ପିଏମଇଣ୍ଡିଆ

ଭାରତ ମାତା କୀ – ଜୟ!

ଭାରତ ମାତା କୀ – ଜୟ!

ଭାରତ ମାତା କୀ – ଜୟ!

ମୁଁ କହିବି ପ୍ରଭୁ ବିର୍ସା ମୁଣ୍ଡା – ତୁମେ କହିବ ଅମର ରହେ, ଅମର ରହେ !

ପ୍ରଭୁ ବିର୍ସା ମୁଣ୍ଡା – ଅମର ରହେ, ଅମର ରହେ !

ପ୍ରଭୁ ବିର୍ସା ମୁଣ୍ଡା – ଅମର ରହେ, ଅମର ରହେ !

ପ୍ରଭୁ ବିର୍ସା ମୁଣ୍ଡା – ଅମର ରହେ, ଅମର ରହେ !

ବିହାରର ମାନ୍ୟବର ରାଜ୍ୟପାଳ ଶ୍ରୀ ରାଜେନ୍ଦ୍ର ଆର୍ଲେକର, ବିହାରର ଲୋକପ୍ରିୟ ମୁଖ୍ୟମନ୍ତ୍ରୀ ଶ୍ରୀ ନୀତିଶ କୁମାର, କେନ୍ଦ୍ର କ୍ୟାବିନେଟର ମୋର ସହଯୋଗୀ ଜୁଆଲ ଓରାମ, ଜିତନ ରାମ ମାଞ୍ଝି, ଗିରିରାଜ ସିଂହ, ଚିରାଗ ପାସୱାନ, ଓ ଦୁର୍ଗାଦାସ ଉଇକେ, ଏହା ଆମର ସୌଭାଗ୍ୟ ଯେ, ଆଜି ଆମ ମଧ୍ୟରେ ବିର୍ସା ମୁଣ୍ଡାଙ୍କ ବଂଶଧର ଉପସ୍ଥିତ ଅଛନ୍ତି । ଯଦିଓ ଆଜି ସେମାନଙ୍କ ଘରେ ଏକ ପ୍ରମୁଖ ଧାର୍ମିକ ଉତ୍ସବ ପାଳନ ହେଉଛି । ସେମାନଙ୍କ ପରିବାର ରୀତିନୀତିରେ ବ୍ୟସ୍ତ ଥିବା ସତ୍ତ୍ୱେ, ବୁଧରାମ ମୁଣ୍ଡା ମହାଶୟ ଆମ ସହିତ ଯୋଗ ଦେଇଛନ୍ତି ଏବଂ ସିଦ୍ଧୁ କାନହୁଙ୍କ ବଂଶଧର ମଣ୍ଡଳ ମୁର୍ମୁ ମହାଶୟ ଆମ ସହିତ ଥିବାରୁ ଆମେ ସମାନ ଭାବରେ ସମ୍ମାନିତ। ଏହା କହିବା ମଧ୍ୟ ମୋ ପାଇଁ ଆନନ୍ଦର ବିଷୟ ଯେ, ଯଦି ଆଜି ଭାରତୀୟ ଜନତା ପାର୍ଟିରେ ସବୁଠାରୁ ବରିଷ୍ଠ ନେତା କେହି ଅଛନ୍ତି, ତେବେ ସେ ହେଉଛନ୍ତି ଆମର କାରିଆ ମୁଣ୍ଡା ମହାଶୟ, ଯିଏ ଥରେ ଲୋକସଭାର ଉପବାଚସ୍ପତି ଭାବରେ କାର୍ଯ୍ୟ କରିଥିଲେ, ପଦ୍ମ ବିଭୂଷଣରେ ସମ୍ମାନୀତ ଏବଂ ଏବେ ବି ଆମକୁ ମାର୍ଗଦର୍ଶନ କରୁଛନ୍ତି। ଜୁଆଲ ଓରାମ ମହାଶୟ ଯେପରି କହିଥିଲେ, ସେ ମୋ ପାଇଁ ପିତା ସଦୃଶ। କାରିଆ ମୁଣ୍ଡା ମହାଶୟ ବିଶେଷ ଭାବରେ ଝାଡ଼ଖଣ୍ଡରୁ ଏଠାକୁ ଯାତ୍ରା କରିଛନ୍ତି। ବିହାରର ଉପମୁଖ୍ୟମନ୍ତ୍ରୀ ଏବଂ ମୋର ବନ୍ଧୁ ବିଜୟ କୁମାର ସିହ୍ନା ମହାଶୟ, ସମ୍ରାଟ ଚୌଧୁରୀ ମହାଶୟ, ବିହାର ସରକାରଙ୍କ ମନ୍ତ୍ରୀ, ସଂସଦର ସଦସ୍ୟ, ବିଧାନସଭାର ସଦସ୍ୟ, ଅନ୍ୟାନ୍ୟ ଜନପ୍ରତିନିଧି, ଦେଶର କୋଣ ଅନୁକୋଣରୁ ଆସିଥିବା ସମ୍ମାନିତ ଅତିଥି ଏବଂ ଜାମୁଇର ମୋର ପ୍ରିୟ ଭାଇ ଓ ଭଉଣୀମାନେ।

