ପିଏମଇଣ୍ଡିଆ

ପୁଡୁଚେରୀର ମୁଖ୍ୟମନ୍ତ୍ରୀ ଶ୍ରୀ ଏନ. ରଙ୍ଗାସାମୀ, ମୋର କେନ୍ଦ୍ର କ୍ୟାବିନେଟ୍ ସହଯୋଗୀ ଶ୍ରୀ ମନସୁଖ ମାଣ୍ଡଭୀୟ, ପୁଡୁଚେରୀର ଉପରାଜ୍ୟପାଳ ଶ୍ରୀ କେ. କୈଳାସନାଥନ, ରାଜ୍ୟ ବିଧାନସଭାର ବାଚସ୍ପତି ଶ୍ରୀ ଆର. ସେଲଭାମ, ଗୃହମନ୍ତ୍ରୀ ଶ୍ରୀ ଏ. ନମାସ୍ସିଭ୍ୟମ, ଅନ୍ୟ ନେତାଗଣ, ପୁଡୁଚେରୀର ମୋର ପ୍ରିୟ ଭଉଣୀ ଏବଂ ଭାଇମାନେ, ବନକ୍କମ!

ବନ୍ଧୁଗଣ,

ପୁଡୁଚେରୀରେ ଆସିବା ମୋ ପାଇଁ ଏକ ସୌଭାଗ୍ୟର  କଥା। ଏହା ସିଦ୍ଧ, ସନ୍ଥ, କବି ଏବଂ ସ୍ୱାଧୀନତା ସଂଗ୍ରାମୀମାନଙ୍କ ଭୂମି। ଏଠାରେ ମହାକବି ସୁବ୍ରମଣ୍ୟ ଭାରତୀ ଜାତୀୟତାର ଜାତୀୟତାର ଭାବନା ଜାଗ୍ରତ କରିଥିଲେ। ଏଠାରୁ, ଶ୍ରୀ ଅରବିନ୍ଦ ଏବଂ ଦି ମାତା ସମଗ୍ର ବିଶ୍ୱ ପାଇଁ ଏକ ନୂତନ ଆଧ୍ୟାତ୍ମିକ ଦୃଷ୍ଟିକୋଣ ଦେଇଥିଲେ।

ବନ୍ଧୁଗଣ,

ଯେତେବେଳେ ମୁଁ ପୂର୍ବରୁ ଏଠାକୁ ଆସିଥିଲି, ମୁଁ “ବେଷ୍ଟ ପୁଡୁଚେରି”ର ମନ୍ତ୍ର ଦେଇଥିଲି। ବେଷ୍ଟର  ଅର୍ଥାତ୍ ବ୍ୟବସାୟ, ଶିକ୍ଷା, ଆଧ୍ୟାତ୍ମିକତା ଏବଂ ପର୍ଯ୍ୟଟନ। ଗତ ସାଢ଼େ ଚାରି ବର୍ଷ ମଧ୍ୟରେ, ଏହି ଦୃଷ୍ଟିକୋଣ ଫଳପ୍ରଦ ହେବାରେ ଲାଗିଛି । ପୁଡୁଚେରୀରେ ସୁଶାସନ ଏବଂ ବିକାଶ ଦେଖାଯାଇଛି। ଯେତେବେଳେ କେନ୍ଦ୍ର ଓ  କେନ୍ଦ୍ର ଶାସିତ ପ୍ରଦେଶ ଉଭୟ  ସମାନ ଦୃଷ୍ଟିକୋଣ ଏବଂ ନିଷ୍ଠାର ସହିତ କାମ କରନ୍ତି, ତେବେ ଏହାର ଫଳାଫଳ ଦ୍ରୁତ ଏବଂ ଉତ୍ତମ ହୋଇଥାଏ। ପୁଡୁଚେରୀରେ  ମୁଣ୍ଡପିଛା ଆୟରେ ପ୍ରଭାବଶାଳୀ ବୃଦ୍ଧି ଦେଖାଇଛି। ଏହା ଦେଶରେ ସର୍ବୋଚ୍ଚ ସାମାଜିକ ପ୍ରଗତିରେ ମଧ୍ୟ ସର୍ବୋଚ୍ଚ ସ୍ଥାନ  ହାସଲ କରିଛି। ବର୍ତ୍ତମାନ, ଡବଲ-ଇଞ୍ଜିନ୍ NDA ସରକାର  ପୁଡୁଚେରୀର ଅଭିବୃଦ୍ଧିକୁ ଆହୁରି ଅଗ୍ରଗତି କରିବ । ଆଜି, ଏଠାରେ ଦୁଇ ହଜାର ସାତ ଶହ କୋଟି ଟଙ୍କାରୁ ଅଧିକ ମୂଲ୍ୟର ପ୍ରକଳ୍ପ ଉଦଘାଟନ ଏବଂ ଭିତ୍ତିପ୍ରସ୍ତର ସ୍ଥାପନ କରାଯାଉଛି। ଏହି ପ୍ରକଳ୍ପଗୁଡ଼ିକ ଲୋକଙ୍କ ଜୀବନକୁ ପରିବର୍ତ୍ତନ କରିବ।

