ପିଏମଇଣ୍ଡିଆ

ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଆଜି ବିହାରର ମୋକାମାଠାରେ ନମାମି ଗଙ୍ଗେ କାର୍ଯ୍ୟକ୍ରମ ଅଧୀନରେ 4ଟି ସ୍ୱେରେଜ ପ୍ରକଳ୍ପ ଏବଂ 4ଟି ରାଜପଥ ପ୍ରକଳ୍ପ ପାଇଁ ଶିଳାନ୍ୟାସ କରିଛନ୍ତି । ଏହି ପ୍ରକଳ୍ପଗୁଡ଼ିକ ପାଇଁ ମୋଟ 3700 କୋଟି ଟଙ୍କାର ବ୍ୟୟ ଅଟକଳ କରାଯାଇଛି ।

ସେଠାରେ ଉପସ୍ଥିତ ବହୁସଂଖ୍ୟାରେ ଜନସାଧାରଣଙ୍କୁ ଉଦ୍ବୋଧନ ଦେଇ ପ୍ରଧାନମନ୍ତ୍ରୀ କହିଥିଲେ ଯେ, ମହାନ କବି ରାମଧାରୀ ସିଂ ଦିନକରଙ୍କ ସହ ସମ୍ପର୍କ ଥିବା ଭୂମିକୁ ଆସି ସେ ଆନନ୍ଦ ଅନୁଭବ କରୁଛନ୍ତି । ବିହାରର ଅଭିବୃଦ୍ଧି ପାଇଁ କେନ୍ଦ୍ର ସରକାର ଏବଂ ରାଜ୍ୟ ସରକାର ଯଥାସମ୍ଭବ କାମ କରିବେ ବୋଲି ସେ ପ୍ରତିଶ୍ରୁତି ଦେଇଥିଲେ ।

ପ୍ରଧାନମନ୍ତ୍ରୀ କହିଥିଲେ ଯେ ଲୋକମାନଙ୍କ ଆଶାଆକାଂକ୍ଷା ପୂରଣ କରିବା ଲାଗି ସରକାର ଅନବରତ ଭାବେ କାମ କରିଚାଲିଛନ୍ତି । ସେ କହିଥିଲେ ଯେ ଆଜି ଶିଳାନ୍ୟାସ ହୋଇଥିବା ପ୍ରକଳ୍ପଗୁଡ଼ିକ ବିହାରର ବିକାଶ ପ୍ରକ୍ରିୟାକୁ ତ୍ୱରାନ୍ୱିତ କରିବ ।

ସେ ଆହୁରି ଉଲ୍ଲେଖ କରିଥିଲେ ଯେ ସଡ଼କ ନିର୍ମାଣ କାର୍ଯ୍ୟକୁ ଦ୍ରୁତଗତିରେ ଆଗେଇ ନେବା ପ୍ରତି ସରକାର ଗୁରୁତ୍ୱାରୋପ କରୁଛନ୍ତି । ନମାମି ଗଙ୍ଗେ ସହ ଜଡ଼ିତ ପ୍ରକଳ୍ପଗୁଡ଼ିକ ଗଙ୍ଗା ନଦୀର ସଂରକ୍ଷଣରେ ସହାୟକ ହେବ ବୋଲି ସେ କହିଥିଲେ ।

ନିକଟରେ ଚଳାଚଳ ଆରମ୍ଭ କରିଥିବା ଅନ୍ତ୍ୟୋଦୟ ଏକ୍ସପ୍ରେସ ସମ୍ପର୍କରେ ଉଲ୍ଲେଖ କରି ସେ କହିଥିଲେ ଯେ ଏହାଦ୍ୱାରା ବିହାର, ପୂର୍ବ ଭାରତ ସହ ଦେଶର ଅନ୍ୟ ପ୍ରାନ୍ତଗୁଡ଼ିକ ମଧ୍ୟରେ ଯୋଗାଯୋଗ ସମ୍ଭବ ହୋଇପାରିବ । ଉତ୍ତମ ଯୋଗାଯୋଗ ଅଧିକ ବିକାଶ ଦିଗରେ ଆଗେଇ ନେବ ବୋଲି ଉଲ୍ଲେଖ କରି ପ୍ରଧାନମନ୍ତ୍ରୀ କହିଥିଲେ ଯେ ରାସ୍ତା, ରେଳବାଇ ଏବଂ ଜଳମାର୍ଗର ବିକାଶ ଉପରେ ଗୁରୁତ୍ୱ ଦେଉଛନ୍ତି ।

ଶିଳାନ୍ୟାସ ହୋଇଥିବା 4ଟି ଜାତୀୟ ରାଜପଥ ପ୍ରକଳ୍ପଗୁଡ଼ିକ ହେଲା :

– 31 ନମ୍ବର ଜାତୀୟ ରାଜପଥର ଅଉନ୍ତା-ସିମାରିୟା ସଡ଼କକୁ 4 ଲେନ୍ ବିଶିଷ୍ଟ କରିବା ଏବଂ 6 ଲେନ୍ ବିଶିଷ୍ଟ ଗଙ୍ଗା ସେତୁ ନିର୍ମାଣ ।

– 31 ନମ୍ବର ଜାତୀୟ ରାଜପଥର ବଖତିଆରପୁର-ମୋକାମା ସଡ଼କର 4 ଲେନ୍ କୁ ସମ୍ପ୍ରସାରଣ ।

– 107 ନମ୍ବର ଜାତୀୟ ରାଜପଥର ମହେଶଖୁଣ୍ଟ-ସାହର୍ସା-ପୁରୁନିଆ କ୍ଷେତ୍ର ସଡ଼କର 2 ଲେନ୍ କୁ ସମ୍ପ୍ରସାରଣ ।

– 82 ନମ୍ବର ଜାତୀୟ ରାଜପଥର ବିହାରଶରିଫ-ବଡ଼ବିଘା-ମୋକାମା କ୍ଷେତ୍ରର 2 ଲେନ୍ ବିଶିଷ୍ଟ ସଡ଼କ ନିର୍ମାଣ ।

ଶିଳାନ୍ୟାସ ହୋଇଥିବା 4ଟି ସ୍ୱେରେଜ ପ୍ରକଳ୍ପ ମଧ୍ୟରେ ରହିଛି ବେଉରଠାରେ ଥିବା ସ୍ୱେରେଜ ଟ୍ରିଟମେଣ୍ଟ ପ୍ଳାଣ୍ଟ, ବେଉର ସିୱେର ନେଟୱାର୍କ ସହିତ ସ୍ୱେରେଜ ସିଷ୍ଟମ, କର୍ମାଲୀ ଛକରେ ଥିବା ସିୱେଜ ଟ୍ରିଟମେଣ୍ଟ ପ୍ଳାଣ୍ଟ ଏବଂ ସୈଦପୁରଠାରେ ଥିବା ସିୱେଜ ନେଟୱାର୍କ । ଏହି ପ୍ରକଳ୍ପଗୁଡ଼ିକ ଦ୍ୱାରା 120 ଏମଏଲଡିର ନୂଆ ଏସଟିପି କ୍ଷମତା ବୃଦ୍ଧି ପାଇବ ଏବଂ ପୂର୍ବରୁ ବେଉରରେ ଥିବା 20ଟି ଏମଏଲଡିର ସମ୍ପ୍ରସାରଣ କରାଯିବା ସମ୍ଭବ ହୋଇପାରିବ ।

**********