ପିଏମଇଣ୍ଡିଆ

ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଆଜି ଜାତୀୟ ଯୁବ ଦିବସ ଅବସରରେ ଭିଡିଓ କନଫେରେନସିଙ୍ଗ ଯୋଗେ ଦୁଇଟି ଗୁରୁତ୍ଵପୂର୍ଣ୍ଣ ସମାବେଶକୁ ସମ୍ବୋଧିତ କରିଛନ୍ତି ।

ସେହିଭଳି ପ୍ରଧାନମନ୍ତ୍ରୀ ଗ୍ରେଟର ନୋଏଡାର ଗୌତମ ବୁଦ୍ଧ ବିଶ୍ୱବିଦ୍ୟାଳୟରେ ଅନୁଷ୍ଠିତ ଜାତୀୟ ଯୁବ ମହୋସôବ – 2018ର ଉଦ୍ଘାଟନୀ ସମାରୋହକୁ ଭିଡିଓ କନଫେରେନ୍ସିଂ ଯୋଗେ ଉଦ୍ବୋଧନ ଦେଇ ଆଜି ଭାରତୀୟ ମହାକାଶ ଗବେଷଣା ସଂସ୍ଥାର ସଫଳ ପିଏସଏଲଭି-C40 ପ୍ରକ୍ଷେପଣ ହେତୁ ବୈଜ୍ଞାନିକମାନଙ୍କୁ ଅଭିନନ୍ଦନ ଜଣାଇଥିଲେ । ସେ କହିଥିଲେ ଯେ, ମହାକାଶ ଗବେଷଣା କ୍ଷେତ୍ରରେ ଆମର ପ୍ରଗତି ଦେଶ ତଥା ଜନ କଲ୍ୟାଣର ବିକାଶ ଯାତ୍ରାକୁ ପରିବର୍ଦ୍ଧିତ କରିବ ।

ପ୍ରଧାନମନ୍ତ୍ରୀ ଗତ ଡିସେମ୍ବର 2017ରେ ନିଜର “ମନ କି ବାତ” ମତ ବିନିମୟ ସମ୍ପର୍କରେ ଅବତାରଣା କରି କହିଥିଲେ ଯେ, ସେ ଦେଶର ପ୍ରତି ଜିଲ୍ଲାରେ ଅଭ୍ୟାସ ସଂସଦମାନ ଗଠନ କରିବାକୁ ଆହ୍ୱାନ ଦେଇଥିଲେ । ଏଭଳି ସଂସଦ ଆମ ଯୁବ ଗୋଷ୍ଠୀ ମଧ୍ୟରେ ଚର୍ଚ୍ଚା, ତର୍କ ବିତର୍କ, ଆଲୋଚନା, ସମାଲୋଚନାର ମନୋଭାବ ତଥା ଉଦ୍ଦୀପନା ସୃଷ୍ଟି କରିବ । ପ୍ରଧାନମନ୍ତ୍ରୀ କହିଥିଲେ ଯେ, ଆମ୍ଭେ ଅନେକ ଦେଶବାସୀ 1947 ମସିହା ପରେ ଜନ୍ମ ଗ୍ରହଣ କରିଛେ ଏବଂ ସ୍ୱାଧିନତା ଆନ୍ଦୋଳନରେ ଭାଗ ନେବାର ସୌଭାଗ୍ୟ ମିଳିନାହିଁ । କିନ୍ତୁ ସ୍ୱାଧିନତା ସଂଗ୍ରାମୀମାନଙ୍କର ବଳିଦାନ, ସ୍ୱପ୍ନ ଓ ରାଷ୍ଟ୍ର ଗଠନର ଆକାଂକ୍ଷାକୁ ସାକାର ଓ ପୁରଣ କରିବା ଦିଗରେ ଆମ ପାଇଁ ପର୍ଯ୍ୟାପ୍ତ ସୁଯୋଗ ରହିଛି ବୋଲି ପ୍ରଧାନମନ୍ତ୍ରୀ ଯୁବ ଗୋଷ୍ଠୀକୁ ସ୍ମରଣ କରାଇ ଦେଇଥିଲେ । ପ୍ରଧାନମନ୍ତ୍ରୀ କହିଥିଲେ ଯେ, ଆମ ମହାପୁରୁଷ ତଥା ସ୍ୱାଧିନତା ସଂଗ୍ରାମୀମାନେ ଯେଉଁ ଭାରତର ସ୍ୱପ୍ନ ଦେଖିଥିଲେ ତାକୁ ଗଢ଼ିବା ଆମ ସମସ୍ତଙ୍କର କର୍ତ୍ତବ୍ୟ ।

ପ୍ରଧାନମନ୍ତ୍ରୀ କହିଥିଲେ, ଆମ ଯୁବ ଗୋଷ୍ଠୀକୁ ନିଯୁକ୍ତି ସୃଷ୍ଟିକାରୀ ରୂପେ ଗଢ଼ିବାକୁ ପଡିବ । ସେମାନେ ଚାକିରୀ ପଛରେ ନ ଗୋଡାଇ ନବସୃଜନରେ ଅଗ୍ରଣୀ ହେବାକୁ ପଡିବ ବୋଲି ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ କହିଛନ୍ତି । ଏବେ କେତେ ଲୋକ କହୁଛନ୍ତି ଯେ, ଆମ ଯୁବକଙ୍କ ମଧ୍ୟରେ ଧୈର୍ଯ୍ୟ ନାହିଁ । ତେବେ ସେ ଏହା ମାନିବାକୁ ପ୍ରସ୍ତୁତ ନୁହଁନ୍ତି ବରଂ ଆମ ଯୁବ ଶକ୍ତି ମଧ୍ୟରେ ନବସୃଜନକୁ ଉଜାଗର କରିବାର ସ୍ଫୁଲିଙ୍ଗ ରହିଛି । ଯୁବ ଗୋଷ୍ଠୀ ଚୀରାଚରିତ ଢ଼ଙ୍ଗରେ ଚିନ୍ତା ନ କରି କିଛି ନୂଆ କରି ଦେଖାଇବାର ସ୍ୱପ୍ନ ରଖିଛନ୍ତି ବୋଲି ପ୍ରଧାନମନ୍ତ୍ରୀ କହିଛନ୍ତି ।