ବନ୍ଧୁଗଣ,

ସମଗ୍ର ଭାରତରେ, ଉଚ୍ଚମାନର ଭିତ୍ତିଭୂମି ନିର୍ମାଣ ଉପରେ ବହୁତ ଗୁରୁତ୍ୱ ଦିଆଯାଇଛି। ଏହି ବର୍ଷର ବଜେଟରେ, ଆମେ ଭିତ୍ତିଭୂମି ନିର୍ମାଣ ପାଇଁ  ବାର ଲକ୍ଷ କୋଟି ଟଙ୍କା ବ୍ୟୟ  କରିଛୁ। ଏହା ପୁଡୁଚେରୀର ଲୋକମାନଙ୍କୁ ମଧ୍ୟ ବେଶ ଲାଭଦାୟକ ହେବ। ଆମେ ପୁଡୁଚେରୀକୁ ପୁଞ୍ଜି ନିବେଶ ପାଇଁ ରାଜ୍ୟମାନଙ୍କୁ ସ୍ୱତନ୍ତ୍ର ସହାୟତା ଯୋଜନା ଅଧୀନରେ ଅନ୍ତର୍ଭୁକ୍ତ କରିଛୁ, ଯାହା ପୂର୍ବରୁ କେବଳ ରାଜ୍ୟମାନଙ୍କ ପାଇଁ ସୀମିତ ଥିଲା। ଭିତ୍ତିଭୂମି ପାଇଁ ଅଧିକ ପାଣ୍ଠି ଅର୍ଥ ହେଉଛି ଉନ୍ନତ ରାସ୍ତା, ଜଳ ଯୋଗାଣ, ଉପକୂଳ ଭିତ୍ତିଭୂମି, ସ୍କୁଲ, ହସ୍ପିଟାଲ ଏବଂ ଏପରି ଅନେକ ପ୍ରକଳ୍ପ। ଏହି ସୁବିଧାଗୁଡ଼ିକ ସିଧାସଳଖ ଲୋକଙ୍କ ଜୀବନକୁ ଉନ୍ନତ କରିଥାଏ।

