ପିଏମଇଣ୍ଡିଆ

କେରଳମ୍‌ର ରାଜ୍ୟପାଳ ରାଜେନ୍ଦ୍ର ଆର୍ଲେକର ଜୀ, କେନ୍ଦ୍ର କ୍ୟାବିନେଟ୍‌ରେ ମୋର ସହଯୋଗୀ, ସୁରେଶ ଗୋପୀ ଜୀ, ଜର୍ଜ କୁରିୟନ୍ ଜୀ, ସାଂସଦ ଏବଂ ବିଧାୟକମାନେ, ପୂର୍ବତନ କେନ୍ଦ୍ର ମନ୍ତ୍ରୀ ରାଜୀବ ଚନ୍ଦ୍ରଶେଖର ଜୀ, ଭାଇ ଓ ଭଉଣୀମାନେ !

କୋଚି ଗସ୍ତ ସର୍ବଦା ଏକ ସୁନ୍ଦର ଅଭିଜ୍ଞତା । ଆଜି ଏହି ସ୍ପନ୍ଦନଶୀଳ ଉପକୂଳ ସହରରୁ ମୋତେ କେରଳମ୍‌ର ବିକାଶକୁ ଆହୁରି ତ୍ୱରାନ୍ୱିତ କରିବାର ସୁଯୋଗ ମିଳିଛି । କିଛି ସମୟ ପୂର୍ବରୁ, କେରଳମ୍‌ର ବିକାଶ ସହିତ ଜଡିତ ପ୍ରାୟ ୧୧,୦୦୦ କୋଟି ଟଙ୍କାର ପ୍ରକଳ୍ପର ଶିଳାନ୍ୟାସ ଏବଂ ଲୋକାର୍ପଣ କରାଯାଇଛି । ଏହି ପ୍ରକଳ୍ପଗୁଡିକ ପାଇଁ ମୁଁ କେରଳମ୍‌ର ଲୋକମାନଙ୍କୁ ହୃଦୟର ସହିତ ଅଭିନନ୍ଦନ ଜଣାଉଛି ।

ମୋର ପ୍ରିୟ ବନ୍ଧୁଗଣ,

ଆତ୍ମନିର୍ଭର ଭାରତ ଗଠନ ଏବଂ ମେକ୍ ଇନ୍ ଇଣ୍ଡିଆକୁ ସମର୍ଥନ କରିବା ପାଇଁ, ପେଟ୍ରୋଲିୟମ କ୍ଷେତ୍ରକୁ ବିସ୍ତାର କରିବା ଅତ୍ୟନ୍ତ ଗୁରୁତ୍ୱପୂର୍ଣ୍ଣ । ଆଜି କୋଚି ରିଫାଇନାରୀରେ ପଲିପ୍ରୋପାଇଲିନ୍ ୟୁନିଟ୍‌ର ଭିତ୍ତିପ୍ରସ୍ତର ସ୍ଥାପନ ଉତ୍ସବ ପଛରେ ମଧ୍ୟ ଏହା ଲକ୍ଷ୍ୟ ରହିଛି । ଏହି ୟୁନିଟ୍ ବାର୍ଷିକ ପ୍ରାୟ ୪ ଲକ୍ଷ ଟନ୍ ପଲିପ୍ରୋପାଇଲିନ ଉତ୍ପାଦନ କରିବ । ଭବିଷ୍ୟତରେ, ଏହି ପ୍ଲାଣ୍ଟ ପ୍ୟାକେଜିଂ, ବୟନଶିଳ୍ପ, ଅଟୋମୋବାଇଲ୍ ଏବଂ ଚିକିତ୍ସା ଉପକରଣ ସମେତ ଅନେକ ଶିଳ୍ପକୁ ସମର୍ଥନ କରିବ।

ମୋର ପ୍ରିୟ ବନ୍ଧୁଗଣ,

ଭାରତ ଆଜି ଏକ ପ୍ରମୁଖ ଉତ୍ପାଦନ କେନ୍ଦ୍ର ହେବାକୁ ଯାଉଛି । ଦେଶ ଏଆଇ ଏବଂ ସେମିକଣ୍ଡକ୍ଟର କ୍ଷେତ୍ରରେ ମଧ୍ୟ ଦ୍ରୁତ ଗତିରେ ପ୍ରଗତି କରୁଛି । ଏହି ସମସ୍ତ କାର୍ଯ୍ୟ ପାଇଁ ଅଧିକ ଶକ୍ତି ଆବଶ୍ୟକ, ସବୁଜ ଏବଂ ସ୍ୱଚ୍ଛ ଶକ୍ତି ଆବଶ୍ୟକ ଏବଂ ଭାରତ ବିଶ୍ୱର ପ୍ରମୁଖ ସୌରଶକ୍ତି ଉତ୍ପାଦକ ଦେଶମାନଙ୍କ ମଧ୍ୟରୁ ଗୋଟିଏ ହୋଇପାରିଛି । କେରଳମ୍ ମଧ୍ୟ ସୌରଶକ୍ତି ଉତ୍ପାଦନରେ ଆଗକୁ ବଢ଼ିବା ନିଶ୍ଚିତ କରିବା ହେଉଛି ଆମର ପ୍ରୟାସ । ଏହି ଲକ୍ଷ୍ୟରେ, ଆଜି ପଶ୍ଚିମ କଲ୍ଲାଡାରେ ୫୦ ମେଗାୱାଟର ଭାସମାନ ସୌର ପ୍ରକଳ୍ପର ଭିତ୍ତିପ୍ରସ୍ତର ସ୍ଥାପନ କରାଯାଇଛି। କେରଳମ୍‌ରେ ବହୁ ସଂଖ୍ୟକ ଜଳାଶୟ ଅଛି । ତେଣୁ, ଏଠାରେ ଭାସମାନ ସୌର ଶକ୍ତି କ୍ଷେତ୍ରରେ ଯଥେଷ୍ଟ ସମ୍ଭାବନା ରହିଛି ।

