌবা অদুমক য়াম্না চাউবা ৱাফমনি।

মোদী জী : দিদী, অদোম চহী খক্তা নত্তনা থবক্তসু ঐখোয়দগী য়াম্না হেন্না চাউই। অদোম্না ফংলিবশিং অসি সাধনা অমসুং তপস্যা তৌদুনা ফংবনি।

লতা দিদী : মসি পুম্নমক অসি ইমা–ইপাগী থৌজালগী মহৈনি অমদি তাবীরিবশিংগী থৌজালনি হায়না ঐহাক্না খঞ্জৈ। ঐহাক্তি করিসু নত্তে।

মোদী জী : খুরুমজরি, দিদী।

লতা দিদী : খুরুমজরি।

মোদী জী : নফমদা য়াইফ–পাওজেল পীজরি

লতা দিদী : নফমদা নুংঙাইবা ফোংদোকচরি।

মোদী জী : খুরুমজরি, দিদী।

ঐগী নুংশিজরবা ইরৈবাকচাশিং, নবরাত্রী লাকপগা লোয়ননা ঙসিদগী কুম্মৈশিং পরেং হৌরক্লে, কুম্মৈ–ফিয়োংগী মতমনিদনা। মথং চয়োল কয়া ফাওবা লৈবাক পুম্বদা পমলাং লাংলগনি। ঐখোয় পুম্নমক্না নবরাত্রী, গর্বা, দুর্গা পুজা, দসেরা, দিৱালী, নিঙোল চক্কৌবা, ছৎ পুজানচিংবা কুম্মৈ কয়া পাংথোক্কদৌরি। ময়াম পুম্নমকসু লাক্কদৌরিবা কুম্মৈশিং অসিগীদমক য়াইফ–পাওজেল পীজরি। কুম্মৈশিংদা ইমুং মনুংগী মী লোইনা পুল্লী, য়ুমশিংদা নুঙায়বগী ইপোম হৌই। অদুবু ইমুং খরদি অসিগুম্বা কুম্মৈ অসিদা নুংঙাইবা ফংদবসু য়াওই। মসিবু থাউমৈগী মমিনা মমহনবা কৌই।

তশেংনমক মসিগী পাওরৌ অসি ৱাহৈদা নত্তনা ঐখোয়গী পান্দম, ফিদম অমনি। খন্দুনা য়েংবীয়ু, অমরোমদনা ইমুং খরদা মৈনা পুমঙান ঙাল্লি, মদুগী হেক মায়োক্নবদা ইমুং খরদি পুংমম মমই। ইমুং খরদনা অথুম অহাও চাবিদনা লেম পানা লৈ, অদুগা ইমুং খরদনা অঙাংশিংনা অথুম অহাও চানীংবনা ঙৌ–ঙৌ লাওই। ইমুং খরদনা ফিনা অলমারি চন্দনা লৈ, অদুগা খরদনা মশা কুপ্নবা ফি ফাওবা লৈতবা য়াওই। মসিবু থাউমৈগী মমিনা মমহনবা কৌবা য়াই। কুম্মৈশিং অসিগী অশেংবা নুংঙাইবদি অমম্বা মাংখিবা, মঙালনা পুমঙান ঙানবা অদুনি। অৱাৎপা লৈবা মফমদা মদুবু কোকহনবা হায়বসি ঐখোয়গী হৈনবী ওইগদবনি।

ঐখোয়গী য়ুমদা অথুম অহাও, ফি–রোল, খুদোলপোৎ ময়াম লাকপা মতমদুদা, মদু পীথোক্নবগী ৱাখলসু পোক্কদবনি। ঐখোয়গী য়ুমদা শিজিন্নরোয়দবা হেল্লবা পোৎ অদু পীথোক্নবগী থবকসু তৌগদবনি। শহর কয়াদা, এন.জি.ও. কয়াগী নহা ওইরিবা মরূপশিংনা স্তার্ত অপকী থবকশিং অসি তৌই। মখোয়না য়ুমশিংদগী ফি–রোল, অথুম–অহাও, চান–থক্নবা খোমজিল্লগা দরকার লৈরবশিং থির–থিরগা মখোয়দা পীবি।

