ପିଏମଇଣ୍ଡିଆ

ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଆଜି ନୂଆଦିଲ୍ଲୀର ତାଲକୋଟରା ଷ୍ଟାଡିୟମଠାରେ କ୍ରେଡାଇ ୟୁଥକନ-2019କୁ ସମ୍ବୋଧନ କରିଥିଲେ ।

ଉପସ୍ଥିତ ଜନସଭାକୁ ସମ୍ବୋଧନ କରି ପ୍ରଧାନମନ୍ତ୍ରୀ କହିଥିଲେ ଯେ  2022 ସୁଦ୍ଧା ପ୍ରତ୍ୟେକ ବାସହୀନ ବ୍ୟକ୍ତିକୁ ଆବାସ ଯୋଗାଇବା ଲାଗି ଦ୍ରୁତ ଗତିରେ କାର୍ଯ୍ୟ ଜାରି ରହିଛି । ସେ କହିଥିଲେ ଯେ ପ୍ରଧାନମନ୍ତ୍ରୀ ଆବାସ ଯୋଜନା ଅଧୀନରେ 1.5 କୋଟି ଆବାସ ନିର୍ମାଣ କରାଯାଇଛି ଏଥିମଧ୍ୟରୁ 15 ଲକ୍ଷ ଆବାସ ସହରାଂଚଳ ଗରିବଙ୍କ ପାଇଁ ନିର୍ମାଣ କରାଯାଇଛି । ସେ ଉଲ୍ଲେଖ କରିଥିଲେ ଯେ ବର୍ତ୍ତମାନର କେନ୍ଦ୍ର ସରକାରଙ୍କ ଅଧୀନରେ ସମ୍ପୂର୍ଣ୍ଣ ପ୍ରକ୍ରିୟାରେ ପାରଦର୍ଶିତା ଆସିପାରିଛି । ସେ କହିଥିଲେ ଯେ ଯେତେବେଳେ ସରକାର ସଠିକ ଉଦ୍ଦେଶ୍ୟ ନେଇ ନୀତି ପ୍ରଣୟନ କରିଥାଏ, ଏହା ଦୁର୍ନୀତି ଦୂର କରିଥାଏ ଏବଂ ଉତ୍ତମ ଫଳାଫଳ ପ୍ରଦାନ କରିଥାଏ ।

ପ୍ରଧାନମନ୍ତ୍ରୀ କହିଥିଲେ ଯେ ରିଅଲ ଇଷ୍ଟେଟ ନିୟାମକ ପ୍ରାଧିକରଣ (ରେରା) ଉପଭୋକ୍ତା ଏବଂ ରିଅଲ ଇଷ୍ଟେଟ ଡେଭଲପର୍ସଙ୍କ ମଧ୍ୟରେ ବିଶ୍ୱାସକୁ ସୁଦୃଢ଼ କରିଛି । ସେ କହିଥିଲେ ଯେ 28ଟି ରାଜ୍ୟରେ ରେରା ବିଜ୍ଞପିତ ହୋଇଛି । 35 ହଜାରରୁ ଅଧିକ ରିଅଲ ଇଷ୍ଟେଟ ପ୍ରକଳ୍ପ ଏବଂ 27ହଜାରରୁ ଅଧିକ ରିଅଲ ଇଷ୍ଟେଟ ଏଜେଣ୍ଟ ରେରା ଅଧୀନରେ ପଞ୍ଜିକୃତ ହୋଇଛନ୍ତି ଏବଂ ଲକ୍ଷାଧିକ ଫ୍ଲାଟ ନିର୍ମାଣ କରାଯାଇଛି ବୋଲି ପ୍ରଧାନମନ୍ତ୍ରୀ କହିଥିଲେ ।

ଗତ ଚାରିବର୍ଷ ମଧ୍ୟରେ ବ୍ୟବସାୟିକ ସୁଗମତା ମାନ୍ୟତାରେ ଭାରତର ଉତ୍ଥାନ ବିଷୟରେ ଉଲ୍ଲେଖ କରି ପ୍ରଧାନମନ୍ତ୍ରୀ କହିଥିଲେ ଯେ ଭାରତରେ ବ୍ୟବସାୟିକ ସୁଗମତାକୁ ସୁନିଶ୍ଚିତ କରିବା ଲାଗି ସରକାର ପ୍ରତିବଦ୍ଧ । ଏହି ପରିପ୍ରେକ୍ଷୀରେ, ସେ ଉଲ୍ଲେଖ କରିଥିଲେ ଯେ ନିର୍ମାଣ ଅନୁମତି ସମେତ ସମସ୍ତ ସରକାରୀ ମଞ୍ଜୁରି ପୂର୍ବାପେକ୍ଷା ଅଧିକ ଦ୍ରୁତ ଗତିରେ ପ୍ରଦାନ କରାଯାଉଛି ।

ଆବାସ ଉଦ୍ୟୋଗ ଏବଂ ଗୃହ କ୍ରେତାମାନଙ୍କ ସହାୟତା ଲାଗି କେନ୍ଦ୍ର ସରକାରଙ୍କ ଦ୍ୱାରା ନିଆଯାଇଥିବା ବିଭିନ୍ନ ଟିକସ ସଂସ୍କାର ବିଷୟରେ ପ୍ରଧାନମନ୍ତ୍ରୀ ଆଲୋକପାତ କରିଥିଲେ । ବିଭିନ୍ନ ନିର୍ମାଣ ସାମଗ୍ରୀ ଉପରେ ଜିଏସଟି ଦର ହ୍ରାସ ବିଷୟରେ ସେ ଉଲ୍ଲେଖ କରିଥିଲେ । ସେ କହିଥିଲେ, ଚଳିତ ବଜେଟରେ ମଧ୍ୟବିତଙ୍କ ପାଇଁ ଆୟକର ରିହାତି ପ୍ରଦାନ କରାଯାଇଛି । ସେ କହିଥିଲେ ଯେ ଏହିସବୁ ପଦକ୍ଷେପର ସଂଚିତ ଲାଭ ଆବାସ କ୍ଷେତ୍ର ଏବଂ ଗୃହକ୍ରେତାମାନଙ୍କୁ ଲାଭାନ୍ୱିତ କରିବ ।

ସାଧାରଣ ନାଗରିକଙ୍କ ଘର ମାଲିକାନା ହାସଲ କରିବା ସ୍ୱପ୍ନକୁ ବାସ୍ତବ ରୂପ ଦେବାରେ କ୍ରେଡାଇର ଯୋଗଦାନକୁ ପ୍ରଧାନମନ୍ତ୍ରୀ ପ୍ରଶଂସା କରିଥିଲେ । ସେ କହିଥିଲେ ଯେ ‘ନୂତନ ଭାରତ’ ରୂପ ନେବା ସମୟରେ ୟୁଥକନର ଆୟୋଜନ କରାଯାଉଛି । ସେ କହିଥିଲେ ଯେ ନୂତନ ଭାରତକୁ ରୂପ ଦେବାରେ ଦେଶର ଯୁବକମାନଙ୍କର ଗୁରୁତ୍ୱପୂର୍ଣ୍ଣ ଭୂମିକା ରହିଛି ।

ଏଥିପୂର୍ବରୁ, ତାଲକୋଟରା ଷ୍ଟାଡିୟମରେ କ୍ରେଡାଇ ପକ୍ଷରୁ ଆୟୋଜିତ ପ୍ରଦର୍ଶନୀକୁ ପ୍ରଧାନମନ୍ତ୍ରୀ ବୁଲି ଦେଖିଥିଲେ ।

**********