ପିଏମଇଣ୍ଡିଆ

ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଆଜି ଉତ୍ତର ପ୍ରଦେଶର ଗ୍ରେଟର ନୋଏଡ଼ା ଗସ୍ତ କରିବା ସହିତ ବିଭିନ୍ନ ଉନ୍ନୟନ ପ୍ରକଳ୍ପର ଉଦଘାଟନ କରିଥିଲେ ।

ପଣ୍ଡିତ ଦୀନ ଦୟାଲ ଉପାଧ୍ୟାୟ ପ୍ରତ୍ନତାତ୍ୱିକ ସଂସ୍ଥାନ ଠାରେ ପ୍ରଧାନମନ୍ତ୍ରୀ ଭିଡ଼ିଓ ଲିଙ୍କ ଜରିଆରେ ନୋଏଡ଼ା ସିଟି ସେଂଟର-ନୋଏଡ଼ା ଇଲେଟ୍ରୋନିକ ସିଟି ସେକ୍ସନ ମେଟ୍ରୋ ଲାଇନକୁ ପତାକା ଦେଖାଇ ଶୁଭାରମ୍ଭ କରିଥିଲେ । ସେ ଉତ୍ତର ପ୍ରଦେଶର ଖୁର୍ଜା ଏବଂ ବିହାରର ବକ୍ସରରେ 1320 ମେଗାୱାଟର ଦୁଇଟି ତାପଜ ବିଦ୍ୟୁତ କେନ୍ଦ୍ରର ଶିଳାନ୍ୟାସ କରିଥିଲେ ।

ପଣ୍ଡିତ ଦୀନଦୟାଲ ଉପାଧ୍ୟାୟ ପ୍ରତ୍ନତାତ୍ୱିକ ସଂସ୍ଥାନକୁ ପ୍ରଧାନମନ୍ତ୍ରୀ ଉଦଘାଟନ କରିଥିଲେ । ଏହି କ୍ୟାମ୍ପସରେ ସେ ପଣ୍ଡିତ ଦୀନଦୟାଲ ଉପାଧ୍ୟାୟଙ୍କ ପ୍ରତିମୂର୍ତି ଅନାବରଣ କରିବା ସହିତ ପୁଷ୍ପାଞ୍ଜଳି ଅର୍ପଣ କରିଥିଲେ । ପରେ ସେ ସଂସ୍ଥାନ ପରିସରରେ ଥିବା ଦୀନଦୟାଲ ସଂଗ୍ରହାଳୟ ପରିଦର୍ଶନ କରିଥିଲେ ।

ସମାରୋହକୁ ସମ୍ବୋଧିତ କରି ପ୍ରଧାନମନ୍ତ୍ରୀ କହିଥିଲେ ଯେ ନୋଏଡ଼ା ସମ୍ପୂର୍ଣ୍ଣ ଭାବେ ପରିବର୍ତିତ ହୋଇଛି । ନୋଏଡ଼ା ବର୍ତମାନ ବିକାଶ ଏବଂ ଯୁବକମାନଙ୍କ ପାଇଁ ନିଯୁକ୍ତି ସୁଯୋଗ ସୃଷ୍ଟି କରିବା ଲାଗି ପରିଚିତ ହୋଇଛି ବୋଲି ପ୍ରଧାନମନ୍ତ୍ରୀ କହିଥିଲେ । ସେ ଉଲ୍ଲେଖ କରିଥିଲେ ଯେ ନୋଏଡ଼ା ବର୍ତମାନ ଦେଶ ପାଇଁ ମେକ ଇନ ଇଣ୍ଡିଆ ହବ୍ ଭାବେ ବିକଶିତ ହୋଇଛି । ଏହି ପରିପ୍ରେକ୍ଷୀରେ, ପ୍ରଧାନମନ୍ତ୍ରୀ ନୋଏଡ଼ାରେ ବିଭିନ୍ନ ଇଲେକଟ୍ରୋନିକ କମ୍ପାନୀ, ବିଶେଷ କରି ବିଶ୍ୱର ସର୍ବବୃହତ ମୋବାଇଲ କାରଖାନାର ଉପସ୍ଥିତି ବିଷୟରେ ଉଲ୍ଲେଖ କରିଥିଲେ ।

ପ୍ରଧାନମନ୍ତ୍ରୀ କହିଥିଲେ ଯେ ଉତ୍ତର ପ୍ରଦେଶର ଜେୱାର ଠାରେ ଦେଶର ସର୍ବବୃହତ ବିମାନ ବନ୍ଦର ନିର୍ମାଣ କରାଯାଉଛି । ଥରେ ସମ୍ପୂର୍ଣ୍ଣ ହେବା ପରେ, ଜେୱାର ବିମାନ ବନ୍ଦର କେବଳ ଜୀବନଧାରଣକୁ ସହଜ କରିବ ନାହିଁ ବରଂ ଉତର ପ୍ରଦେଶ ପାଇଁ ଆର୍ଥିକ ଦୃଷ୍ଟିକୋଣରୁ ଲାଭ ଆଣିବ । ଦେଶର ବିଭିନ୍ନ ସ୍ଥାନରେ ନିର୍ମାଣ କରାଯାଉଥିବା ବିଭିନ୍ନ ବିମାନବନ୍ଦର ବିଷୟରେ ମଧ୍ୟ ସେ ଉଲ୍ଲେଖ କରିଥିଲେ । ଉଡ଼ାନ ଯୋଜନା ଜରିଆରେ ଛୋଟ ସହରକୁ ବିମାନ ଯୋଗାଯୋଗ ପାଇଁ କେନ୍ଦ୍ର ସରକାର ପ୍ରତିବଦ୍ଧ ବୋଲି ସେ ଉଲ୍ଲେଖ କରିଥିଲେ ।