হন্দক কুম্মৈ–ফিয়োংগী মতমসিদা, পান্দম অমগা লোয়ননা থাউমৈগী মমিনা মমহনবসি কোকহনসি। লাইরবা কয়াগী মায়থোংদা মোমোন মীনোক অদুনা কুম্মৈগী মতমদা অদোমগী নুংঙাইবা অদু শরুক অনি হেঙ্গৎহনগদৌরিবনি। অদোমগী মায়থোং অদু অমুক্কা হেন্না মঙাল নায়হনগদৌরিবনি। নহাক্কী দিৱালী অমুক্কা হেন্না ঙালহনগনি।

ঐগী নুংশিজরবা ইরৈবাকচাশিং, দিপাবলীদা লাইবক ফবা অমদি চাউখৎপগী শক্তমদা লক্ষ্মীনা য়ুম য়ুমদা লাকই। থায়নদগী চৎনরকপগী মওংদা লনগী মবেম্মবু তরাম্না ওকচগনি। হন্দক্তি অনৌবা মখলগী লনগী মবেম্মবু ওকসিরা। ঐখোয়গী চৎন লোনচৎতা ইচানুপীবু লক্ষ্মীনি হায়না খন্নৈ, মরমদি ইচানুপীনা লাইবক ফবা অমদি চাউখৎপা পুরকই।

হন্দক ঐহাক্না লৈকায়দা, খুলদা, শহরদা, ইচানুপীশিংবু ইকায় খুম্নবগী থৌরাং থম্বা য়াব্রা, মীয়ামগী থৌরম থম্বা য়াব্রা? ঐখোয়গী ইরক্তা মখোয় মশানা হোৎনজবদগী ইমুংগী, সমাজগী, লৈবাক্কী মীংচৎ পুরকপা ইচানুপী কয়া লৈরমগনি। হন্দক্কী দিৱালী অসিদা ভারতকী ইচানুপীশিং অসিবু ইকায় খুম্নবা উৎপগী থৌরম থম্বা য়াগদ্রা? ঐখোয়গী ইরক্তা থোইদোক হেন্দোকপা থবক তৌবা ইচানুপী কয়া লৈরমগনি।

খরনা লাইরবা ইমুংগী অঙাংশিংবু লাইরিক তাকপীরমগনি, খরনা লুবা–নানবা অমদি হকশেলবু মীয়ামদা খঙহন্নবা হোৎনরমগনি। খরনা দোক্তর, ইঞ্জিনীয়র ওইদুনা সমাজকী সেবা তৌরমগনি। খরনা উকিল ওইদুনা মীয়ামদা অচুম্বা পীনবা হোৎনরমগনি। ঐখোয়গী সমাজনা অসিগুম্লবা ইচানুপীশিং অসিবু শক খঙবিদুনা ইকায় খু্ম্নবা উৎশি, মখোয়গীদমক চাউথোকসি. মখোয়গীদমক লৈবাক পুম্বদা থৌরম কয়া থমসি।

অতোপ্পা অমনা ইচানুপীশিং অসিগী থোইদোক হেন্দোকপা থৌওংশিং অসিবু সোসিয়েল মিদীয়াদা য়ারিবা মখৈ সেয়ার তৌবিয়ু। অদুগা হেশতেগ # শিজিন্নবিয়ু, হেশতেগ #ভারতকী লক্ষমি। ঐখোয় ময়াম্না সেলফী ৱিথ দোতর তৌবদগী মালেম পুম্বদা শন্দোকখ্রে। মতৌ অসুম্না হন্দক ভারতকী লক্ষমি খোংজং অসি চংশিল্লসি। ভারতকী লক্ষমিবু থৌনা হাপ্পগী মরমদি, লৈবাক মচাশিংগী চাউখৎপগী লম্বী অদু পাকথোকহনবনি।

ঐগী নুংশিজরবা ইরৈবাকচাশিং, ঐহা হান্নসু হায়জখ্রবা অদুনি, মন কী বাত অসি য়াম্না কান্নবা থৌরম অমনি। মসিগী মতেংনা ঐহাক খঙনবা খঙনদবা মীওই কয়া অমগা ৱারী শান্নবগী খুদোংচাবা ফংজরে।

