ପିଏମଇଣ୍ଡିଆ

ମହାମହିମ ପ୍ରଧାନମନ୍ତ୍ରୀ ମାର୍କ ରୁଟ୍ଟେ,

ଜୁନ୍ 2015ରେ ମୁଁ ଆପଣଙ୍କୁ ଭାରତ ମାଟିରେ ସ୍ୱାଗତ ଜଣାଇବାର ସୌଭାଗ୍ୟ ପାଇଥିଲି । ସାଧାରଣତଃ ଜୁନ୍ ମାସରେ ଭାରତରେ ପ୍ରବଳ ଗରମ ଅନୁଭୂତ ହୋଇଥାଏ । ତଥାପି ସେହି ମାସରେ ଆପଣ ଭାରତ ଆସିବା ଲାଗି ବାଛିବା ଆମ ଦୁଇ ଦେଶ ମଧ୍ୟରେ ଦ୍ୱିପାକ୍ଷିକ ସମ୍ପର୍କ ପ୍ରତି ଆପଣଙ୍କ ପ୍ରତିବଦ୍ଧତାର ପ୍ରତୀକ ।

ଆଜି ଠିକ୍ 2 ବର୍ଷ ପରେ ମୁଁ ମଧ୍ୟ ଜୁନ୍ ମାସରେ ନେଦରଲେଣ୍ଡ ଆସିଛି । କିନ୍ତୁ ଅବଶ୍ୟ ତାପମାତ୍ରା ଦୃଷ୍ଟିରୁ ଦିଲ୍ଲୀ ଏବଂ ହଗ୍ ମଧ୍ୟରେ ଢେର ତଫାତ୍ ରହିଛି । ଏହା ପ୍ରାୟତଃ ଦିନ ଏବଂ ରାତି ଭଳି । ଏଠାକାର ପରିବେଶ, ଯାହା ମୁଁ ଦେଖିପାରୁଛି, ଅତ୍ୟନ୍ତ ମନୋରମ ।

ମହାମାନ୍ୟଗଣ ପ୍ରଥମତଃ, ମୋତେ ଏବଂ ମୋ ସହିତ ଆସିଥିବା ପ୍ରତିନିଧିମଣ୍ଡଳୀକୁ ଭବ୍ୟ ସ୍ୱାଗତ ଜଣାଇଥିବାରୁ ମୁଁ ଆପଣମାନଙ୍କୁ ଧନ୍ୟବାଦ ଜଣାଉଛି । ଏପରି ସ୍ୱାଗତ ଦ୍ୱାରା ଆପଣମାନେ ଭାରତବାସୀଙ୍କ ପ୍ରତି ରହିଥିବା ଆପଣଙ୍କ ଭାବାବେଗକୁ ପ୍ରଦର୍ଶନ କରିଛନ୍ତି ।

ମହାମହିମ, ନେଦରଲେଣ୍ଡକୁ ମୋର ଏହି ଗସ୍ତ ସମ୍ପର୍କରେ ଅଳ୍ପ ଦିନ ପୂର୍ବରୁ ସୂଚନା ଦିଆଯାଇଥିଲା । ତଥାପି ଏହି ଗସ୍ତକୁ ସ୍ୱୀକାର କରିବା ଏବଂ ଏତେ କମ୍ ସମୟ ମଧ୍ୟରେ ସବୁ କାର୍ଯ୍ୟକ୍ରମ ଆୟୋଜନ କରିବା ଏବଂ ଏହାକୁ ଫଳପ୍ରଦ କରିବା ଲାଗି ମୁଁ ଆପଣଙ୍କୁ କୃତଜ୍ଞତା ଜଣାଉଛି । ଆପଣଙ୍କ ନେତୃତ୍ୱର ମୁଁ ପ୍ରଶଂସା କରୁଛି ଏବଂ ମୁଁ ଭାବୁଛି ଯେ ଆପଣଙ୍କ ଚମତ୍କାର ନେତୃତ୍ୱର ଏହା ପ୍ରତିଫଳନ ।

ମହାମହିମ, ଆପଣ ଠିକ୍ କହିଛନ୍ତି, ଭାରତ ଏବଂ ନେଦରଲେଣ୍ଡ ମଧ୍ୟରେ ସମ୍ପର୍କ ଶତାଧିକ ବର୍ଷ ପୁରୁଣା ଏବଂ ଦୁଇ ଦେଶ ସର୍ବଦା ଏହାକୁ ଆହୁରି ସୁଦୃଢ଼ ଏବଂ ଗଭୀର କରିବା ଲାଗି ଚେଷ୍ଟା କରିଆସିଛନ୍ତି । ଚଳିତ ବର୍ଷ ଆପଣ କହିବା ଭଳି, ଭାରତ ଏବଂ ନେଦରଲେଣ୍ଡ ମଧ୍ୟରେ କୂଟନୈତିକ ସମ୍ପର୍କର 70ତମ ବର୍ଷପୂର୍ତ୍ତି ଆମେ ପୂରଣ କରିବାକୁ ଯାଉଛୁ ଏବଂ ନିଶ୍ଚିତ ସ୍ୱାଭାବିକ ଯେ ଆମେ ଦ୍ୱିପାକ୍ଷିକ ସମ୍ପର୍କ ପ୍ରତି ବିଶେଷ ଗୁରୁତ୍ୱ ଦେଉଛୁ ।

