ପିଏମଇଣ୍ଡିଆ

ଜୋର୍ଡାନ ହାସେମାଇଟ୍ ରାଜ୍ୟର ମହାମହିମ ରାଜା ଅବଦୁଲ୍ଲା ଦ୍ୱିତୀୟ ଇବନ୍ ଅଲ୍ ହୁସେନଙ୍କ ନିମନ୍ତ୍ରଣ କ୍ରମେ, ଭାରତୀୟ ଗଣରାଜ୍ୟର ମାନ୍ୟବର ପ୍ରଧାନମନ୍ତ୍ରୀ, ଶ୍ରୀ ନରେନ୍ଦ୍ର ମୋଦୀ ଡିସେମ୍ବର ୧୫-୧୬, ୨୦୨୫ରେ ଜୋର୍ଡାନ ହାସେମାଇଟ୍ ରାଜ୍ୟ ଗସ୍ତ କରିଥିଲେ।
ନେତାମାନେ ସ୍ୱୀକାର କରିଥିଲେ ଯେ ପ୍ରଧାନମନ୍ତ୍ରୀ ମୋଦୀଙ୍କ ଗସ୍ତ ଏକ ଗୁରୁତ୍ୱପୂର୍ଣ୍ଣ ସମୟରେ ହେଉଛି, ଯେତେବେଳେ ଦୁଇ ଦେଶ ଦ୍ୱିପାକ୍ଷିକ କୂଟନୈତିକ ସମ୍ପର୍କ ସ୍ଥାପନର ୭୫ତମ ବାର୍ଷିକୀ ପାଳନ କରୁଛନ୍ତି।
ନେତାମାନେ ଦୁଇ ଦେଶ ମଧ୍ୟରେ ରହିଥିବା ଦୀର୍ଘକାଳୀନ ସମ୍ପର୍କକୁ ପ୍ରଶଂସା କରିଥିଲେ ଯାହା ପାରସ୍ପରିକ ବିଶ୍ୱାସ, ଉଷ୍ମତା ଏବଂ ସଦ୍ଭାବନାରେ ପରିପୂର୍ଣ୍ଣ । ସେମାନେ ରାଜନୈତିକ, ଅର୍ଥନୈତିକ, ପ୍ରତିରକ୍ଷା, ସୁରକ୍ଷା, ସଂସ୍କୃତି ଏବଂ ଶିକ୍ଷା ସମେତ ବିଭିନ୍ନ ସହଯୋଗ କ୍ଷେତ୍ରରେ ବ୍ୟାପିଥିବା ବହୁମୁଖୀ ଭାରତ-ଜୋର୍ଡାନ ସମ୍ପର୍କକୁ ସକାରାତ୍ମକ ଭାବରେ ମୂଲ୍ୟାଙ୍କନ କରିଥିଲେ।
ନେତାମାନେ ଦ୍ୱିପାକ୍ଷିକ ସ୍ତରରେ ଏବଂ ବହୁପକ୍ଷୀୟ ମଞ୍ଚରେ ଉଭୟ ପକ୍ଷ ମଧ୍ୟରେ ଉତ୍କୃଷ୍ଟ ସହଯୋଗକୁ ପ୍ରଶଂସା କରିଥିଲେ। ସେମାନେ ନ୍ୟୁୟର୍କ (ସେପ୍ଟେମ୍ବର ୨୦୧୯  ), ରିୟାଦ (ଅକ୍ଟୋବର ୨୦୧୯ ), ଦୁବାଇ (ଡିସେମ୍ବର୨୦୨୩ ) ଏବଂ ଇଟାଲୀ (ଜୁନ୍ ୨୦୨୪) ରେ ସେମାନଙ୍କର ପୂର୍ବ ବୈଠକକୁ ସ୍ମରଣ କରିଥିଲେ।
ରାଜନୈତିକ ସମ୍ପର୍କ
