ପିଏମଇଣ୍ଡିଆ

ମହାମହିମ ପ୍ରଧାନମନ୍ତ୍ରୀ ମେଲୋନି,

ଉଭୟ ଦେଶର ପ୍ରତିନିଧିମଣ୍ଡଳୀ,

ଗଣମାଧ୍ୟମର ବନ୍ଧୁଗଣ,

ନମସ୍କାର!

ବୁଓନଜୋର୍ନୋ!

ମୋତେ ଏବଂ ମୋ ପ୍ରତିନିଧିମଣ୍ଡଳୀକୁ ଦିଆଯାଇଥିବା ଭବ୍ୟ ସ୍ୱାଗତ ପାଇଁ ମୁଁ ପ୍ରଧାନମନ୍ତ୍ରୀ ମେଲୋନିଙ୍କୁ ଆନ୍ତରିକତାର ସହିତ କୃତଜ୍ଞତା ଜଣାଉଛି।

ରୋମ ବିଶ୍ୱସ୍ତରରେ ‘ଶାଶ୍ୱତ ନଗରୀ ‘ ଭାବରେ ଜଣାଶୁଣା। ଭାରତରେ, ମୋର ଲୋକସଭା ନିର୍ବାଚନମଣ୍ଡଳୀ କାଶୀକୁ  ମଧ୍ୟ ଏକ ପ୍ରାଚୀନ ଏବଂ ଶାଶ୍ୱତ ନଗର ଭାବରେ ବିବେଚନା କରାଯାଏ। ଯେତେବେଳେ ଦୁଇଟି ସଭ୍ୟତା ଏକାଠି ହୁଅନ୍ତି, ସେତେବେଳେ ଆଲୋଚନା କେବଳ କାର୍ଯ୍ୟସୂଚୀରେ ସୀମିତ ହୋଇ ରହେ ନାହିଁ; ବରଂ, ଏଥିରେ ଇତିହାସର ଗଭୀରତା, ଭବିଷ୍ୟତ ପାଇଁ ଏକ ଦୃଷ୍ଟିକୋଣ ଏବଂ ବନ୍ଧୁତାର ସହଜତା – ଏ ତିନୋଟି ଏକାସାଥିରେ ପ୍ରତିଫଳିତ ହୁଏ।

ବନ୍ଧୁଗଣ,

ଗତ ପ୍ରାୟ ସାଢେ ତିନି ବର୍ଷ ମଧ୍ୟରେ, ମୋତେ ପ୍ରଧାନମନ୍ତ୍ରୀ ମେଲୋନିଙ୍କ ସହ ଅନେକଥର ସାକ୍ଷାତ କରିବାର ସୁଯୋଗ ମିଳିଛି। ଏହା ଭାରତ ଏବଂ ଇଟାଲୀ ମଧ୍ୟରେ ଥିବା ଘନିଷ୍ଠ ସହଯୋଗ ଏବଂ ସଦ୍‌ଭାବକୁ ପ୍ରତିଫଳିତ କରୁଛି। ତାଙ୍କ ନେତୃତ୍ୱରେ, ଆମର ସମ୍ପର୍କ ନୂତନ ଗତି, ଏକ ନୂତନ ଦିଗ ଏବଂ ନୂତନ ଆତ୍ମବିଶ୍ୱାସ ହାସଲ କରିଛି। ମୁଁ ଆନନ୍ଦିତ ଯେ, ଆମେ ଆମର ସମ୍ପର୍କକୁ ଉନ୍ନତ କରିବା ସହିତ, ଏକ ‘ବିଶେଷ ରଣନୈତିକ ସହଭାଗୀତା‘ ଘୋଷଣା କରୁଛୁ।

