ପିଏମଇଣ୍ଡିଆ

ପର୍ଯ୍ୟଟନ କ୍ଷେତ୍ରରେ ସହଯୋଗକୁ ସୁଦୃଢ଼ କରିବା ସକାଶେ ଭାରତ ସରକାରଙ୍କ ପର୍ଯ୍ୟଟନ ମନ୍ତ୍ରଣାଳୟ ଏବଂ ସାଉଦୀ ସାମ୍ରାଜ୍ୟର ସାଉଦୀ କମିଶନ ଫର ଟୁରିଜିମ ଏବଂ ନେସନାଲ ହେରିଟେଜ ମଧ୍ୟରେ ବୁଝାମଣାପତ୍ର (ଏମଓୟୁ) ସ୍ୱାକ୍ଷର ପ୍ରସ୍ତାବକୁ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ଅଧ୍ୟକ୍ଷତାରେ ଅନୁଷ୍ଠିତ କେନ୍ଦ୍ର କ୍ୟାବିନେଟର ମଞ୍ଜୁରି ମିଳିଛି ।

ଏହି ଏମଓୟୁର ପ୍ରମୁଖ ଉଦ୍ଦେଶ୍ୟଗୁଡ଼ିକ ହେଲା :

1. ପର୍ଯ୍ୟଟନ ବିକାଶରେ ଆଇନଗତ ବ୍ୟବସ୍ଥା, ହୋଟେଲ, ରିସୋର୍ଟ ଏବଂ ପର୍ଯ୍ୟଟକ ଆତିଥେୟ ବ୍ୟବସ୍ଥା, ପର୍ଯ୍ୟଟନ ତଥ୍ୟ ଏବଂ ପରିସଂଖ୍ୟାନ, ପ୍ରତିପକ୍ଷ ରାଷ୍ଟ୍ରରେ ପ୍ରଦର୍ଶନୀ କାର୍ଯ୍ୟକ୍ରମ ଏବଂ ଅନ୍ୟ ପର୍ଯ୍ୟଟନ କାର୍ଯ୍ୟକଳାପ, ପର୍ଯ୍ୟଟନ ବିକାଶ, ଯୋଜନା ଏବଂ ନିବେଶ; ପର୍ଯ୍ୟଟନ ସୁବିଧାର ଲାଇସେନ୍ସ ପ୍ରଦାନ, ପରିଚାଳନା ଏବଂ ନିବେଶ; କୃଷି ପର୍ଯ୍ୟଟନ, ମରୁଭୂମି ପର୍ଯ୍ୟଟନ ଆଦି କ୍ଷେତ୍ରରେ ସୂଚନା ଏବଂ ବିଶେଷଜ୍ଞତାର ବିନିମୟ ।
2. ଉଭୟ ପକ୍ଷର ରାଷ୍ଟ୍ର ମଧ୍ୟରେ ଗଣମାଧ୍ୟମ ପ୍ରକାଶନୀ, ପର୍ଯ୍ୟଟନ ସଂକ୍ରାନ୍ତ ଚଳଚ୍ଚିତ୍ରର ବିନିମୟ ଏବଂ ବିଶେଷଜ୍ଞ ଓ ପର୍ଯ୍ୟଟନ ଗଣମାଧ୍ୟମ ପ୍ରତିନିଧିମାନଙ୍କ ବିନିମୟକୁ ପ୍ରୋତ୍ସାହନ ।
3. ଉଭୟ ପକ୍ଷ ମଧ୍ୟରେ ପର୍ଯ୍ୟଟନ ନିବେଶ ସୁଯୋଗର ପ୍ରଚଳନ; ପର୍ଯ୍ୟଟନ ପ୍ରକଳ୍ପରେ ଆପୋସ ପର୍ଯ୍ୟଟନ ନିବେଶକୁ ପ୍ରୋତ୍ସାହନ
4. ଉଭୟ ପକ୍ଷର ରାଷ୍ଟ୍ର ମଧ୍ୟରେ ଯୁଗ୍ମ ପର୍ଯ୍ୟଟନ କାର୍ଯ୍ୟକ୍ରମର ଆୟୋଜନ, ପ୍ରଦର୍ଶନୀ, କନଫରେନ୍ସ ଏବଂ ସେମିନାରରେ ଅଂଶଗ୍ରହଣକୁ ପ୍ରୋତ୍ସାହନ ସହିତ ପର୍ଯ୍ୟଟନ ବିକାଶରେ ଯୋଗଦାନ ଓ ମିଳିତ ପର୍ଯ୍ୟଟନ ଲକ୍ଷ୍ୟକୁ ବାସ୍ତବ ରୂପ ଦେବା ।
5. ଉଭୟ ପକ୍ଷ ମଧ୍ୟରେ ପର୍ଯ୍ୟଟନ ଶିକ୍ଷା ଏବଂ ତାଲିମ କ୍ଷେତ୍ରରେ କାର୍ଯ୍ୟରତ ସରକାରୀ ଏବଂ ଘରୋଇ ଶିକ୍ଷା ସୁବିଧାକୁ ପ୍ରୋତ୍ସାହିତ କରିବା ।
6. ପର୍ଯ୍ୟଟନ କ୍ଷେତ୍ରରେ ଅଭିନବ ଅଭିଜ୍ଞତା ଓ ପ୍ରଯୁକ୍ତିର ବିନିମୟ ଏବଂ ପରାମର୍ଶ ସେବା ।
7. ପର୍ଯ୍ୟଟନ ବ୍ୟାପାର ସହ ଜଡ଼ିତ ଅନ୍ତର୍ଜାତୀୟ ମଞ୍ଚ ଓ ସଂଗଠନରେ ସହଯୋଗ ଏବଂ ସମନ୍ୱୟ ।

**********