ଆଜି ଜାତୀୟ ଯୁବ ଦିବସ ପାଳନ ତଥା କର୍ଣ୍ଣାଟକର ବେଲଗାଭୀଠାରେ ଆୟୋଜିତ ସର୍ବ ଧର୍ମ ସଭାକୁ ଭିଡିଓ କନଫେରେନ୍ସିଂ ମାଧ୍ୟମରେ ସମ୍ବୋଧିତ କରି ସେ ଏହା କହିଛନ୍ତି । ପ୍ରଧାନମନ୍ତ୍ରୀ କହିଛନ୍ତି ଯେ, ସ୍ୱାମୀ ବିବେକାନନ୍ଦ ବିଶ୍ୱ ଭ୍ରାତୃତ୍ୱ ଭାବ ଉପରେ ଗୁରୁତ୍ୱ ଦେଇଥିଲେ । ଆମର ସର୍ବ କଲ୍ୟାଣ ଭାରତର ସାମଗ୍ରିକ ବିକାଶ ଉପରେ ନିର୍ଭର କରେ ବୋଲି ପ୍ରଧାନମନ୍ତ୍ରୀ କହିଛନ୍ତି ।

ପ୍ରଧାନମନ୍ତ୍ରୀ କହିଥିଲେ ଯେ, ପାଶ୍ଚାତ୍ୟ ରାଷ୍ଟ୍ରରେ ଭାରତ ବିରୁଦ୍ଧରେ ଅନେକ ଅପପ୍ରଚାର କରାଯାଉଥିଲା, ଯାହାକୁ ସ୍ୱାମୀ ବିବେକାନନ୍ଦ ଭୁଲ ପ୍ରମାଣିତ କରିଛନ୍ତି । ସାମାଜିକ କୁସଂସ୍କାର ବିରୁଦ୍ଧରେ ସେ ଦୃଢ଼ ଭାବେ ସ୍ୱର ଉତ୍ତୋଳନ କରିଥିଲେ ବୋଲି ପ୍ରଧାନମନ୍ତ୍ରୀ କହିଛନ୍ତି ।
ଏବେ କିଛି ଲୋକ ଓ ଗୋଷ୍ଠୀ ଆମ ଦେଶ ଏବଂ ଯୁବ ଗୋଷ୍ଠୀ ମଧ୍ୟରେ ବିଭାଜନର ମଞ୍ଜି ବୁଣିବା ପାଇଁ ଷଡଯନ୍ତ୍ର କରୁଛନ୍ତି କିନ୍ତୁ ଏ ଦେଶର ଯୁବ ସମାଜ, ଯୁବ ଶକ୍ତି ଏଭଳି ବିଭାଜନକାରୀ ଶକ୍ତିଙ୍କୁ ଉଚିତ ଜବାବ ଦେଉଛନ୍ତି । ପ୍ରଧାନମନ୍ତ୍ରୀ କହିଥିଲେ ଯେ, ଆମର ଯୁବ ଗୋଷ୍ଠୀ କେବେହେଲେ ବିଭ୍ରାନ୍ତ ବା ବିପଥଗାମୀ ହେବେ ନାହିଁ । ବର୍ତ୍ତମାନର ସ୍ୱଚ୍ଛ ଭାରତ ମିଶନକୁ କେବଳ ଯୁବ ଗୋଷ୍ଠୀ ହିଁ ଆଗେଇ ନେଉଛନ୍ତି । ଭାରତରେ ଅନେକ ସାଧୁ, ସନ୍ଥ, ମୁନୀ ଋଷି ଜନ୍ମଗ୍ରହଣ କରି ଆମ ସମାଜରେ ସଂସ୍କାର ଆଣିବା ଦିଗରେ ଉଲ୍ଲେଖନୀୟ କାର୍ଯ୍ୟ କରିଛନ୍ତି ବୋଲି ସେ କହିଥିଲେ ।

ପ୍ରଧାନମନ୍ତ୍ରୀ କହିଥିଲେ ଯେ, ସେବା ଭାବ ହେଉଛି ଆମ ସଂସ୍କୃତିର ଅଂଶ ବିଶେଷ । ଦେଶରେ ଏବଂ ସମାଜରେ ଏଭଳି ଅନେକ ବ୍ୟକ୍ତି ବିଶେଷ ଓ ଅନୁଷ୍ଠାନମାନ ରହିଛନ୍ତି, ଯେଉଁମାନେ କି ନିସ୍ୱାର୍ଥପର ଭାବେ ଦେଶମାତୃକାର ସେବା କରି ଚାଲିଛନ୍ତି । ଭାରତକୁ ଏକ ସ୍ୱଚ୍ଛ, ନିର୍ମଳ ଓ ଖୋଲା ଶୌଚମୁକ୍ତ ରାଷ୍ଟ୍ରରେ ପରିଣତ କରିବା ପାଇଁ ପ୍ରଧାନମନ୍ତ୍ରୀ ଏହି ଅବସରରେ ଯୁବ ସମାଜକୁ ଆହ୍ୱାନ ଦେଇଥିଲେ ।

**********