ପିଏମଇଣ୍ଡିଆ

ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଆଜି ନୂଆଦିଲ୍ଲୀଠାରେ 27ତମ ପ୍ରଗତି ବୈଠକରେ ଅଧ୍ୟକ୍ଷତା କରିଛନ୍ତି । ଏହି ଅବସରରେ ପ୍ରଧାନମନ୍ତ୍ରୀ ଆଇସିଟିଭିତ୍ତିକ ମଲ୍ଟି ମଡ଼େଲ ପ୍ଲାଟଫର୍ମ ଜରିଆରେ ବିଭିନ୍ନ ପ୍ରକଳ୍ପର ଅଗ୍ରଗତି ସଂପର୍କରେ ସମୀକ୍ଷା କରିଛନ୍ତି ।

ଏଥିପୂର୍ବରୁ 26ଟି ପ୍ରଗତି ବୈଠକ ଅନୁଷ୍ଠିତ ହୋଇସାରିଛି ଏବଂ ସେଥିରେ ବିଭିନ୍ନ କାର୍ଯ୍ୟକ୍ରମର ପ୍ରବର୍ତ୍ତନ ଓ ପ୍ରଗତି ସଂପର୍କରେ ପୁନଃପୌନିକ ସମୀକ୍ଷା କରାଯାଇଛି । ଏହିସବୁ କାର୍ଯ୍ୟକ୍ରମରେ ମୋଟ 11 ଲକ୍ଷ କୋଟି ଟଙ୍କା ବିନିଯୋଗ କରାଯାଇଛି । ବିଭିନ୍ନ ସେକ୍ଟରରେ ଅନେକଗୁଡ଼ିଏ ଜନ ଅଭିଯୋଗ ସଂପର୍କରେ ଏହିସବୁ ସମୀକ୍ଷା ବୈଠକରେ ବିଭିନ୍ନ ପ୍ରସ୍ତାବ ଗୃହୀତ ହୋଇଛି ।

ଆଜିର ପ୍ରଗତି ବୈଠକ ଥିଲା ଏହି କ୍ରମରେ 27ତମ ସମୀକ୍ଷା କାର୍ଯ୍ୟକ୍ରମ । ଏହି ବୈଠକରେ ଅଧ୍ୟକ୍ଷତା କରି ପ୍ରଧାନମନ୍ତ୍ରୀ ଆଠଟି ଭିତ୍ତିଭୂମି ପ୍ରକଳ୍ପ ଯଥା ରେଳବାଇ, ସଡ଼କ ଏବଂ ଶକ୍ତି ସେକ୍ଟର ଆଦିର ସମୀକ୍ଷା କରାଯାଇଥିଲା । ଏହିସବୁ ପ୍ରକଳ୍ପଗୁଡ଼ିକ ବିଭିନ୍ନ ରାଜ୍ୟ ଯଥା ଓଡ଼ିଶା, ବିହାର, ଝାଡ଼ଖଣ୍ଡ, ଛତିଶଗଡ଼, ମଧ୍ୟ ପ୍ରଦେଶ, ହିମାଚଳ ପ୍ରଦେଶ, ଉତ୍ତର ପ୍ରଦେଶ, ଉତ୍ତରାଖଣ୍ଡ, ମହାରାଷ୍ଟ୍ର, ଚଣ୍ଡୀଗଡ଼, ଆନ୍ଧ୍ର ପ୍ରଦେଶ, ଦିଲ୍ଲୀ, ଗୁଜରାଟ, ରାଜସ୍ଥାନ, ପଶ୍ଚିମବଙ୍ଗ, ସିକିମ ଏବଂ ଅରୁଣାଚଳ ପ୍ରଦେଶରେ କାର୍ଯ୍ୟକାରୀ କରାଯାଉଛି ।

ପ୍ରଧାନମନ୍ତ୍ରୀ ପ୍ରକଳ୍ପଗୁଡ଼ିକର କାର୍ଯ୍ୟକାରୀତା ତଥା ପ୍ରଗତି ସଂପର୍କରେ ସମୀଡ଼ା କରିବା ସହ ନୂତନ ମେଡ଼ିକାଲ କଲେଜ ପ୍ରତିଷ୍ଠା ଉପରେ ଗୁରୁତ୍ୱ ଆରୋପ କରିଥିଲେ । ଜିଲ୍ଲା/ ରେଫେରାଲ ହସପିଟାଲଗୁଡ଼ିକୁ ସେହିସବୁ ମେଡ଼ିକାଲ କଲେଜ ସହ ଅନୁବନ୍ଧିତ କରିବା ପାଇଁ ସେ ପରାମର୍ଶ ଦେଇଥିଲେ । ସ୍ୱାସ୍ଥ୍ୟ ସେକ୍ଟରରେ କେନ୍ଦ୍ର ସରକାର ବିଭିନ୍ନ ପ୍ରକାର ନୂତନ ପଦକ୍ଷେପମାନ ଗ୍ରହଣ କରୁଛନ୍ତି ବୋଲି ସୂମଚନା ଦେଇ ପ୍ରଧାନମନ୍ତ୍ରୀ କହିଲେ ଯେ ସ୍ୱାସ୍ଥ୍ୟ ଭିତିଭୂମିକୁ ସୁଦୃଢ଼ କରିବା ଦିଗରେ ତ୍ୱରିତ ପଦକ୍ଷେପ ଗ୍ରହଣ କରାଯିବା ଆବଶ୍ୟକ ।

