ପିଏମଇଣ୍ଡିଆ

ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ଅଧ୍ୟକ୍ଷତାରେ କେନ୍ଦ୍ର କ୍ୟାବିନେଟ ଜାତୀୟ ସଫେଇ କର୍ମଚାରୀ ଆୟୋଗଙ୍କ କାର୍ଯ୍ୟକାଳ 31.03.2019 ଠାରୁ ଆହୁରି 3 ବର୍ଷ ପର୍ଯ୍ୟନ୍ତ ବୃଦ୍ଧି କରିବା ପ୍ରସ୍ତାବକୁ ମଞ୍ଜୁର କରିଛନ୍ତି ।

ବିଶେଷତ୍ୱ

ଜାତୀୟ ସଫେଇ କର୍ମଚାରୀ ଆୟୋଗ (ଏନସିଏସକେ)ର ପ୍ରତିଷ୍ଠା 1993ରେ ଏନସିଏସକେ ଆଇନ 1993ର ବ୍ୟବସ୍ଥା ଅନୁଯାୟୀ କରାଯାଇଥିଲା । ପ୍ରଥମେ ଏହାର କାର୍ଯ୍ୟକାଳ 31.03.1997 ପର୍ଯ୍ୟନ୍ତ ଥିଲା । ପରେ ଏହି ଆଇନର ବୈଧତା 31.03.2002 ପର୍ଯ୍ୟନ୍ତ ଏବଂ ଏହାପରେ 29.02.2004 ପର୍ଯ୍ୟନ୍ତ ବୃଦ୍ଧି କରାଯାଇଥିଲା । ଏନସିଏସକେର ଆଇନ 29.02.2004ରେ ଶେଷ ହେବାର ଥିଲା । ଏହାପରେ ଏନସିଏକେର କାର୍ଯ୍ୟକାଳ ଏକ ଅଣସାମ୍ବିଧାନିକ ସଂସ୍ଥା ରୂପରେ ସମୟକ୍ରମେ ବୃଦ୍ଧି କରାଯାଇଆସୁଥିଲା । ବର୍ତ୍ତମାନ ଆୟୋଗଙ୍କ କାର୍ଯ୍ୟକାଳ 31.03.2019 ପର୍ଯ୍ୟନ୍ତ ରହିଛି ।

ପ୍ରମୁଖ ପ୍ରଭାବ :

ଏହି ପ୍ରସ୍ତାବ ଦ୍ୱାରା ସଫେଇ କର୍ମଚାରୀ ଏବଂ ହାତରେ ସଫେଇ କାମ କରିବାରେ ନିୟୋଜିତ ବ୍ୟକ୍ତି ମୁଖ୍ୟ ଲାଭାର୍ଥୀ ହେବେ, କାରଣ ଏନସିଏସକେ ସେମାନଙ୍କ କଲ୍ୟାଣ ଏବଂ ଉତ୍ଥାନ ଲାଗି କାର୍ଯ୍ୟ କରିବ । 31.01.2019 ଅନୁଯାୟୀ, ଏମଏସ ଆଇନ ସର୍ବେକ୍ଷଣ ଅଧୀନରେ ଚିହ୍ନଟ କରାଯାଇଥିବା ହାତରେ ସଫେଇ କରୁଥିବା ବ୍ୟକ୍ତିଙ୍କ ସଂଖ୍ୟା 14,226 । ନୀତି ଆୟୋଗଙ୍କ ଆଦେଶ ଫଳରେ ସାମାଜିକ ନ୍ୟାୟ ଏବଂ ସଶକ୍ତିକରଣ ମନ୍ତ୍ରଣାଳୟ ଦ୍ୱାରା କରାଯାଇଥିବା ଜାତୀୟ ସର୍ବେକ୍ଷଣ ଅଧୀନରେ 31.01.2019 ଅନୁସାରେ ଏହି ସଂଖ୍ୟା 31,128 ରହିଛି ।

**********