ଆଜି, କେନ୍ଦ୍ର ସରକାରଙ୍କ ଅନେକ ମୁଖ୍ୟମନ୍ତ୍ରୀ, ରାଜ୍ୟପାଳ, ରାଜ୍ୟ ମନ୍ତ୍ରୀ ଏବଂ ମନ୍ତ୍ରୀମାନେ ଭାରତର ବିଭିନ୍ନ ଜିଲ୍ଲାରେ ଗୁରୁତ୍ୱପୂର୍ଣ୍ଣ କାର୍ଯ୍ୟକ୍ରମ ଆୟୋଜନ କରୁଛନ୍ତି, ଏବଂ ମୁଁ ସମସ୍ତଙ୍କୁ ସ୍ୱାଗତ କରୁଛି। ଆମ ସହିତ ଭର୍ଚୁଆଲ୍ ଭାବରେ ଯୋଗ ଦେଇଥିବା ମୋର ଲକ୍ଷ ଲକ୍ଷ ଆଦିବାସୀ ଭାଇଭଉଣୀଙ୍କୁ ମଧ୍ୟ ମୁଁ ଶୁଭେଚ୍ଛା ଜଣାଉଛି। ଗୀତ ଗୌର ଦୁର୍ଗା ମାଈ ଏବଂ ବାବା ଧନେଶ୍ୱର ନାଥଙ୍କ ଏହି ପବିତ୍ର ଭୂମିକୁ ମୁଁ ପ୍ରଣାମ କରୁଛି । ମୁଁ ଭଗବାନ ମହାବୀରଙ୍କ ଜନ୍ମସ୍ଥାନକୁ ପ୍ରଣାମ କରୁଛି । ଆଜି ହେଉଛି କାର୍ତ୍ତିକ ପୂର୍ଣ୍ଣିମା । ଏକ ଅତ୍ୟନ୍ତ ଶୁଭ ଦିନ । ଏହା, ଦେବ ଦୀପାବଳି ଏବଂ ଗୁରୁ ନାନକ ଦେବ ଜୀଙ୍କ ୫୫୫ତମ ଜନ୍ମବାର୍ଷିକୀ । ମୁଁ ଏହି ପର୍ବଗୁଡ଼ିକ ପାଇଁ ସମସ୍ତ ନାଗରିକଙ୍କୁ ଅଭିନନ୍ଦନ ଜଣାଉଛି। ଆଜି ଦେଶର ପ୍ରତ୍ୟେକ ନାଗରିକଙ୍କ ପାଇଁ ଆଉ ଏକ କାରଣ ମଧ୍ୟ ଗୁରୁତ୍ୱପୂର୍ଣ୍ଣ । ଆଜି ଭଗବାନ ବିର୍ସା ମୁଣ୍ଡାଙ୍କ ଜନ୍ମବାର୍ଷିକୀ, ଯାହାକୁ ରାଷ୍ଟ୍ରୀୟ ଜନଜାତି ଗୌରବ ଦିବସ (ଜାତୀୟ ଆଦିବାସୀ ଗୌରବ ଦିବସ) ଭାବରେ ପାଳନ କରାଯାଏ। ଜନଜାତୀୟ ଗୌରବ ଦିବସରେ ମୁଁ ସମସ୍ତ ନାଗରିକଙ୍କୁ, ବିଶେଷକରି ମୋର ଆଦିବାସୀ ଭାଇ ଭଉଣୀମାନଙ୍କୁ ଅଭିନନ୍ଦନ ଜଣାଉଛି। ମୋତେ ସୂଚନା ଦିଆଯାଇଛି ଯେ, ଏହି ପର୍ବଗୁଡ଼ିକ ପୂର୍ବରୁ, ଗତ ଦୁଇ ତିନି ଦିନ ଧରି ଜାମୁଇରେ ଏକ ବଡ଼ ସ୍ୱଚ୍ଛତା ଅଭିଯାନ ପାଳନ କରାଯାଉଛି। ପ୍ରଶାସନ ଏହି ଅଭିଯାନର ନେତୃତ୍ୱ ନେଇଛନ୍ତି ଏବଂ ଆମର ବିଜୟ ମହାଶୟ ଏଠାରେ ଡେରା ପକାଇଛନ୍ତି। ବିଜେପି କର୍ମୀମାନେ ମଧ୍ୟ ଏକ ଗୁରୁତ୍ୱପୂର୍ଣ୍ଣ ସ୍ୱଚ୍ଛତା ଅଭିଯାନ କରିଥିଲେ। ନାଗରିକ, ଯୁବକ, ମା‘ ଏବଂ ଭଉଣୀମାନେ ଉତ୍ସାହର ସହିତ ଯୋଗଦାନ ଦେଇଥିଲେ। ଏହି ବିଶେଷ ପ୍ରୟାସ ପାଇଁ ମୁଁ ଜାମୁଇର ଲୋକମାନଙ୍କୁ ବହୁତ କୃତଜ୍ଞତା ଜଣାଉଛି।