ଆଜିର ବିଶ୍ୱ ଆନ୍ତଃନିର୍ଭରଶୀଳ ଏବଂ ଆନ୍ତଃସଂଯୁକ୍ତ । ତେଣୁ ଏହା ନିଶ୍ଚିତ ଭାବେ ସ୍ୱାଭାବିକ ଥିଲା ଯେ ଆମର ଆଲୋଚନାରେ କେବଳ ଦ୍ୱିପାକ୍ଷିକ ସମ୍ପର୍କ ନୁହେଁ ଅନ୍ତର୍ଜାତୀୟ ଗୁରୁତ୍ୱ ବହନ କରୁଥିବା ସମ୍ପର୍କ ମଧ୍ୟ ସ୍ଥାନ ପାଇଥିଲା ।

ଆମ ଦୁଇ ଦେଶ ମଧ୍ୟରେ କେତେକ ଅନ୍ତର୍ଜାତୀୟ ପ୍ରସଙ୍ଗ ଉପରେ ସହମତି ରହିଛି ଏବଂ ନେଦରଲେଣ୍ଡର ସହଯୋଗ ଯୋଗୁ ଭାରତ ଗତବର୍ଷ ସଫଳତାପୂର୍ବକ MTCR(Missile Technology Control Regime) ର ସଦସ୍ୟତା ପାଇଥିଲା ଏବଂ ଏଥିପାଇଁ ମୁଁ ଆପଣଙ୍କୁ ହୃଦୟର ସହ ଧନ୍ୟବାଦ ଜ୍ଞାପନ କରୁଛି ।

ଦ୍ୱିପାକ୍ଷିକ ନିବେଶ ପ୍ରସଙ୍ଗକୁ ଦେଖିଲେ ନେଦରଲେଣ୍ଡ ବର୍ତ୍ତମାନ ପ୍ରତ୍ୟକ୍ଷ ବିଦେଶୀ ପୁଞ୍ଜିନିବେଶର ପଞ୍ଚମ ବୃହତ ଉତ୍ସ ହୋଇ ରହିଛି । ଏପରିକି ଗତ 3 ବର୍ଷ ମଧ୍ୟରେ ଏହା ପ୍ରତ୍ୟକ୍ଷ ବିଦେଶୀ ନିବେଶର ତୃତୀୟ ବୃହତ ଉତ୍ସ ହୋଇପାରିଛି ।

ପୁଣିଥରେ ମୋତେ ଏହା ଦୋହରାଇବା ଆବଶ୍ୟକ ପଡ଼ିବ ନାହିଁ ଯେ ଭାରତର ଅର୍ଥନୈତିକ ବିକାଶ, ବିକାଶ ପାଇଁ ଆମର ପ୍ରାଥମିକତାରେ ନେଦରଲେଣ୍ଡ ଏକ ସ୍ୱାଭାବିକ ସହଯୋଗୀ ।

ଆଜି ଆମେ ଡଚ୍ କମ୍ପାନୀଗୁଡ଼ିକର ସିଇଓଙ୍କ ସହ ବୈଠକରେ ଆଲୋଚନା କରିବାର ସୁଯୋଗ ପାଇବୁ ଏବଂ ମୁଁ ଭାବୁଛି ଯେ ସେମାନେ ଭାରତ ପ୍ରତି ସକାରାତ୍ମକ ମନୋଭାବ ରଖିଛନ୍ତି ଏବଂ ସେମାନଙ୍କ ମତ ଜାଣିବା ଲାଗି ମୁଁ ଆଗ୍ରହୀ ।

ଆଜି ମୁଁ ନେଦରଲେଣ୍ଡରେ ରହୁଥିବା ପ୍ରବାସୀ ଭାରତୀୟଙ୍କ ସହ ଆଲୋଚନା କରିବାର ସୁଯୋଗ ପାଇବି । ଦୁଇ ଦେଶ ମଧ୍ୟରେ ପ୍ରବାସୀ ଭାରତୀୟମାନେ ସମ୍ପର୍କର ସେତୁ ଭଳି କାର୍ଯ୍ୟ କରୁଛନ୍ତି । ଜନ-ଜନ ସମ୍ପର୍କକୁ ଆହୁରି ସୁଦୃଢ଼ କରିବା ଆମର ଉଦ୍ଦେଶ୍ୟ ।

ମୋ ପାଇଁ ମହାମହିମ ମହାରାଜା ଏବଂ ମହାରାଣୀଙ୍କୁ ଭେଟିବାର ସୁଯୋଗ ପାଇବା ବଡ଼ ସୌଭାଗ୍ୟର କଥା । ମୁଁ ପୁଣିଥରେ ପ୍ରଧାନମନ୍ତ୍ରୀ ରୁଟ୍ଟେ, ନେଦରଲେଣ୍ଡ ସରକାର ଏବଂ ଜନସାଧାରଣଙ୍କୁ ହୃଦୟରୁ କୃତଜ୍ଞତା ଜଣାଉଛି ।

ଧନ୍ୟବାଦ

**********