ବନ୍ଧୁଗଣ,

ଏକ ଶକ୍ତିଶାଳୀ ଏବଂ ସଶକ୍ତ ଯୁବପିଢ଼ି ଆମର ବିକାଶର ମୂଳଦୁଆ। ଆମେ ସେମାନଙ୍କ ସ୍ୱପ୍ନକୁ ସମର୍ଥନ କରିବା ପାଇଁ କାମ କରୁଛୁ। NIT କରାଇକାଲରେ, ନୂତନ  ଡକ୍ଟର ଏପିଜେ ଅବଦୁଲ କଲାମ  ଇଞ୍ଜିନିୟରିଂ ବ୍ଲକ ଏବଂ ଆଧୁନିକ ଛାତ୍ରାବାସର  ସୁବିଧା ଅନେକ ଛାତ୍ରଛାତ୍ରୀଙ୍କ ପାଇଁ ବୈଷୟିକ ଶିକ୍ଷାକୁ ସୁଦୃଢ଼ ​​କରିବ। ପଣ୍ଡିଚେରୀ ବିଶ୍ୱବିଦ୍ୟାଳୟରେ ଭିତ୍ତିଭୂମିର ମଧ୍ୟ  ଉନ୍ନତିକରଣ କରାଯାଇଛି। ଏହାର ନୂତନ ବ୍ୟାଖ୍ୟାନ ହଲ୍, ବାଳିକା ଛାତ୍ରାବାସ ଏବଂ ଅନ୍ୟାନ୍ୟ ଭିତ୍ତିଭୂମି ଛାତ୍ରଛାତ୍ରୀମାନଙ୍କୁ ସାହାଯ୍ୟ କରିବ। ମୋତେ ସୂଚନା ଦିଆଯାଇଛି ଯେ ପୁଡୁଚେରୀ ସରକାରଙ୍କ ବିଭିନ୍ନ ବିଭାଗରେ ଖାଲି ପଡିଥିବା  ହଜାର ହଜାର  ପଦବୀ ପୂରଣ କରାଯାଇଛି। ଏହି ପଦବୀଗୁଡ଼ିକ ମଧ୍ୟରୁ ଅନେକ ବର୍ଷ ଧରି କୌଣସି  ନିଯୁକ୍ତି ପରୀକ୍ଷା କରାଯାଇ ନଥିଲା। କିନ୍ତୁ ଡବଲ ଇଞ୍ଜିନ ସରକାର ଏହାକୁ ସଫଳ କରି ଦେଖାଇଲା । ଲୋକଙ୍କ ସେବା ପାଇଁ ଯୋଗ ଦେଇଥିବା ସମସ୍ତ ଯୁବକମାନଙ୍କୁ ମୁଁ ଅଭିନନ୍ଦନ ଜଣାଉଛି।

ବନ୍ଧୁଗଣ,

ଆଜି ସାରା ବିଶ୍ୱ ସ୍ୱଚ୍ଛ ଏବଂ ସବୁଜ ଗତିଶୀଳତା ଉପରେ ଧ୍ୟାନ ଦେଉଛି। ବୈଦ୍ୟୁତିକ ଯାନବାହନ ଆମ ଜୀବନର ଏକ ଗୁରୁତ୍ୱପୂର୍ଣ୍ଣ ଅଂଶ ପାଲଟିଛି। ପୁଡୁଚେରୀ ଭଳି ପର୍ଯ୍ୟଟନ କେନ୍ଦ୍ରରେ, ପ୍ରଦୂଷଣ ହ୍ରାସ କରିବାରେ ବୈଦ୍ୟୁତିକ ବସ୍ ଏକ ଗୁରୁତ୍ୱପୂର୍ଣ୍ଣ ପରିବର୍ତ୍ତନ ଆଣିପାରିବ। ପ୍ରଧାନମନ୍ତ୍ରୀ ଇ-ବସ୍ ସେବା ଅଧୀନରେ, ଆଜି ବୈଦ୍ୟୁତିକ ବସ୍ ଯୋଗାଇ ଦିଆଯାଉଛି। ଆଜି ଆମର କାର୍ଯ୍ୟକ୍ରମ ସହିତ ଜଡିତ ଗୃହ ପ୍ରକଳ୍ପଗୁଡ଼ିକ ପରିବାରକୁ ସ୍ଥିରତା ଏବଂ ସମ୍ମାନ ପ୍ରଦାନ କରିବ। ପୁଡୁଚେରୀ, କରିକାଲ, ମାହେ ଏବଂ ୟାନମରେ ଶହ ଶହ କୋଟି ଟଙ୍କାର ପ୍ରକଳ୍ପ ଅଛି ଯାହା ଲୋକଙ୍କୁ ଅନେକ  ସାହାଯ୍ୟ କରିବ। ଜଳ ଡିସାଲିନେସନ୍ ପ୍ଲାଣ୍ଟଗୁଡ଼ିକ ସ୍ୱଚ୍ଛ ପାନୀୟ ଜଳ ସୁନିଶ୍ଚିତ କରିବ। ନୂତନ ସ୍ୱେରେଜ୍ ଟ୍ରିଟମେଣ୍ଟ ପ୍ଲାଣ୍ଟଗୁଡ଼ିକ ବର୍ଜ୍ୟବସ୍ତୁ ପରିଚାଳନାରେ ଉନ୍ନତି ଆଣିବ। ସରକାର ମୌସୁମୀ ସମୟରେ ବନ୍ୟା ଏବଂ ଜଳବନ୍ଦୀ ହ୍ରାସ କରିବା ପାଇଁ ମଧ୍ୟ କାମ କରୁଛନ୍ତି।  ପୁଡୁଚେରୀର ଲୋକଙ୍କ ପାଇଁ ସହଜ ଜୀବନଧାରଣ ପ୍ରଦାନ କରିବା ଦିଗରେ ଆମର ପ୍ରୟାସ ଜାରି ରହିଛି । ଆମର ସମସ୍ତ ପ୍ରୟାସ ପୁଡୁଚେରୀର ଲୋକଙ୍କ ଜୀବନକୁ ସହଜ କରିବା ଦିଗରେ ନିର୍ଦ୍ଦେଶିତ। ଏଠାରେ କିଛି ଶିଶୁ ଖୁବ ସୁନ୍ଦର ଚିତ୍ର ଅଙ୍କି ଆଣିଛନ୍ତି। ମୁଁ ଏଏସପିଜିର ସଦସ୍ୟମାନଙ୍କୁ କହିବି, ଦୟାକରି ସେଗୁଡ଼ିକ ସଂଗ୍ରହ କରନ୍ତୁ। ମୋର ପ୍ରିୟ ମିତ୍ରମାନେ, ଧନ୍ୟବାଦ, ଅନେକ ଅନେକ  ଧନ୍ୟବାଦ। ଦୟାକରି ସମସ୍ତ ଉପହାର ସଂଗ୍ରହ କରନ୍ତୁ ।