ବନ୍ଧୁଗଣ,

ଗତ ବର୍ଷ ଏହି ଦିନ, ମୁଁ ଉଲିହାଟୁର ଧରତୀ ଆବା ବିର୍ସା ମୁଣ୍ଡାଙ୍କ ଗାଁରେ ଥିଲି। ଆଜି, ମୁଁ ସେହି ଭୂମିରେ ଅଛି ଯେଉଁଠାରେ ଶହୀଦ ତିଲକା ମାଞ୍ଝିଙ୍କ ବୀରତ୍ୱର ସାକ୍ଷୀ ଥିଲା। ଏହି ବର୍ଷ ଏହି କାର୍ଯ୍ୟକ୍ରମ ଆହୁରି ସ୍ୱତନ୍ତ୍ର। ଆଜିଠାରୁ, ଦେଶ ଭଗବାନ ବିର୍ସା ମୁଣ୍ଡାଙ୍କ ୧୫୦ତମ ଜନ୍ମବାର୍ଷିକୀ ପାଳନ କରିବ, ଯାହା ଗୋଟିଏ ବର୍ଷ ପାଇଁ ଜାରି ରହିବ। ମୁଁ ଖୁସି ଯେ, ଶହ ଶହ ଜିଲ୍ଲାର ପ୍ରାୟ ଏକ କୋଟି ଲୋକ ପ୍ରଯୁକ୍ତିବିଦ୍ୟା ମାଧ୍ୟମରେ ଏହି କାର୍ଯ୍ୟକ୍ରମ ସହିତ ଯୋଡ଼ି ହୋଇଛନ୍ତି, ଯାହା ଏହାକୁ ଜାମୁଇର ଲୋକଙ୍କ ପାଇଁ ଏକ ଗର୍ବର ମୁହୂର୍ତ୍ତ। ମୁଁ ସମସ୍ତଙ୍କୁ ମୋର ଶୁଭେଚ୍ଛା ଜଣାଉଛି। ପୂର୍ବରୁ, ମୁଁ ଭଗବାନ ବିର୍ସା ମୁଣ୍ଡାଙ୍କ ବଂଶଜ ବୁଧରାମ ମୁଣ୍ଡାଙ୍କୁ ସ୍ୱାଗତ କରିବାର ସୌଭାଗ୍ୟ ପାଇଥିଲି। କିଛି ଦିନ ପୂର୍ବରୁ, ମୁଁ ସିଦ୍ଧୁ କାହ୍ନୁଙ୍କ ବଂଶଧର ଶ୍ରୀମଣ୍ଡଳ ମୁର୍ମୁ ମହାଶୟଙ୍କୁ ସମ୍ମାନୀତ କରିବାର ସୌଭାଗ୍ୟ ମଧ୍ୟ ପାଇଥିଲି। ସେମାନଙ୍କ ଉପସ୍ଥିତି ଏହି କାର୍ଯ୍ୟକ୍ରମର ଗୁରୁତ୍ୱକୁ ଆହୁରି ବୃଦ୍ଧି କରିଛି।

ବନ୍ଧୁଗଣ,

ଧରତୀ ଆବା ବିର୍ସା ମୁଣ୍ଡାଙ୍କ ଏହି ମହାନ ସ୍ମୃତିରେ, ଆଜି ଛଅ ହଜାର କୋଟି ଟଙ୍କାରୁ ଅଧିକ ମୂଲ୍ୟର ପ୍ରକଳ୍ପର ଶିଳାନ୍ୟାସ ଏବଂ ଉଦଘାଟନ କରାଯାଇଛି। ଏଥିରେ ମୋର ଆଦିବାସୀ ଭାଇଭଉଣୀମାନଙ୍କ ପାଇଁ ପ୍ରାୟ ଦେଢ଼ ଲକ୍ଷ ସ୍ଥାୟୀ ଘର, ଆଦିବାସୀ ପିଲାମାନଙ୍କ ଭବିଷ୍ୟତ ପାଇଁ ସ୍କୁଲ, ଛାତ୍ରାବାସ, ଆଦିବାସୀ ମହିଳାଙ୍କ ପାଇଁ ସ୍ୱାସ୍ଥ୍ୟ ସୁବିଧା, ଆଦିବାସୀ ଅଞ୍ଚଳକୁ ସଂଯୋଗ କରୁଥିବା ଶହ ଶହ କିଲୋମିଟର ରାସ୍ତା, ଆଦିବାସୀ ସଂସ୍କୃତି ପାଇଁ ସମର୍ପିତ ସଂଗ୍ରହାଳୟ ଏବଂ ଗବେଷଣା କେନ୍ଦ୍ର ପାଇଁ ଅନୁମୋଦନ ଆଦି ଅନ୍ତର୍ଭୁକ୍ତ। ଦେବ ଦୀପାବଳିରେ ଆଜି ୧୧,୦୦୦ ରୁ ଅଧିକ ଆଦିବାସୀ ପରିବାର ସେମାନଙ୍କର ନୂତନ ଘରେ ପ୍ରବେଶ କରୁଛନ୍ତି। ଏଥିପାଇଁ ମୁଁ ସମସ୍ତ ଆଦିବାସୀ ପରିବାରକୁ ହୃଦୟର ସହିତ ଅଭିନନ୍ଦନ ଜଣାଉଛି।

