ପିଏମଇଣ୍ଡିଆ

ବିଶାଳ ସଂଖ୍ୟାରେ ଏଠାରେ ଉପସ୍ଥିତ ସୁରେନ୍ଦ୍ର ନଗର ଜିଲ୍ଲାର ମୋର ପ୍ରିୟ ଭାଇ ଓ ଭଉଣୀମାନେ । ଆପଣମାନେ ଗରିବରୁ ଅତି ଗରିବ ଲୋକଙ୍କୁ ପଚାରନ୍ତୁ, ଯାହା ପାଖରେ ଘର ନାହିଁ ତାକୁ ପଚାରନ୍ତୁ-ଘର ଦରକାର, ସିଏ କହିବ ହଁ ଦରକାର । ଆଉ ତାଙ୍କୁ ଘର ଦେବାକୁ ହେଲେ, ଗରିବଙ୍କୁ ରହିବା ପାଇଁ ବ୍ୟବସ୍ଥା କରାଇବାକୁ ହେଲେ ବିନା ବିକାଶରେ ଏହା ସମ୍ଭବ ନୁହେଁ । ପୂର୍ବରୁ ମଧ୍ୟ ବିକାଶ ହେଉଥିଲା । କିନ୍ତୁ ସେତେବେଳେ କୌଣସି ଗାଁରେ କୌଣସି ସାହିରେ ଗୋଟିଏ ହାତପମ୍ପ ଲଗାଇଦେଲେ ନେତା ତିନି ତିନି ଥର ନିର୍ବାଚନରେ କହୁଥିଲା କି ଦେଖନ୍ତୁ ମୁଁ ଆପଣଙ୍କ ସେଠାରେ ହାତ ପମ୍ପ ଲଗାଇଛି । ମୋତେ ନିର୍ବାଚନରେ ବିଜୟୀ କରାନ୍ତୁ ମୁଁ ଆପଣଙ୍କ ବିକାଶ ପାଇଁ କାମ କରିଛି । ଅର୍ଥାତ ହାତପମ୍ପ ଲଗାଇବା, ପାଣି ପାଇଁ ହାତପମ୍ପ ଲଗାଇବା ହିଁ ସେତେବେଳେ ବିକାଶର ପରିଭାଷା ଥିଲା ।

ଆଜି ଗୋଟିଏ ଏଭଳି ସରକାର ଅଛି, ଯିଏ ଏତେ ବଡ଼ ପାଇପ-ଲାଇନ ଲଗାଇ ମା’ ନର୍ମଦାର ଜଳକୁ ଗାଁ ଗାଁରେ ଘରେ ଘରେ ପହଂଚାଉଛି । ଆଉ ସମଗ୍ର ଗୁଜରାଟରେ ନର୍ମଦା ଯୋଜନା ଯୋଗୁ ସର୍ବାଧିକ ଲାଭ ଯଦି କାହାରି ହେବାର ଅଛି, ଉକ୍ତ ଜିଲ୍ଲା ନାଁ ହେଉଛି, ସେ ଜିଲ୍ଲାର ନାଁ କ’ଣ ? ସିଏ ହେଉଛି ସୁରେନ୍ଦ୍ର ନଗର । ନର୍ମଦା ଜଳ ଏହି ଶୁଖିଲା ମାଟିକୁ ନନ୍ଦନବନ କରିବା ପାଇଁ ଆପଣଙ୍କ ଘର ପର୍ଯ୍ୟନ୍ତ ଆସିଛି । କେବଳ ଗ୍ରାମାଂଚଳ ଓ କୃଷି ଜୀବନରେ ଏହି ନର୍ମଦାର ପ୍ରଭାବ ସୃଷ୍ଟି