ପିଏମଇଣ୍ଡିଆ

 ଜାପାନର ନାଗରିକମାନଙ୍କ ପାଇଁ ପହଂଚିବା-କ୍ଷଣି-ଭିସା ସୁବିଧା;

ଇଣ୍ଡିଆ ପୋଷ୍ଟ, ଜାପାନ ପୋଷ୍ଟ ସହଯୋଗରେ ଆରମ୍ଭ ହେବ କୁଲ୍ ବକ୍ସ ସର୍ଭିସ

ମହାମହିମ ପ୍ରଧାନମନ୍ତ୍ରୀ ଶିଞ୍ଜୋ ଆବେ,

ସମ୍ମାନନୀୟ ପ୍ରତିନିଧି ଦଳ

ଗଣମାଧ୍ୟମର ସଦସ୍ୟଗଣ,

କୋନ୍ନିଚିଭା(ଶୁଭ ଅପରାହ୍ଣ/ନମସ୍କାର)

ମୁଁ ପ୍ରସନ୍ନ ଯେ ମୋର ଅନନ୍ୟ ମିତ୍ର, ପ୍ରଧାନମନ୍ତ୍ରୀ ଶିଞ୍ଜୋ ଆବେଙ୍କୁ ଭାରତରେ ଏବଂ ବିଶେଷ କରି ଗୁଜରାଟରେ, ସ୍ୱାଗତ କରିବାର ସୁଯୋଗ ମୋତେ ମିଳିଛି । ପ୍ରଧାନମନ୍ତ୍ରୀ ଆବେ ଏବଂ ମୁଁ ଅନେକ ଥର ଅନ୍ତର୍ଜାତୀୟ ସମ୍ମେଳନ ଉପଲକ୍ଷେ ଭେଟିଛୁ । କିନ୍ତୁ ଭାରତରେ ତାଙ୍କୁ ସ୍ୱାଗତ କରିବା ମୋ ପାଇଁ ସ୍ୱତନ୍ତ୍ର ଭାବେ ଆନନ୍ଦ/ହର୍ଷର ବିଷୟ ହୋଇଥାଏ । ଗତକାଲି ଅପରାହ୍ଣରେ ମୁଁ ତାଙ୍କ ସହିତ ସାବରମତୀ ଆଶ୍ରମ ଯିବାର ସୁଯୋଗ ପାଇଥିଲି । ଆଜି ଆମେ ଦୁହେଁ ଦାଣ୍ଡି କୁଟୀର ମଧ୍ୟ ଯାଇଥିଲୁ । ଆଜି ସକାଳୁ ଆମେ ଦୁହେଁ ମିଶି  ଜାପାନର ସହଯୋଗରେ ନିର୍ମାଣ କରାଯାଉଥିବା ମୁମ୍ବାଇ-ଅହମ୍ମଦାବାଦ ଦ୍ରୁତଗାମୀ ରେଳ ପ୍ରକଳ୍ପର ଭୂମିପୂଜନ କଲୁ । ଏହା ଏକ ବହୁତ ବଡ଼ ପଦକ୍ଷେପ । ଏହା କେବଳ ହାଇସ୍ପିଡ୍ ଟ୍ରେନର ଆରମ୍ଭ ନୁହେଁ, ଭବିଷ୍ୟତରେ ଆମର ଆବଶ୍ୟକତାକୁ ଦେଖି ଏହି ନୂଆ ରେଳବାଇ ଦର୍ଶନକୁ ନୂଆ ଭାରତ ନିର୍ମାଣର ଜୀବନରେଖା ବୋଲି ମୁଁ ଭାବୁଛି । ଭାରତର ଅବାଧ ପ୍ରଗତିର ସମ୍ପର୍କ ଏବେ ଆହୁରି ତୀବ୍ରତା ସହିତ ଯୋଡ଼ି ହୋଇଯାଇଛି ।