ବନ୍ଧୁଗଣ,

ଯେତେବେଳେ ଆମେ ଜନଜାତି ଗୌରବ ଦିବସ ପାଳନ କରୁଛୁ ଏବଂ ଜନଜାତି ଗୌରବ ବର୍ଷ ଆରମ୍ଭ କରୁଛୁ, ସେତେବେଳେ ଏହା ବୁଝିବା ଗୁରୁତ୍ୱପୂର୍ଣ୍ଣ ଯେ, ଏହି କାର୍ଯ୍ୟକ୍ରମ କାହିଁକି ଆବଶ୍ୟକ ଥିଲା। ଏହା ଇତିହାସରେ ଏକ ମହାନ ଅନ୍ୟାୟକୁ ସଂଶୋଧନ କରିବାର ଏକ ସଚ୍ଚୋଟ ପ୍ରୟାସ। ସ୍ୱାଧୀନତା ପରେ ଆଦିବାସୀ ସମ୍ପ୍ରଦାୟର ଅବଦାନକୁ ଇତିହାସରେ ସ୍ୱୀକୃତି ଦିଆଯାଇ ନଥିଲା। ଆଦିବାସୀ ସମ୍ପ୍ରଦାୟ ହିଁ ରାଜକୁମାର ରାମଙ୍କୁ ଭଗବାନ ରାମରେ ପରିଣତ କରିଥିଲେ। ଆଦିବାସୀ ସମ୍ପ୍ରଦାୟ ହେଉଛି ଭାରତର ସଂସ୍କୃତି ଏବଂ ଆଦିବାସୀମାନେ ସ୍ୱାଧୀନତାକୁ ସୁରକ୍ଷା  ଦେବା ପାଇଁ ଶତାବ୍ଦୀ ଧରି ଚାଲିଥିବା ଲଢ଼େଇର ନେତୃତ୍ୱ ନେଇଥିଲେ। ତଥାପି, ସ୍ୱାଧୀନତା ପରବର୍ତ୍ତୀ ଦଶନ୍ଧିଗୁଡ଼ିକରେ, ସ୍ୱାର୍ଥପର ରାଜନୀତି ଦ୍ୱାରା ଆଦିବାସୀ ଇତିହାସରୁ ଏହି ଅମୂଲ୍ୟ ଅବଦାନକୁ ଲିଭାଇ ଦେବା ପାଇଁ ଚେଷ୍ଟା କରାଯାଇଥିଲା, ଯାହା ଦ୍ୱାରା କେବଳ ଗୋଟିଏ ଦଳକୁ ଭାରତର ସ୍ୱାଧୀନତାର ଶ୍ରେୟ ଦିଆଯାଇଥିଲା। କିନ୍ତୁ ଯଦି କେବଳ ଗୋଟିଏ ଦଳ କିମ୍ବା ପରିବାର ସ୍ୱାଧୀନତା ହାସଲ କରିଥିଲା, ତେବେ ବିର୍ସା ମୁଣ୍ଡାଙ୍କ ନେତୃତ୍ୱରେ ଉଲଗୁଲାନ ଆନ୍ଦୋଳନ କାହିଁକି ହେଲା? ସନ୍ଥଲ ବିଦ୍ରୋହ କ’ଣ ଥିଲା? କୋଲ ବିଦ୍ରୋହ କ’ଣ ଥିଲା? ଆମେ କ’ଣ ମହାରାଣା ପ୍ରତାପଙ୍କ ସହିତ ଲଢ଼ିଥିବା ବୀର ଭୀଲମାନଙ୍କୁ ଭୁଲିପାରିବା? ସାହ୍ୟାଦ୍ରିର ଘନ ଜଙ୍ଗଲରେ ଛତ୍ରପତି ଶିବାଜୀ ମହାରାଜଙ୍କୁ ସଶକ୍ତ କରିଥିବା ଆଦିବାସୀ ଭାଇ–ଭଉଣୀମାନଙ୍କୁ କିଏ ଭୁଲିପାରିବ? ଆଲୁରି ସୀତାରାମ ରାଜୁଙ୍କ ଅଧୀନରେ ଆଦିବାସୀମାନଙ୍କ ଦ୍ୱାରା ଭାରତ ମାତାର ସେବାକୁ କେହି ଅଣଦେଖା କରିପାରିବେ କି? କିମ୍ବା ତିଲକା ମାଞ୍ଝି, ସିଦ୍ଧୁ କାହ୍ନୁ, ବୁଧୁ ଭଗତ, ଧୀରଜ ସିଂହ, ତେଲଙ୍ଗା ଖାରିଆ, ଗୋବିନ୍ଦଙ୍କ ସାହସିକତାକୁ କେହି ଅଣଦେଖା କରିପାରିବେ କି? ଗୁରୁ, ତେଲେଙ୍ଗାନାର ରାମଜୀ ଗୋଣ୍ଡ, ବାଦଲ ଭୋଇ, ରାଜା ଶଙ୍କର ଶାହ, ମଧ୍ୟପ୍ରଦେଶର କୁମାର ରଘୁନାଥ ଶାହ, ତାନ୍ତ୍ୟା ଭୀଲ, ନୀଳାମ୍ବର-ପିତାମ୍ବର, ବୀର ନାରାୟଣ ସିଂହ, ଦିବା କିଶୁନ ସୋରେନ, ଜାତ୍ରା ଭଗତ, ଲକ୍ଷ୍ମଣ ନାୟକ ଏବଂ ମିଜୋରାମର ମହାନ ସ୍ୱାଧୀନତା ସଂଗ୍ରାମୀ, ରୋପୁଇଲିଆନି ମହାଶୟ, ରାଜମୋହିନୀ ଦେବୀ, ରାଣୀ ଗୈଦିନଲିଉ, ବୀର ବାଲିକା କାଳୀବାଈ ଏବଂ ଗୋଣ୍ଡୱାନାର ରାଣୀ ଦୁର୍ଗାବତୀଙ୍କ ସାହସିକତାକୁ କେହି ଭୁଲିପାରିବେ କି? ଏହି ଅଗଣିତ ଆଦିବାସୀ ନାୟକମାନଙ୍କୁ କେହି କିପରି ଭୁଲିପାରିବେ? ମାନଗଡ଼ରେ ହୋଇଥିବା ହତ୍ୟାକାଣ୍ଡକୁ ଆମେ ଭୁଲିପାରିବା କି, ଯେଉଁଠାରେ ମୋର ହଜାର ହଜାର ଆଦିବାସୀ ଭାଇଭଉଣୀ ବ୍ରିଟିଶମାନଙ୍କ ଦ୍ୱାରା ସହିଦ ହୋଇଥିଲେ?

