ପିଏମଇଣ୍ଡିଆ

ଏଣିକି ଆନ୍ତର୍ଜାତିକ ପ୍ରତିଦ୍ୱନ୍ଦ୍ୱିତାମୂଳକ ନିଲାମୀ (ଆଇସିବି) ପରେ ହାଇଡ୍ରୋକାର୍ବନ ଅନ୍ୱେଷଣ ଏବଂ ଲାଇସେନ୍ସିଂ ନୀତି (ଏଚଇଏଲପି) ଅନ୍ତର୍ଗତ ସଫଳ ନିଲାମୀକାରୀମାନଙ୍କୁ ବ୍ଲକ/ଠିକା କ୍ଷେତ୍ରର ଅନୁମତି ପ୍ରଦାନ କରିବାର ଅଧିକାର ପେଟ୍ରୋଲିୟମ ଏବଂ ପ୍ରାକୃତିକ ବାଷ୍ପ ମନ୍ତ୍ରୀ ଏବଂ ଅର୍ଥମନ୍ତ୍ରୀଙ୍କ ନିକଟରେ ରହିବ । କ୍ଷମତାସମ୍ପନ୍ନ ସଚିବମାନଙ୍କ ସମିତିର ସୁପାରିସ ଆଧାରରେ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ଅଧ୍ୟକ୍ଷତାରେ ଅନୁଷ୍ଠିତ କେନ୍ଦ୍ର କ୍ୟାବିନେଟ ଏ ସଂକ୍ରାନ୍ତ ପ୍ରସ୍ତାବକୁ ଅନୁମୋଦନ କରିଛନ୍ତି । ସରକାରଙ୍କ ବ୍ୟବସାୟିକ ସୁଗମତା (ଇଜ୍ ଅଫ୍ ଡୁଇଂ ବିଜନେସ) ନୀତି କ୍ରମରେ ଏହି ନିଷ୍ପତ୍ତି ନିଆଯାଇଛି । ଏଚଇଏଲପି ଅନ୍ତର୍ଗତ ବ୍ଲକ ଗୋଟିଏ ବର୍ଷରେ ଦୁଇ ଥର ଦିଆଯିବ । ତେଣୁ ଅଧିକାର ପ୍ରଦାନ କରିବା ଦ୍ୱାରା ବ୍ଲକ ଦେବା ବିଷୟରେ ନିଷ୍ପତ୍ତି ନେବାର ପ୍ରକ୍ରିୟା ଦ୍ରୁତ ହୋଇପାରିବ । ବ୍ୟବସାୟିକ ସୁଗମତା ପ୍ରୟାସକୁ ମଧ୍ୟ ପ୍ରୋତ୍ସାହନ ମିଳିବ ।

ପ୍ରଭାବ :

ଏଚଇଏଲପି ନୀତି ଅନ୍ତର୍ଗତ ସଚିବମାନଙ୍କ କ୍ଷମତାସମ୍ପନ୍ନ କମିଟି ନିଲାମୀ ମୂଲ୍ୟାଙ୍କନ ମାନଦଣ୍ଡ (ବିଇସି) ଉପରେ ବିଚାର କରିଥାଏ, ଯେଉଁଠି ଆବଶ୍ୟକ ହୋଇଥାଏ ନିଲାମୀକର୍ତ୍ତାଙ୍କ ସହିତ ବୁଝାମଣା ଆଲୋଚନା କରିଥାଏ ଏବଂ ବ୍ଲକ ଦେବା ବିଷୟରେ ସିସିଇଏକୁ ସୁପାରିସ କରିଥାଏ । ସିସିଇଏ ବ୍ଲକ ଦେବା ଲାଗି ମଞ୍ଜୁରି ଦେଇଥା’ନ୍ତି । ମନ୍ତ୍ରଣାଳୟରେ ବିଚାର-ଆଲୋଚନା ସହିତ ସମଗ୍ର ପ୍ରକ୍ରିୟା ଯଥେଷ୍ଟ ବିଳମ୍ବିତ ଅଟେ ଏବଂ ଏଥିରେ ବେଶ ସମୟ ଲାଗିଥାଏ । ସରକାରଙ୍କ ‘ବ୍ୟବସାୟିକ ସୁଗମତା’ ପ୍ରୟାସ ସହିତ ସମନ୍ୱୟ ଆଣିବା ଲାଗି ଏହା ଜରୁରୀ ଥିଲା ଯେ ବ୍ଲକ/ଠିକା କ୍ଷେତ୍ର ଦେବା ସମୟର ଅବଧି ହ୍ରାସ କରାଯାଉ । ନୂଆ ହାଇଡ୍ରୋକାର୍ବନ ଅନ୍ୱେଷଣ ଏବଂ ଲାଇସେନ୍ସିଂ ନୀତି ଅନ୍ତର୍ଗତ ପ୍ରତିଦ୍ୱନ୍ଦ୍ୱିତାମୂଳକ ନିଲାମୀ ଜାରି ରହିବ ଏବଂ ପ୍ରତ୍ୟେକ ବର୍ଷରେ ଦୁଇ ଥର ବ୍ଲକ ଦିଆଯିବ ।

**********