ବନ୍ଧୁଗଣ,

ଆଜିର ବୈଠକରେ ଆମେ ଆମର ଭବିଷ୍ୟତ ସହଭାଗିତାକୁ ଆହୁରି ସୁଦୃଢ଼ କରିବା ପାଇଁ ବିସ୍ତୃତ ଆଲୋଚନା କରିଛୁ। ଭାରତ-ଇଟାଲୀ ମିଳିତ ରଣନୈତିକ କାର୍ଯ୍ୟ ଯୋଜନା ୨୦୨୫-୨୯ ଆମ ସହଯୋଗକୁ ଏକ ବ୍ୟବହାରିକ ଏବଂ ଭବିଷ୍ୟତମୁଖୀ ଢାଞ୍ଚା ପ୍ରଦାନ କରୁଛି। ଆମେ ଏହାକୁ ସମୟବଦ୍ଧ ଭାବେ ଆଗେଇ ନେଉଛୁ। ଆମର ମିଳିତ ପ୍ରୟାସ ମାଧ୍ୟମରେ, ଦ୍ୱିପାକ୍ଷିକ ବାଣିଜ୍ୟ ୨୦ ବିଲିୟନ ୟୁରୋର ଲକ୍ଷ୍ୟ ଦିଗରେ ଦ୍ରୁତ ଗତିରେ ଅଗ୍ରସର ହେଉଛି।

ଭାରତରେ ବର୍ତ୍ତମାନ ଉପସ୍ଥିତ ୮୦୦ରୁ ଅଧିକ ଇଟାଲୀୟ କମ୍ପାନୀ ଭାରତର ଅଭିବୃଦ୍ଧି କାହାଣୀରେ ସକ୍ରିୟ ଅଂଶୀଦାର ହେଉଛନ୍ତି। ଆଜି ଆୟୋଜିତ ବ୍ୟବସାୟ ଫୋରମ୍‌ରୁ ଏହା ସ୍ପଷ୍ଟ ଯେ, ଉଭୟ ଦେଶର ବ୍ୟବସାୟିକ ନେତାମାନଙ୍କ ମଧ୍ୟରେ ନୂଆ ଉତ୍ସାହ, ନୂଆ ଆତ୍ମବିଶ୍ୱାସ ଏବଂ ନୂଆ ଆକାଂକ୍ଷା ଦେଖାଯାଉଛି। ଇଟାଲୀ ଏହାର ଡିଜାଇନ୍ ଏବଂ ସଠିକତା ପାଇଁ ବିଶ୍ୱସ୍ତରରେ ପରିଚିତ।

ଭାରତକୁ ବୃହତ୍ ପରିସର, ପ୍ରତିଭା ଏବଂ ନବସୃଜନର ଏକ ଶକ୍ତିଶାଳୀ କେନ୍ଦ୍ର ଭାବରେ ସ୍ୱୀକୃତି ଦିଆଯାଇଛି। ସେହିପରି, ଆମେ “ଭାରତ ଏବଂ ଇଟାଲୀରେ ଡିଜାଇନ୍ ଓ ବିକଶିତ, ଏବଂ ବିଶ୍ୱ ପାଇଁ ପ୍ରଦାନ” ନୀତିକୁ ଆଧାର କରି ଆଗକୁ ବଢ଼ିବୁ। ଫ୍ୟାଶନ୍‌ରୁ ଫିନଟେକ୍ ପର୍ଯ୍ୟନ୍ତ, ଚମଡ଼ାରୁ ଲଜିଷ୍ଟିକ୍ସ ପର୍ଯ୍ୟନ୍ତ, ଗତିଶୀଳତାରୁ ଉତ୍ପାଦନ ପର୍ଯ୍ୟନ୍ତ – ପ୍ରତ୍ୟେକ କ୍ଷେତ୍ରରେ – ଆମେ ଆମର ନିଜ ନିଜ ଶକ୍ତିକୁ ଏକତ୍ର କରି ସମଗ୍ର ମାନବଜାତିର କଲ୍ୟାଣ ପାଇଁ କାମ କରିବୁ। ଭାରତ-ୟୁରୋପୀୟ ସଂଘ ମୁକ୍ତ ବାଣିଜ୍ୟ ଚୁକ୍ତି (India-EU FTA)ର ସମାପ୍ତି ପାଇଁ ଇଟାଲୀର ସହଯୋଗ ନିମନ୍ତେ ମୁଁ ପ୍ରଧାନମନ୍ତ୍ରୀ ମେଲୋନିଙ୍କୁ ବିଶେଷ ଧନ୍ୟବାଦ ଜଣାଉଛି। ଆମେ ମିଳିମିଶି ଏହାର ଶୀଘ୍ର କାର୍ଯ୍ୟକାରୀ କରିବା ପାଇଁ ଉଦ୍ୟମ କରିବୁ ଯାହା ଦ୍ଵାରା ଆମର ବ୍ୟବସାୟିକ ସମ୍ପ୍ରଦାୟ ଏହାର ସମ୍ପୂର୍ଣ୍ଣ ଲାଭ ଉଠାଇପାରିବେ।