ବନ୍ଧୁଗଣ,

ସଂସ୍କୃତି ହେଉ କି ସାମାଜିକ ନ୍ୟାୟ, ଆଜିର ଏନ୍‌ଡିଏ ସରକାରଙ୍କ ମାନସିକତା ଅନନ୍ୟ। ମୁଁ ଏହାକୁ କେବଳ ବିଜେପି ନୁହେଁ ବରଂ ସମଗ୍ର ଏନ୍‌ଡିଏର ଭାଗ୍ୟ ବୋଲି ଭାବୁଛି ଯେ, ଆମେ ଦ୍ରୌପଦୀ ମୁର୍ମୁଙ୍କୁ ରାଷ୍ଟ୍ରପତି କରିବାର ସୁଯୋଗ ପାଇଲୁ। ସେ ଦେଶର ପ୍ରଥମ ଆଦିବାସୀ ରାଷ୍ଟ୍ରପତି। ମୋତେ ମନେ ଅଛି ଯେତେବେଳେ ଏନ୍‌ଡିଏ ଦ୍ରୌପଦୀ ମୁର୍ମୁଙ୍କୁ ରାଷ୍ଟ୍ରପତି ପ୍ରାର୍ଥୀ କରିବା ପାଇଁ ନିଷ୍ପତ୍ତି ନେଇଥିଲା, ଆମ ନୀତିଶ ବାବୁ ଦେଶବ୍ୟାପୀ ଲୋକଙ୍କୁ ଏକ ବଡ଼ ବ୍ୟବଧାନରେ ତାଙ୍କର ବିଜୟ ସୁନିଶ୍ଚିତ କରିବା ପାଇଁ ନିବେଦନ କରିଥିଲେ। ପ୍ରଧାନମନ୍ତ୍ରୀ ଜନ ମାନ ଯୋଜନା, ଯାହା ଅଧୀନରେ ଅନେକ ପଦକ୍ଷେପ ଆରମ୍ଭ ହୋଇଛି, ସେଥିପାଇଁ ମଧ୍ୟ ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କୁ ଶ୍ରେୟ ଦିଆଯାଏ। ଯେତେବେଳେ ସେ ଝାଡ଼ଖଣ୍ଡର ରାଜ୍ୟପାଳ ଏବଂ ପରେ ରାଷ୍ଟ୍ରପତି ଥିଲେ, ସେ ପ୍ରାୟତଃ ମୋ ସହିତ ଉପାନ୍ତ ଆଦିବାସୀ ସମ୍ପ୍ରଦାୟ ବିଷୟରେ ଆଲୋଚନା କରୁଥିଲେ। ପୂର୍ବ ସରକାରମାନେ କେବେବି ଏହି ସବୁ ପଛୁଆ ଆଦିବାସୀ ସମ୍ପ୍ରଦାୟ ବିଷୟରେ ଚିନ୍ତା କରିନଥିଲେ। ସେମାନଙ୍କ ଜୀବନର ଅସୁବିଧାକୁ ହ୍ରାସ କରିବା ପାଇଁ, ୨୪,୦୦୦ କୋଟି ଟଙ୍କା ନିବେଶ ସହିତ ପ୍ରଧାନମନ୍ତ୍ରୀ ଜନମାନ ଯୋଜନା ଆରମ୍ଭ କରାଯାଇଥିଲା। ପ୍ରଧାନମନ୍ତ୍ରୀ ଜନମାନ ଯୋଜନା ଦେଶର ସବୁଠାରୁ ପଛୁଆ ଆଦିବାସୀ ବସତିର ବିକାଶ ସୁନିଶ୍ଚିତ କରୁଛି। ଆଜି ଏହି ଯୋଜନାର ଗୋଟିଏ ବର୍ଷ ପୂରଣ ହେଉଛି। ଏହି ସମୟ ମଧ୍ୟରେ, ଆମେ ଏହି ଅବହେଳିତ ଆଦିବାସୀ ସମ୍ପ୍ରଦାୟକୁ ହଜାର ହଜାର ସ୍ଥାୟୀ ଘର ଯୋଗାଇ ଦେଇଛୁ। ଏହି ସମ୍ପ୍ରଦାୟର ବସତିକୁ ସଂଯୋଗ କରିବା ପାଇଁ ଶହ ଶହ କିଲୋମିଟର ରାସ୍ତା ନିର୍ମାଣ କରାଯାଇଛି, ଏବଂ ପଛୁଆ ଆଦିବାସୀ ଅଞ୍ଚଳର ଶହ ଶହ ଗାଁର ପ୍ରତ୍ୟେକ ଘରକୁ ଜଳ ଯୋଗାଣ ସୁନିଶ୍ଚିତ କରାଯାଇଛି।

