ପିଏମଇଣ୍ଡିଆ

ଅନ୍ୟାନ୍ୟ ପଛୁଆବର୍ଗ(ଓବିସି)ଙ୍କ ଉପବର୍ଗୀକରଣ ପ୍ରସଙ୍ଗର ଅନୁଧ୍ୟାନ ପାଇଁ ଗଠନ କରାଯାଇଥିବା କମିଶନଙ୍କ କାର୍ଯ୍ୟକାଳ ଆହୁରି 12 ସପ୍ତାହ ପର୍ଯ୍ୟନ୍ତ ବୃଦ୍ଧି କରାଯାଇଛି । କମିଶନ 2 ଏପ୍ରିଲ 2018 ପର୍ଯ୍ୟନ୍ତ କାର୍ଯ୍ୟ କରିବେ । ଏ ସଂକ୍ରାନ୍ତ ପ୍ରସ୍ତାବକୁ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ଅଧ୍ୟକ୍ଷତାରେ ବସିଥିବା କେନ୍ଦ୍ର କ୍ୟାବିନେଟ ବୈଠକରେ ମଞ୍ଜୁରି ମିଳିଛି । କାର୍ଯ୍ୟକାଳ ବଢ଼ାଯିବା ଫଳରେ କମିଶନ ବିଭିନ୍ନ ଭାଗିଦାରମାନଙ୍କ ସହ ପରାମର୍ଶ କରି ଓବିସିଙ୍କ  ଉପବର୍ଗୀକରଣ ପ୍ରସଙ୍ଗରେ ସରକାରଙ୍କ ନିକଟରେ ଏକ ବିସ୍ତୃତ ରିପୋର୍ଟ ଦାଖଲ କରିପାରିବେ ।

ସମ୍ବିଧାନର ଧାରା 340 ଅନୁଯାୟୀ ଏହି କମିଶନ ଗଠନ କରାଯାଇଛି । ଅକ୍ଟୋବର 2, 2017ରେ ଭାରତର ରାଷ୍ଟ୍ରପତି ଏହାକୁ ଅନୁମୋଦନ କରିଥିଲେ । ଅଧ୍ୟକ୍ଷ ଦାୟିତ୍ୱ ଗ୍ରହଣ କରିବାର 12 ସପ୍ତାହ ମଧ୍ୟରେ କମିଶନ ଏହାର ରିପୋର୍ଟ ଦାଖଲ କରିବେ ବୋଲି ଧାର୍ଯ୍ୟ ହୋଇଥିଲା ।

ସୂଚନାଯୋଗ୍ୟ ଯେ ଅବସରପ୍ରାପ୍ତ ବିଚାରପତି ଜଷ୍ଟିସ ଶ୍ରୀମତୀ ଜି ରୋହିଣୀଙ୍କ ଅଧ୍ୟକ୍ଷତାରେ ଏହି କମିଶନ 11 ଅକ୍ଟୋବର, 2017 ଠାରୁ କାର୍ଯ୍ୟାରମ୍ଭ କରିଥିଲା । ସେବେଠାରୁ କମିଶନ ଓବିସିଙ୍କ ପାଇଁ ସଂରକ୍ଷଣ ବ୍ୟବସ୍ଥା ଥିବା ବିଭିନ୍ନ ରାଜ୍ୟ/କେନ୍ଦ୍ର ଶାସିତ ଅଂଚଳ ସରକାର ଏବଂ ରାଜ୍ୟ ପଛୁଆ ବର୍ଗ କମିଶନଙ୍କ ସହିତ ଆଲୋଚନା କରିସାରିଛନ୍ତି ।

**********