ନେତାମାନେ ୧୫ ଡିସେମ୍ବର ୨୦୨୫ରେ ଅମ୍ମାନରେ ଦ୍ୱିପାକ୍ଷିକ ଏବଂ ବିସ୍ତାରିତ ଆଲୋଚନା କରିଥିଲେ, ଯେଉଁଠାରେ ସେମାନେ ଭାରତ ଏବଂ ଜୋର୍ଡାନ ମଧ୍ୟରେ ସମ୍ପର୍କ ଉପରେ ଆଲୋଚନା କରିଥିଲେ। ସେମାନେ ପାରସ୍ପରିକ ସ୍ୱାର୍ଥ କ୍ଷେତ୍ରରେ ଦୁଇ ଦେଶ ମଧ୍ୟରେ ସହଯୋଗ ବୃଦ୍ଧି କରିବାକୁ ଏବଂ ସେମାନଙ୍କ ବିକାଶ ଆକାଂକ୍ଷାକୁ ହାସଲ କରିବାରେ ବିଶ୍ୱସ୍ତ ଅଂଶୀଦାର ଭାବରେ ଏକାଠି ଠିଆ ହେବାକୁ ମଧ୍ୟ ସହମତ ହୋଇଥିଲେ।
ନେତାମାନେ ଦୁଇ ଦେଶ ମଧ୍ୟରେ ନିୟମିତ ରାଜନୈତିକ ଆଲୋଚନା ଏବଂ ବିଭିନ୍ନ କ୍ଷେତ୍ରରେ ବିଭିନ୍ନ ମିଳିତ କାର୍ଯ୍ୟକାରୀ ଗୋଷ୍ଠୀର ବୈଠକକୁ ସନ୍ତୋଷର ସହିତ ଉଲ୍ଲେଖ କରିଥିଲେ। ଦ୍ୱିପାକ୍ଷିକ ସମ୍ପର୍କକୁ ସୁଦୃଢ଼ କରିବା ପାଇଁ ସେମାନେ ପ୍ରତିଷ୍ଠିତ ତନ୍ତ୍ରଗୁଡ଼ିକୁ ପୂର୍ଣ୍ଣ ବ୍ୟବହାର କରିବାକୁ ମଧ୍ୟ ସହମତ ହୋଇଥିଲେ। ଏହି ପରିପ୍ରେକ୍ଷୀରେ, ନେତାମାନେ ୨୯ ଏପ୍ରିଲ୍ ୨୦୨୫ରେ ଆମ୍ମାନରେ ଅନୁଷ୍ଠିତ ଦୁଇ ବୈଦେଶିକ ମନ୍ତ୍ରଣାଳୟ ମଧ୍ୟରେ ଚତୁର୍ଥ ପର୍ଯ୍ୟାୟ ରାଜନୈତିକ ପରାମର୍ଶର ଫଳାଫଳକୁ ପ୍ରଶଂସା କରିଥିଲେ। ପଞ୍ଚମ ପର୍ଯ୍ୟାୟ ନୂଆଦିଲ୍ଲୀରେ ଅନୁଷ୍ଠିତ ହେବ।
ଆଗକୁ ଦିନକୁ ଦୃଷ୍ଟିରେ ରଖି , ନେତାମାନେ ଦୁଇ ଦେଶ ମଧ୍ୟରେ ସମ୍ପର୍କର ସକାରାତ୍ମକ ଗତିପଥକୁ ବଜାୟ ରଖିବା, ଉଚ୍ଚସ୍ତରୀୟ ପାରସ୍ପରିକ କ୍ରିୟାକୁ ପ୍ରୋତ୍ସାହିତ କରିବା ଏବଂ ପରସ୍ପର ସହିତ ସହଯୋଗ ଏବଂ ସମ୍ପର୍କ ଜାରି ରଖିବା ପାଇଁ ସେମାନଙ୍କର ସଂକଳ୍ପକୁ ପୁନଃସ୍ଥାପିତ କରିଥିଲେ।
ଆର୍ଥିକ ସହଯୋଗ
ନେତାମାନେ ଭାରତ ଏବଂ ଜୋର୍ଡାନ ମଧ୍ୟରେ ଦୃଢ଼ ଦ୍ୱିପାକ୍ଷିକ ବାଣିଜ୍ୟ ସମ୍ପର୍କକୁ ପ୍ରଶଂସା କରିଛନ୍ତି, ଯାହା ବର୍ତ୍ତମାନ ୨୦୨୪  ପାଇଁ ୨.