ବନ୍ଧୁଗଣ,

ପ୍ରଯୁକ୍ତିବିଦ୍ୟା ଏବଂ ନବସୃଜନ ଆମର ସହଭାଗୀତାର ଅଭିବୃଦ୍ଧି ଇଞ୍ଜିନ ଭାବରେ କାର୍ଯ୍ୟ କରେ। କୃତ୍ରିମ ବୁଦ୍ଧିମତା (AI), କ୍ୱାଣ୍ଟମ୍ କମ୍ପ୍ୟୁଟିଂ, ମହାକାଶ ଏବଂ ବେସାମରିକ ପରମାଣୁ ଶକ୍ତି ଭଳି କ୍ଷେତ୍ରରେ ସହଯୋଗ ପାଇଁ ଅପାର ସମ୍ଭାବନା ରହିଛି। ଆମେ ଉଭୟ ଦେଶର ଷ୍ଟାର୍ଟଅପ୍, ଗବେଷଣା କେନ୍ଦ୍ର ଏବଂ ଶିଳ୍ପ ମଧ୍ୟରେ ସମ୍ପର୍କ ସ୍ଥାପନ କରିବା ପାଇଁ ଏକ ଭାରତ-ଇଟାଲୀ ନବସୃଜନ କେନ୍ଦ୍ର ପ୍ରତିଷ୍ଠା କରିବା ଉପରେ କାର୍ଯ୍ୟ କରୁଛୁ।

ବନ୍ଧୁଗଣ,

ପ୍ରତିରକ୍ଷା ଏବଂ ସୁରକ୍ଷା କ୍ଷେତ୍ରରେ ଘନିଷ୍ଠ ସହଯୋଗ ଆମର ଗଭୀର ପାରସ୍ପରିକ ବିଶ୍ୱାସର ପ୍ରତୀକ। କେବଳ ଆମର ସଶସ୍ତ୍ର ବାହିନୀ ମଧ୍ୟରେ ନୁହେଁ ବରଂ ଉଭୟ ଦେଶର ପ୍ରତିରକ୍ଷା ଶିଳ୍ପ ମଧ୍ୟରେ ମଧ୍ୟ ସହଯୋଗ ବୃଦ୍ଧି ପାଉଛି। ଆମର ‘ପ୍ରତିରକ୍ଷା ଶିଳ୍ପ ରୋଡମ୍ୟାପ୍’ ସହ-ବିକାଶ ଏବଂ ସହ-ଉତ୍ପାଦନ ପାଇଁ ପଥ ପ୍ରଶସ୍ତ କରିଛି।

