ପିଏମଇଣ୍ଡିଆ

ଭାଇ ଓ ଭଉଣୀମାନେ,

ଶାଲୋମ୍ ଲେ କୁଲାମ୍ ଆନି ସେମ୍ୟା ମାୟୋଧ ଲେହିୟୋଦ୍ ପୋ (ମୁଁ ଇସ୍ରାଏଲକୁ ଆସି ଖୁବ୍ ଆନନ୍ଦିତ) ଭାରତର ପ୍ରଥମ ପ୍ରଧାନମନ୍ତ୍ରୀ ଭାବେ ଐତିହାସିକ ଇସ୍ରାଏଲ ଗସ୍ତ ପାଇଁ ସୌଭାଗ୍ୟ ପାଇଥିବାରୁ ମୁଁ ଗର୍ବିତ । ମୁଁ ମୋର ବନ୍ଧୁ, ପ୍ରଧାନମନ୍ତ୍ରୀ ନେତାନ୍ୟାହୁଙ୍କୁ ତାଙ୍କ ଆମନ୍ତ୍ରଣ ଏବଂ ମୋର ଏପରି ଭବ୍ୟ ସ୍ୱାଗତ ଲାଗି ଧନ୍ୟବାଦ ଜଣାଉଛି  । ଆମ ସମାଜ ମଧ୍ୟରେ ରହିଥିବା ଶତାଧିକ ବର୍ଷର ପୁରୁଣା ସମ୍ପର୍କକୁ ମୋର ଏହି ଗସ୍ତ ପାଳନ କରୁଛି । ଏହି ସ୍ନେହ-ବନ୍ଧନ ଯୋଗୁଁ 25 ବର୍ଷ ତଳେ ପ୍ରତିଷ୍ଠା ହୋଇଥିବା ଆମର କୂଟନୈତିକ ସମ୍ପର୍କ ଆହୁରି ସୁଦୃଢ଼ ଏବଂ ସ୍ଥିର ଭାବେ ଅଗ୍ରଗତି କରିଛି  ।

ବନ୍ଧୁଗଣ,

ଗଣତନ୍ତ୍ରର ଆଦର୍ଶରେ ଅନୁପ୍ରାଣିତ ଇସ୍ରାଏଲର ଲୋକମାନେ ଏକ ନୂତନ ରାଷ୍ଟ୍ର ଗଠନ କରିଛନ୍ତି  । ସେମାନେ ଏହାକୁ କଠିନ ପରିଶ୍ରମ, ସୌହାର୍ଦ୍ଦ୍ୟ ଏବଂ ନବୀକରଣର ଉତ୍ସାହ ସହିତ ଆହୁରି ସମୃଦ୍ଧ କରିଛନ୍ତି  । ବହୁ ପ୍ରତିକୂଳ ପରିସ୍ଥିତି ସତ୍ତ୍ୱେ ଆପଣମାନେ ଆଗେଇଛନ୍ତି ଏବଂ ସବୁ ଘାତ-ପ୍ରତିଘାତକୁ ସୁଯୋଗରେ ପରିଣତ କରିଛନ୍ତି । ଭାରତ ଆପଣମାନଙ୍କ ଏଭଳି ସଫଳତାକୁ ପ୍ରଶଂସା କରୁଛି ।

ଆଜି ଜୁଲାଇ 4, ଠିକ୍ 41 ବର୍ଷ ପୂର୍ବେ “ଏନ୍ତେବେ ଅଭିଯାନ” (Operation Entebbe) ହୋଇଥିଲା  । ସେହିଦିନ ବହୁ ସଂଖ୍ୟକ ଇସ୍ରାଏଲ ବନ୍ଦୀଙ୍କୁ ମୁକୁଳାଇବାକୁ ଯାଇ ଆପଣଙ୍କ ପ୍ରଧାନମନ୍ତ୍ରୀ, ଏବଂ ମୋର ବନ୍ଧୁ, ବିବି, ତାଙ୍କ ଜ୍ୟେଷ୍ଠ ଭ୍ରାତା ୟୋନିଙ୍କୁ ହରାଇଥିଲେ । ଆପଣଙ୍କ ବୀରମାନେ ଯୁବ ପିଢ଼ି ପାଇଁ ପ୍ରେରଣା ।

ବନ୍ଧୁଗଣ,

ଭାରତର ଅତି ପ୍ରାଚୀନ ସଭ୍ୟତା ରହିଛି, କିନ୍ତୁ ଏହା ଏକ ଯୁବ ରାଷ୍ଟ୍ର । ଭାରତରେ 800 ନିୟୁତ ଲୋକଙ୍କ ବୟସ 35 ବର୍ଷ କିମ୍ବା ତା’ଠାରୁ କମ୍  । ପ୍ରତିଭା ସମ୍ପନ୍ନ ଏବଂ ତାଲିମପ୍ରାପ୍ତ ଯୁବଗୋଷ୍ଠୀ ଭାରତର କର୍ମଶକ୍ତି । ସେମାନେ ମୋର ଲକ୍ଷ୍ୟ – ଭାରତର ରୂପାନ୍ତରଣ, ଏହାର ଶିଳ୍ପ, ଅର୍ଥବ୍ୟବସ୍ଥା, ବ୍ୟବସୟ କାରବାର ଏବଂ ବିଶ୍ୱ ସହିତ ଏହାର ସମ୍ପର୍କକୁ ଆଗେଇ ନେଉଛନ୍ତି  ।