୩ ବିଲିୟନ ଆମେରିକୀୟ ଡଲାର ମୂଲ୍ୟର, ଯାହା ଭାରତକୁ ଜୋର୍ଡାନ ପାଇଁ ତୃତୀୟ ସର୍ବବୃହତ ବାଣିଜ୍ୟିକ ଅଂଶୀଦାର ଭାବେ ବିବେଚିତ କରିଥାଏ। ଦ୍ୱିପାକ୍ଷିକ ବାଣିଜ୍ୟକୁ ଆହୁରି ବୃଦ୍ଧି କରିବା ପାଇଁ ବାଣିଜ୍ୟ ବାସ୍କେଟକୁ ବିବିଧ କରିବାର ଆବଶ୍ୟକତା ଉପରେ ସେମାନେ ସହମତ ହୋଇଥିଲେ। ଅର୍ଥନୈତିକ ଏବଂ ବାଣିଜ୍ୟିକ ସମ୍ପର୍କରେ ପ୍ରଗତି ନିରୀକ୍ଷଣ କରିବା ପାଇଁ ୨୦୨୬ର ପ୍ରଥମାର୍ଦ୍ଧରେ ୧୧ ତମ ବାଣିଜ୍ୟ ଏବଂ ଅର୍ଥନୈତିକ ମିଳିତ କମିଟିର ଶୀଘ୍ର ଆୟୋଜନ ଉପରେ ମଧ୍ୟ ନେତାମାନେ ସହମତ ହୋଇଥିଲେ।
୧୬ ଡିସେମ୍ବର ୨୦୨୫ରେ ଜୋର୍ଡାନ-ଭାରତ ବ୍ୟବସାୟ ଫୋରମର ଆୟୋଜନକୁ ନେତାମାନେ ସ୍ୱାଗତ କରିଥିଲେ। ଦୁଇ ଦେଶର ଏକ ଉଚ୍ଚସ୍ତରୀୟ ବ୍ୟବସାୟିକ ପ୍ରତିନିଧି ଦଳ ଦୁଇ ଦେଶ ମଧ୍ୟରେ ବାଣିଜ୍ୟ ଏବଂ ଅର୍ଥନୈତିକ ସହଯୋଗକୁ ଆହୁରି ମଜବୁତ ଏବଂ ବିସ୍ତାର କରିବା ପାଇଁ ଆଲୋଚନା କରିଥିଲେ।
ନେତାମାନେ କଷ୍ଟମ କ୍ଷେତ୍ରରେ ସହଯୋଗର ଗୁରୁତ୍ୱକୁ ସ୍ୱୀକାର କରିଥିଲେ। କଷ୍ଟମ ମାମଲାରେ ସହଯୋଗ ଏବଂ ପାରସ୍ପରିକ ପ୍ରଶାସନିକ ସହାୟତା ଚୁକ୍ତିନାମାକୁ ପୂର୍ଣ୍ଣ ଉପଯୋଗ କରିବାକୁ ସେମାନେ ଆହୁରି ମଧ୍ୟ ସହମତ ହୋଇଥିଲେ। ଏହି ଚୁକ୍ତିନାମା କଷ୍ଟମ ଆଇନର ସଠିକ୍ ପ୍ରୟୋଗ ଏବଂ କଷ୍ଟମ ଅପରାଧର ମୁକାବିଲା ସୁନିଶ୍ଚିତ କରିବା ପାଇଁ ସୂଚନା ଆଦାନପ୍ରଦାନକୁ ସହଜ କରିଥାଏ। ଏହା ଦୁଇ ଦେଶ ମଧ୍ୟରେ ବାଣିଜ୍ୟ ହେଉଥିବା ସାମଗ୍ରୀର ଦକ୍ଷ କ୍ଲିୟରାନ୍ସ ପାଇଁ ସରଳୀକୃତ କଷ୍ଟମ୍ ପ୍ରକ୍ରିୟା ଗ୍ରହଣ କରି ବାଣିଜ୍ୟର ସୁବିଧା ମଧ୍ୟ ପ୍ରଦାନ କରେ।
ଉଭୟ ନେତା ଜୋର୍ଡାନର ରଣନୈତିକ ଭୌଗୋଳିକ ସ୍ଥିତି ଏବଂ ଉନ୍ନତ ଲଜିଷ୍ଟିକ୍ସ କ୍ଷମତାକୁ ବିଚାରକୁ ନେଇ ଦୁଇ ଦେଶ ମଧ୍ୟରେ ବୃଦ୍ଧି ପାଇଥିବା ଆର୍ଥିକ ସହଯୋଗର ସମ୍ଭାବନା ଉପରେ ଗୁରୁତ୍ୱାରୋପ କରିଥିଲେ। ଏହି