ପିଏମଇଣ୍ଡିଆ

ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ଅଧ୍ୟକ୍ଷତାରେ ୨୦୧୬ ଜୁନ୍ ୨ ତାରିଖ ଦିନ ଜାତୀୟ ଦକ୍ଷତା ବିକାଶ ମିଶନର ପ୍ରଥମ ପରିଚାଳନା ପରିଷଦ ବୈଠକ ଅନୁଷ୍ଠିତ ହୋଇଯାଇଛି ।

ବୈଠକରେ ଅଧ୍ୟକ୍ଷତା କରି ପ୍ରଧାନମନ୍ତ୍ରୀ ଉପଯୁକ୍ତ ଦକ୍ଷତା ମ୍ୟାପିଂ ଏବଂ ଭବିଷ୍ୟତ କୌଶଳ ବିକାଶ ଆବଶ୍ୟକତା ଉପରେ ଗୁରୁତ୍ୱାରୋପ କରିଛନ୍ତି । ଯାହାଫଳରେ ସ୍କୁଲ ଛାତ୍ରଛାତ୍ରୀ ଏବଂ ସେମାନଙ୍କ ଅଭିଭାବକମାନେ କର୍ମସଂସ୍ଥାନ ଉପରେ ଧାରଣା ପାଇପାରିବେ । ସେ ମଧ୍ୟ କହିଛନ୍ତି ଯେ, ବିଶ୍ୱସ୍ତରରେ ଆବଶ୍ୟକ ହେଉଥିବା ଦକ୍ଷ ଶ୍ରମ ବଳର ତୁଳନାତ୍ମକ ଚିତ୍ର ପ୍ରସ୍ତୁତି ପାଇଁ ଏଭଳି କାର୍ଯ୍ୟକ୍ରମ ଅନୁଷ୍ଠିତ ହେବା ଉଚିତ । ଯାହାଫଳରେ ବିଶ୍ୱସ୍ତରରେ ଯେଉଁ କାର୍ଯ୍ୟଦକ୍ଷତାର ଆବଶ୍ୟକତା ରହିଛି ତାହା ଭାରତ ପୂରଣ କରିପାରିବ ।

ପ୍ରଧାନମନ୍ତ୍ରୀ ମଧ୍ୟ ଦକ୍ଷତା ବିକାଶର ସୁରକ୍ଷା ମାନ ଉପରେ ଗୁରୁତ୍ୱାରୋପ କରିଛନ୍ତି । ଏହି ବୈଠକରେ ମହାରାଷ୍ଟ୍ର, ଅରୁଣାଚଳ ପ୍ରଦେଶ ଏବଂ ଜାମ୍ମୁ-କାଶ୍ମୀରର ମୁଖ୍ୟମନ୍ତ୍ରୀମାନେ ଉପସ୍ଥିତ ଥିଲେ । କେନ୍ଦ୍ର କୌଶଳ ବିକାଶ ଏବଂ ଉଦଯୋଗ ରାଷ୍ଟ୍ରମନ୍ତ୍ରୀ (ସ୍ୱାଧୀନ ଦାୟିତ୍ୱ) ଶ୍ରୀ ରାଜୀବ ପ୍ରତାପ ରୁଡି, ମାନବସମ୍ବଳ ବିକାଶ ମନ୍ତ୍ରୀ ଶ୍ରୀମତୀ ସ୍ମୃତି ଜୁବିନ ଇରାନୀ, ସୂକ୍ଷ୍ମ, କ୍ଷୁଦ୍ର ଏବଂ ମଧ୍ୟମ ଉଦ୍ୟୋଗ ମନ୍ତ୍ରୀ ଶ୍ରୀ କଲରାଜ ମିଶ୍ର ଏବଂ ଯୋଗାଯୋଗ ଓ ପ୍ରଯୁକ୍ତି ବିଦ୍ୟା ମନ୍ତ୍ରୀ ଶ୍ରୀ ରବି ଶଙ୍କର ପ୍ରସାଦ ପ୍ରମୁଖ ଏହି ବୈଠକରେ ଉପସ୍ଥିତ ଥିଲେ । ବରିଷ୍ଠ ପ୍ରଶାସକମାନଙ୍କ ସହିତ ଶିଳ୍ପୋଦ୍ୟୋଗୀ ଯଥା ଟାଟା ଗ୍ରୁପ୍ ଅଧ୍ୟକ୍ଷ ଶ୍ରୀ ସାଇରସ୍ ପି. ମିସ୍ତ୍ରୀ, ଫ୍ଲିପକାର୍ଟ ପ୍ରତିଷ୍ଠାତା ଓ ସିଇଓ ଶ୍ରୀ ସଚିନ ବଂଶଲ ଏବଂ ଟିମ୍ ଲିଜ୍ ସର୍ଭିସେସର ଅଧ୍ୟକ୍ଷ ତଥା ପ୍ରତିଷ୍ଠାତା ଶ୍ରୀ ମନିଶ ସବରୱାଲ ପ୍ରମୁଖ ଏହି ପରିଚାଳନା ପରିଷଦ ବୈଠକରେ ଉପସ୍ଥିତ ଥିଲେ ।

