ପିଏମଇଣ୍ଡିଆ

ପାଲେଷ୍ଟାଇନ, ସଂଯୁକ୍ତ ଆରବ ଅମିରତନ୍ତ୍ର (ୟୁଏଇ)ଏବଂ ଓମାନ ଗସ୍ତରେ ଯିବା ପୂର୍ବରୁ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ପ୍ରସ୍ଥାନ ବିବୃତି ନିମ୍ନରେ ଦିଆଗଲା –

“ମୁଁ 9 ରୁ12 ଫେବୃଆରୀ ପର୍ଯ୍ୟନ୍ତ ପାଲେଷ୍ଟାଇନ, ସଂଯୁକ୍ତ ଆରବ ଅମିରତନ୍ତ୍ର ଏବଂ ଓମାନକୁ ଦ୍ୱିପାକ୍ଷିକ ଗସ୍ତରେ ଯାଉଛି ।

2015 ପର ଠାରୁ ପଞ୍ଚମ ଥର ପାଇଁ ଉପସାଗରୀୟ ଏବଂ ପଶ୍ଚିମ ଏସୀୟ ଅଂଚଳକୁ ଗସ୍ତ କରୁଥିବାରୁ ମୁଁ ଆନନ୍ଦିତ । ଏହି ଅଂଚଳ ବୈଦେଶିକ ସମ୍ପର୍କ ଦୃଷ୍ଟିରୁ ଆମ ପାଇଁ ଗୁରୁତ୍ୱପୂର୍ଣ୍ଣ । ଏ ଅଂଚଳର ରାଷ୍ଟ୍ରଗୁଡ଼ିକ ସହ ଆମର ଉଜ୍ଜ୍ୱଳ ବହୁସ୍ତରୀୟ ସମ୍ପର୍କ ରହିଛି ।

ଜୋର୍ଡାନ ଦେଇ ଯିବା ପରେ 10 ଫେବୃଆରୀରେ ଏହି ଗସ୍ତ ପାଲେଷ୍ଟାଇନରୁ ଆରମ୍ଭ ହେବ । ଜୋର୍ଡାନ ଦେଇ ଯିବା ଲାଗି ଅନୁମତି ପ୍ରଦାନ କରିଥିବାରୁ ମୁଁ ଜୋର୍ଡାନ ରାଜା ମହାମହିମ କିଙ୍ଗ ଅବଦୁଲ୍ଲା ଦ୍ୱିତୀୟଙ୍କ ପ୍ରତି କୃତଜ୍ଞ । 9 ଫେବୃଆରୀ ସନ୍ଧ୍ୟାରେ ଅମନ(Aman)ରେ ତାଙ୍କୁ ଭେଟିବା ଲାଗି ମୁଁ ଉତ୍ସାହିତ ।

ଇତିହାସରେ ପ୍ରଥମ ଥର ପାଇଁ ଭାରତର ପ୍ରଧାନମନ୍ତ୍ରୀ ପାଲେଷ୍ଟାଇନ ଗସ୍ତରେ ଯାଉଛନ୍ତି । ରାଷ୍ଟ୍ରପତି ମହମଦ ଆବାସଙ୍କ ସହ ଆଲୋଚନା ପାଇଁ ମୁଁ ଆଗ୍ରହୀ ଅଛି ଏବଂ ପାଲେଷ୍ଟାଇନ ଓ ପାଲେଷ୍ଟାଇନର ଲୋକମାନଙ୍କ ବିକାଶ ପ୍ରତି ଆମର ସହଯୋଗ ଜାରି ରହିବ ।

