ପିଏମଇଣ୍ଡିଆ

କେନ୍ଦ୍ରୀୟ ରାଷ୍ଟ୍ରାୟତ୍ତ ଉଦ୍ୟୋଗ ସମୂହର କର୍ମଚାରୀମାନଙ୍କ ପାଇଁ ଅଷ୍ଟମ ପର୍ଯ୍ୟାୟ ବେତନ ବୁଝାମଣା ଅନୁଷ୍ଠିତ ହେବ । ଏ ସଂକ୍ରାନ୍ତ ବେତନ ନୀତିକୁ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ଅଧ୍ୟକ୍ଷତାରେ ଅନୁଷ୍ଠିତ କେନ୍ଦ୍ର କ୍ୟାବିନେଟ ଅନୁମୋଦନ କରିଛନ୍ତି । କ୍ୟାବିନେଟର ନିଷ୍ପତ୍ତି ଅନୁଯାୟୀ ବେତନ ବୁଝାମଣାର ବିଭିନ୍ନ ଦିଗ ସ୍ଥିର କରାଯାଇଛି ।

1. ରାଷ୍ଟ୍ରାୟତ୍ତ ଉଦ୍ୟୋଗର ପରିଚାଳନା ମଣ୍ଡଳୀ ସେମାନଙ୍କର କର୍ମଚାରୀ(ୱାର୍କମ୍ୟାନ)ମାନଙ୍କ ବେତନ ସଂଶୋଧନ ନେଇ ସ୍ୱାଧୀନ ଭାବେ ଆଲୋଚନା କରିପାରିବେ । ଯେଉଁ କର୍ମଚାରୀମାନଙ୍କ ୱେଜ ସେଟଲମେଂଟ ଅବଧି (5 କିମ୍ବା 10 ବର୍ଷ) 31.12.2016ରେ ଶେଷ ହୋଇଛି ସେମାନଙ୍କ କ୍ଷେତ୍ରରେ ଦରମା ସଂଶୋଧନ ପାଇଁ ଆଲୋଚନା ଆରମ୍ଭ କରାଯାଇପାରିବ ।
2. ଦରମା ସଂଶୋଧନ ପାଇଁ ରାଷ୍ଟ୍ରାୟତ୍ତ ଉଦ୍ୟୋଗ ସମୂହକୁ କେନ୍ଦ୍ର ସରକାର କୌଣସି ବଜେଟ ସହାୟତା ଦେବେ ନାହିଁ । ସଂପୃକ୍ତ ଉଦ୍ୟୋଗ ତାର ଆଭ୍ୟନ୍ତରୀଣ ସମ୍ବଳରୁ ଦରମା ସଂଶୋଧନ ସଂକ୍ରାନ୍ତ ଅତିରିକ୍ତ ଆର୍ଥିକ ବୋଝ ବହନ କରିବେ ।
3. ପୁନର୍ବିନ୍ୟାସ ତଥା ପୁନରୁଦ୍ଧାର ଯୋଜନା ଅଧୀନରେ ଆସୁଥିବା ରାଷ୍ଟ୍ରାୟତ୍ତ ଉଦ୍ୟୋଗର କର୍ମଚାରୀମାନଙ୍କ ଦରମା ସଂଶୋଧନ ପ୍ରସ୍ତାବ ସରକାରଙ୍କ ଅନୁମୋଦିତ ଯୋଜନା ଅନୁସାରେ ସମ୍ପାଦିତ ହେବ ।
4. କର୍ମଚାରୀମାନଙ୍କର ଦରମା ହାର ଯେପରି ଅଫିସର, ଏକଜିକ୍ୟୁଟିଭ ଏବଂ ଅଣ-ୟୁନିଅନ ସୁପରଭାଇଜରମାନଙ୍କର ଦରମା ହାରଠାରୁ ଅଧିକ ହେବନାହିଁ, ତାହା ସଂପୃକ୍ତ ରାଷ୍ଟ୍ରାୟତ୍ତ ଉଦ୍ୟୋଗ ସୁନିଶ୍ଚିତ କରିବେ ।
