ପିଏମଇଣ୍ଡିଆ

ନିରନ୍ତର ସହର ବିକାଶ କ୍ଷେତ୍ରରେ ବୈଷୟିକ ସହଯୋଗ ଲାଗି ଭାରତ ଏବଂ ବ୍ରିଟେନ ମଧ୍ୟରେ ସ୍ୱାକ୍ଷରିତ ହୋଇଥିବା ବୁଝାମଣାପତ୍ର (ଏମଓୟୁ) ବିଷୟରେ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ଅଧ୍ୟକ୍ଷତାରେ ଅନୁଷ୍ଠିତ କେନ୍ଦ୍ର କ୍ୟାବିନେଟକୁ ଅବଗତ କରାଯାଇଥିଲା ।

ବିବରଣୀ :

ଏହି ବୁଝାମଣାପତ୍ରର ଉଦ୍ଦେଶ୍ୟ ନିରନ୍ତର ସହର ବିକାଶ କ୍ଷେତ୍ରରେ ଭାରତ ଏବଂ ବ୍ରିଟେନ ମଧ୍ୟରେ ସଂସ୍ଥାଗତ ସହଯୋଗ ଉପଲବ୍ଧ କରାଇବା ଏବଂ ଏହାକୁ ସୁଦୃଢ଼ କରିବା । ସହଯୋଗର କ୍ଷେତ୍ରରେ ସ୍ମାର୍ଟ ସିଟିର ବିକାଶ, କଠିନ ବର୍ଜ୍ୟ ପରିଚାଳନା, ପରିବେଶ ଅନୁକୂଳ ଶସ୍ତା ବାସଗୃହ, ବର୍ଜ୍ୟ ଜଳ ପରିଚାଳନା, ସହରୀ ପ୍ରତିଷ୍ଠାନଗୁଡ଼ିକର କ୍ଷମତା ନିର୍ମାଣ, ସହରୀ କ୍ଷେତ୍ରରେ ଦକ୍ଷତା ବିକାଶ, ସହରୀ ପରିବହନ, ଚତୁର ପରିବହନ ବ୍ୟବସ୍ଥା ଏବଂ ଟ୍ରାଞ୍ଜିଟ-କୈନ୍ଦ୍ରିକ ବିକାଶ, ଆର୍ଥିକ ପ୍ରସାରରେ ନବୋନ୍ମେଷ ଏବଂ ଅନ୍ୟ ସମ୍ପୃକ୍ତ କ୍ଷେତ୍ର ମଧ୍ୟ ସାମିଲ ରହିଛି । ଉଭୟ ପକ୍ଷ ଏହି କ୍ଷେତ୍ରରେ ସହଯୋଗ ଲାଗି ଆପୋସ ସହମତି ବ୍ୟକ୍ତ କରିଥିଲେ ।

କାର୍ଯ୍ୟକାରୀ ରଣନୀତି

ଏହି ଏମଓୟୁ ଅନ୍ତର୍ଗତ ଏକ ଭାରତ-ବ୍ରିଟେନ ମିଳିତ କାର୍ଯ୍ୟ ଦଳ ଗଠନ କରାଯିବ ଯାହା ବୁଝାମଣାର ପରିଧି ମଧ୍ୟରେ ରହି ସହଯୋଗ ଉପରେ ରଣନୀତି ଏବଂ କାର୍ଯ୍ୟକ୍ରମର ରୂପରେଖ ପ୍ରସ୍ତୁତ କରିବ । ସହରୀ ବିକାଶ ଉପରେ ମିଳିତ କାର୍ଯ୍ୟ ଗୋଷ୍ଠୀର ବୈଠକ ବର୍ଷରେ ଗୋଟିଏ ଥର ହେବ ଏବଂ ଥର ଥର କରି ଭାରତ ଏବଂ ବ୍ରିଟେନରେ ହେବ ।

ପ୍ରମୁଖ ପ୍ରଭାବ :

ଏହି ଏମଓୟୁ ଉଭୟ ଦେଶ ମଧ୍ୟରେ ନିରନ୍ତର ସହରୀ ବିକାଶ କ୍ଷେତ୍ରରେ ଦୀର୍ଘାବଧି ଦ୍ୱିପାକ୍ଷିକ ସହଯୋଗକୁ ଗଭୀରତା ଏବଂ ସୁଦୃଢ଼ତା ପ୍ରଦାନ ଲାଗି ପ୍ରୋତ୍ସାହିତ କରିବ ।

ହିତାଧିକାରୀ :

ଏହି ଏମଓୟୁ ଦ୍ୱାରା ସ୍ମାର୍ଟ ସିଟି ବିକାଶ, କଠିନ ବର୍ଜ୍ୟ ପରିଚାଳନା, ପରିବେଶ ଅନୁକୂଳ ଶସ୍ତା ବାସଗୃହ, ବର୍ଜ୍ୟ ଜଳ ପରିଚାଳନା, ସହରୀ କ୍ଷେତ୍ରରେ ଦକ୍ଷତା ବିକାଶ, ଚତୁର ସହରାଞ୍ଚଳ ପରିବହନ ବ୍ୟବସ୍ଥା ବିକଶିତ ହେବ ।

**********