ବନ୍ଧୁଗଣ,

ଯେଉଁମାନଙ୍କୁ କେହି ଧ୍ୟାନ ଦେଇ ନଥିଲେ, ମୋଦୀ ସେମାନଙ୍କ ସେବା କରନ୍ତି। ପୂର୍ବ ସରକାରଗୁଡ଼ିକର ମନୋଭାବ ଯୋଗୁଁ, ଆଦିବାସୀ ସମ୍ପ୍ରଦାୟ ଦଶନ୍ଧି ଧରି ମୌଳିକ ସୁବିଧାରୁ ବଞ୍ଚିତ ଥିଲା। ଆଦିବାସୀ ଜନସଂଖ୍ୟାର ଏକ ଗୁରୁତ୍ୱପୂର୍ଣ୍ଣ ସଂଖ୍ୟା ଥିବା ଅନେକ ଜିଲ୍ଲା ବିକାଶରେ ପଛୁଆ ଥିଲା। ଯଦି କୌଣସି ଅଧିକାରୀଙ୍କୁ ଦଣ୍ଡିତ କିମ୍ବା ଦଣ୍ଡ ସ୍ୱରୂପ ପୋଷ୍ଟିଂ କରିବାର ଆବଶ୍ୟକତା ଥାଏ, ତେବେ ଏପରି ଜିଲ୍ଲାଗୁଡ଼ିକୁ ସେମାନଙ୍କ ପୋଷ୍ଟିଂ ପାଇଁ ବାଛି ଦିଆଯାଏ। ଏନଡିଏ ସରକାର ପୁରୁଣା ସରକାରଗୁଡ଼ିକର ଏହି ମାନସିକତାକୁ ବଦଳାଇ ଦେଇଛି। ଆମେ ଏହି ଜିଲ୍ଲାଗୁଡ଼ିକୁ ଆକାଂକ୍ଷୀ ଜିଲ୍ଲା ଭାବରେ ଘୋଷଣା କରିଛୁ ଏବଂ ସେଠାକୁ ନୂତନ ଏବଂ ଶକ୍ତିଶାଳୀ ଅଧିକାରୀ ପଠାଇଛୁ। ମୁଁ ସନ୍ତୁଷ୍ଟ ଯେ ଆଜି ଅନେକ ଆକାଂକ୍ଷୀ ଜିଲ୍ଲା ବିଭିନ୍ନ ବିକାଶ ମାପଦଣ୍ଡରେ ଅନ୍ୟ ଜିଲ୍ଲାଗୁଡ଼ିକୁ ପଛରେ ପକାଇ ଦେଇଛନ୍ତି। ଏହା ମୋର ଆଦିବାସୀ ଭାଇ ଏବଂ ଭଉଣୀମାନଙ୍କୁ ବହୁତ ଲାଭ ଦେଇଛି।

ବନ୍ଧୁଗଣ,

ଜନଜାତି କଲ୍ୟାଣ ସର୍ବଦା ଏନଡିଏ ସରକାରଙ୍କ ପ୍ରାଥମିକତା ହୋଇଆସିଛି। ଅଟଳ ବିହାରୀ ବାଜପେୟୀଙ୍କ ନେତୃତ୍ୱରେ ଏନଡିଏ ସରକାର ଆଦିବାସୀ କଲ୍ୟାଣ ପାଇଁ ଏକ ପୃଥକ ମନ୍ତ୍ରଣାଳୟ ଗଠନ କରିଥିଲେ। ଦଶ ବର୍ଷ ପୂର୍ବେ, ଆଦିବାସୀ ଅଞ୍ଚଳ ଏବଂ ପରିବାରର ବିକାଶ ପାଇଁ ବଜେଟ ୨୫,୦୦୦ କୋଟି ଟଙ୍କାରୁ କମ୍ ଥିଲା। ଏକ ଦଶନ୍ଧି ପୂର୍ବର ପରିସ୍ଥିତି ଦେଖନ୍ତୁ – ୨୫,୦୦୦ କୋଟି ଟଙ୍କାରୁ କମ୍। ଆମ ସରକାର ଏହାକୁ ପାଞ୍ଚ ଗୁଣ ବୃଦ୍ଧି କରି ୧.୨୫ ଲକ୍ଷ କୋଟି ଟଙ୍କା କରିଛି। କିଛି ଦିନ ପୂର୍ବରୁ, ଆମେ ଦେଶର ୬୦ ହଜାରରୁ ଅଧିକ ଆଦିବାସୀ ଗ୍ରାମର ବିକାଶ ପାଇଁ ଏକ ସ୍ୱତନ୍ତ୍ର ଯୋଜନା ଆରମ୍ଭ କରିଛୁ। ଧରତୀ ଆବା ଜନଜାତି ଗ୍ରାମ ଉତ୍କୃଷ୍ଟ ଅଭିଯାନ ଅଧୀନରେ, ଆଦିବାସୀ ଗ୍ରାମଗୁଡ଼ିକରେ ପ୍ରାୟ ୮୦,୦୦୦ କୋଟି ଟଙ୍କା ବିନିଯୋଗ କରାଯିବ। ଲକ୍ଷ୍ୟ କେବଳ ଆଦିବାସୀ ସମ୍ପ୍ରଦାୟକୁ ଆବଶ୍ୟକୀୟ ସୁବିଧା ଯୋଗାଇବା ନୁହେଁ ବରଂ ଯୁବକମାନଙ୍କ ପାଇଁ ତାଲିମ ଏବଂ ନିଯୁକ୍ତି ସୁଯୋଗ ସୃଷ୍ଟି କରିବା। ଏହି ଅଭିଯାନ ବିଭିନ୍ନ ସ୍ଥାନରେ ଜନଜାତି ବିପଣନ କେନ୍ଦ୍ର ସ୍ଥାପନ କରିବ, ହୋମଷ୍ଟେ ନିର୍ମାଣରେ ସହାୟତା କରିବ ଏବଂ ତାଲିମ ପ୍ରଦାନ କରିବ। ଏହା ଆଦିବାସୀ ଅଞ୍ଚଳରେ ପର୍ଯ୍ୟଟନକୁ ପ୍ରୋତ୍ସାହିତ କରିବ ଏବଂ ଜଙ୍ଗଲରେ ରହୁଥିବା ଆଦିବାସୀ ପରିବାର ମଧ୍ୟରେ ପରିବେଶ ପର୍ଯ୍ୟଟନକୁ ପ୍ରୋତ୍ସାହିତ କରିବ, ଯାହା ଦ୍ଵାରା ସ୍ଥାନାନ୍ତରଣ ବନ୍ଦ ହେବ ଏବଂ ପର୍ଯ୍ୟଟନ ଅଭିବୃଦ୍ଧିକୁ ପ୍ରୋତ୍ସାହିତ କରାଯିବ।