ବନ୍ଧୁଗଣ,

ଯେକୌଣସି ଦେଶ କେବଳ ସେତେବେଳେ ପ୍ରଗତି କରିପାରିବ ଯେତେବେଳେ ଏହାର ମାନବ ପୁଞ୍ଜି ସୁସ୍ଥ ରହିବ। ସେଥିପାଇଁ ସ୍ୱାସ୍ଥ୍ୟସେବା ଆମର ସର୍ବୋଚ୍ଚ ପ୍ରାଥମିକତା ହୋଇ ରହିଛି। ଆମେ ବିଶ୍ୱାସ କରୁଛୁ ଯେ ସ୍ୱାସ୍ଥ୍ୟସେବା ସମସ୍ତଙ୍କ ପାଇଁ ସୁଲଭ, ଉପଲବ୍ଧ ଏବଂ ସୁଲଭ ହେବା ଉଚିତ। ଆୟୁଷ୍ମାନ ଭାରତ ଯୋଜନା ଦ୍ୱାରା  ଭାରତର କୋଟି କୋଟି ପରିବାର ଉପକୃତ ହେଉଛନ୍ତି  । ପୁଡୁଚେରୀର କୌଣସି ନାଗରିକଙ୍କୁ ଚିକିତ୍ସା ପାଇଁ ଦୂର ଯାତ୍ରା କରିବାକୁ ବାଧ୍ୟ କରାଯିବା ଉଚିତ୍ ନୁହେଁ। ବରଂ, ଆମେ ଚାହୁଁଛୁ ଯେ ଅନ୍ୟ ଅଞ୍ଚଳର ଲୋକମାନେ ଏଠାକୁ ଚିକିତ୍ସା ପାଇଁ ଆସନ୍ତୁ। ମୁଁ ଦୃଢ଼ ଭାବରେ ବିଶ୍ୱାସ କରେ ଯେ ପୁଡୁଚେରୀ ଏକ ଚିକିତ୍ସା ପର୍ଯ୍ୟଟନ କେନ୍ଦ୍ର ହୋଇପାରିବ। ପୁଡୁଚେରୀରେ ପୂର୍ବରୁ ନଅଟି ମେଡିକାଲ କଲେଜ ଅଛି। JIPMER ରେ ଆଞ୍ଚଳିକ କର୍କଟ କେନ୍ଦ୍ରର ଆଧୁନିକୀକରଣ ସ୍ୱାସ୍ଥ୍ୟସେବା କ୍ଷମତାକୁ ଆହୁରି ବିସ୍ତାର କରିବ। ଆଜି, ପିଏମ -ଅଭିମ (PM-ABHIM )ଅଧୀନରେ ଗୁରୁତର ରୋଗୀଙ୍କ ପାଇଁ ତିନୋଟି କ୍ରିଟିକାଲ୍ କେୟାର ବ୍ଲକ୍ ପାଇଁ ଶିଳାନ୍ୟାସ କରାଯାଇଛି। ପୁଡୁଚେରୀ ଏବଂ କରାଇକାଲରେ ଏହି ନୂତନ କ୍ରିଟିକାଲ୍ କେୟାର ବ୍ଲକ୍ ଜରୁରୀକାଳୀନ କ୍ଷମତାକୁ ଯଥେଷ୍ଟ ବୃଦ୍ଧି କରିବ। ପୁଡୁଚେରୀ ସିଦ୍ଧ ଔଷଧ ଏବଂ ସମ୍ପୂର୍ଣ୍ଣ ସ୍ୱାସ୍ଥ୍ୟସେବା ପାଇଁ ଜଣାଶୁଣା। କରାଇକାଲରେ ନୂତନ ସମନ୍ୱିତ ଆୟୁଷ ହସ୍ପିଟାଲ ଲୋକଙ୍କ ସେବା କରିବ।