ମୋର ପ୍ରିୟ ବନ୍ଧୁଗଣ,

ଆଜି ବିଶ୍ୱ ଆଧୁନିକ ଭିତ୍ତିଭୂମିରେ ନିବେଶ ପାଇଁ ଭାରତକୁ ପ୍ରଶଂସା କରୁଛି । ଏହି ବର୍ଷ କେନ୍ଦ୍ର ସରକାରଙ୍କ ବଜେଟ୍‌ରେ ଭିତ୍ତିଭୂମି ପାଇଁ ରେକର୍ଡ ପାଣ୍ଠି ମଧ୍ୟ ଅନ୍ତର୍ଭୁକ୍ତ କରାଯାଇଛି । ଏହି ଭିତ୍ତଭୂମି ନିବେଶରୁ କେରଳମ୍‌କୁ ସର୍ବାଧିକ ଲାଭ ମିଳୁଛି । ଅମୃତ ଭାରତ ଷ୍ଟେସନ୍ ଯୋଜନା ଅଧୀନରେ, ଶୋର୍‌ନୁର ଜଙ୍କସନ୍‌, କୁଟ୍ଟି-ପୁରମ୍ ଏବଂ ଚଙ୍ଗନାସେରୀ ରେଳ ଷ୍ଟେସନଗୁଡିକୁ ଆଧୁନିକୀକରଣ କରାଯାଇଛି । ଏଥିସହିତ, ଶୋର୍‌ନୁର-ନିଲାମ୍ବୁର ରେଳ ଲାଇନର ଏକ ବଡ଼ ଅଂଶର ବିଦ୍ୟୁତୀକରଣ ସମାପ୍ତ ହୋଇଛି । ଆଜି, ପାଲକ୍କଡ-ପୋଲ୍ଲାଚ୍ଚି ଟ୍ରେନ ସେବା ମଧ୍ୟ ଆରମ୍ଭ ହୋଇଛି । ଏହା କେରଳମ୍ ଏବଂ ତାମିଲନାଡୁ ଉଭୟ ଲୋକଙ୍କୁ ଅଧିକ ସୁବିଧା ପ୍ରଦାନ କରିବ ।

ମୋର ପ୍ରିୟ ବନ୍ଧୁଗଣ,

ଆଜି କେରଳରେ ଅନେକ ଗୁରୁତ୍ୱପୂର୍ଣ୍ଣ ସଡ଼କ ପ୍ରକଳ୍ପ ମଧ୍ୟ ଉଦ୍‌ଘାଟନ କରାଯାଇଛି । ଛଅ ଲେନ୍ ବିଶିଷ୍ଟ ଏହି ରାସ୍ତା ଆଲିକ୍କାଲ ବନ୍ଦରକୁ ସଂଯୋଗୀକରଣକୁ ଉନ୍ନତ କରିବ । ଛଅ ଲେନ୍ ବିଶିଷ୍ଟ କୋଝିକୋଡ ବାଇପାସ୍ ଟ୍ରାଫିକ ଭିଡ଼ ହ୍ରାସ କରିବ ଏବଂ ଯାତ୍ରା ସମୟକୁ ଯଥେଷ୍ଟ ପରିମାଣରେ ସଞ୍ଚୟ କରିବ । ଏହି ସମସ୍ତ ପ୍ରକଳ୍ପ କେରଳର ଚାଷୀମାନଙ୍କୁ ଲାଭ ଦେବ ଏବଂ ପର୍ଯ୍ୟଟନ ଏବଂ ଅନ୍ୟାନ୍ୟ ଶିଳ୍ପକୁ ପ୍ରୋତ୍ସହିତ କରିବ ।

ମୋର ପ୍ରିୟ ବନ୍ଧୁଗଣ,

ଭିତ୍ତିଭୂମିରେ ଖର୍ଚ୍ଚ ହେଉଥିବା ପ୍ରତ୍ୟେକ ଟଙ୍କା ନୂତନ ନିଯୁକ୍ତି ସୃଷ୍ଟି କରିବ । ଏହି ପ୍ରକଳ୍ପଗୁଡିକ କେରଳମ୍‌ର ହଜାର ହଜାର ଯୁବକ ଯୁବତୀଙ୍କୁ ନୂତନ ନିଯୁକ୍ତି ସୁଯୋଗ ପ୍ରଦାନ କରିବ । ମୁଁ ନିଶ୍ଚିତ ଯେ ଏହି ସମସ୍ତ ପ୍ରକଳ୍ପ ଏକ ବିକଶିତ କେରଳମ୍ ପାଇଁ ଆମର ସଂକଳ୍ପ ପୂରଣ କରିବା ଦିଗରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିବ ।

ପୁଣିଥରେ ଆପଣମାନଙ୍କୁ ମୋର ଅନେକ ଶୁଭକାମନା ।

ଧନ୍ୟବାଦ!

SR