ବନ୍ଧୁଗଣ,

ଆମର ସରକାର ଆଦିବାସୀ ଐତିହ୍ୟକୁ ସଂରକ୍ଷଣ କରିବା ପାଇଁ ଅନେକ ପଦକ୍ଷେପ ନେଇଛି। ଆଦିବାସୀ କଳା ଏବଂ ସଂସ୍କୃତି ପ୍ରତି ସମର୍ପିତ ଅନେକ ବ୍ୟକ୍ତିଙ୍କୁ ପଦ୍ମ ପୁରସ୍କାରରେ ସମ୍ମାନୀତ କରାଯାଇଛି। ଆମେ ରାଞ୍ଚିରେ ଭଗବାନ ବିର୍ସା ମୁଣ୍ଡାଙ୍କ ନାମରେ ଏକ ମହାସଂଗ୍ରହାଳୟ ଆରମ୍ଭ କରିଛୁ। ମୁଁ ସମସ୍ତ ସ୍କୁଲ ଛାତ୍ରଛାତ୍ରୀଙ୍କୁ ଭଗବାନ ବିର୍ସା ମୁଣ୍ଡାଙ୍କ ପ୍ରତି ସମର୍ପିତ ଏହି ସଂଗ୍ରହାଳୟ ପରିଦର୍ଶନ ଏବଂ ଅଧ୍ୟୟନ କରିବାକୁ ଅନୁରୋଧ କରୁଛି। ମୁଁ ଖୁସି ଯେ, ଆଜି ମଧ୍ୟପ୍ରଦେଶର ଛିନ୍ଦୱାଡ଼ାରେ ବାଦଲ ଭୋଇ ସଂଗ୍ରହାଳୟ ଏବଂ ମଧ୍ୟପ୍ରଦେଶର ଜବଲପୁରରେ ରାଜା ଶଙ୍କର ଶାହ ଏବଂ କୁନୱର ରଘୁନାଥ ଶାହ ସଂଗ୍ରହାଳୟ ଉଦଘାଟନ ହୋଇଛି। ଆଜି ଶ୍ରୀନଗର ଏବଂ ସିକିମରେ ଦୁଇଟି ଆଦିବାସୀ ଗବେଷଣା କେନ୍ଦ୍ର ମଧ୍ୟ ଉଦଘାଟନ କରାଯାଇଛି, ଏବଂ ଭଗବାନ ବିର୍ସା ମୁଣ୍ଡାଙ୍କ ସ୍ମୃତିରେ ସ୍ମାରକୀ ମୁଦ୍ରା ଏବଂ ଡାକ ଟିକେଟ ପ୍ରଚଳନ କରାଯାଇଛି। ଏହି ପ୍ରୟାସ ଦେଶକୁ ଆଦିବାସୀ ସମ୍ପ୍ରଦାୟର ବୀରତ୍ୱ ଏବଂ ଗର୍ବର କଥା ସ୍ମରଣ କରାଇବ।

ବନ୍ଧୁଗଣ,

ଭାରତର ପ୍ରାଚୀନ ଚିକିତ୍ସା ପଦ୍ଧତିରେ ଆଦିବାସୀ ସମ୍ପ୍ରଦାୟର ଗୁରୁତ୍ୱପୂର୍ଣ୍ଣ ଅବଦାନ ରହିଛି। ଏହି ଐତିହ୍ୟକୁ ସଂରକ୍ଷଣ କରାଯାଉଛି ଏବଂ ଭବିଷ୍ୟତ ପିଢ଼ି ପାଇଁ ନୂତନ ପରିମାଣ ଯୋଡାଯାଉଛି। ଏନ୍‌ଡିଏ ସରକାର ଲେହରେ ଜାତୀୟ ସୋୱା ରିଗପା ପ୍ରତିଷ୍ଠାନ ସ୍ଥାପନ କରିଛନ୍ତି ଏବଂ ଅରୁଣାଚଳ ପ୍ରଦେଶରେ ଉତ୍ତର–ପୂର୍ବ ଆୟୁର୍ବେଦ ଏବଂ ଲୋକ ଔଷଧ ଗବେଷଣା ପ୍ରତିଷ୍ଠାନକୁ ଉନ୍ନତ କରିଛନ୍ତି। ଭାରତରେ ଡବ୍ଲ୍ୟୁଏଚ୍‌ଓ ଗ୍ଲୋବାଲ ସେଣ୍ଟର ଫର ଟ୍ରାଡିସ୍‌ନାଲ ମେଡିସିନ୍‌ ମଧ୍ୟ ପ୍ରତିଷ୍ଠା କରାଯାଉଛି। ଏହା ଭାରତର ଆଦିବାସୀ ସମ୍ପ୍ରଦାୟର ପାରମ୍ପରିକ ଚିକିତ୍ସା ପଦ୍ଧତିକୁ ବିଶ୍ୱବ୍ୟାପୀ ପ୍ରସାର କରିବାରେ ସାହାଯ୍ୟ କରିବ।

