ପିଏମଇଣ୍ଡିଆ

ମହାମହିମ ଶେଖ୍ ମହମ୍ମଦ ବିନ୍ ଜାଏଦ ଆଲ୍ ନାହୟାନ,

ରାଜକୁମାର, ଆବୁଧାବୀ

ଗଣମାଧ୍ୟମର ବନ୍ଧୁମାନେ,

ଜଣେ ପ୍ରିୟ ବନ୍ଧୁ ମହାମହିମ୍ ଶେଖ୍ ମହମ୍ମଦ ବିନ୍ ଜାଏଦ୍ ଆଲ୍ ନାହୟାନଙ୍କୁ ଭାରତରେ ସ୍ୱାଗତ କରି ମୁଁ ଅତ୍ୟନ୍ତ ଖୁସି । ମହାମହିମ ଦ୍ୱିତୀୟ ଥର ଭାରତକୁ ରାଜକୀୟ ଗସ୍ତରେ ଆସିଥିବାରୁ ଆମେମାନେ ଆନନ୍ଦିତ ଏବଂ ଆସନ୍ତାକାଲି ସାଧାରଣତନ୍ତ୍ର ଦିବସ ସମାରୋହରେ ସେ ମୁଖ୍ୟ ଅତିଥି ଭାବେ ଯୋଗ ଦେଉଥିବାରୁ ତାଙ୍କର ଗସ୍ତ ଅତ୍ୟନ୍ତ ମହତ୍ଵପୂର୍ଣ୍ଣ । ମହାମହିମ, 2015 ଅଗଷ୍ଟ ମାସ ଓ ଗତବର୍ଷ ଫେବୃୟାରୀ ମାସରେ ଆମର ପୂର୍ବ ସାକ୍ଷାତ ମୋ’ର ମନେ ପଡ଼ୁଛି । ଆମ ଦ୍ୱିପାକ୍ଷିକ ସମ୍ପର୍କର ସମସ୍ତ ଦିଗ ଉପରେ ବ୍ୟାପକ ଭାବେ ଆମର ଆଲୋଚନା ହୋଇଥିଲା । ଆମର ଭାଗିଦାରୀକୁ ନେଇ ଆପଣଙ୍କ ଦୃଷ୍ଟିଭଙ୍ଗୀ, ଆମ ଅଂଚଳ ପ୍ରତି ଆଗ୍ରହ ଓ ବିଶ୍ୱ ପ୍ରତି ଆଭିମୁଖ୍ୟ ପ୍ରସଙ୍ଗ ଆମକୁ ଅତ୍ୟନ୍ତ ଲାଭାନ୍ୱିତ କରିଛି । ମହାମହିମ, ଆପଣଙ୍କ ନେତୃତ୍ୱରେ ଆମେ ଆମ ସମ୍ପର୍କର ଏକ ନୂଆ ଅଧ୍ୟାୟ ସୃଷ୍ଟି କରିବାରେ ସଫଳ ହୋଇଛୁ । ଆମର ଉଦ୍ଦେଶ୍ୟପୂର୍ଣ୍ଣ ବିସ୍ତୃତ ରଣନୀତିକ ଭାଗିଦାରୀ ଏବଂ କାର୍ଯ୍ୟଭିତ୍ତିକ ପଦକ୍ଷେପ ଦ୍ୱାରା ଆମେ ସମ୍ପର୍କର ଏକ ମହତ୍ୱାକାଂକ୍ଷୀ ମାର୍ଗ(Roadmap) ପ୍ରସ୍ତୁତ କରିଛୁ । ଏବେ ଯେଉଁ ରାଜିନାମାଗୁଡ଼ିକ ଆଦାନ ପ୍ରଦାନ ହେଲା ତାହା ଆମର ବୁଝାମଣାକୁ ଦର୍ଶାଉଛି ।