10-11 ଫେବୃଆରୀରେ ମୁଁ ସଂଯୁକ୍ତ ଆରବ ଅମିରତନ୍ତ୍ର ଗସ୍ତରେ ଯିବି । 2015 ଅଗଷ୍ଟ ପରେ ମୁଁ ପୁଣିଥରେ ସେଠାକୁ ଯାଉଛି । ୟୁଏଇ ଆମର ଗୁରୁତ୍ୱପୂର୍ଣ୍ଣ ରଣନୈତିକ ସହଭାଗୀ ଯାହା ସହିତ ଆମର ସମ୍ପର୍କ ଅର୍ଥନୀତି, ଶକ୍ତି, ଉଚ୍ଚ ପ୍ରଯୁକ୍ତି ଏବଂ ସୁରକ୍ଷା ଆଦି କ୍ଷେତ୍ରରେ ତ୍ୱରାନ୍ୱିତ ହୋଇଛି । ଏହି ସବୁ କ୍ଷେତ୍ରରେ ଆମେ ହାସଲ କରିଥିବା ଅଗ୍ରଗତି ସମ୍ପର୍କରେ ଆଲୋଚନା କରାଯିବାର କାର୍ଯ୍ୟକ୍ରମ ରହିଛି । ୟୁଏଇର ପ୍ରଧାନମନ୍ତ୍ରୀ ଏବଂ ଦୁବାଇ ରାଜା ମହାମହିମ ଶେଖ ମହମ୍ମଦ ବିନ ରସିଦ ଅଲ ମକତୁମ ଏବଂ ଆବୁଧାବିର ଯୁବରାଜ ମହାମହିମ ଶେଖ ମହମ୍ମଦ ବିନ ଜାୟେଦ ଅଲ ନାହ୍ୟାନଙ୍କ ସହ ବୈଠକରେ ଏସବୁ ଆଲୋଚନା ହେବ ।

ୟୁଏଇର ନେତୃବୃନ୍ଦଙ୍କ ଆମନ୍ତ୍ରଣ କ୍ରମେ ଦୁବାଇରେ ଆୟୋଜିତ ବିଶ୍ୱ ସରକାର ସମ୍ମିଳନୀର ଷଷ୍ଠ ସଂସ୍କରଣରେ ମୋର ଉଦ୍ବୋଧନ ଦେବାର କାର୍ଯ୍ୟକ୍ରମ ରହିଛି, ଭାରତ ଏଥିରେ ସମ୍ମାନିତ ଅତିଥି ରାଷ୍ଟ୍ର ଭାବେ ଯୋଗଦେଉଛି ।

ସେହିଦିନ, ଅଗ୍ରଣୀ ୟୁଏଇ ଏବଂ ଆରବ ସିଇଓମାନଙ୍କ ସହ ଦୁବାଇରେ ଆଲୋଚନା କରାଯିବାର କାର୍ଯ୍ୟକ୍ରମ ରହିଛି । ଏଥିରେ ଭାରତରେ ଥିବା ବ୍ୟାପକ ଅର୍ଥନୈତିକ ସୁଯୋଗ ଏବଂ ଆମର ବ୍ୟବସାୟିକ ସହଯୋଗ ବୃଦ୍ଧି ଲାଗି ଆଉ ଅଧିକ କ’ଣ କରାଯାଇପାରିବ ସେ ସମ୍ପର୍କରେ ଆଲୋଚନା କରାଯିବ ।

ଓମାନ ଆମର ନିବିଡ଼ ସାମୁଦ୍ରିକ ପଡ଼ୋଶୀ ଯାହା ସହିତ ଆମର ଉତ୍ତମ ସମ୍ପର୍କ ରହିଛି । ମୁଁ ମହାମହିମ ଓମାନ ସୁଲତାନ ଏବଂ ଅନ୍ୟ ଗୁରୁତ୍ୱପୂର୍ଣ୍ଣ ନେତୃବୃନ୍ଦଙ୍କ ସହ ଆଲୋଚନା କରିବି । ଭାରତ ସହିତ ସୁଦୃଢ଼ ଅର୍ଥନୈତିକ ଏବଂ ବ୍ୟବସାୟିକ ସମ୍ପର୍କ ଲାଗି ମୁଁ ଓମାନର ଅଗ୍ରଣୀ ବ୍ୟବସାୟୀ ଗୋଷ୍ଠୀ ସହ ଆଲୋଚନା କରିବି ।

ଓମାନ ଆମର ନିବିଡ଼ ସାମୁଦ୍ରିକ ପଡ଼ୋଶୀ ହୋଇଥିବାରୁ ଏହା ସହ ଆମର ଭଲ ସମ୍ପର୍କ ରହିଛି । 11-12 ଫେବୃଆରୀରେ ପ୍ରଧାନମନ୍ତ୍ରୀ ଭାବେ ସେଠାକୁ ମୋର ପ୍ରଥମ ଗସ୍ତକୁ ନେଇ ମୁଁ ଉତ୍ସାହିତ ଅଛି । ଜନ-ଜନ ବିନିମୟ ମାଧ୍ୟମରେ ଶତାଧିକ ବର୍ଷ ଧରି ଭାରତ ଏବଂ ଓମାନ ମଧ୍ୟରେ ସମ୍ପର୍କ ରହିଆସିଛି ।