ପ୍ରଧାନମନ୍ତ୍ରୀ କହିଲେ ଯେ ଗ୍ରାମ ସ୍ୱରାଜ ଅଭିଯାନର ପ୍ରଥମ ପର୍ଯ୍ୟାୟ 2018 ମସିହା ଏପ୍ରିଲ 14 ତାରିଖଠାରୁ ମେ 5 ତାରିଖ ପର୍ଯ୍ୟନ୍ତ କାର୍ଯ୍ୟକାରୀ ହୋଇଥିଲା । ଏହି କାର୍ଯ୍ୟକ୍ରମ ପ୍ରବର୍ତ୍ତନରେ ସରକାରଙ୍କୁ ବିଶେଷ ସଫଳତା ମିଳିଛି ଏବଂ ଦେଶର 16,000 ଗ୍ରାମରେ କେନ୍ଦ୍ର ସରକାରଙ୍କ ସାତଟି ଗୁରୁତ୍ୱପୂର୍ଣ୍ଣ ଯୋଜନା ଏହା ମାଧ୍ୟମରେ କାର୍ଯ୍ୟକାରୀ କରାଯାଉଛି । ଏବେ ଗ୍ରାମ ସ୍ୱରାଜ ଅଭିଯାନର ଦ୍ୱିତୀୟ ପର୍ଯ୍ୟାୟ କାର୍ଯ୍ୟକାରୀ ହେଉଛି ଏବଂ ସେଥିରେ ଅଭିଳାଷୀ ଜିଲାର 40 ହଜାର ଗ୍ରାମରେ ସେହିସବୁ ଯୋଜନା ଲାଗୁ କରାଯାଉଛି । ତେଣୁ ସେହିସବୁ ଯୋଜନାରୁ ଯେଭଳି ଜନସାଧାରଣ ସର୍ବାଧିକ ସୁଫଳ ପାଇପାରିବେ ସେଥିଲାଗି ଉଭୟ ରାଜ୍ୟ ସରକାର ଏବଂ କେନ୍ଦ୍ର ସରକାରଙ୍କ ଅଧିକାରୀମାନଙ୍କୁ ପ୍ରଧାନମନ୍ତ୍ରୀ ଆହ୍ୱାନ ଜଣାଇଛନ୍ତି । ଆସନ୍ତା ଅଗଷ୍ଟ 15 ତାରିଖ ସୁଦ୍ଧା ସେହିସବୁ କାର୍ଯ୍ୟକ୍ରମର ସୁଫଳ ଲୋକମାନଙ୍କ ନିକଟରେ ପହଂଚିବା ଆବଶ୍ୟକ ବୋଲି ପ୍ରଧାନମନ୍ତ୍ରୀ ମତ ପୋଷଣ କରିଥିଲେ ।

ସୌଭାଗ୍ୟ ଯୋଜନାରେ ଏଯାବତ୍ ହାସଲ କରାଯାଇଥିବା ସଫଳତାକୁ ପ୍ରଧାନମନ୍ତ୍ରୀ ଭୂୟସୀ ପ୍ରଶଂସା କରିଥିଲେ । ପ୍ରଧାନମନ୍ତ୍ରୀ କହିଛନ୍ତି ଯେ ନିର୍ଦ୍ଧାରିତ ସମୟସୂଚୀ ଅନୁସାରେ ଦେଶର 4 କୋଟି ପରିବାରଙ୍କ ନିକଟରେ ବିଜୁଳିଶକ୍ତି ଉପଲବ୍ଧ କରାଇବା ଲାଗି ମହତ୍ୱାକାଂକ୍ଷୀ ଲକ୍ଷ୍ୟ ହାସଲ ଦିଗରେ ସମସ୍ତ ପ୍ରକାର ପ୍ରୟାସ କରାଯିବା ଆବଶ୍ୟକ ।

**********