5. ଦୁଇଟି କ୍ରମିକ ଦରମା ନିର୍ଦ୍ଧାରଣ ବୁଝାମଣା ପରେ କର୍ମଚାରୀମାନଙ୍କର (ପାଞ୍ଚବର୍ଷ ଅବଧିର) ବେତନ ଯେପରି ଅଫିସର, ଏକଜିକ୍ୟୁଟିଭ ଏବଂ ଅଣ-ୟୁନିଅନ ସୁପରଭାଇଜରମାନଙ୍କର (10ବର୍ଷର ଅବଧି) ଦରମା ହାରଠାରୁ ଅଧିକ ହେବନାହିଁ, ତାହା ସଂପୃକ୍ତ କର୍ତ୍ତୃପକ୍ଷ ସୁନିଶ୍ଚିତ କରିବେ ।
6. କର୍ମଚାରୀ (ୱାର୍କମ୍ୟାନ) ଏବଂ ଅଫିସର, ଏକଜିକ୍ୟୁଟିଭ ଏବଂ ଅଣ-ୟୁନିଅନ ସୁପରଭାଇଜରମାନଙ୍କର ଦରମାରେ ବିଷମତା ଦୂର କରିବା ଲାଗି ଗ୍ରେଡ ଭିତ୍ତିକ ଡିଏ ନ୍ୟୁଟ୍ରାଲାଇଜେସନ ବ୍ୟବସ୍ଥା ଅବଲମ୍ବନ କରାଯିବ ।
7. ଦରମା ସଂଶୋଧନ ପରେ ସଂପୃକ୍ତ ରାଷ୍ଟ୍ରାୟତ୍ତ ଉଦ୍ୟୋଗରୁ ପ୍ରସ୍ତୁତ ସାମଗ୍ରୀ ଓ ସେବାର ମୂଲ୍ୟ ଯେପରି ନ’ବଢ଼ିବ ସେ ଦିଗରେ ସଂପୃକ୍ତ କର୍ତ୍ତୃପକ୍ଷ ଉଚିତ ଧ୍ୟାନ ଦେବେ ।
8. ସଂପୃକ୍ତ ରାଷ୍ଟ୍ରାୟତ୍ତ କର୍ତ୍ତୃପକ୍ଷ ଦରମା ସଂଶୋଧନ ବେଳେ ଉତ୍ପାଦନ ଖର୍ଚ୍ଚ ଯେପରି ନ’ବଢ଼େ ତାହା ସୁନିଶ୍ଚିତ କରିବେ ।
9. ଦରମା ସଂଶୋଧନ ବୁଝାମଣାର ଅବଧି 5 ବର୍ଷ ରହିବ । ତେବେ ଯେଉଁ କର୍ମଚାରୀମାନେ 10 ବର୍ଷିଆ ଅବଧି ପାଇଁ ଚାହିଁଛନ୍ତି ସେମାନଙ୍କର ଦରମା ବୁଝାମଣାର ଅବଧି 10 ବର୍ଷ ହେବ । ତେବେ ସଂଶୋଧିତ ଦରମା ବୁଝାମଣା ଜାନୁଆରୀ 1, 2017ରୁ ଲାଗୁ ହେବ ।
10. ରାଷ୍ଟ୍ରାୟତ୍ତ ଉଦ୍ୟୋଗମାନେ ସେମାନଙ୍କର ମୂଳ ମନ୍ତ୍ରଣାଳୟ ତଥା ବିଭାଗ ସହ ଆଲୋଚନା କରିବା ପରେ କର୍ମଚାରୀମାନଙ୍କ ପାଇଁ ସଂଶୋଧିତ ବେତନ ବୁଝାମଣା ଲାଗୁ କରିବେ ।

ଏବେ ସମଗ୍ର ଦେଶରେ ମୋଟ 320ଟି କେନ୍ଦ୍ରୀୟ ରାଷ୍ଟ୍ରାୟତ୍ତ ଉଦ୍ୟୋଗ ରହିଛି ଏବଂ ସେ ସବୁରେ 12.34ଲକ୍ଷ କର୍ମଚାରୀ କାର୍ଯ୍ୟ କରୁଛନ୍ତି । ସେମାନଙ୍କ ମଧ୍ୟରୁ 2.99 ଲକ୍ଷ ହେଉଛନ୍ତି ବୋର୍ଡସ୍ତରର ଅଥବା ନିମ୍ନବୋର୍ଡ ସ୍ତରର ଏକଜିକ୍ୟୁଟିଭି ଓ ଅଣ-ୟୁନିଅନ ସୁପରଭାଇଜର ଶ୍ରେଣୀର । ଅବଶିଷ୍ଟ 9.35 ଲକ୍ଷ ହେଉଛନ୍ତି ୟୁନିଅନ ଭିତ୍ତିକ କର୍ମଚାରୀ ।

**********