11 ଫେବୃଆରୀ ସନ୍ଧ୍ୟାରେ ମୋର ମହାମହିମ ଓମାନ ସୁଲତାନଙ୍କୁ ଭେଟିବାର କାର୍ଯ୍ୟକ୍ରମ ରହିଛି । ମୁଁ ମଧ୍ୟ ସେଠାକାର ମନ୍ତ୍ରୀପରିଷଦର ଉପପ୍ରଧାନମନ୍ତ୍ରୀ ମହାମହିମ ସୟିଦ ଫହଦ ବିନ ମହମ୍ମଦ ଅଲ ସୟିଦ ଏବଂ ଅନ୍ତର୍ଜାତୀୟ ସମ୍ପର୍କ ଏବଂ ସହଯୋଗ ବ୍ୟାପାର ବିଭାଗ ଉପପ୍ରଧାନମନ୍ତ୍ରୀ ମହାମହିମ ସୟିଦ ଆସାଦ ବିନ ତାରିକ ଅଲ ସୟିଦଙ୍କୁ ଭେଟିବି । ଆମେ ଦ୍ୱିପାକ୍ଷିକ ସହଯୋଗର ସମୀକ୍ଷା କରିବୁ ଏବଂ ଆମର ଦୃଢ଼ ପାରମ୍ପରିକ ସମ୍ପର୍କକୁ ଆହୁରି ବିସ୍ତାର କରିବା ପାଇଁ ନିଆଯିବାକୁ ଥିବା ପଦକ୍ଷେପ ସମ୍ପର୍କରେ ଆଲୋଚନା କରିବୁ ।

12 ଫେବୃଆରୀରେ ଭାରତ ସହ ଦୃଢ଼ ଅର୍ଥନୈତିକ ଏବଂ ବ୍ୟବସାୟିକ ସମ୍ପର୍କ ବିକଶିତ କରିବା ଲାଗି ଓମାନର ଅଗ୍ରଣୀ ବ୍ୟବସାୟୀ ଗୋଷ୍ଠୀ ସହିତ ମଧ୍ୟ ମୁଁ ଆଲୋଚନା କରିବି ।

ଉଭୟ ଓମାନ ଏବଂ ୟୁଏଇରେ ମୋର ବହୁସଂଖ୍ୟକ ପ୍ରବାସୀ ଭାରତୀୟଙ୍କୁ ଭେଟିବାର କାର୍ଯ୍ୟକ୍ରମ ରହିଛି, ଯେଉଁମାନେ ସେହି ଦେଶକୁ ନିଜର ଘର ଭଳି ଗ୍ରହଣ କରିନେଇଛନ୍ତି । ଉପସାଗରୀୟ ଦେଶରେ ଏବେ 9 ନିୟୁତରୁ ଅଧିକ ଭାରତୀୟ କାମ କରୁଛନ୍ତି ଏବଂ ରହୁଛନ୍ତି । ଏମାନଙ୍କ ମଧ୍ୟରୁ ଏକତୃତୀୟାଂଶ କେବଳ ୟୁଏଇରେ ରହୁଛନ୍ତି । ଓମାନରେ ଏମାନେ ସବୁଠୁ ବଡ଼ ପ୍ରବାସୀ ସମୁଦାୟ ।

ପ୍ରବାସୀ ଭାରତୀୟମାନେ ଉପସାଗରୀୟ ଦେଶ ସହ ଭାରତର ବନ୍ଧୁତ୍ୱରେ ସେତୁ ଭାବେ କାର୍ଯ୍ୟ କରୁଛନ୍ତି । ସେମାନେ ମଧ୍ୟ ଏସବୁ ଦେଶର ସମୃଦ୍ଧି ଏବଂ ପ୍ରଗତିରେ ସକ୍ରିୟ ଭାଗିଦାର ହୋଇପାରିଛନ୍ତି ।

ଏହି ଗସ୍ତ ମାଧ୍ୟମରେ ପଶ୍ଚିମ ଏସିଆ ଏବଂ ଉପସାଗରୀୟ ଦେଶ ସହ ଭାରତର ବର୍ଦ୍ଧିତ ଏବଂ ଗୁରୁତ୍ୱପୂର୍ଣ୍ଣ ସମ୍ପର୍କକୁ ସୁଦୃଢ଼ କରିବା ପାଇଁ ମୁଁ ଲକ୍ଷ୍ୟ ରଖିଛି ।