ବନ୍ଧୁଗଣ,

ଆପୋଷ ବିଶ୍ୱାସ ଏବଂ ଭରସା, ପରସ୍ପରର ସ୍ୱାର୍ଥ ଏବଂ ଚିନ୍ତାକୁ ବୁଝିବା, ଏବଂ ଉଚ୍ଚସ୍ତରୀୟ ନିରନ୍ତର ସମ୍ପର୍କ ଭାରତ-ଜାପାନ ସମ୍ବନ୍ଧର ବିଶେଷତ୍ୱ ଅଟେ । ଆମର ସ୍ୱତନ୍ତ୍ର ରଣନୈତିକ ଏବଂ ବୈଶ୍ୱିକ ଭାଗିଦାରୀ କେବଳ ଦ୍ୱିପାକ୍ଷିକ କିମ୍ବା କ୍ଷେତ୍ରୀୟ ସ୍ତର ପର୍ଯ୍ୟନ୍ତ ସୀମିତ ନୁହେଁ, ବିଶ୍ୱ ପ୍ରସଙ୍ଗରେ ମଧ୍ୟ ଆମର ସହଯୋଗ ଘନିଷ୍ଠ ଅଟେ । ଗତବର୍ଷ ମୋର ଜାପାନ ଯାତ୍ରା ସମୟରେ ଆମେ ପରମାଣୁ ଶକ୍ତିର ଶାନ୍ତିପୂର୍ଣ୍ଣ ପ୍ରୟୋଗ ପାଇଁ ଏକ ଐତିହାସିକ ବୁଝାମଣା କରିଥିଲୁ । ଏହାର ଅନୁସମର୍ଥନ(Ratification) ପାଇଁ ଜାପାନର ଜନମାନସ, ଜାପାନର ସଂସଦ ଏବଂ ବିଶେଷ କରି ପ୍ରଧାନମନ୍ତ୍ରୀ ଆବେଙ୍କୁ ହୃଦୟରୁ କୃତଜ୍ଞତା ପ୍ରକଟ କରୁଛି । ସ୍ୱଚ୍ଛ ଶକ୍ତି ଏବଂ ଜଳବାୟୁ ପରିବର୍ତ୍ତନ ବିଷୟରେ ଆମର ସହଯୋଗ ପାଇଁ ଏହି ବୁଝାମଣା ଏକ ନୂଆ ଅଧ୍ୟାୟ ଯୋଡ଼ିଛି ।