ଏହି ବୈଠକରେ ନିଆଯାଇଥିବା କିଛି ପ୍ରମୁଖ ନିଷ୍ପତ୍ତି ନିମ୍ନରେ ଦର୍ଶାଗଲା :

• ୨୦୧୬-୧୭ରେ ୧.୫ କୋଟି ଲୋକଙ୍କୁ ଦକ୍ଷତା ପ୍ରଶିକ୍ଷଣ ଦିଆଯିବ

• ୨୦୧୬ ସେପ୍ଟେମ୍ବର ସୁଦ୍ଧା ସେଣ୍ଟ୍ରାଲ ବୋର୍ଡ ଫର ସ୍କିଲ ସାର୍ଟିଫିକେସନ ପ୍ରତିଷ୍ଠା କରାଯିବ । ଭାରତର ଦକ୍ଷତା ବିକାଶ ଇକୋସିଷ୍ଟମର ମାନ ପୂରଣ ପାଇଁ ଏହା ଗଠନ କରାଯିବ ।

• ଇଞ୍ଜିନିୟରିଂ କଲେଜ ଗୁଡ଼ିକରେ ଅବ୍ୟବହୃତ ଭିତ୍ତିଭୂମିକୁ ବିନିଯୋଗ କରାଯାଇ ଦକ୍ଷତା ତାଲିମ ପ୍ରଦାନ କରାଯିବ ।

• ଲାଭଜନକ ରାଷ୍ଟ୍ରାୟତ୍ତ ସଂସ୍ଥାମାନେ ସେମାନଙ୍କ ସାମଗ୍ରୀକ ଶ୍ରମ ଶକ୍ତିର ୧୦ ପ୍ରତିଶତ ଶିକ୍ଷାନବୀସଙ୍କୁ ନିଯୁକ୍ତି ଦେବା ସକାଶେ କ୍ଷମତାପ୍ରାପ୍ତ ହେବେ । ଘରୋଇ ଉଦ୍ୟୋଗଗୁଡିକୁ ମଧ୍ୟ ଅନୁରୁପ ପଦକ୍ଷେପ ନେବାର ଆଶା କରାଯାଉଛି ।

• ଦେଶର ଶିକ୍ଷିତ ଏବଂ ବେରୋଜଗାର ଯୁବ ଗୋଷ୍ଠୀଙ୍କୁ ମାଗଣାରେ ଦକ୍ଷତା ବିକାଶ ପ୍ରଶିକ୍ଷଣ ଦେବାପାଇଁ ଚଳିତବର୍ଷ ୫୦୦ ପ୍ରଧାନମନ୍ତ୍ରୀ କୌଶଳ କେନ୍ଦ୍ର ଖୋଲାଯିବ ।