ବନ୍ଧୁଗଣ,

ସଂଯୋଗୀକରଣ ହେଉଛି ପ୍ରଗତିର ମେରୁଦଣ୍ଡ। ଆମେ ଗ୍ରାମୀଣ ଏବଂ ସହରାଞ୍ଚଳ ଭିତ୍ତିଭୂମି ଉଭୟ ଉପରେ ଧ୍ୟାନ ଦେଉଛୁ। ଗୋଟିଏ ପଟେ, ଶହ ଶହ କିଲୋମିଟର ଗ୍ରାମୀଣ ରାସ୍ତା ନିର୍ମାଣ କରାଯାଉଛି। ଏହା ଛାତ୍ର, ଚାଷୀ, ଶ୍ରମିକ ଏବଂ ଛୋଟ ବ୍ୟବସାୟ ପାଇଁ ସଂଯୋଗୀକରଣକୁ ଉନ୍ନତ କରୁଛି। ସେହି ପରି , ଆଉ ଗୋଟେ ପଟେ ଆମେ ପୁଡୁଚେରୀର ଭିଡ଼ ହ୍ରାସ କରିବା ପାଇଁ ମଧ୍ୟ କାମ କରୁଛୁ। ଆମେ ପୁଡୁଚେରୀ ସହରରେ ଏକ ହଜାର କୋଟି ଟଙ୍କାରୁ ଅଧିକ ମୂଲ୍ୟର ପ୍ରକଳ୍ପ ଘୋଷଣା କରିଛୁ। ଏଥିରେ ଚାରି ଶହ ଚାଳିଶ କୋଟି ଟଙ୍କା ମୂଲ୍ୟର ଏକ ଫ୍ଲାଏଓଭର ମଧ୍ୟ ଅନ୍ତର୍ଭୁକ୍ତ।