ପରିପ୍ରେକ୍ଷୀରେ, ଉଭୟ ପକ୍ଷ ପରିବହନ ଏବଂ ଲଜିଷ୍ଟିକ୍ସ ସଂଯୋଗୀକରଣକୁ ସୁଦୃଢ଼ କରିବାର ଗୁରୁତ୍ୱକୁ ପୁନଃସ୍ଥାପିତ କରିଥିଲେ, ଯେଉଁଥିରେ ଜୋର୍ଡାନର ପରିବହନ ଏବଂ ଲଜିଷ୍ଟିକ୍ସ ଭିତ୍ତିଭୂମିର ଆଞ୍ଚଳିକ ସମନ୍ୱୟକୁ ସହଭାଗୀ ଆର୍ଥିକ ସ୍ୱାର୍ଥ ଏବଂ ଘରୋଇ କ୍ଷେତ୍ର ସହଯୋଗକୁ ଆଗକୁ ବଢ଼ାଇବା ପାଇଁ ଏକ ରଣନୈତିକ ସୁଯୋଗ ଭାବରେ ଅନ୍ତର୍ଭୁକ୍ତ କରାଯାଇଥିଲା।
ପ୍ରଯୁକ୍ତିବିଦ୍ୟା ଏବଂ ଶିକ୍ଷା
ଡିଜିଟାଲ ପ୍ରଯୁକ୍ତିବିଦ୍ୟା ଏବଂ ଶିକ୍ଷା କ୍ଷେତ୍ରରେ ଦ୍ୱିପାକ୍ଷିକ ସହଯୋଗ ସମୀକ୍ଷା କରିଥିଲେ ଏବଂ ଡିଜିଟାଲ ରୂପାନ୍ତରଣରେ ଅଧିକାରୀଙ୍କ କ୍ଷମତା ନିର୍ମାଣ, ଡିଜିଟାଲ ରୂପାନ୍ତରଣ ସମାଧାନ କାର୍ଯ୍ୟାନ୍ୱୟନରେ ସମ୍ଭାବ୍ୟତା ଅଧ୍ୟୟନ ପାଇଁ ସାଂସ୍ଥାଗତ ସହଯୋଗକୁ ପ୍ରୋତ୍ସାହିତ କରିବା ଏବଂ ଅନ୍ୟାନ୍ୟ କ୍ଷେତ୍ରରେ ସହଯୋଗ କରିବାକୁ ରାଜି ହୋଇଥିଲେ। ସେମାନେ ଉଭୟ ଦେଶର ଡିଜିଟାଲ ରୂପାନ୍ତରଣ ପଦକ୍ଷେପର କାର୍ଯ୍ୟାନ୍ୱୟନରେ ସହଯୋଗର ଆହୁରି ମାର୍ଗ ଅନୁସନ୍ଧାନ କରିବାକୁ ମଧ୍ୟ ରାଜି ହୋଇଥିଲେ। ଅଲ୍ ହୁସେନ୍ ଟେକ୍ନିକାଲ୍ ୟୁନିଭରସିଟିରେ ଆୟୋଜିତ ଭାରତ ଏବଂ ଜୋର୍ଡାନ ସେଣ୍ଟର ଅଫ୍ ଏକ୍ସଲେନ୍ସ ଇନ୍ ଇନଫର୍ମେସନ୍ ଟେକ୍ନୋଲୋଜିର ଭିତ୍ତିଭୂମି ଏବଂ କ୍ଷମତା ନିର୍ମାଣ କାର୍ଯ୍ୟକ୍ରମଗୁଡ଼ିକର ବିସ୍ତାର ତଥା ଉନ୍ନତିକରଣ ପାଇଁ ଉଭୟ ପକ୍ଷ ଆଗ୍ରହ ପ୍ରକାଶ କରିଥିଲେ।
ଡିଜିଟାଲ ପବ୍ଲିକ୍ ଭିତ୍ତିଭୂମି (ଡିପିଆଈ) କ୍ଷେତ୍ରରେ ସହଯୋଗ ପାଇଁ ରାସ୍ତା  ଉପରେ ଆଲୋଚନା କରିଥିଲେ। ଏହି ପରିପ୍ରେକ୍ଷୀରେ, ଉଭୟ ପକ୍ଷ ଡିପିଆଇର ଭାରତୀୟ ଅଭିଜ୍ଞତା ବାଣ୍ଟିବା ପାଇଁ ଏକ ଚୁକ୍ତିନାମାରେ ପ୍ରବେଶ ପାଇଁ ଏକ ଇଣ୍ଟେଣ୍ଟ ଲେଟର ସ୍ୱାକ୍ଷରକୁ ସ୍ୱାଗତ କରିଥିଲେ। ଏକ ନିରାପଦ,  ବିଶ୍ୱସ୍ତ ଏବଂ ଅନ୍ତର୍ଭୁକ୍ତ ଡିଜିଟାଲ ପରିବେଶ ସୁନିଶ୍ଚିତ କରିବାରେ ସହଯୋଗ କରିବାକୁ ଉଭୟ ପକ୍ଷ ରାଜି ହୋଇଥିଲେ।