ବନ୍ଧୁଗଣ

ମିଳିତ ଆରବ ଅମିରତନ୍ତ୍ର (ୟୁଏଇ) ହେଉଛି ଆମର ସବୁଠୁ ମୂଲ୍ୟବାନ ସହଯୋଗୀ ମଧ୍ୟରୁ ଗୋଟିଏ ଓ ବିଶ୍ୱର ଏହି ଗୁରୁତ୍ୱପୂର୍ଣ୍ଣ ଅଞ୍ଚଳରେ ଆମର ଘନିଷ୍ଠ ବନ୍ଧୁ । ମୁଁ ଏଇ ସଙ୍ଗେ ସଙ୍ଗେ ମହାମହିମଙ୍କ ସହ ଫଳପ୍ରଦ ଓ ଫଳପ୍ରସୂ ଆଲୋଚନା ଶେଷ କଲି । ଆମେ ବିଶେଷକରି ଗତ ଦୁଇଟି ବୈଠକରେ ନେଇଥିବା ବିଭିନ୍ନ ନିଷ୍ପତ୍ତିକୁ କାର୍ଯ୍ୟକାରୀ କରିବା ଉପରେ ଗୁରୁତ୍ୱ ଦେଇଥିଲୁ । ଶକ୍ତି ଓ ନିବେଶ ସମେତ ବିଭିନ୍ନ କ୍ଷେତ୍ରରେ ଆମର ସମ୍ପର୍କର ଗତିକୁ ସ୍ଥାୟୀ ରଖିବାକୁ ଆମେ ସହମତ ହୋଇଛୁ ।

ବନ୍ଧୁଗଣ

ଭାରତର ବିକାଶ ଗାଥାରେ ଜଣେ ପ୍ରମୁଖ ଭାଗିଦାର ଭାବେ ଆମେ ମିଳିତ ଆରବ ଅମିରତନ୍ତ୍ର ସମ୍ମାନ ଜଣାଉଛି । ଭାରତର ଭିତ୍ତିଭୂମି କ୍ଷେତ୍ରରେ ନିବେଶ ପାଇଁ ଆଗ୍ରହ ଯୋଗୁ ମୁଁ ବିଶେଷକରି ୟୁଏଇକୁ ସ୍ୱାଗତ କରୁଛି । ୟୁଏଇର ସଂସ୍ଥାଗତ ନିବେଶକଙ୍କ ସହ ଆମର ଜାତୀୟ ନିବେଶ ଓ ଭିତ୍ତିଭୂମି ପାଣ୍ଠିକୁ ସଂଯୋଗ ଦିଗରେ ଆମେ କାର୍ଯ୍ୟ କରୁଛୁ । ଦୁବାଇରେ ବିଶ୍ୱ ଏକ୍ସପୋ 2020 ପାଇଁ ଭିତ୍ତିଭୂମି ପ୍ରକଳ୍ପରେ ଭାରତୀୟ କମ୍ପାନୀଗୁଡ଼ିକ ଭାଗିଦାର ହେବାକୁ ଚାହୁଁଥିବା ବିଷୟରେ ମୁଁ ମହାମହିମଙ୍କୁ ଅବଗତ କରାଇଛି । ଆମର ନିର୍ମାଣ ଓ ସେବା କ୍ଷେତ୍ରରେ ଅଭିବୃଦ୍ଧି ସହ ସାମିଲ ହୋଇ ୟୁଏଇ ଉପକୃତ ହୋଇପାରିବ । ଡିଜିଟାଲ ଅର୍ଥବ୍ୟବସ୍ଥା ଗଠନ, ମାନବ ପୁଞ୍ଜି ଓ ଭାରତରେ ସ୍ମାର୍ଟ ସହରାଂଚଳ ପ୍ରୟାସ ପାଇଁ ଆମର ଲକ୍ଷ୍ୟରେ ଥିବା ବିପୁଳ ସୁଯୋଗକୁ ଆମେ ମିଳିତ ଭାବେ ବାନ୍ଧି ରଖିପାରିବୁ । ଆମେ ଦ୍ୱିପାକ୍ଷିକ ବାଣିଜ୍ୟ କାରବାରର ପରିମାଣ ଓ ମାନ ବୃଦ୍ଧି ପାଇଁ ଉଭୟ ଦେଶର ବ୍ୟବସାୟ ଓ ଶିଳ୍ପକୁ ପ୍ରୋତ୍ସାହିତ କରୁଛୁ । ବାଣିଜ୍ୟ ପ୍ରତିଷେଧକ କ୍ଷେତ୍ରରେ ଆଜି ସ୍ୱାକ୍ଷରିତ ହୋଇଥିବା ରାଜିନାମା ଦ୍ୱାରା ଆମର ବାଣିଜ୍ୟିକ ଭାଗିଦାର ଅଧିକ ସୁଦୃଢ଼ ହେବ । ଆମର ଶକ୍ତି କ୍ଷେତ୍ରରେ ଭାଗିଦାରୀ ହେଉଛି ଆମର ସମ୍ପର୍କରେ ଏକ ପ୍ରମୁଖ ସେତୁ । ଏଥିରେ ଆମର ଶକ୍ତି ନିରପତ୍ତା ପ୍ରତି ଅବଦାନ ରହିଛି । ନିର୍ଦ୍ଧିଷ୍ଟ ପ୍ରକଳ୍ପ ଓ ପ୍ରସ୍ତାବ ମାଧ୍ୟମରେ ରଣନୀତିକ ଗତିରେ ଆମର ଶକ୍ତି ସମ୍ପର୍କକୁ ପରିବର୍ତ୍ତିତ କରିବା ଉପରେ ମହାମହିମ ଓ ମୁଁ ଆଲୋଚନା କରିଛୁ । ଏହି ମର୍ମରେ ଦୀର୍ଘସ୍ଥାୟୀ ଯୋଗାଣର ଠିକା ଓ ଶକ୍ତି କ୍ଷେତ୍ରରେ ଯୌଥ ଉଦ୍ୟୋଗର ସ୍ଥାପନ ଲାଭଦାୟକ ହୋଇପାରିବ ।