নুমীৎ খরনিগী মমাংদা অরুনাচলগী মহৈরোই, এলিনা তায়াং কৌবী মহৈরোই নুপীমচা অমনা ঐঙোন্দা য়াম্না নুংঙাইবা চিথী অমা ইরকই। চিথীগী মরোল অদু ঐহাক পাথোকচরক্কে।

ইকায় খুম্নজরিবা প্রধান মন্ত্রী জী, ঐগা মিং এলিনা তায়াং কৌই, ঐহাক অরুনাচল প্রদেশকী রোইংদগীনি। হন্দক ঐগী পরিখাগী রিজল্ত লাকপদা ময়াম্না ঐঙোন্দা এগজাম ৱারিয়রগী লাইরিক পাখিব্রা হংলকই। মদুগী লাইরিক অদুদি ঐহাক পাহৌদে হায়না ঐহাক্না খুমখি। অদুম ওইনমক হল্লগা ঐহাক্না লাইরিক অদু লৈরে, অদুগা অনি অহুমলক হন্না পারে। লাইরিক অদু পারুরবা তুংদা মসি ঐহাক্না পরিখাগী মমাংদা পারম্লবদি য়াম্না হেন্না কানরমগনি হায়না খল্লি। লাইরিক অসিদা য়াওরিবশিং অসি মহৈরোইশিংগীদমক্তা য়াম্না কান্নবা ঙাক্তনি। অদুবু মহৈরোইশিংগী মমা মপা অমসুং ওজাশিংগীদি থোইদোক্না কান্নবা য়াওদে হায়না খঞ্জৈ। করিগু্ম্বা অদোম্না লাইরিক অসিগী অতোপ্পা এদিসন অমগীদমক হৌনবা থৌরাং তৌবিরবদি মমা–মপা অমসুং ওজাশিংগী কান্নবা হিরম খরা শোয়দনা হাপচিনবীয়ু।

অমুক্তা য়েংবীয়ু… ঐখোয়গী নহা ওইরিবা মরূপশিং অসি, মখোয়না লৈবাক অসিগী প্রধান সেবকপু থাজবা অসি, মখোয়না খল্লি, মঙোন্দা হায়রবদি থবক অসি শোয়দনা ওইথোক্কনি।

ঐহাক্কী নহা ওইরিবা মরূপ মহৈরোইশিং, অহানবা মক্তদা চিথী ইবিরকপগীদমক থাগৎচরি। এগজাম ৱারিয়র্সপু অনি–অহুমলক পাবীবগীসু থাগৎচরি। পারগা অৱাৎপা হায়বিরকপগীসু হন্না–হন্না থাগৎচরি। নৌরিবা মরূপ অসিনা ঐঙোন্দা থবক অমা শিন্নবিরক্লি। মসিদা ঐহাক্না হায়জনীংবদি ময়াম্না থেংনবিরিবা স্ত্রেস ফ্রী এগজামগা মরী লৈনবা ৱাফমশিং অদু ঐঙোন্দা তাকপিরকউ। ঐহাক্না ময়াম অদু নৈনরবা তুংদা ঐগী ওইবা লোন্দা অমুক ইথোকচরক্কে। অরুনাচলগী নৌরিবা মরূপপু অমুক্কা হন্না তৌবীমল খঙবা উৎচরি।

ঐগী নুংশিজরবা ইরৈবাকচাশিং, ময়াম্না পাও–চে অমসুং তি.ভি.গী খুত্থাংদা প্রধান মন্ত্রীগী চিল্লবা থৌরমশিংগী মতাংদা খঙবিরমদনি। অদুবু, ঐহাকসু ময়ামগা চপ মান্নবা মী অমনি হায়বসু খঙবীরমগনি। মীয়ামগী পুক্নিংদা করি করি খনবগে, করম্বা ৱাফম্না মীয়ামগী পুক্নিংদা অহোংবা পুরকপগা হায়বদু ঐহাক খঙজৈ, মরমদি ঐহাকসু মীয়ামগী মরক্তগীনি।

হন্দক্কী য়ু.এস. ওপনগী মায় পাকপগী ৱারিগী মরক্তা রনর অপ তাখিবা দেনিল মেদবেদেবকী ৱারোল অদুসু মীয়াম্না ঙাংনখি, সোসিয়েল মিদীয়াদা য়াম্না থাগৎনরকখি। মদুদা ঐহাকসু স্পিস অদু তাখি অমসুং মেচ অদু য়েংখি। চহী ২৩ শুরবা দেনিল মেদবেদেবকী চমজবা অমসুং মপুং মরৈ ফারবা মওং অদুদা ময়াম্না থোইদোক্না অপেনবা পোক্নৈ। ৱারোল অদুগী ঙাইহাক মমাংদা মহাক ১৯লক থোইরক্লবনি, অদুগা হন্দক্না গ্রান্দ স্লাম মায় পাক্লবা তেনিসকী শক্নাইরবা রফাইল নদালগী খুৎতা ফাইনেলদা পোখি।

তাঞ্জা অসিদা অতোপ্পা কনা অমা ওইরগদি নীংবা কাইবনা উংদুনা লৈরগদবনি, অদুবু মহাক্তি উংদুনা লৈখিদে। লোয়ননা মহাক্কী ৱাফম্না মীয়ামগী মায়থোংদসু মমোন মীনোক উবা ফংখি। মহাক্কী নোকলুকপা, চমজবা অমসুং শান্নরোই অমা ওইবগী থৌনা অমসুং ৱাখলোন অদুনা মীয়ামগী পুক্নিং হুখি। দেনিলনা মায় পাক্লবা নদালবুসু য়াম্না থাগৎখি, নদালনা নহা লাখ কয়াবু তেনিস শান্নহনীংবগী ইথিল পী হায়না মহাক্না ফোংদোকখি। লোয়ননা মহাক্কা শান্নবা অসি অরাইবা নত্তে হায়নসু মহাক্না হায়খি। অমরোমদা মায় পাক্লবা নদালনা দেনিলবুসু য়াম্না থাগৎখি। মেচ অমনা অপোবা অমগী থৌনা অমসুং অথোইবগী নোলুকপা অনিমক তমজনিঙাইনি।

ঐগী নুংশিজরবা ইরৈবাকচাশিং, মরুওইনা নহাশিং, ঐহাক্না হায়গদৌরিবা ৱাফম অসি নখোয়গীদমক য়াম্না কান্নরবা ৱাফম্নি। অপাম্বা পামদবা হায়বসি মতম খুদিংমক্তা লৈরগদবনি। অদুবু ৱাফম খরা অমদি হেঙ্গৎলক্ত্রিঙৈ থিংহৌরগদি থোইদোক্না কান্নবা লৈ। ঐহাক্না মরুওইনা নহাশিংদা হায়নীংলিবদি, হিদাক মনা অসি য়াম্না ফত্তে, অদুবু মসি হৈনখ্রবদি থাদোকপা য়াম্না ৱাই। হিদাক মনা শিজিন্নবা মীওইশিংদা কেনসর, দাইবেতিজ, ব্লদ প্রেসরনচিংবা খুদোংথিবা কয়া লাকই। হিদাক মনাদা য়াওবা নিকোতিন অসিনা নহাশিংগী পুন্সিদা ৱাখল খনবা ঙম্বগী চাং হন্থরকই। ৱাফম অসি কয়ারক নৈনদুনা লাক্লি। ঙসিদি মসি নত্তবা অতোপ্পা হিরম অমা অমুক খন্ননীংই।

হন্দক্তা ভারত্তা ই–সিগরেত্তা অথিংবা থমখ্রে হায়বা ময়াম খঙবীরম্লগনি। চুম্নগী চুরুপকা মান্নদবা ই–সিগরেত হায়বসি ইলেক্ত্রোনিক্কী খুলাই অমনি। ই–সিগরেত্তা নিকোতিন য়াওবা পোৎশক অমা শাগৎহল্লগা মখল অমগী কেমিকেলগী মৈখু থোকহল্লি। অতৈ চুরুপকুম্না মনম নমথিদনবা মনম নুংশিবা কেমিকেল অমা হাপ্পি। ই–সিগরত অসি খঙনীংবদগী য়ুমদা পুরকপসু য়াওই। অঙাং মশেল অমগা অমগা উৎনৈ। ইমুংদা মমা–মপাগী মমাংদসু উৎলকই। অমুক হৈনখ্রবদি নহাশিং অসি মসিগী লাংদা থুখি।