ସାମୁଦ୍ରିକ ଶକ୍ତି ଭାବରେ, ସଂଯୋଗ କ୍ଷେତ୍ରରେ ଭାରତ ଏବଂ ଇଟାଲୀ ମଧ୍ୟରେ ଘନିଷ୍ଠ ସହଯୋଗ ସ୍ୱାଭାବିକ। ଏକାଠି, ଆମେ ଜାହାଜ ଚଳାଚଳ, ବନ୍ଦର ଆଧୁନିକୀକରଣ, ଲଜିଷ୍ଟିକ୍ସ ଏବଂ ନୀଳ ଅର୍ଥନୀତି ଉପରେ କାମ କରିବୁ।

ଆମେ ଆମର ‘ପରସ୍ପର ଲାଭଦାୟକ’ (win-win) ସହଭାଗିତାକୁ ତୃତୀୟ ଦେଶଗୁଡ଼ିକ ପର୍ଯ୍ୟନ୍ତ ବିସ୍ତାର କରିବା ନେଇ ମଧ୍ୟ ଆଲୋଚନା କରିଛୁ। ଏହି ଦିଗରେ ଆଗକୁ ବଢ଼ି ଆମେ ଆଫ୍ରିକାରେ କଂକ୍ରିଟ୍ ପ୍ରକଳ୍ପଗୁଡ଼ିକରେ ସହଯୋଗ କରିବାକୁ ସହମତ ହୋଇଛୁ।

ବନ୍ଧୁଗଣ,

ଭାରତ ଏବଂ ଇଟାଲୀ ଏହି କ୍ଷେତ୍ରରେ ସହମତି ପ୍ରକାଶ କରିଛନ୍ତି ଯେ, ଆତଙ୍କବାଦ ମାନବତା ପାଇଁ ଏକ ଗମ୍ଭୀର ଚ୍ୟାଲେଞ୍ଜ ସୃଷ୍ଟି କରିଛି। ଆତଙ୍କବାଦୀ ଅର୍ଥ ପୋଷଣ (Terror financing) ବିରୋଧରେ ଆମର ସାମୁହିକ ପଦକ୍ଷେପ ସମଗ୍ର ବିଶ୍ୱ ସମ୍ମୁଖରେ ଏକ ଗୁରୁତ୍ୱପୂର୍ଣ୍ଣ ଉଦାହରଣ ସୃଷ୍ଟି କରିଛି।  ଭାରତ ଏବଂ ଇଟାଲୀ ଏକ ସ୍ପଷ୍ଟ ବାର୍ତ୍ତା ଦେଇଛନ୍ତି ଯେ, ଦାୟିତ୍ୱବାନ ଗଣତନ୍ତ୍ରଗୁଡ଼ିକ କେବଳ ଆତଙ୍କବାଦର ନିନ୍ଦା କରନ୍ତି ନାହିଁ; ବରଂ ସେମାନେ ଏହାର ଆର୍ଥିକ ନେଟୱର୍କକୁ ଭାଙ୍ଗିବା ପାଇଁ ମଧ୍ୟ କଡା ପଦକ୍ଷେପ ନିଅନ୍ତି। ଆମେ ୟୁକ୍ରେନ, ପଶ୍ଚିମ ଏସିଆ ଏବଂ ଉତ୍ତେଜନାର ଅନ୍ୟାନ୍ୟ କ୍ଷେତ୍ରର ପରିସ୍ଥିତି ସମ୍ପର୍କରେ ନିରନ୍ତର ଯୋଗାଯୋଗରେ ରହିଛୁ। ଭାରତର ମତ ସ୍ପଷ୍ଟ: ସମସ୍ତ ସମସ୍ୟା ଆଲୋଚନା ଏବଂ କୂଟନୀତି ମାଧ୍ୟମରେ ସମାଧାନ କରାଯିବା ଉଚିତ।