ବନ୍ଧୁଗଣ

ନିରାପତ୍ତା ଓ ରକ୍ଷା ସହଯୋଗ ଏବେ ଆମ ସମ୍ପର୍କକୁ ଏକ ନୂଆ ଦିଗକୁ ନେବାରେ ସହାୟକ ହୋଇଛି । ରକ୍ଷା କ୍ଷେତ୍ରରୁ ଉପଯୋଗୀ ସହଯୋଗିତାକୁ ସାମୁଦ୍ରିକ ସମେତ ନୂଆ କ୍ଷେତ୍ରକୁ ସମ୍ପ୍ରସାରଣ କରିବା ପାଇଁ ଆମେ ସହମତ ହୋଇଛୁ । ରକ୍ଷା ସହଯୋଗ ପାଇଁ ବୁଝାମଣା ଆଜି ସ୍ୱାକ୍ଷରିତ ହୋଇଛି, ଯାହା ଆମର ରକ୍ଷା ସମ୍ପର୍କକୁ ସଠିକ ଦିଗରେ ଆଗେଇ ନେବାରେ ସହାୟକ ହେବ । ହିଂସା ଓ ଉଗ୍ରବାଦର ମୁକାବିଲା ପାଇଁ ଆମର ବୃଦ୍ଧି ପାଉଥିବା ସମ୍ପର୍କ ଆମ ସମାଜକୁ ସୁରକ୍ଷିତ ରଖିବା ପାଇଁ ଜରୁରୀ ବୋଲି ଆମେ ଅନୁଭବ କରୁଛୁ ।

ବନ୍ଧୁଗଣ

ଆମର ଘନିଷ୍ଠ ସମ୍ପର୍କ ନା କେବଳ ଆମ ଉଭୟ ଦେଶ ପାଇଁ ଗୁରୁତ୍ୱପୂର୍ଣ୍ଣ ବରଂ ସମଗ୍ର ପଡ଼ୋଶୀଙ୍କ ପାଇଁ ମଧ୍ୟ ଉଲ୍ଲେଖନୀୟ ବୋଲି ମହାମହିମ ରାଜକୁମାର ଓ ମୁଁ ବିଶ୍ୱାସ କରୁଛୁ । ଆମର ଏକାଭିମୁଖୀତା ଏହି ଅଞ୍ଚଳକୁ ସ୍ଥିର ରଖିବାରେ ସହାୟକ ହେବ ଆଉ ଆମର ଆର୍ଥିକ ଭାଗିଦାରୀ ମଧ୍ୟ ଆଂଚଳିକ ଓ ବିଶ୍ୱ ସମୃଦ୍ଧିର ସ୍ରୋତ ପାଲଟିବ । ଆମେ ପଶ୍ଚିମ ଏସିଆ ଓ ଉପସାଗରୀୟ ରାଷ୍ଟ୍ରର ବିକାଶ ପ୍ରସଙ୍ଗରେ ମତ ଆଦାନପ୍ରଦାନ କରିଛୁ । ସେଠାରେ ଶାନ୍ତି ଓ ସ୍ଥିରତା ଆମ ଉଭୟ ଦେଶର ସ୍ୱାର୍ଥଜଡ଼ିତ ରହିଛି । ଆଫଗାନିସ୍ତାନ ସମେତ ଆମ ସ୍ଥାନୀୟ କ୍ଷେତ୍ରର ବିକାଶ ପ୍ରସଙ୍ଗରେ ମଧ୍ୟ ଆମେ ଆଲୋଚନା କରିଛୁ । ଆମ ଲୋକଙ୍କ ନିରାପତ୍ତା ଓ ସୁରକ୍ଷା ପ୍ରତି କଠୋରପନ୍ଥୀ ଓ ଆତଙ୍କବାଦ ଆଡ଼ୁ ବିପଦ ବୃଦ୍ଧି ପାଇବା ଉପରେ ଆମେ ଉଦବେଗ ପ୍ରକାଶ କରିବା ସହ ସହଯୋଗକୁ ଏକ ନୂଆ ରୂପ ଦେଉଛୁ ।