নহাশিং অসি ঐখোয়গী তুংগী য়ুম্বীনি। মখোয়না মসিদা হৈনখ্রবদি লৈবাক অসি মাংবা তারে খনবদগী ই–সিগরেত অসিদা অথিংবা থম্লে। ঐহাক্না ময়ামদা হায়জনীংবদি হিদাক মনা শিজিন্নগুমসি, ই–সিগরেতকী মরমদা অরানবা ৱাফম থাজরোইসি, ঐখোয় ময়াম পুল্লগা মশা–মউ ফবা ভারত অমা শেম্লসি।

হোয়, ময়াম ফিৎ ইন্দিয়াদি নীংশিংলিকো? ফিৎ ইন্দিয়া হায়বগী ৱাহন্থোক অয়ুক নুমিদাং ৱাইরম মতমদা পুং অনি–অনি জিমদা চৎপা হায়বা নত্তে। ফিৎ ইন্দিয়াগীদমক মসিদগীসু লাপথোক্কদবনি। ঐগী ৱাফম অসি লান্না লৌরোই হায়বা ঐ থাজৈ ৱাফম অসি শোয়দনা নুংঙাইগনি।

ঐগী নুংশিরবা ইচিল–ইনাওশিং, ঐখোয়না য়াম্না হেন্না লাইবক ফরিবা ৱাফমদি ঐখোয়গী লৈবাক অসিদা মশাগী ওইজবা থিদনা অতোপ্পগী য়াইফনবা হোৎনবদা পুন্সি লোমখিবা অথোইবা মীওই কয়া অমা পোকখি।

ঐখোয়গী ভারত মাতা অসিদা অথোইবা মীওই কয়া অমা পোকখি। অদুগুম্লবা অথোইবশিং অদুগী মরক্তগী মীওই অমা ওক্তোবর ১৩দা ভেতিকান সিতীদা ইকায় খুম্নবা উৎকদৌরি। মসি ভারত মরা পুম্নমক্কী চাউথোকচনীংঙাই ওইবা ৱাফম্নি। পোপ ফ্রান্সিসনা ওক্তোবর ১৩দা সিস্তর মারিয়ম তেরেসাবু সেন্তনি হায়না লাওথোক্কনি। সিস্তর মারিয়ম তেরেসানা মহাক্কী চহী ৫০গী তেল্লবা পুন্সি খোংচৎ অসিদা মীওইবা কাংলুপকী য়াইফনবগীদমক্তা হোৎনরিবশিং অদু মালেম পুম্বগী ওইনা ময়েক লারবা খুদম ওইখি। সমাজ সেবা অমসুং মহৈ মশিংগী লমদা মহাক থোইদোক হেন্দোক্না পুক্নিং চংখি।

মহাক্না কোংগ্রেগেসন ওফ দি সিস্তর্স ওফ দি হোলী ফেমিলী লিংখৎখি, মদুনা মহাক্কী খোংজং অমসুং ৱাখল্লোন মায় পাক্না চংশিল্লি। ঐহাক্না সিস্তর মারিয়ম তেরেসাবু অমুক্কা হন্না খুরুমজরি। অমসুং ভারতকী মীয়াম মরুওইবা খৃস্তান ইচিল–ইনাওশিংদা লিস্তর মারিয়মগী মিংথোল ফংগদৌরিবা অসিগীদমক য়াইফ–পাওজেল পীজরি।

ঐগী নুংশিজরবা ইরৈবাকচাশিং, ভারত্তা নত্তনা মালেম পুম্বগী ওইনা চাউথোকচনীংঙাই ওইবা ৱাফম অমদি ঙসি ঐখোয়না গান্ধী ১৫০ পাংথোক্কদৌরি। মসিগা লোয়ননা ইরৈবাকচা কোতি ১৩০না সিঙ্গল য়ুজ প্লাসতিক শিজিন্নবা তোক্লগনি হায়না ৱাশক্লি। অকোয়বগী ফিভম ঙাক শেনবগী মায়কৈদা ভারতনা লৌরিবা থৌদাং অসি মালেম পুম্বনা য়েংনরি। ঐহাক্না থাজৈ, ওক্তোবর ২দা সিঙ্গল য়ুজ প্লাসতিক শিজিন্নদবগী খোংজং অসিদা ময়াম শোয়দনা শরুক য়াবিগনি হায়না। মফম কয়াদা মীয়াম্না মাগী মাগী ওইবা মওংদা খোংজং অসি চত্থরি।