ବନ୍ଧୁଗଣ,

2016-17ରେ ଭାରତରେ ଜାପାନରୁ 4.7 ବିଲିୟନ ଡଲାରର ନିବେଶ ହୋଇଥିଲା, ଯାହାକି ଗତବର୍ଷ ତୁଳନାରେ 80ପ୍ରତିଶତ ଅଧିକ ଅଟେ । ଏବେ ଜାପାନ ଭାରତରେ ତୃତୀୟ ବୃହତ ନିବେଶକ । ଏହା ସ୍ପଷ୍ଟ ଭାବେ ଦର୍ଶାଇଥାଏ ଯେ ଭାରତର ଆର୍ଥିକ ବିକାଶ ଏବଂ ସ୍ୱର୍ଣ୍ଣିମ ଭବିଷ୍ୟତ ପ୍ରତି ଜାପାନରେ କେତେ ବିଶ୍ୱାସ ଏବଂ ଆଶାବାଦୀ ବାତାବରଣ ରହିଛି । ଏବଂ ଏହି ନିବେଶକୁ ଦେଖି ଏହା ଅନୁମାନ କରାଯାଇପାରେ ଯେ ଆଗାମୀ ଦିନରେ ଭାରତ ଏବଂ ଜାପାନ ମଧ୍ୟରେ ବୃଦ୍ଧି ପାଉଥିବା ବ୍ୟବସାୟ ସହିତ ନାଗରିକ-ନାଗରିକ ସମ୍ପର୍କ ମଧ୍ୟ ବଢ଼ିବ । ଆମେ ଜାପାନର ନାଗରିକମାନଙ୍କ ପାଇଁ ପହଂଚିବା-କ୍ଷଣି-ଭିସା ସୁବିଧା ତ’ ପୂର୍ବରୁ ଦେଇସାରିଛୁ । ଆହୁରି ଏବେ ଆମେ ଇଣ୍ଡିଆ ପୋଷ୍ଟ ଏବଂ ଜାପାନ ପୋଷ୍ଟ’ର ସହଯୋଗରେ ଏକ କୁଲ୍–ବକ୍ସ–ସର୍ଭିସ୍  ମଧ୍ୟ ଆରମ୍ଭ କରିବାକୁ ଯାଉଛୁ, ଯାହାଦ୍ୱାରା  ଭାରତରେ ରହୁଥିବା ଜାପାନୀ ଲୋକମାନେ ସିଧାସଳଖ ଜାପାନରୁ ନିଜ ମନପସନ୍ଦର ଭୋଜନ ମଗାଇପାରିବେ । ଏଥିସହିତ ମୋର ଜାପାନୀ ବ୍ୟବସାୟୀ ଗୋଷ୍ଠୀଙ୍କୁ ଏହା ଅନୁରୋଧ ଯେ ଭାରତରେ ଅଧିକରୁ ଅଧିକ ଜାପାନୀ ରେସ୍ତୁରାଂ ଖୋଲନ୍ତୁ! ଆଜି ଭାରତ ଅନେକ ସ୍ତରରେ ଆମୂଳଚୂଳ ପରିବର୍ତ୍ତନର ମାର୍ଗରେ ଚାଲିଛି । ଇଜ୍ ଅଫ୍ ଡୁଇଂ ବିଜନେସ୍ ହେଉ କିମ୍ବା ସ୍କିଲ୍ ଇଣ୍ଡିଆ, ଟିକସ ସଂସ୍କାର ହେଉ କିମ୍ବା ମେକ୍ ଇନ୍ ଇଣ୍ଡିଆ, ଭାରତ ପୂର୍ଣ୍ଣ ଭାବରେ ରୂପାନ୍ତରିତ ହେଉଛି । ଜାପାନର ବ୍ୟବସାୟୀଙ୍କ ପାଇଁ ବହୁତ ଭଲ ସୁଯୋଗ ଏବଂ ମୁଁ ଖୁସି ଯେ ଜାପାନର ଅନେକ କମ୍ପାନୀ ଆମ ଜାତୀୟ ଫ୍ଲାଗସିପ୍ କାର୍ଯ୍ୟକ୍ରମ ସହ ଗଭୀର ଭାବେ ଯୋଡ଼ି ହେଉଛନ୍ତି । ଆଜି ଅପରାହ୍ଣରେ ଦୁଇ ଦେଶର ବ୍ୟବସାୟୀ ନେତୃମଣ୍ଡଳୀ ସହିତ ଆମର ଆଲୋଚନା ଏବଂ କାର୍ଯ୍ୟକ୍ରମରେ ଆମେ ଏହାର ପ୍ରତ୍ୟକ୍ଷ ଲାଭ ମଧ୍ୟ ଦେଖିପାରିବୁ । ଜାପାନର ଅଫିସିଆଲ୍ ଡେଭଲପମେଣ୍ଟ ଆସିଷ୍ଟାନ୍ସରେ ଆମେ ସବୁଠୁ ବଡ଼ ସହଯୋଗୀ, ଏବଂ ବିଭିନ୍ନ କ୍ଷେତ୍ରର ପ୍ରକଳ୍ପ ପାଇଁ ଆଜି ହୋଇଥିବା ବୁଝାମଣାକୁ ମୁଁ ହାର୍ଦ୍ଦିକ ସ୍ୱାଗତ କରୁଛି ।

ବନ୍ଧୁଗଣ,

ମୋର ପୂର୍ଣ୍ଣ ବିଶ୍ୱାସ ଯେ ଆମର ଆଲୋଚନା ଏବଂ ଆଜି କରାଯାଇଥିବା ବୁଝାମଣା ଭାରତ ଏବଂ ଜାପାନ ଭାଗିଦାରୀକୁ ସମସ୍ତ କ୍ଷେତ୍ରରେ ଆହୁରି ଅଧିକ ମଜଭୂତ କରିବ । ଏହି ଶବ୍ଦ ସହିତ ମୁଁ ପୁଣିଥରେ ପ୍ରଧାନମନ୍ତ୍ରୀ ଆବେ ଏବଂ ତାଙ୍କ ସହିତ ଆସିଥିବା ଉଚ୍ଚସ୍ତରୀୟ ପ୍ରତିନିଧିଦଳକୁ ହାର୍ଦ୍ଦିକ ସ୍ୱାଗତ କରୁଛି ।

ଇଜ୍ୟୋ ଦେ ଗୋଜାଇମସ(ବର୍ତ୍ତମାନ ପାଇଁ ଏତିକି)

ଅରିଗାତୌ ଗୋଜାଇମସ୍ (ଧନ୍ୟବାଦ)

ବହୁତ ବହୁତ ଧନ୍ୟବାଦ

**********