ବନ୍ଧୁଗଣ,

ୟୁଏଇ ଏବେ ପ୍ରାୟ 26 ଲକ୍ଷ ଭାରତୀୟଙ୍କ ଘର । ସେମାନଙ୍କର ଯୋଗଦାନ ଉଭୟ ଭାରତ ଓ ୟୁଏଇ ପାଇଁ ଅଧିକ ମୂଲ୍ୟବାନ । ୟୁଏଇରେ ଭାରତୀୟ ନାଗରିକଙ୍କ କଲ୍ୟାଣ ପାଇଁ ମହାମହିମ ଯତ୍ନଶୀଳ ଥିବାରୁ ମୁଁ ତାଙ୍କୁ କୃତଜ୍ଞତା ଜଣାଉଛି । ମୁଁ ମଧ୍ୟ ଆବୁଧାବୀରେ ଭାରତୀୟ ସମୁଦାୟ ପାଇଁ ମନ୍ଦିର ନିର୍ମାଣ ନିମନ୍ତେ ଜମି ଆବଂଟନ କରିଥିବାରୁ ମହାମହିମଙ୍କୁ ଧନ୍ୟବାଦ ଜଣାଉଛି ।

ବନ୍ଧୁଗଣ

ୟୁଏଇ ରାଷ୍ଟ୍ରପତି ମହାମହିମ ଶେଖ୍ ଖଲିଫା ବିନ୍ ଜାଏଦ ଆଲ୍ ନାହୟାନ ଓ ମହାମହିମ ଶେଖ୍ ମହମ୍ମଦଙ୍କ ବ୍ୟକ୍ତିଗତ ରୁଚି ଯୋଗୁ ଆମର ଭାଗିଦାରୀ ସଫଳ ହୋଇଛି । ଏହି ଦୃଷ୍ଟିରୁ ଆମର ସହଯୋଗ ଆଭିମୁଖ୍ୟ ମଧ୍ୟ ଆଗକୁ ବଢ଼ୁଛି । ମୁଁ ଦୃଢ଼ ଆଶ୍ୱସ୍ତ ଯେ ମହାମହିମଙ୍କ ଗସ୍ତ ପୂର୍ବ ଆଲୋଚନାକୁ ବୁଝିବା ଓ ଦୃଢ଼ତା ହାସଲରେ ସକ୍ଷମ ହେବ । ଆଉ ନିବିଡ଼, ଗତିଶୀଳ ଓ ବିବିଧ ଭାବେ ଆମର ଭାଗିଦାରୀର ଭବିଷ୍ୟତର ରୂପରେଖକୁ ଚିହ୍ନଟ କରିବ । ଶେଷରେ ଆମର ନିମନ୍ତ୍ରଣ ରକ୍ଷା କରି ମହାମହିମ ଭାରତ ଗସ୍ତରେ ଆସିଥିବାରୁ ମୁଁ ତାଙ୍କୁ ଧନ୍ୟବାଦ ଜଣାଉଛି । ମୁଁ ତାଙ୍କୁ ଓ ତାଙ୍କ ପ୍ରତିନିଧି ମଣ୍ଡଳୀଙ୍କ ସୁଖଦ ଭାରତ ଗସ୍ତ କାମନା କରୁଛି ।

ଧନ୍ୟବାଦ,

ବହୁତ ବହୁତ ଧନ୍ୟବାଦ ।