মরক অসিদা ঐখোয়গী লৈবাক্কী নহা অমনা য়াম্না অঙকপা খোংজং অমা চংশিল্লি। মহাক্কী খোংজং অসিগী মরমদা খঙনীংবদগী ঐহাক্না ফোন্দা ৱারী শান্ননবা হোৎনখি। মহাক্কী ৱাফম অসি মীয়ামদসু কান্নগদ্রা হায়না খল্লি। শ্রীমান রিপুদামন বেলবিজীনা অঙকপা থৌওং অমা চত্থরি। মহাক্না প্লোগিং তৌরি। ঐহাক্না ইহান হান্না প্লোগিং হায়বা ৱাহৈ অসি তাবদা অনৌবা অমা ওইখি। মপাল লৈবাকশিংদদি ৱাহৈ অসি খরদি শিজিন্নরবা মাল্লি। অদুম ওইনমক রিপুদামন বেলবিজীনা মসিবু পাক শন্না শন্দোক্লে। লোয়ননা ইকায় খুম্নজরিবা বাপুজীগী মপোক কুমওন্দা স্পোর্তস মিনিস্ত্রীনা ফিৎ ইন্দিয়া প্লোগিং রন পাংথোক্কদৌরি।

ওক্তোর অনিদা কিলোমীতর অনি প্লোগিং, লৈবাক শিনবা থুংনা থৌরম অসি পাংথোক্কদৌরি। থৌরম অসিদা করি করি তৌবা হায়বদু রিপুদামন্না হায়বিখ্রে। ওক্তোবর ২দগী হৌগদৌরিবা খোংজং অসিদা কিলোমীতর ২ জোগিংসু তৌগনি, অদুগা লম্বীদা তারিবা প্লাস্তিক অমোৎপশিংদুসু খোমগৎকনি। মসিনা ঐখোয়না ইশাগী হকশেলগী মরমদা খঙহনবতা নত্তনা মালেম ইমাগী হকশেলগী মরমদসু পুক্নিং চিংশিল্লি।

খোংজং অসিদা মীয়ামগী হকচাং ফহবতা নত্তনা লু–নানবগী লমদা পুক্নিং চিংশিল্লি। ঐহাক্না থাজৈ মদুদি, ইরৈবাকচা কোতি ১৩০না মায়কৈ অসিদা পুক্নিং চংলবদি সিঙ্গল য়ুজ প্লাস্তিকতগী নান্থোক্নবা খোংজং অসিদা খোংথাং কোতি ১৩০না মাংজিল থারগনি। রিপুদামনজী অদোম্বু অমুক্কা হন্না থাগৎচরি, নহাকপু অমদি নহাক্কী তীম্বু অনৌবা পুথোক্লিবা ৱাখল্লোন অসিদা হন্না–হন্না থাগৎচরি।

ঐগী নুংশিজরবা ইরৈবাকচাশিং, ওক্তোবর ২গীদমক লৈবাক শিনবা থুংনা শেম শারে। ঐখোয়না গান্ধী ১৫০বু থবক্কী লম্বীদা পুবা পামই, মাগী পুন্সিবু লৈবাক্কী কান্নবদা ওন্থোক্তুনা মাংদা চংশিনবা পামখি। ৱাফম অমনা মাংজৌননা হায়গে খল্লি, মথংগী মন কী বাত্তা শন্দোক্না হায়জগে, অদুবু মাংজৌননা হায়গদৌরিবগী মরমদি মীয়াম্না শেম শানবগী মতম পীজবনি।

