ପିଏମଇଣ୍ଡିଆ

ଭାରତ ସଂଚାର ନିଗମ ଲିମିଟେଡ(ବିଏସଏନଏଲ) ଅଧିନରେ ରହିଛି ଦେଶର ସର୍ବବୃହତ ମୋବାଇଲ ଟାୱାର ନେଟୱାର୍କ । ତେବେ ଏହି ଟାୱାରଗୁଡିକୁ ବ୍ୟାବସାୟୀକ ଦୃଷ୍ଟିରୁ ଲାଭଦାୟକ କରିବା ଲାଗି କେନ୍ଦ୍ର ସରକାର ଏକ ଅଭିନବ ପନ୍ଥା ଗ୍ରହଣ କରୁଛନ୍ତି । ବିଏସଏନଏଲର ସବୁ ଟାୱାରକୁ ନେଇ ଏକ ପୃଥକ ସଂସ୍ଥା ଗଠନ କରିବାକୁ ନିଷ୍ପତ୍ତି ହୋଇଛି । ଏହି ସଂସ୍ଥା ଯଦିଓ ପୃଥକ ରହିବ, କିନ୍ତୁ ସମ୍ପୂର୍ଣ୍ଣ ରୂପେ ବିଏସଏନଏଲର କର୍ତ୍ତୃତ୍ଵରେ ରହିବ ।

ଆଜି ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ଅଧ୍ୟକ୍ଷତାରେ ଅନୁଷ୍ଠିତ କେନ୍ଦ୍ର କ୍ୟାବିନେଟ ବୈଠକରେ ଏହି ପ୍ରସ୍ତାବକୁ ଅନୁମୋଦନ କରାଯାଇଛି ।
ଏହି ମଞ୍ଜୁରି ବଳରେ ବିଏସଏନଏଲ ନିଜର ଦୂରସଂଚାର ଟାୱାର କାର୍ଯ୍ୟ ପୃଥକ ଭାବେ ପରିଚାଳନା କରିବା ଲାଗି ଏକ ଭିନ୍ନ ସହାୟକ କମ୍ପାନୀ ଗଠନ ସକାଶେ ଅଧିକୃତ ହୋଇଛି ।

ଦେଶରେ ପାଖାପାଖି 4,42,000 ମୋବାଇଲ୍ ଟାୱାର ରହିଛି, ଏଥିମଧ୍ୟରୁ 66,000 ରୁ ଅଧିକ ମୋବାଇଲ୍ ଟାୱାର ବିଏସଏନଏଲର । ଏକ ସ୍ୱାଧୀନ ଓ ସମର୍ପିତ ଟାୱାର କମ୍ପାନୀ ଜରିଆରେ ବିଏସଏନଏଲ ନିଜର ଟାୱାରଗୁଡିକୁ ବ୍ୟବସାୟୀକ ଦୃଷ୍ଟିରୁ ସଠିକ ଢ଼ଙ୍ଗରେ ଉପଯୋଗକରି ଅଧିକ ରାଜସ୍ୱ ଅର୍ଜନ କରିପାରିବ ।