ହେବ, ସେମିତି ନୁହେଁ ଏହି ପାଣି ଏଭଳି ଏକ ଶକ୍ତି ଯାହା ସୁରେନ୍ଦ୍ର ନଗର ଜିଲ୍ଲାର ପାଣି ଯୋଗୁ ଆଗାମୀ ଦିନରେ ଉଦ୍ୟୋଗିକ ବିକାଶର ମଧ୍ୟ ବହୁତ ବଡ଼ କେନ୍ଦ୍ର ପାଲଟିବ । ରୋଜଗାରର ସର୍ବାଧିକ ସମ୍ଭାବନା ସୁରେନ୍ଦ୍ର ନଗର ଜିଲ୍ଲାରେ ସୃଷ୍ଟି ହେବ । ଶିକ୍ଷାର ଏହା ବହୁତ ବଡ଼ ଧାମ ପାଲଟିବ । କାରଣ ଯେତେବେଳେ ପାଣି ରହେ, ସେତେବେଳେ ବ୍ୟବସ୍ଥା ବିକଶିତ କରିବା ପାଇଁ ସରକାରଙ୍କ ସାହାସ ଅଧିକ ବଢ଼ିଯାଇଥାଏ । ଆଉ ଏହି ବିମାନ ବନ୍ଦର ତିଆରି ହେଉଛି । ଏହା ତା’ର ଫଳ ମଧ୍ୟ । ସୁରେନ୍ଦ୍ର ନଗର ଜିଲ୍ଲା ଓ ରାଜକୋଟ ଜିଲ୍ଲା ପରସ୍ପର ସହ ଆଗାମୀ ଦିନରେ ପ୍ରତିଯୋଗିତା କରିବେ । ସିଏ ଆଗକୁ ମାଡ଼ିଯିବ, ମୋତେ ବି ଆଗକୁ ଯିବାକୁ ପଡ଼ିବ । ଆଉ ଏହା ବିକାଶର ସୁସ୍ଥ ପ୍ରତିଯୋଗିତାକୁ ବଢ଼ାଇବ । ତେଣୁ ଦ୍ରୁତ ଗତିରେ ଆଗକୁ ବଢ଼ିବାର ସମ୍ଭାବନା ଥିବା ସୁରେନ୍ଦ୍ର ନଗର ଜିଲ୍ଲା ଓ ରାଜକୋଟ ଜିଲ୍ଲାର ମଧ୍ୟଭାଗରେ ଭାରତ ସରକାର ଶହଶହ କୋଟି ଟଙ୍କା ଖର୍ଚ୍ଚ କରି ଭବ୍ୟ ବିମାନ ବନ୍ଦର ନିର୍ମାଣ ଦିଗରେ ଆଜି ମହତ୍ୱପୂର୍ଣ୍ଣ ଶିଳାନ୍ୟାସ କରି ଗୋଟିଏ ପାଦ ଆଗକୁ ବଢ଼ାଇଛନ୍ତି । କିଛି ଲୋକ ଅଛନ୍ତି ଯେଉଁମାନଙ୍କୁ ଏହା ବି ଖରାପ ଲାଗୁଛି । ସେମାନଙ୍କୁ କୁହନ୍ତୁ, ବସ୍ ରେ ଯାଉନାହାନ୍ତି, ବିମାନରେ କାହଁକି ଯାଉଛନ୍ତି ? ନା ନା କହି ଶୀଘ୍ର ପଳାଇବେ । ସେମାନଙ୍କୁ କହନ୍ତୁ ଯଦି ତୁମକୁ ଯିବାର ଅଛି ତା’ହେଲେ ଲୋକଙ୍କୁ ବିମାନରେ ଯିବାକୁ କାହିଁକି ଦେଉନ?