ଶିକ୍ଷା, ଆର୍ଥିକ ଅଭିବୃଦ୍ଧି ଏବଂ ସାମାଜିକ ବିକାଶରେ ପ୍ରଯୁକ୍ତିର ଗୁରୁତ୍ୱପୂର୍ଣ୍ଣ ଭୂମିକାକୁ ଉଭୟ ପକ୍ଷ ସ୍ୱୀକାର କରିଛନ୍ତି ଏବଂ ଡିଜିଟାଲ ପରିବର୍ତ୍ତନ, ଶାସନ ଓ କ୍ଷମତା ନିର୍ମାଣ କ୍ଷେତ୍ରରେ ନିରନ୍ତର ସହଯୋଗ ଉପରେ ସହମତ ହୋଇଛନ୍ତି।
ଭାରତୀୟ ପକ୍ଷ ସ୍ଥାୟୀ ବିକାଶରେ କ୍ଷମତା ନିର୍ମାଣର ଗୁରୁତ୍ୱପୂର୍ଣ୍ଣ ଭୂମିକା ଉପରେ ଆଲୋକପାତ କରିଛନ୍ତି। ସୂଚନା ପ୍ରଯୁକ୍ତି, କୃଷି ଏବଂ ସ୍ୱାସ୍ଥ୍ୟସେବା ସମେତ ବିଭିନ୍ନ କ୍ଷେତ୍ରରେ ଭାରତୀୟ ବୈଷୟିକ ଏବଂ ଅର୍ଥନୈତିକ ସହଯୋଗ (ଆଇଟିଇସି) କାର୍ଯ୍ୟକ୍ରମ ମାଧ୍ୟମରେ ଏହି କ୍ଷେତ୍ରରେ ସହଯୋଗ ଜାରି ରଖିବାକୁ ପ୍ରତିବଦ୍ଧତା ପ୍ରକାଶ କରିଛନ୍ତି। ଜୋର୍ଡାନ ପକ୍ଷ ଚଳିତ ବର୍ଷଠାରୁ ଆଇଟିଇସି ସ୍ଲଟ୍ ୩୫  ରୁ ୫୦  କୁ ବୃଦ୍ଧି କରିବାକୁ ପ୍ରଶଂସା କରିଛନ୍ତି।
ସ୍ୱାସ୍ଥ୍ୟ
ନେତାମାନେ ସ୍ୱାସ୍ଥ୍ୟସେବା କ୍ଷେତ୍ରରେ ବିଶେଷଜ୍ଞତା ବାଣ୍ଟିବା, ବିଶେଷକରି ଟେଲି-ମେଡିସିନ୍ ଏବଂ ସ୍ୱାସ୍ଥ୍ୟ କର୍ମୀଙ୍କ ତାଲିମରେ କ୍ଷମତା ନିର୍ମାଣ ମାଧ୍ୟମରେ ମିଳିତ ଭାବରେ କାର୍ଯ୍ୟ କରିବା ପ୍ରତିବଦ୍ଧତାକୁ ଗୁରୁତ୍ୱାରୋପ କରିଥିଲେ। ସେମାନେ ଦ୍ୱିପାକ୍ଷିକ ସହଯୋଗର ଏକ ପ୍ରମୁଖ ସ୍ତମ୍ଭ ଭାବରେ ସ୍ୱାସ୍ଥ୍ୟ ଏବଂ ଔଷଧର ଗୁରୁତ୍ୱକୁ ସ୍ୱୀକାର କରିଥିଲେ, ସେମାନଙ୍କ ଲୋକ କଲ୍ୟାଣକୁ ପ୍ରୋତ୍ସାହିତ କରି ନିରନ୍ତର ବିକାଶ ଲକ୍ଷ୍ୟ (ଏସଡିଜି)କୁ ଆଗକୁ ନେବାରେ ଏହାର ଭୂମିକାକୁ ଗୁରୁତ୍ୱ ଦେଇଥିଲେ।