ବନ୍ଧୁଗଣ,

ଉଭୟ ଦେଶର ପ୍ରତ୍ୟେକ ପଦକ୍ଷେପରେ ଆମର ଐତିହାସିକ ସାଂସ୍କୃତିକ ଏବଂ ପାରସ୍ପରିକ ଜନସମ୍ପର୍କର ଝଲକ ଦୃଶ୍ୟମାନ ହେଉଛି। ଇଟାଲୀରେ, ଭାରତୀୟ କଳା, ଯୋଗ, ଆୟୁର୍ବେଦ ଏବଂ ଖାଦ୍ୟ ପ୍ରତି ଆକର୍ଷଣ ବୃଦ୍ଧି ପାଉଛି। ସଂସ୍କୃତ ଏବଂ ଲାଟିନ୍ ଭଳି ପ୍ରାଚୀନ ଭାଷାଗୁଡ଼ିକ ଗୋଟିଏ ଭାଷାଗତ ପରିବାରର। ଏହା ଦର୍ଶାଏ ଯେ, ଆମର ସମ୍ପର୍କ କେବଳ କୂଟନୀତିର ନୁହେଁ, ବରଂ ଏକ ସହଭାଗୀ ଐତିହ୍ୟର ସମ୍ପର୍କ।

ଆସନ୍ତା ବର୍ଷ, ଭାରତ ଏବଂ ଇଟାଲୀ ମଧ୍ୟରେ ସମ୍ପର୍କର ୮୦ ତମ ବାର୍ଷିକୀ ପାଳନ କରାଯିବା ପାଇଁ ଏକ “ସଂସ୍କୃତି ବର୍ଷ” ପାଳନ କରାଯିବ। ଏହା ଆମର ସାଂସ୍କୃତିକ ସମ୍ପର୍କକୁ ଆହୁରି ମଜଭୁତ କରିବ। ଇଟାଲୀରେ ବସବାସ କରୁଥିବା ବିଶାଳ ଭାରତୀୟ-ବଂଶଜ ଆମ ସମ୍ପର୍କରେ ଏକ ଜୀବନ୍ତ ସଂଯୋଗ ଭାବରେ କାର୍ଯ୍ୟ କରୁଛି। ପ୍ରଧାନମନ୍ତ୍ରୀ ମେଲୋନି ଏବଂ ଇଟାଲୀର ଜନସାଧାରଣଙ୍କ ପ୍ରତି ସେମାନଙ୍କ ଯତ୍ନ ଏବଂ ସମର୍ଥନ ପାଇଁ ମୁଁ ଆନ୍ତରିକତାର ସହିତ କୃତଜ୍ଞତା ଜ୍ଞାପନ କରୁଛି।

ତିନି ବର୍ଷ ପୂର୍ବେ ସମାପ୍ତ ହୋଇଥିବା ମାଇଗ୍ରେସନ୍ ଏବଂ ମୋବିଲିଟି ପାର୍ଟନରଶିପ୍, ଦ୍ୱାରା ଉଭୟ ଦେଶର ଲୋକମାନଙ୍କ ମଧ୍ୟରେ ଯାତାୟାତ ବୃଦ୍ଧି ପାଇଛି।

ମହାମହିମ,

ଆଜିର ଅତ୍ୟନ୍ତ ଉପଯୋଗୀ ବୈଠକ ପାଇଁ ଏବଂ ଆପଣଙ୍କ ବନ୍ଧୁତା ପାଇଁ ମୁଁ ପୁନର୍ବାର ଆପଣଙ୍କ ପ୍ରତି ଆନ୍ତରିକତାର ସହିତ କୃତଜ୍ଞତା ଜ୍ଞାପନ କରୁଛି। ଭାରତର ୧୪୦ କୋଟି  ଜନସାଧାରଣଙ୍କ ତରଫରୁ, ମୁଁ ଆପଣଙ୍କୁ ପୁଣିଥରେ ଭାରତ ଗସ୍ତ କରିବାକୁ ଆମନ୍ତ୍ରଣ କରୁଛି।

ଆପଣଙ୍କୁ ବହୁତ ବହୁତ ଧନ୍ୟବାଦ।

ଗ୍ରାଜିଏ ମିଲେ!

*****

MT