ପିଏମଇଣ୍ଡିଆ

ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦି ଆଜି (22.08.2016) ପ୍ରମୁଖ ଭିତ୍ତିଭୂମି କ୍ଷେତ୍ରରେ ହୋଇଥିବା ପ୍ରଗତିର ସମୀକ୍ଷା କରିଛନ୍ତି । ନୀତି ଆୟୋଗ ଦ୍ୱାରା ଦିଆଯାଇଥିବା ଏକ ଉପସ୍ଥାପନାରେ ଅକ୍ଷୟ ଶକ୍ତି ଏବଂ ରେଳବାଇ ସମେତ ଅନେକ ପ୍ରମୁଖ କ୍ଷେତ୍ରରେ ଉଲ୍ଲେଖନୀୟ ଅଗ୍ରଗତି ପରିଲକ୍ଷିତ ହୋଇଛି ।

ଅକ୍ଷୟ ଶକ୍ତିର ନୂତନ କ୍ଷେତ୍ରରେ ସମୁଦାୟ ସଂସ୍ଥାପିତ କ୍ଷମତା 44 ଗିଗାୱାଟକୁ ଅତିକ୍ରମ କରିଛି । କେନ୍ଦ୍ର ଓ ରାଜ୍ୟର ବିଭିନ୍ନ ଯୋଜନା ଓ ଉପଯୋଜନା ଅଧିନରେ କାର୍ଯ୍ୟକାରୀ ହେଉଥିବା ଅନେକ ପ୍ରକଳ୍ପ ଧାର୍ଯ୍ୟ ଲକ୍ଷ୍ୟ ହାସଲ କରିଛି । ଛାତ ଉପରେ ଏବଂ ପ୍ରକଳ୍ପ ୟୁନିଟରେ ସୌର ଶକ୍ତି ଉତ୍ପାଦନର ମାତ୍ରାକୁ ଆହୁରି ବୃଦ୍ଧି କରିବା ପାଇଁ ପ୍ରସ୍ତୁତ କରାଯାଇଥିବା କୌଶଳ ସମ୍ପର୍କରେ ପ୍ରଧାନମନ୍ତ୍ରୀଙ୍କୁ ସୂଚନା ପ୍ରଦାନ କରାଯାଇଥିଲା ।

ବିମାନ ଚଳାଚଳ କ୍ଷେତ୍ରରେ ପ୍ରଧାନମନ୍ତ୍ରୀ ସୁରକ୍ଷା ଏବଂ ଯୋଗାଯୋଗ ଭଳି ମୂଖ୍ୟ ଉପାଦାନର ପ୍ରମୁଖ ନୀତିରେ ହୋଇଥିବା ଅଗ୍ରଗତିର ସମୀକ୍ଷା କରିଥିଲେ । ଉଲ୍ଲେଖନୀୟ ଯେ, ବିଶ୍ୱସ୍ତରରେ ନିଜ ନିଜ ଶ୍ରେଣୀରେ ସର୍ବୋକୃଷ୍ଟ ପାଞ୍ଚଟି ସ୍ଥାନରେ ଭାରତର ଆଠଟି ବିମାନ ବନ୍ଦର ରହିଛି । ଆଞ୍ଚଳିକ ଯୋଗାଯୋଗକୁ ଆହୁରି କ୍ରିୟାଶୀଳ କରିବା ଏବଂ ଗ୍ରାହକ ସନ୍ତୁଷ୍ଟି ବୃଦ୍ଧି କରିବା ପାଇଁ ନିଆଯାଉଥିବା ପଦକ୍ଷେପ ସମ୍ପର୍କରେ ପ୍ରଧାନମନ୍ତ୍ରୀଙ୍କୁ ଅବଗତ କରାଯାଇଥିଲା ।

ଭାରତୀୟ ରେଳବାଇ ଇତିମଧ୍ୟରେ ଦୈନିକ 2.25 କୋଟି ଯାତ୍ରୀ ପରିବହନର ଧାର୍ଯ୍ୟ ଲକ୍ଷ୍ୟ ହାସଲ କରିପାରିଛି । ଚଳିତ ଆର୍ଥିକ ବର୍ଷର ପ୍ରଥମ ତିନିମାସ ମଧ୍ୟରେ 240 ଟି ମାନବ-ବିହୀନ ରେଳ ଫାଟକକୁ ଉଠାଇ ଦିଆଯାଇଛି । ସେହି ସମୟ ମଧ୍ୟରେ ଶକ୍ତି କ୍ଷେତ୍ରରେ 3.5 କୋଟି ଏଲଇଡି ବଲ୍ବ ବିତରଣ କରାଯାଇଛି । ବନ୍ଦର କ୍ଷେତ୍ରରେ ଜାହାଜଗୁଡିକର ହାରାହାରି ପରିବହନ କ୍ଷମତାରେ ଉଲ୍ଲେଖନୀୟ ଅଗ୍ରଗତି ହୋଇଛି ।

ଗ୍ରାମ୍ୟ ଗୃହ ନିର୍ମାଣ କ୍ଷେତ୍ରରେ ଚଳିତ ଆର୍ଥିକ ବର୍ଷର ପ୍ରଥମ ତିନିମାସ ମଧ୍ୟରେ 6 ଲକ୍ଷ ଗୃହ ନିର୍ମାଣ ପାଇଁ ଲକ୍ଷ୍ୟ ଧାର୍ଯ୍ୟ ହୋଇଥିବାବେଳେ ଏହି ସମୟ ମଧ୍ୟରେ 6.94 ଲକ୍ଷ ଗୃହ ନିର୍ମିତ ହୋଇଛି ।

ତୈଳ ଏବଂ ପ୍ରାକୃତିକ ବାଷ୍ପ କ୍ଷେତ୍ରରେ ଅଗ୍ରଗତିର ସମୀକ୍ଷା କରି ପ୍ରଧାନମନ୍ତ୍ରୀ ପେଟ୍ରୋଲରେ ଇଥାନଲ୍ ମିଶ୍ରଣ କାର୍ଯ୍ୟରେ ଅଗ୍ରଗତି ସମ୍ପର୍କରେ ଜାଣିବାକୁ ଚାହିଁଥିଲେ । ଚଳିତ ଆର୍ଥିକ ବର୍ଷରେ 15 କୋଟିରୁ ଉର୍ଦ୍ଧ ଉପଭୋକ୍ତାଙ୍କୁ ଏଲପିଜିର ପ୍ରତ୍ୟକ୍ଷ ଲାଭ ହସ୍ତାନ୍ତର ଯୋଜନାରେ ଅନ୍ତର୍ଭୁକ୍ତ କରାଯାଇଛି ବୋଲି ପ୍ରଧାନମନ୍ତ୍ରୀଙ୍କୁ ସୂଚନା ଦିଆଯାଇଥିଲା ।

ବିଭିନ୍ନ ଭିତ୍ତିଭୂମି କ୍ଷେତ୍ରସଂଲଗ୍ନ ମନ୍ତ୍ରଣାଳୟର ଉଚ୍ଚ ପଦାଧିକାରୀ, ନୀତି ଆୟୋଗ ଏବଂ ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟର ପଦାଧିକାରୀମାନେ ଏହି ବୈଠକରେ ଯୋଗ ଦେଇଥିଲେ ।

**********