ଭାରତରେ ବିଦ୍ୟୁତ କ୍ଷେତ୍ରର ବିକାଶ ଦିଗରେ ସରକାରଙ୍କ ପ୍ରୟାସ ବିଷୟରେ ଉଲ୍ଲେଖ କରି ପ୍ରଧାନମନ୍ତ୍ରୀ କହିଥିଲେ ଯେ ତାଙ୍କ ସରକାର ବିଦ୍ୟୁତ ଉତ୍ପାଦନର ସମସ୍ତ 4ଟି ଦିଗ ପ୍ରତି ସମ୍ପୂର୍ଣ୍ଣ ଭାବେ ଲକ୍ଷ୍ୟବଦ୍ଧ । ଏହି ଚାରିଟି କ୍ଷେତ୍ର ହେଉଛି- ଉତ୍ପାଦନ, ସଂଚାରଣ, ବିତରଣ ଏବଂ ସଂଯୋଗ । ସେ କହିଥିଲେ ଯେ ଏପରି ଏକ ଆଭିମୁଖ୍ୟ ସମ୍ପୂର୍ଣ୍ଣ ଭାବେ ବିଦ୍ୟୁତ କ୍ଷେତ୍ରକୁ ରୂପାନ୍ତରିତ କରିପାରିଛି ଏବଂ ଏକ ରାଷ୍ଟ୍ର-ଏକ ଗ୍ରୀଡ ବର୍ତ୍ତମାନ ବାସ୍ତବ ରୂପ ନେଇଛି । ଅକ୍ଷୟ ଶକ୍ତି କ୍ଷେତ୍ରକୁ ସରକାର ଉପଯୁକ୍ତ ପ୍ରୋତ୍ସାହନ ଦେଉଛନ୍ତି ବୋଲି ପ୍ରଧାନମନ୍ତ୍ରୀ କହିଥିଲେ । ସେ ଉଲ୍ଲେଖ କରିଥିଲେ ଯେ ତାଙ୍କର ସ୍ୱପ୍ନ ହେଉଛି ‘ଏକ ବିଶ୍ୱ, ଏକ ସୂର୍ଯ୍ୟ, ଏକ ଗ୍ରୀଡ’ ।

ପ୍ରଧାନମନ୍ତ୍ରୀ କହିଥିଲେ ଯେ ବକ୍ସର ଏବଂ ଖୁର୍ଗାରେ ତାପଜ ବିଦ୍ୟୁତ ପ୍ଲାଂଟ ପ୍ରତିଷ୍ଠା ହେବା ଦ୍ୱାରା ଭାରତର ଅଭିବୃଦ୍ଧି ତ୍ୱରାନ୍ୱିତ ହେବା ସହିତ ଉତର ପ୍ରଦେଶ, ବିହାର ଓ ଅନ୍ୟ ପଡ଼ୋଶୀ ରାଜ୍ୟଗୁଡ଼ିକରେ ବିଦ୍ୟୁତ ଉପଲବ୍ଧତାରେ ପରିବର୍ତ୍ତନ ଆସିବ । ଗତ ସାଢ଼େ ଚାରି ବର୍ଷରେ ବିଦୁ୍ୟତ ଉତ୍ପାଦନ କ୍ଷେତ୍ରରେ ଆସିଥିବା ବ୍ୟାପକ ବୃଦ୍ଧି ବିଷୟରେ ସେ କହିଥିଲେ ।

ପଣ୍ଡିତ ଦୀନଦୟାଲ ଉପାଧ୍ୟାୟ ପ୍ରତ୍ନତାତ୍ୱିକ ସଂସ୍ଥାନକୁ ଉଦଘାଟନ କରି ପ୍ରଧାନମନ୍ତ୍ରୀ କହିଥିଲେ ଯେ ଏହି ସଂସ୍ଥାନ ଭାରତ ଏବଂ ବିଦେଶରୁ ଆସୁଥିବା ଛାତ୍ରଛାତ୍ରୀ ଓ ଗବେଷକମାନଙ୍କୁ ଅତ୍ୟାଧୁନିକ ସୁବିଧାସୁଯୋଗ ଯୋଗାଇ ଦେବ ।

ପ୍ରଧାନମନ୍ତ୍ରୀ କହିଥିଲେ ଯେ ଏକ ନୂତନ ଭାରତର ନିର୍ମାଣ ହେଉଛି । ସେ ଉଲ୍ଲେଖ କରିଥିଲେ ଯେ 125 କୋଟି ଭାରତୀୟଙ୍କ ଶକ୍ତି ଏବଂ ସମର୍ଥନ କାରଣରୁ ଏହା ସମ୍ଭବ ହୋଇପାରୁଛି । ଦେଶରୁ ଦୁର୍ନୀତିର ମୂଳୋତ୍ପାଟନ ଲାଗି କେନ୍ଦ୍ର ସରକାରଙ୍କ ପ୍ରତିବଦ୍ଧତାକୁ ସେ ଦୋହରାଇଥିଲେ । ଆତଙ୍କବାଦୀମାନଙ୍କୁ କଡ଼ା ଜବାବ ଦେଇଥିବା ସୈନ୍ୟବାହିନୀର ସାହସକୁ ଅଭିବାଦନ ଜଣାଇ ପ୍ରଧାନମନ୍ତ୍ରୀ କହିଥିଲେ ଯେ ସରକାର ଆତଙ୍କବାଦ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିବା ଜାରି ରଖିବ ।

*****