ବନ୍ଧୁଗଣ,

ଉଚ୍ଚ ଅଭିବୃଦ୍ଧି ଏବଂ ସାମଗ୍ରୀକ ବିକାଶ ଲକ୍ଷ୍ୟ ଦିଗରେ ଆଗେଇ ଚାଲିଥିବାରୁ ଇସ୍ରାଏଲକୁ ଭାରତ ନିଜର ଗୁରୁତ୍ୱପୂର୍ଣ୍ଣ ସହଯୋଗୀ ଭାବେ ବିବେଚନା କରୁଛି  । ବିକାଶ ପାଇଁ ଆମେ ଦୁଇ ରାଷ୍ଟ୍ର ଭୋଗୁଥିବା ସାଧାରଣ ଆହ୍ୱାନର ମୁକାବିଲା ଲାଗି ବିଜ୍ଞାନ, ପ୍ରଯୁକ୍ତି, ନବସୃଜନ ଏବଂ ଉଚ୍ଚ ବୈଷୟିକ ଜ୍ଞାନ କୌଶଳ ଉପରେ ନିର୍ଭରଶୀଳ ହେବାର ଆବଶ୍ୟକତା ରହିଛି ।

ଏହିସବୁ ଦିଗ ମଧ୍ୟ ଆମ ଦୁଇ ଦେଶର ଉଚ୍ଚକୁଶଳୀ ଯୁବଶକ୍ତି ଏବଂ ଉଦ୍ୟୋଗୀମାନଙ୍କ ସୃଜନଶୀଳ ଉତ୍ସାହ ଏବଂ ଚିନ୍ତାଧାରାକୁ ସମ୍ମିଶ୍ରିତ କରୁଛି । ସହଭାଗୀ ଅର୍ଥନୈତିକ ସମୃଦ୍ଧି ଲାଗି ସହଯୋଗ ବୃଦ୍ଧି କରିବା ସହିତ ଆମେ ଆମ ସମାଜକୁ ଆତଙ୍କବାଦ ଭଳି ସମସ୍ୟାରୁ ମୁକ୍ତ ରଖିବା ଦିଗରେ ସହଯୋଗ ବୃଦ୍ଧି ଲାଗି ସହମତ ହୋଇଛୁ ।

ଏ ସମସ୍ତ କ୍ଷେତ୍ରରେ ପ୍ରଗତିଶୀଳ ଚିନ୍ତାଧାରା, ପ୍ରଧାନମନ୍ତ୍ରୀ ନେତାନ୍ୟାହୁଙ୍କ ସହ ମୋର ଆଲୋଚନାର ସୁଯୋଗ ସୃଷ୍ଟି କରିବ ।

ଆମ ଦୁଇ ସମାଜକୁ ସମୃଦ୍ଧ କରିଥିବା ଭାରତୀୟ ବଂଶୋଦ୍ଭବ ଇହୁଦୀମାନଙ୍କ ସମେତ ଇସ୍ରାଏଲରେ ଥିବା ପ୍ରବାସୀ ଭାରତୀୟଙ୍କୁ ଭେଟିବାକୁ ନେଇ ମୁଁ ଉତ୍ସାହିତ ଅଛି ।

ମହାମହିମ ଏବଂ ବନ୍ଧୁଗଣ,

ମୋର ଏହି ଗ୍ରସ୍ତ ଐତିହାସିକ ସମ୍ପର୍କର ମୂଳଦୁଆ ପ୍ରତିଷ୍ଠା କରିବ । ଆମ ସମାଜ ଏବଂ ଲୋକମାନଙ୍କ କଲ୍ୟାଣ ଲାଗି ଆମେ ଏହି ମିଳିତ ଯାତ୍ରା ଆରମ୍ଭ କରିବାକୁ ଉତ୍କଣ୍ଠିତ । ଏହି ଯାତ୍ରା ଆମେ ଉଭୟ ଆରମ୍ଭ କରିଥିବାରୁ ଇସ୍ରାଏଲ ସହିତ ଏକ ଦୃଢ଼ ଏବଂ ନମନୀୟ ସମ୍ପର୍କ ମୋର ଉଦ୍ଦେଶ୍ୟ ଏବଂ ଲକ୍ଷ୍ୟ ରହିବ  । ଏପରି ଭବ୍ୟ ସ୍ୱାଗତ ପାଇଁ ମୁଁ ପୁଣିଥରେ ଆପଣମାନଙ୍କୁ ଧନ୍ୟବାଦ ଜଣାଉଛି  ।

ଆପଣମାନଙ୍କୁ ଧନ୍ୟବାଦ, ଅନେକ ଅନେକ ଧନ୍ୟବାଦ ।

**********