• ପ୍ରତ୍ୟେକ ବର୍ଷ ମଜୁରି ଖଟିବାକୁ ଯାଉଥିବା ଅଞ୍ଚଳର ଲୋକଙ୍କ ପାଇଁ ପ୍ରମୁଖ ସ୍ଥାନରେ ୫୦ଟି ରୋଜଗାର ଦକ୍ଷତା ତାଲିମ କେନ୍ଦ୍ର ଖୋଲାଯିବ ।

• ଶିଳ୍ପ ତାଲିମ କେନ୍ଦ୍ର (ଆଇଟିଆଇ), କେନ୍ଦ୍ର ପ୍ରଶିକ୍ଷଣ ସଂସ୍ଥାନ, ପ୍ରଧାନମନ୍ତ୍ରୀ କୌଶଳ ବିକାଶ ଯୋଜନା (ପିଏମକେଭିୱାଇ) ପ୍ରଶିକ୍ଷଣ କେନ୍ଦ୍ର, ଟୁଲରୁମ୍ ଆଦିରେ ୫୦୦ ରୋଜଗାର ଉତ୍ସବ ଅନୁଷ୍ଠିତ ହେବ । ଆଗ୍ରହୀ ଯୁବକମାନଙ୍କୁ ଦକ୍ଷତା ପ୍ରଶିକ୍ଷଣ ଦେବାପାଇଁ ଏହି ଉତ୍ସବ ଅନୁଷ୍ଠିତ ହେବ ।

• ଏକ ଜାତୀୟ ଦକ୍ଷତା ପ୍ରତିଯୋଗିତା “ଇଣ୍ଡିଆ ସ୍କିଲ୍ସ’’ ୨୦୧୬-୧୭ରେ ଉନ୍ମୋଚିତ ହେବ । ଭାରତର ଯୁବକମାନଙ୍କ ଦକ୍ଷତା ଚିହ୍ନଟ ପାଇଁ ପ୍ରତିବର୍ଷ ଏହି ଉତ୍ସବ ଅନୁଷ୍ଠିତ ହେବ ।

• ଆଇଟିଆଇ ପାଠ୍ୟକ୍ରମ ସଫଳତାର ସହ ଶେଷ କରିଥିବା ପ୍ରାର୍ଥୀଙ୍କ ପାଇଁ ଚଳିତବର୍ଷ ଏକ ଜାତୀୟସ୍ତରୀୟ ସମ୍ମିଳନୀ ଅନୁଷ୍ଠିତ ହେବ । ସେମାନଙ୍କ ଦକ୍ଷତା ଚିହ୍ନଟ ପାଇଁ ଏଭଳି କରାଯିବ ।

• ଆସନ୍ତାବର୍ଷ ଆଇଟିଆଇ ଗୁଡ଼ିକର କ୍ଷମତା ୧୮.୫ ଲକ୍ଷରୁ ୨୫ ଲକ୍ଷକୁ ବୃଦ୍ଧି କରାଯିବ ଏବଂ ୫ ହଜାର ପାଖାପାଖି ନୂଆ ଆଇଟିଆଇ ପ୍ରତିଷ୍ଠା କରାଯିବ ।

ପୃଷ୍ଠଭୂମି

୬୫% ଭାରତୀୟଙ୍କ ବୟସ ୩୫ ବର୍ଷରୁ କମ । ଏନଡିଏ ସରକାର କ୍ଷମତାକୁ ଆସିବା ପରେ ୨୦୧୪ ନଭେମ୍ବରରେ ପ୍ରଥମ କରି କେନ୍ଦ୍ର କୌଶଳ ବିକାଶ ଓ ଉଦଯୋଗ ମନ୍ତ୍ରଣାଳୟ ପ୍ରତିଷ୍ଠା କରାଯାଇଛି । ଏହାଛଡା କେନ୍ଦ୍ର ସରକାରଙ୍କ ୨୧ଟି ମନ୍ତ୍ରଣାଳୟ ଏବଂ ବିଭାଗ ୫୦ରୁ ଅଧିକ ଦକ୍ଷତା ପ୍ରଶିକ୍ଷଣ କାର୍ଯ୍ୟକ୍ରମ କାର୍ଯ୍ୟକାରୀ କରୁଛନ୍ତି ।