ପିଏମଇଣ୍ଡିଆ

ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଆଜି ଫିଲିପାଇନ୍ସର ଲସ ବାନୋସଠାରେ ଥିବା ଅନ୍ତର୍ଜାତୀୟ ଧାନ ଗବେଷଣା ପ୍ରତିଷ୍ଠାନ (IRRI) ପରିଦର୍ଶନ କରିଥିଲେ । ଆଇଆରଆରଆଇ ଏକ ପ୍ରମୁଖ ଆନ୍ତର୍ଜାତିକ ଗବେଷଣା ପ୍ରତିଷ୍ଠାନ, ଯାହା ଧାନ ଗବେଷଣା ମାଧ୍ୟମରେ ଦାରିଦ୍ର୍ୟ ଏବଂ କ୍ଷୁଧା ଦୂରୀକରଣ; ଧାନ ଚାଷୀ ଏବଂ ଉପଭୋକ୍ତାଙ୍କ ସ୍ୱାସ୍ଥ୍ୟର ଉନ୍ନତି ତଥା କଲ୍ୟାଣ; ଏବଂ ପରବର୍ତ୍ତି ପିଢ଼ି ପାଇଁ ଧାନ ଚାଷ/ଫସଲ ପରିବେଶର ସୁରକ୍ଷା କରିବା ପ୍ରତି ସମର୍ପିତ ।

ଏହି ଅବସରରେ ପ୍ରଧାନମନ୍ତ୍ରୀ ଏକ ଫଟୋ ପ୍ରଦର୍ଶନୀ ବୁଲି ଦେଖିଥିଲେ । ଏହି ପ୍ରଦର୍ଶନୀରେ ବନ୍ୟା-ସହନ ଧାନ କିସମ; ମରୁଡ଼ି-ସହନ ଧାନ କିସମ; ଲବଣ-ସହନ ଧାନ କିସମ ଏବଂ ମହିଳା କୃଷି ସମବାୟ ସମିତିମାନଙ୍କ ସହ ଆଇଆରଆରଆଇର କାର୍ଯ୍ୟ-ସମ୍ପର୍କ ସ୍ଥାନ ପାଇଛି ।

ଜଳପ୍ଲାବନ ସହିଷ୍ଣୁ ଧାନ କିସମ ପାଇଁ ଏକ ନୂତନ ଭୂମିକୁ ପ୍ରଧାନମନ୍ତ୍ରୀ ପ୍ରତିକାତ୍ମକ ଭାବେ କାର୍ଯ୍ୟାରମ୍ଭ କରିଥିଲେ । ଶ୍ରୀ ନରେନ୍ଦ୍ର ମୋଦୀ ସହନଶୀଳ ଧାନ କ୍ଷେତ ଗବେଷଣାଗାରକୁ ମଧ୍ୟ ଫଳକ ଉନ୍ମୋଚନ ପୂର୍ବକ ଉଦ୍ଘାଟନ କରିଥିଲେ । ସେ ଏହି ଅବସରରେ ଦୁଇଟି ଭାରତୀୟ କିସମର ଧାନ ବିହନ ଆଇଆରଆରଆଇ ଜିନ ବ୍ୟାଙ୍କକୁ ପ୍ରଦାନ କରିଥିଲେ ।

ପରିଦର୍ଶନ ସମୟରେ ପ୍ରଧାନମନ୍ତ୍ରୀ ଆଇଆରଆରଆଇରେ କାର୍ଯ୍ୟରତ ବହୁ ଭାରତୀୟ ବୈଜ୍ଞାନିକଙ୍କ ସହ ଆଲୋଚନା କରିଥିଲେ ।

ପ୍ରଧାନମନ୍ତ୍ରୀ ମଧ୍ୟ ମାନିଲାସ୍ଥିତ ମହାବୀର ଫିଲିପାଇନ ପ୍ରତିଷ୍ଠାନ ପରିଦର୍ଶନ କରିଥିଲେ । ଏହା ଭାରତ ଏବଂ ଫିଲିପାଇନ୍ସ ମଧ୍ୟରେ ଏକ ଦୀର୍ଘକାଳୀନ ମାନବୀୟ ସହଯୋଗ କାର୍ଯ୍ୟକ୍ରମ । ଏହାକୁ ଜଣେ ଭାରତୀୟ ବଂଶୋଦ୍ଭବ ମାନିଲା ମେୟର ଡ. ରମଣ ବଗତସିଂ ପ୍ରତିଷ୍ଠା କରିଥିଲେ । ଏହି ପ୍ରତିଷ୍ଠାନ ମହାବୀର ବିକଳାଙ୍ଗ ସହାୟତା ସମିତିର ସହଭାଗୀତାରେ ଅଙ୍ଗହାନି କଷ୍ଟ ଭୋଗୁଥିବା ଲୋକମାନଙ୍କ ଠାରେ ସଫଳତାପୂର୍ବକ ଜୟପୁର ପାଦ (Jaipur Foot) ଖଞ୍ଜିବାରେ ସଫଳ ହୋଇଛି । ଜୟପୁର ପାଦ ଦ୍ୱାରା ଉପକୃତ ହୋଇଥିବା ଲୋକମାନଙ୍କ ସହିତ ପ୍ରଧାନମନ୍ତ୍ରୀ ମତ ବିନିମୟ କରିଥିଲେ ।

**********