ବିମାନ ଯାତ୍ରା – ସେ ପୁରୁଣା ଯୁଗର ଯେଉଁମାନେ ରାଜା-ମହାରାଜା ହେଉଥିଲେ ସେମାନଙ୍କ ମଧ୍ୟରେ ଆଉ ସୀମିତ ହୋଇ ରହିନି । ସାଧାରଣ ମଣିଷ ବି ଏଥିରେ ଯାତ୍ରା କରୁଛି । ତେଣୁ ମୁଁ କହିଥିଲି କି ଦେଶର ବେସାମରିକ ବିମାନ ଚଳାଚଳ କ୍ଷେତ୍ରର ବିକାଶ ଏଭଳି କରିବାକୁ ଚାହୁଁଛି କି ହାୱାଇ ଚପଲ ପିନ୍ଧିଥିବା ବ୍ୟକ୍ତି ମଧ୍ୟ ଉଡ଼ାଜାହାଜରେ ଯାତ୍ରା କରିପାରିବ । ଆପଣ ଜାଣିଲେ ଆଶ୍ଚର୍ଯ୍ୟ ହେବେ କି ଆଜି ସମଗ୍ର ବିଶ୍ୱରେ ବେସାମରିକ ବିମାନ ଚଳାଚଳ କ୍ଷେତ୍ରର ମହାତ୍ମ୍ୟ ରହିଛି । କିନ୍ତୁ ଭାରତରେ ସ୍ୱାଧୀନତା ପରେ କେବେ ବି ବେସାମରିକ ବିମାନ ଚଳାଚଳ ନୀତି ପ୍ରସ୍ତୁତ ହୋଇନଥିଲା । ଭାରତ ସରକାରଙ୍କ ପାଖରେ ବେସାମରିକ ବିମାନ ଚଳାଚଳ ନୀତି ହିଁ ନଥିଲା । ଆମେ ଆସିବା ପରେ ବେସାମରିକ ବିମାନ ଚଳାଚଳ ନୀତି ପ୍ରସ୍ତୁତ କରିଛୁ । ବଡ଼ ବଡ଼ ସ୍ଥାନ – ଅହମ୍ମଦାବାଦ, ମୁମ୍ବାଇ, ଚେନ୍ନାଇ ମଧ୍ୟରେ ସୀମିତ ନରହି ଛୋଟ ଛୋଟ ସହରକୁ ମଧ୍ୟ ବିମାନ ଯାତ୍ରା ଉପଲବ୍ଧ ହେଉଛି । ଯେଉଁଠି ଦୂରଦରାନ୍ତକୁ ସଂଯୋଗ ନାହିଁ । ଅବା ସେଠି ଏକ ଘଣ୍ଟାରୁ ଅଧିକ ଯାତ୍ରା ହେଉ, ସେଠି ଅଢ଼େଇ ହଜାର ଟଙ୍କାର ଟିକେଟ୍ ନିର୍ଦ୍ଧାରଣ କରି ବିମାନ ଚଳାଚଳକୁ ପ୍ରୋତ୍ସାହିତ କରିଛୁ । ଏପର୍ଯ୍ୟନ୍ତ 8 ଟି ମାର୍ଗରେ ବିମାନ ଚଳପ୍ରଚଳ କଲାଣି । ଗୁଜରାଟରେ ବି କାଣ୍ଡଲାର ଫାଇଦା ମିଳୁଛି । ମିଠାପୁରକୁ ଲାଭ ମିଳୁଛି । ଛୋଟ ଛୋଟ ସ୍ଥାନକୁ ଯୋଡ଼ିବା କାରଣରୁ ଏବେ ଭାରତରେ ଏଭଳି ରାଜ୍ୟ ଅଛି ଯେଉଁଠି ଦୁଇ ଅବା 3ଟି ବିମାନ ବନ୍ଦର, ବିମାନ ଘାଟି ହୋଇଛି । ଏପରି ସ୍ଥିତି ଆସିବ କି ଗୋଟିଏ ଗୋଟିଏ ରାଜ୍ୟକୁ 