ବନ୍ଧୁଗଣ,

ପୂର୍ବ ତଟ ରୋଡ୍ ଏବଂ ଗ୍ରାଣ୍ଡ ଦକ୍ଷିଣ ଟ୍ରଙ୍କ ରୋଡ୍‌ରେ ଉନ୍ନତିକରଣ ମାଧ୍ୟମରେ ଚେନ୍ନାଇକୁ ସଂଯୋଗୀକରଣ ଉନ୍ନତ କରାଯାଉଛି। ଏହା ଦ୍ୱାରା ପୁଡୁଚେରୀ ଏବଂ ଚେନ୍ନାଇ ମଧ୍ୟରେ ଯାତ୍ରା ସମୟ ପ୍ରାୟ ଦେଢ଼ ଘଣ୍ଟାରୁ ଦୁଇ ଘଣ୍ଟା ହ୍ରାସ ପାଇବ। ପୁଡୁଚେରୀରୁ କୁଡାଲୋର ଜାତୀୟ ରାଜପଥ ପୂର୍ବରୁ ସମାପ୍ତ ହୋଇସାରିଛି ଏବଂ କରାଇକାଲ ଜାତୀୟ ରାଜପଥକୁ ଉନ୍ନତ କରାଯାଉଛି। ଆମେ କନ୍ୟାକୁମାରୀ ପର୍ଯ୍ୟନ୍ତ ପୂର୍ବ ତଟ କରିଡରରେ ରାସ୍ତା ପ୍ରକଳ୍ପରେ ତିରିଶ ହଜାର କୋଟି ଟଙ୍କାରୁ ଅଧିକ ନିବେଶ କରୁଛୁ। ଏହି ପ୍ରକଳ୍ପଗୁଡ଼ିକ ପୁଡୁଚେରୀର କିଛି ଅଂଶକୁ ଚେନ୍ନାଇ, ବେଙ୍ଗାଲୁରୁ ଏବଂ କୋଏମ୍ବାଟୁର ଭଳି ପ୍ରମୁଖ ଆର୍ଥିକ କେନ୍ଦ୍ର ସହିତ ସଂଯୋଗ କରେ। ଏପରି ପରିବହନ-ସଂଯୋଗ ସୁବିଧା ପର୍ଯ୍ୟଟନ, ବାଣିଜ୍ୟ ଏବଂ ଶିଳ୍ପକୁ ଉଲ୍ଲେଖନୀୟ ଭାବରେ ବୃଦ୍ଧି କରିବ।

ବନ୍ଧୁଗଣ,

ପୁଡୁଚେରିର ସବୁଠାରୁ ବଡ଼ ଶକ୍ତି ହେଉଛି ପର୍ଯ୍ୟଟନ। ସପ୍ତାହାନ୍ତ ଗନ୍ତବ୍ୟସ୍ଥଳ ଭାବରେ, ଏହା ପୂର୍ବରୁ ହଜାର ହଜାର ଲୋକଙ୍କୁ ଆକର୍ଷିତ କରିଆସୁଛି। ଟ୍ରେନ୍ ଏବଂ ବିମାନଗୁଡ଼ିକ ସର୍ବଦା ପରିପୂର୍ଣ୍ଣ ଥାଏ। ପୁଡୁଚେରୀର ଲୋକଙ୍କ ସହଭାଗିତା ପାଇଁ  ଯୋଗୁଁ ଏହା ସମ୍ଭବ ହୋଇପାରିଛି । ଆଧ୍ୟାତ୍ମିକ ପର୍ଯ୍ୟଟନ, ପରିବେଶ ପର୍ଯ୍ୟଟନ ଏବଂ ସ୍ୱାସ୍ଥ୍ୟ ପର୍ଯ୍ୟଟନରେ ନିବେଶ ସହିତ, ଆମେ ଏହାକୁ ନୂତନ ଶୀର୍ଷକୁ  ନେଇଯାଉଛୁ। ପ୍ରଶାଦ ଯୋଜନା ଅଧୀନରେ, ବିଭିନ୍ନ ମନ୍ଦିରରେ ତୀର୍ଥ ସୁବିଧାର ବିକାଶ କରାଯାଉଛି।ଶ୍ରୀ ଅରବିନ୍ଦ ଏବଂ ଦି ମା’ ଅରୋଭିଲକୁ ଏକ ବିଶ୍ୱସ୍ତରୀୟ ଚେତନାର ସହର ଭାବରେ କଳ୍ପନା କରିଥିଲେ। ମୁଁ ଜାଣି ଖୁସି ଯେ ଆଜି ଅରୋଭିଲରେ ଏକ ବିଶ୍ୱ ଆଧ୍ୟାତ୍ମିକ ମହୋତ୍ସବ ଆରମ୍ଭ ହେଉଛି। ଏପରି ସମାବେଶ ବିଭିନ୍ନ ଅଞ୍ଚଳ ଏବଂ ଧର୍ମର ଲୋକଙ୍କୁ ଏକତ୍ରିତ କରିବ।

