ପିଏମଇଣ୍ଡିଆ

ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ଅଧ୍ୟକ୍ଷତାରେ କେନ୍ଦ୍ର କ୍ୟାବିନେଟ ଅଲିପୁର, ଦିଲ୍ଲୀରେ ଥିବା ଦିଲ୍ଲୀ ଦୁଗ୍ଧ ଯୋଜନାର ମାଲିକାନାରେ ଥିବା 1.61 ଏକର ଜମି, ଖାସରା ନମ୍ବର-91/15କୁ କୃଷକମାନଙ୍କ ମଣ୍ଡି ପ୍ରତିଷ୍ଠା ଲାଗି କ୍ଷୁଦ୍ର କୃଷକ କୃଷି ବ୍ୟବସାୟ ସମିତି (ଏସଏଫଏସି)କୁ ଲିଜରେ ଦେବା ପ୍ରସ୍ତାବକୁ ଅନୁମୋଦନ କରିଛନ୍ତି ।

ଲିଜରେ ଦିଆଯିବାର ଅବଧି 30 ବର୍ଷର ହେବ, ଯାହା 10 ସେପ୍ଟେମ୍ବର, 2014 ଠାରୁ 9 ସେପ୍ଟେମ୍ବର 2044 ପର୍ଯ୍ୟନ୍ତ ଲାଗୁ ରହିବ । ଲିଜରେ ଦିଆଯାଇଥିବା ଜମିର ଭଡ଼ା ମାସିକ 100 ଟଙ୍କା ହେବ ଏବଂ ଏଥିରେ 10 ସେପ୍ଟେମ୍ବର 2014 ଠାରୁ ବାର୍ଷିକ 10 ପ୍ରତିଶତ ବୃଦ୍ଧି ଲାଗୁ ହେବ । ସାରା ବର୍ଷ ପାଇଁ ଜମି ଭଡ଼ାର ଅଗ୍ରୀମ ଦେୟ 31 ଜାନୁଆରୀ ସୁଦ୍ଧା କରିବାକୁ ହେବ ।

ପ୍ରଭାବ :-

ଏସଏଫଏସି ଦ୍ୱାରା କୃଷକ ମଣ୍ଡି ପ୍ରତିଷ୍ଠା ହେବା ଦ୍ୱାର ଏଫପିଓ ଏବଂ କୃଷି ଉତ୍ପାଦନ ସଂଘକୁ ପାଇକାରୀ ଏବଂ ଖୁଚୁରା ବିକ୍ରେତାମାନଙ୍କୁ ଫଳ ଏବଂ ପରିବା ବିକ୍ରି କରିବା ଲାଗି ଏକ ଅତିରିକ୍ତ ସୁବିଧା କେନ୍ଦ୍ର ମିଳିପାରିବ । ଏହାଦ୍ୱାରା ଦିଲ୍ଲୀ/ଏନସିଆର ଅଂଚଳର କୃଷକ ଏବଂ ଦେଶର ଉପଭୋକ୍ତାମାନଙ୍କୁ ଲାଭ ମିଳିପାରିବ ।

କୃଷକ ମଣ୍ଡିର ପ୍ରମୁଖ ବିନ୍ଦୁ :

1. କେବଳ ପଞ୍ଜିକୃତ ଏଫପିଓ/ଉତ୍ପାଦନ ସଂଘ (ଜିଏ)କୁ ହିଁ ଏହି ସୁବିଧା କେନ୍ଦ୍ରରେ ତାଜା ସାମଗ୍ରୀ ବିକ୍ରି କରିବାର ଅନୁମତି ମିଳିବ ।

2. ଖୁଚୁରା ବିକ୍ରେତା ସଂଘ, ପାଇକାରୀ ବିକ୍ରେତା, ହୋଟେଲ ଏବଂ କ୍ୟାଟିରିଂ ସଂସ୍ଥା, ଆବାସିକ କଲ୍ୟାଣ ସଂଘ ଏବଂ ସାଧାରଣ ଉପଭୋକ୍ତା ଏହି ସୁବିଧା କେନ୍ଦ୍ରରୁ କିଣାକିଣି କରିପାରିବେ । ଏଥିରେ କୌଣସି ଏଜେଣ୍ଟ/ଦଲାଲ ସାମିଲ ହେବେ ନାହିଁ ।

କୃଷକ ମଣ୍ଡିର କାରବାରେ କ୍ରେତା କିମ୍ବା ବିକ୍ରେତାମାନଙ୍କୁ କୌଣସି ଶୁଳ୍କ (କମିଶନ) ଦେବାକୁ ପଡ଼ିବ ନାହିଁ । କେବଳ ଗୋଦାମ, ଶୀତଳ ଭଣ୍ଡାର (କୋଲ୍ଡ ଷ୍ଟୋରେଜ) ଆଦି ସୁବିଧାର ଉପଯୋଗ ଲାଗି ଏଫପିଓକୁ ସାଧାରଣ ଶୁଳ୍କ ଦେବାକୁ ପଡ଼ିବ ।

ଖୁଚୁରା ବିକ୍ରୟ କେନ୍ଦ୍ର ମାଧ୍ୟମରେ କୃଷକ ମଣ୍ଡି ସିଧାସଳଖ ଯୋଗାଣ କରିବା ଲାଗି ମଧ୍ୟ ବିକଳ୍ପ ଦେବ । ଏଥିପାଇଁ ଫ୍ରାଞ୍ଚାଇଜି ମଡେଲ ଗ୍ରହଣ କରାଯିବ । ଦିଲ୍ଲୀ ଦୁଗ୍ଧ ଯୋଜନାର କେତେକ ବଛା ବଛା ବିକ୍ରୟ କେନ୍ଦ୍ରରୁ ଆଳୁ ଏବଂ ପିଆଜ ଭଳି ପ୍ରମୁଖ ଉତ୍ପାଦର ବିକ୍ରୟରୁ ଏହାର ଆରମ୍ଭ କରାଯିବ । କୃଷକ ମଣ୍ଡି ଅନଲାଇନ ବିକ୍ରି ଏବଂ କଲ ସେଂଟର ମାଧ୍ୟମରେ ସିଧାସଳଖ ବିପଣନର ସୁବିଧା ପ୍ରଦାନ କରିବ ।

**********