10 କି 15 କି 20 ଟି ଲେଖାଏଁ ବିମାନ ବନ୍ଦର ପାଇଁ କାମ କରିବାକୁ ହେବ । ଆଉ ଯେଉଁ ଭଳି ଏବେ ଦେଶରେ ବିମାନ ଯାତ୍ରୀ ସଂଖ୍ୟା ବଢ଼ୁଛି ତାହା ଶୁଣିଲେ ଖୁସି ଲାଗୁଛି । ଏବେ ବିମାନ ଯାତ୍ରୀଙ୍କ ସଂଖ୍ୟାରେ 14 ପ୍ରତିଶତ ବୃଦ୍ଧି ହୋଇଛି ବୋଲି ମୁଁ ଜାଣିବାକୁ ପାଇଛି । ତେଣୁ ରାଜକୋଟ ଭିତରେ ଏ ଗ୍ରୀନଫିଲ୍ଡ ପ୍ରକଳ୍ପ ଚାଲିଛି ।

ମୁଁ ଗୁଜରାଟର ଏହି ଅଂଚଳର ନାଗରିକଙ୍କୁ ଅଭିନନ୍ଦନ ଜଣାଉଛି । ମୋତେ ଖୁସି ଲାଗୁଛି କି ଏତେ ବଡ଼ ବିମାନ ବନ୍ଦରର ପ୍ରକଳ୍ପ ପାଇଁ ମାତ୍ର 4 ପ୍ରତିଶତ ଜମି ଚାଷୀଙ୍କଠାରୁ ନିଆଯାଇଛି । 4ପ୍ରତିଶତ, 96 ପ୍ରତିଶତ ଜମି ପଡ଼ିଆ ପଡ଼ିଥିଲା । ଏହି ଜମିରେ ବିମାନ ବନ୍ଦର ନିର୍ମାଣ ହେବାକୁ ନିଷ୍ପତ୍ତି ନିଆଗଲା । ଯାହାଫଳରେ ଏବେ ସୁରେନ୍ଦ୍ର ନଗରର ଜମି କୃଷି ପାଇଁ ଅଧିକ ମହତ୍ୱପୂର୍ଣ୍ଣ ହେବ । ସେଥିପାଇଁ ପଡ଼ିଆ ଜମିକୁ ପସନ୍ଦ କରାଯାଇଥିଲା । ଆଉ ଏହାକୁ ଆମେ ବିମାନ ବନ୍ଦର ନିର୍ମାଣ ପାଇଁ ଆଗକୁ ଆଣିଥିଲୁ । ଏବେ ବିଜୟ ଭାଇ କହୁଥିଲେ କି ରାଜକୋଟର ବିମାନ ବନ୍ଦରର ସୀମା ଏତିକି । ବସ୍ ଷ୍ଟେସନରୁ ବି ତା’ର ସୀମା ଅଧିକ ବୋଲି ଦେଖିବାକୁ ମିଳେ । ତେଣୁ ରାଜକୋଟ ଓ ଏହି ସଂପୂର୍ଣ୍ଣ କ୍ଷେତ୍ର ଯେତେବେଳେ ବିକଶିତ ହେଉଛି, ସେତେବେଳେ ଭବିଷ୍ୟତକୁ ଦୃଷ୍ଟିରେ ରଖି କରାଯାଉଛି । ଆଉ ସେଦିନ ବି ଡେରି ନୁହେଁ, ଯେତେବେଳେ ଏଠି ଆନ୍ତର୍ଜାତିକ ସେବା ମଧ୍ୟ ଆରମ୍ଭ ହେବ । ବିଶ୍ୱର ଯେକୌଣସି କୋଣକୁ ଯିବାର ଥିଲେ, ରାଜକୋଟ-ଚୌଟିଲା ମଧ୍ୟରେ ଏହି ବିମାନ ବନ୍ଦର କାମରେ ଆସିବ । ଏହା ଅତ୍ୟନ୍ତ ମହତ୍ୱପୂର୍ଣ୍ଣ କାମ ଆଜି ହୋଇଛି ।

***