ବନ୍ଧୁଗଣ,

ଡବଲ ଇଞ୍ଜିନ ସରକାର ଦ୍ୱାରା କରାଯାଉଥିବା ଭଲ କାମକୁ ପାଳନ କରିବା ଗୁରୁତ୍ୱପୂର୍ଣ୍ଣ। କିନ୍ତୁ ଏହା ମଧ୍ୟ ମନେ ରଖିବା ଗୁରୁତ୍ୱପୂର୍ଣ୍ଣ ଯେ ପୂର୍ବରୁ ପରିସ୍ଥିତି କିପରି ଥିଲା। କଂଗ୍ରେସ-ଡିଏମକେ ଶାସନ ସମୟରେ ପୁଡୁଚେରୀର ଲୋକମାନେ ବହୁତ କଷ୍ଟ ଭୋଗିଥିଲେ। ସେହି ବର୍ଷଗୁଡ଼ିକ ରାଜନୈତିକ ଅସ୍ଥିରତା, ଦୁର୍ନୀତି, ଅପରାଧ ଏବଂ ଗରିବଙ୍କ କଷ୍ଟ ଦ୍ୱାରା ଚିହ୍ନିତ ହୋଇଥିଲା। ରାସନ ଦୋକାନରେ ଚାଉଳ ନଥିଲା। ଦରମା ବିଳମ୍ବ ହେଉଥିଲା। ରାସ୍ତାଗୁଡ଼ିକ ଗୁଣ୍ଡା ଏବଂ ଡ୍ରଗ୍ ମାଫିଆଙ୍କ ଦ୍ୱାରା ଦଖଲ କରାଯାଇଥିଲା।

ବନ୍ଧୁଗଣ,

କଂଗ୍ରେସ ଦିଲ୍ଲୀରେ ବସିଥିବା ଏକ ପରିବାର ପାଇଁ ପୁଡୁଚେରୀକୁ ଏକ ଏଟିଏମରେ ପରିଣତ କରିଥିଲା। ଯେତେବେଳେ ଡିଏମକେ କଥା ଆସେ, ଆପଣ ତାମିଲନାଡୁରେ ମଧ୍ୟ ଠକେଇର ଏକ ଲମ୍ବା ତାଲିକା ଦେଖିପାରୁଛନ୍ତି। କଂଗ୍ରେସ ଏବଂ ଡିଏମକେ ପୁଡୁଚେରୀର ବିକାଶ ଯାତ୍ରାରେ ବାଧା ସୃଷ୍ଟି କରିଥିଲେ। ଏବେ ସେହି ଶକ୍ତିଗୁଡ଼ିକ ପୁଣି କ୍ଷମତା ପାଇଁ ଭୋକିଲା। କ’ଣ ପୁଡୁଚେରୀ ଦୁର୍ନୀତି ଏବଂ ଅପରାଧର ସେହି ଯୁଗକୁ ଫେରିଯିବ? ମୁଁ ନିଶ୍ଚିତ ଯେ ପୁଡୁଚେରୀର ଲୋକମାନେ ତାହା ଚାହାଁନ୍ତି ନାହିଁ।

ବନ୍ଧୁଗଣ,

ପୁଡୁଚେରୀ ଆମ ସ୍ୱାଧୀନତା ସଂଗ୍ରାମର ଏକ ଗୁରୁତ୍ୱପୂର୍ଣ୍ଣ ଅଂଶ ଥିଲା । ଅନେକ ନେତା ଏଠାରେ ଜନ୍ମଗ୍ରହଣ କରିଥିଲେ। ସେମାନଙ୍କ ମଧ୍ୟରୁ କିଛି ଏଠାକୁ ଆସି ଏହାକୁ ନିଜର କର୍ମଭୂମି କରିଥିଲେ। ହି ଭୂମି ୧୯୪୭ ରେ ଭାରତର ସ୍ୱାଧୀନତାରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥିଲା। ଏବେ, ୨୦୪୭ ସୁଦ୍ଧା, ଆମକୁ ଏକ ବିକଶିତ ପୁଡୁଚେରୀ ଏବଂ ଏକ ବିକଶିତ ଭାରତ ସୃଷ୍ଟି କରିବାକୁ ପଡିବ। ଏହି ମିଶନରେ ପୁଡୁଚେରୀର ଡବଲ ଇଞ୍ଜିନ ସରକାର ଆପଣଙ୍କ ସହିତ ଅଛି। ଆମେ ସର୍ବୋତ୍ତମ ପୁଡୁଚେରୀ ପାଇଁ କାର୍ଯ୍ୟ  କରିବୁ।

ନାଣ୍ଡ୍ରି!

****

SPD