ওক্তোবর ৩১ অসি সরদার ভলব ভাই পতেলগী মপোক কুমওন্নি। অমত্তা ওইবা ভারত, অথোইবা ভারত হায়বা অসি ঐখোয় পুম্নমক্কী মংলান্নি। চহী খুদিংগী ওক্তোবর ৩১ অসি রন ফোর য়ুনিতী, অপুনবগীদমক চেনবা লমজেল পাংথোকই। মসিদা অঙাং–অহল, স্কুল–কোলেজ, পুম্নমক ভারতকী খুঙ্গং খুদিংগী মীওই লাখ কয়ানা ভ্রতকী অপুনবা শক্তমগীদমক চেনগদৌরি। ময়াম পুম্নমক থৌরাং হৌবিরো, শন্দোক্নদি মথং হায়জরগে। হৌজিক মতম লৈরি, থৌরাং তৌবা হৌবা য়ারে।

ঐগী নুংশিজরবা ইরৈবাকচাশিং, ঐহাক্না ওগস্ত ১৫দা লাল কিলাদগী চহী ২০২২ ফাওবদা ভারতকী মফম ১৫দা চৎনবা হায়খি, য়ামদ্রবদা মফম ১৫। য়ারবদি অহিং অমা অনি লেক্নবা থৌরাং শিনবিয়ু, হিন্দুস্তানবু য়েংবীয়ু, খঙবিয়ু, নুংশিবিয়ু। ঐখোয়গী খেৎনবা কয়া লৈখ্রবনো। দিৱালীগী সুতিদা কোইবা চৎনৈ। মরম অসিনা ঐনা হায়জনীংবদি ভারতকী মফম ১৫দা শোয়দনা চৎপীয়ু।

ঐগী নুংশিজরবা ইরৈবাকচাশিং, নহান সেপ্তেম্বর ২৭তা মালেমগী লম কোয়বা নুমীৎ পাংথোকখি। মালেমগী এজেন্সীশিংনা লম কোয়বগী মকোক মথং থিবগী থবকশিং তৌরি। মসিদা ভারতনা ত্রাভেল এন্দ তুরিজম কোম্পিতেতিব ইন্দেক্সতা য়াম্না খুমাং চাউশিল্লে। মসি ময়ামগী মতেংদগী ওইখিবনি। থোইদোক্না লম কোয়বগী মগুন খঙনবদগীনি। লু–নানবগী খোংজংনসু মসিদা মতেং য়াম্না পাংই। কয়াম হেঙ্গৎলবগে হায়বদু নহাক্না খঙবদা শোয়দনা নুঙায়গনি। ঐখোয় ৩৪শুবা রেঙ্কতা লৈরে। চহী মঙাগী মমাংদদি ৬৫শুবা রেঙ্কতা লৈরম্মি। নাকল অমরোমদা য়াম্না চাউনা চোংলবনি। ঐখোয়না অমুক্কা হেন্না হোৎনরবদি নীংখা তম্বগী চহী ৭৫শুরকপদা লম কোয়বগী লমদা ভারত অসি মালেমগী মরু ওইবা মফমশিংগী মনুং চল্লগনি।

ঐগী নুংশিজরবা ইরৈবাকচাশিং, ময়াম পুম্নমকপু খেৎনবনা থল্লবা ভারতকী তোঙান তোঙানবা কুম্মৈশিংগীদমক য়াইফ পাওজেল পীজরি। অদুদু দিৱালীগী মতমদা বোম্বুলানচিংবদগী মৈহৌ লাংপোক থোক্তনবা চেকশিনবীয়ু। মসিগীদমক লৌবা য়াবা ঙাকশেল থৌরাং লৌখৎপীয়ু। নুংঙাইবা ফোংদোক্কদবনি, ঐখোয়গী কুম্মৈশিং অসিদা অপুনবগী লৈনম চেল্লি, অপুনবগী চৎন–লোনচৎ য়াওরি। অপুনবগী শক্তিদা অনৌবা থৌনা, তৌবা ঙম্বগী শক্তি য়াওই। মদু ফংহন্নবগী লম্বীদি কুম্মৈ ফিয়োংনি। লাক্লো ঐখোয় ময়াম পুন্দুনা নুংঙাইনা অনৌবা থৌনাগা লোয়ননা, অনৌবা মংলান, অনৌবা ৱাশক্কা লোয়ননা কুম্মৈশিং অসি পাংথোক্লসি। অমুক্কা হন্না ময়াম্বু য়াইফ–পাওজেল পীজরি। থাগৎচরি।