କୃଷି
ନେତାମାନେ ଖାଦ୍ୟ ସୁରକ୍ଷା ଏବଂ ପୁଷ୍ଟିସାର ଅଗ୍ରଗତିରେ କୃଷି କ୍ଷେତ୍ରର ଗୁରୁତ୍ୱପୂର୍ଣ୍ଣ ଭୂମିକାକୁ ସ୍ୱୀକାର କରିଥିଲେ ଏବଂ ଏହି କ୍ଷେତ୍ରରେ ସହଯୋଗକୁ ସୁଦୃଢ଼ କରିବା ପାଇଁ ଏକ ସମାନ ପ୍ରତିବଦ୍ଧତା ପ୍ରକାଶ କରିଥିଲେ। ଏହି ପରିପ୍ରେକ୍ଷୀରେ, ସେମାନେ ସାର, ବିଶେଷକରି ଫସଫେଟ୍ କ୍ଷେତ୍ରରେ ଉଭୟ ପକ୍ଷ ମଧ୍ୟରେ ବର୍ତ୍ତମାନର ସହଯୋଗ ସମୀକ୍ଷା କରିଥିଲେ। ସେମାନେ କୃଷି ଏବଂ ସମ୍ବନ୍ଧିତ କ୍ଷେତ୍ରଗୁଡ଼ିକର ଦକ୍ଷତା ବୃଦ୍ଧି ପାଇଁ ପ୍ରଯୁକ୍ତିବିଦ୍ୟା ଏବଂ ବିଶେଷଜ୍ଞତା ବିନିମୟରେ ସହଯୋଗ ବୃଦ୍ଧି ଉପରେ ମଧ୍ୟ ସହମତ ହୋଇଥିଲେ।
ଜଳ ସହଯୋଗ
ନେତାମାନେ ଜଳସମ୍ପଦ ପରିଚାଳନା ଏବଂ ବିକାଶ କ୍ଷେତ୍ରରେ ସହଯୋଗ ପାଇଁ ବୁଝାମଣାପତ୍ର ସ୍ୱାକ୍ଷରକୁ ସ୍ୱାଗତ କରିଛନ୍ତି ଏବଂ ଜଳ-ସଂରକ୍ଷକ କୃଷି ପ୍ରଯୁକ୍ତିବିଦ୍ୟା, କ୍ଷମତା ନିର୍ମାଣ, ଜଳବାୟୁ ଅନୁକୂଳନ ଏବଂ ଯୋଜନା ଓ ଜଳଭଣ୍ଡାର ପରିଚାଳନା ଭଳି କ୍ଷେତ୍ରରେ ଉଭୟ ପକ୍ଷ ମଧ୍ୟରେ ସହଯୋଗର ଗୁରୁତ୍ୱକୁ ସ୍ୱୀକାର କରିଛନ୍ତି।
ସବୁଜ ଏବଂ ସ୍ଥାୟୀ ବିକାଶ
ନେତାମାନେ ଜଳବାୟୁ ପରିବର୍ତ୍ତନ, ପରିବେଶ, ସ୍ଥାୟୀ ବିକାଶ ଏବଂ ନୂତନ ଓ ନବୀକରଣୀୟ ଶକ୍ତି ବ୍ୟବହାରକୁ ଉତ୍ସାହିତ କରିବା କ୍ଷେତ୍ରରେ ସହଯୋଗ ବୃଦ୍ଧିର ଗୁରୁତ୍ୱ ଉପରେ ଆଲୋଚନା କରିଛନ୍ତି। ଏହି ପରିପ୍ରେକ୍ଷୀରେ, ସେମାନେ ନୂତନ ଏବଂ ନବୀକରଣୀୟ ଶକ୍ତି କ୍ଷେତ୍ରରେ ବୈଷୟିକ ସହଯୋଗ ପାଇଁ ବୁଝାମଣାପତ୍ର ସ୍ୱାକ୍ଷରକୁ ସ୍ୱାଗତ କରିଛନ୍ତି। ଏହି ବୁଝାମଣାପତ୍ର ସ୍ୱାକ୍ଷର ମାଧ୍ୟମରେ, ସେମାନେ ବୈଜ୍ଞାନିକ ଏବଂ ବୈଷୟିକ କର୍ମଚାରୀଙ୍କ ଆଦାନପ୍ରଦାନ ଓ ତାଲିମ, କର୍ମଶାଳା, ସେମିନାର ଏବଂ କାର୍ଯ୍ୟ ଗୋଷ୍ଠୀର ସଂଗଠନ, ଅଣ-ବାଣିଜ୍ୟିକ ଆଧାରରେ ଉପକରଣ, ଜ୍ଞାନକୌଶଳ ତଥା ପ୍ରଯୁକ୍ତିବିଦ୍ୟା ହସ୍ତାନ୍ତର ଏବଂ ପାରସ୍ପରିକ ସ୍ୱାର୍ଥର ବିଷୟ ଉପରେ ମିଳିତ ଗବେଷଣା କିମ୍ବା ବୈଷୟିକ ପ୍ରକଳ୍ପ ବିକାଶ ଉପରେ ସହମତ ହୋଇଛନ୍ତି।
ସାଂସ୍କୃତିକ ସହଯୋଗ
ଭାରତ ଏବଂ ଜୋର୍ଡାନ ମଧ୍ୟରେ ବର୍ଦ୍ଧିତ ସାଂସ୍କୃତିକ ଆଦାନପ୍ରଦାନ ପାଇଁ ଉଭୟ ପକ୍ଷ ସେମାନଙ୍କର ପ୍ରଶଂସା ପ୍ରକାଶ କରିଛନ୍ତି ଏବଂ ୨୦୨୫-୨୦୨୯ ଅବଧି ପାଇଁ ସାଂସ୍କୃତିକ ଆଦାନପ୍ରଦାନ କାର୍ଯ୍ୟକ୍ରମ ସ୍ୱାକ୍ଷରକୁ ସ୍ୱାଗତ କରିଛନ୍ତି। ସେମାନେ ସଙ୍ଗୀତ, ନୃତ୍ୟ, ନାଟ୍ୟ, କଳା, ଅଭିଲେଖାଗାର, ପାଠାଗାର ଏବଂ ସାହିତ୍ୟ ଏବଂ ମହୋତ୍ସବ କ୍ଷେତ୍ରରେ ସହଯୋଗ ବିସ୍ତାର କରିବାର ଚିନ୍ତାଧାରାକୁ ସମର୍ଥନ କରିଛନ୍ତି। ସେମାନେ ପେଟ୍ରା ସହର ଏବଂ ଏଲୋରା ଗୁମ୍ଫା ସ୍ଥଳ ମଧ୍ୟରେ ଟ୍ୱିନିଂ ଚୁକ୍ତିନାମା ସ୍ୱାକ୍ଷରକୁ ମଧ୍ୟ ସ୍ୱାଗତ କରିଛନ୍ତି, ଯାହା ପ୍ରତ୍ନତାତ୍ତ୍ୱିକ ସ୍ଥଳଗୁଡ଼ିକର ବିକାଶ ଏବଂ ସାମାଜିକ ସମ୍ପର୍କକୁ ପ୍ରୋତ୍ସାହିତ କରିବା ଉପରେ ଧ୍ୟାନ କେନ୍ଦ୍ରିତ କରିଛି।
ସଂଯୋଗୀକରଣ
ଦ୍ୱିପାକ୍ଷିକ ସମ୍ପର୍କକୁ ପ୍ରୋତ୍ସାହିତ କରିବାରେ ପ୍ରତ୍ୟକ୍ଷ ସଂଯୋଗୀକରଣର ଗୁରୁତ୍ୱକୁ ଉଭୟ ପକ୍ଷ ସ୍ୱୀକାର କରିଛନ୍ତି। ଏହା ବାଣିଜ୍ୟ, ନିବେଶ, ପର୍ଯ୍ୟଟନ ଏବଂ ଲୋକ-ଲୋକଙ୍କ ମଧ୍ୟରେ ଆଦାନପ୍ରଦାନକୁ ପ୍ରୋତ୍ସାହିତ କରିବା ପାଇଁ ଏକ ଗୁରୁତ୍ୱପୂର୍ଣ୍ଣ ଆଧାରଶିଳା ଏବଂ ଗଭୀର ପାରସ୍ପରିକ ବୁଝାମଣା ବୃଦ୍ଧି କରିବାରେ ସାହାଯ୍ୟ କରେ। ଏହି ପରିପ୍ରେକ୍ଷୀରେ, ସେମାନେ ଦୁଇ ଦେଶ ମଧ୍ୟରେ ପ୍ରତ୍ୟକ୍ଷ ସଂଯୋଗୀକରଣ ବୃଦ୍ଧି କରିବାର ସମ୍ଭାବନା ଅନୁସନ୍ଧାନ କରିବାକୁ ସହମତ ହୋଇଛନ୍ତି।
ବହୁପାକ୍ଷିକ ସହଯୋଗ
ମହାମହିମ ରାଜା ଅବଦୁଲ୍ଲା ଦ୍ୱିତୀୟ ଅନ୍ତର୍ଜାତୀୟ ସୌର ମେଣ୍ଟ (ଆଇଏସଏ) ଏବଂ ବିପର୍ଯ୍ୟୟ ପ୍ରତିରୋଧୀ ଭିତ୍ତିଭୂମି ପାଇଁ ମେଣ୍ଟ (ସିଡିଆରଆଇ) ଏବଂ ଗ୍ଲୋବାଲ୍ ଜୈବ ଇନ୍ଧନ ମେଣ୍ଟ (ଜିବିଏ)ରେ ଭାରତର ନେତୃତ୍ୱକୁ ପ୍ରଶଂସା କରିଛନ୍ତି। ଆଇଏସଏ, ସିଡିଆରଆଇ ଏବଂ ଜିବିଏରେ ଯୋଗଦାନ ପାଇଁ ଜୋର୍ଡାନର ଇଚ୍ଛା ପ୍ରକାଶକୁ ଭାରତ ସ୍ୱାଗତ କରିଛି। ଉଭୟ ପକ୍ଷ ଜୈବ ଇନ୍ଧନକୁ ଏକ ସ୍ଥାୟୀ, କମ୍ କାର୍ବନ ବିକଳ୍ପ ଭାବରେ ସ୍ୱୀକୃତି ଦେଇଛନ୍ତି ଯାହା ଦ୍ୱାରା ଡିକାର୍ବନାଇଜେସନ୍ ପ୍ରତିଶ୍ରୁତି ହାସଲ କରାଯାଇପାରିବ ଏବଂ ଉଭୟ ଦେଶର ଲୋକଙ୍କ ପାଇଁ ଅଧିକ ଆର୍ଥିକ ଏବଂ ସାମାଜିକ ବିକାଶ କରାଯାଇପାରିବ।
ଗସ୍ତ ଶେଷରେ, ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ତାଙ୍କୁ ଏବଂ ତାଙ୍କ ସହିତ ପ୍ରତିନିଧିମଣ୍ଡଳକୁ ପ୍ରଦାନ କରାଯାଇଥିବା ଭବ୍ୟ ସ୍ୱାଗତ ଏବଂ ଉଦାର ଆତିଥ୍ୟ ପାଇଁ ମହାମହିମ ରାଜା ଅବଦୁଲ୍ଲା ଦ୍ୱିତୀୟଙ୍କୁ ଆନ୍ତରିକ ଧନ୍ୟବାଦ ଏବଂ କୃତଜ୍ଞତା ଜଣାଇଥିଲେ। ସେ ହାସେମାଇଟ୍ ରାଜ୍ୟର ବନ୍ଧୁତ୍ୱପୂର୍ଣ୍ଣ ଲୋକଙ୍କ ନିରନ୍ତର ପ୍ରଗତି ଏବଂ ସମୃଦ୍ଧି ପାଇଁ ଶୁଭକାମନା ମଧ୍ୟ ଜଣାଇଥିଲେ। ତାଙ୍କ ପକ୍ଷରୁ, ମହାମହିମ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏବଂ ଭାରତର ବନ୍ଧୁତ୍ୱପୂର୍ଣ୍ଣ ଲୋକଙ୍କୁ ଆହୁରି ପ୍ରଗତି ଏବଂ ସମୃଦ୍ଧି ପାଇଁ ତାଙ୍କର ଆନ୍ତରିକ ଶୁଭକାମନା ଜଣାଇଥିଲେ।

*****   
SPD