ବନ୍ଧୁଗଣ,

ଆମର ସରକାର ଆଦିବାସୀ ସମ୍ପ୍ରଦାୟ ପାଇଁ ଶିକ୍ଷା, ନିଯୁକ୍ତି ଏବଂ ସ୍ୱାସ୍ଥ୍ୟସେବା ଉପରେ ଅଧିକ ଧ୍ୟାନ ଦେଉଛି। ଆଜି, ଡାକ୍ତର, ଇଞ୍ଜିନିୟର, ସୈନିକ କିମ୍ବା ବିମାନ ପାଇଲଟ୍ ହେବା ହେଉ, ଆଦିବାସୀ ପୁଅଝିଅମାନେ ପ୍ରତ୍ୟେକ ବୃତ୍ତିରେ ଉତ୍କର୍ଷ ହାସଲ କରୁଛନ୍ତି। ଏହା ସମ୍ଭବ ହୋଇଛି କାରଣ ଗତ ଦଶନ୍ଧି ମଧ୍ୟରେ, ଆଦିବାସୀ ଅଞ୍ଚଳରେ ସ୍କୁଲଠାରୁ ଉଚ୍ଚଶିକ୍ଷା ପର୍ଯ୍ୟନ୍ତ ଉତ୍ତମ ଶିକ୍ଷା ସୁଯୋଗ ସୃଷ୍ଟି ହୋଇଛି। ସ୍ୱାଧୀନତାର ଛଅ କିମ୍ବା ସାତ ଦଶନ୍ଧି ପରେ ମଧ୍ୟ, ଦେଶରେ କେବଳ ଗୋଟିଏ କେନ୍ଦ୍ରୀୟ ଆଦିବାସୀ ବିଶ୍ୱବିଦ୍ୟାଳୟ ଥିଲା। ଗତ ୧୦ ବର୍ଷ ମଧ୍ୟରେ, ଏନ୍‌ଡିଏ ସରକାର ଦେଶକୁ ଦୁଇଟି ନୂତନ କେନ୍ଦ୍ରୀୟ ଆଦିବାସୀ ବିଶ୍ୱବିଦ୍ୟାଳୟ ଦେଇଛନ୍ତି। ଗୁରୁତ୍ୱପୂର୍ଣ୍ଣ ଆଦିବାସୀ ଜନସଂଖ୍ୟା ଥିବା ଜିଲ୍ଲାଗୁଡ଼ିକରେ ଅନେକ ଡିଗ୍ରୀ କଲେଜ, ଇଞ୍ଜିନିୟରିଂ କଲେଜ ଏବଂ ଆଇଟିଆଇ ପ୍ରତିଷ୍ଠା କରାଯାଇଛି। ଗତ ୧୦ ବର୍ଷ ମଧ୍ୟରେ, ଆଦିବାସୀ ଜିଲ୍ଲାଗୁଡ଼ିକରେ ୩୦ଟି ନୂତନ ମେଡିକାଲ କଲେଜ ପ୍ରତିଷ୍ଠିତ ହୋଇଛି, ଏବଂ ଆହୁରି ଅନେକ ପାଇଁ କାର୍ଯ୍ୟ ଜାରି ରହିଛି। ଏଠାରେ ଜାମୁଇରେ ମଧ୍ୟ ଏକ ନୂତନ ମେଡିକାଲ କଲେଜ ନିର୍ମାଣ କରାଯାଉଛି। ଆମେ ସାରା ଦେଶରେ ୭୦୦ ରୁ ଅଧିକ ଏକଲବ୍ୟ ସ୍କୁଲର ଏକ ସୁଦୃଢ଼ ​​ନେଟୱାର୍କ ନିର୍ମାଣ କରୁଛୁ।

ବନ୍ଧୁଗଣ,

ଡାକ୍ତରୀ, ଇଞ୍ଜିନିୟରିଂ ଏବଂ ବୈଷୟିକ ଶିକ୍ଷାରେ ଆଦିବାସୀ ସମ୍ପ୍ରଦାୟ ପାଇଁ ଭାଷା ଏକ ଗୁରୁତ୍ୱପୂର୍ଣ୍ଣ ପ୍ରତିବନ୍ଧକ ହୋଇଛି। ଆମ ସରକାର ମାତୃଭାଷାରେ ପରୀକ୍ଷାର ବିକଳ୍ପ ପ୍ରଦାନ କରିଛନ୍ତି। ଏହି ନିଷ୍ପତ୍ତିଗୁଡ଼ିକ ଆଦିବାସୀ ସମ୍ପ୍ରଦାୟର ପିଲାମାନଙ୍କୁ ନୂତନ ଆତ୍ମବିଶ୍ୱାସ ଦେଇଛି ଏବଂ ସେମାନଙ୍କର ସ୍ୱପ୍ନକୁ ଉଚ୍ଚ କରିଛି।

ବନ୍ଧୁଗଣ,

ଗତ ଦଶନ୍ଧିରେ, ଆଦିବାସୀ ଯୁବକମାନେ କ୍ରୀଡାରେ ମଧ୍ୟ ଉତ୍କର୍ଷ ହାସଲ କରିଛନ୍ତି। ଜନଜାତି ଖେଳାଳିମାନେ ଅନ୍ତର୍ଜାତୀୟ ଟୁର୍ଣ୍ଣାମେଣ୍ଟରେ ଭାରତ ପାଇଁ ପଦକ ଜିତିବାରେ ଗୁରୁତ୍ୱପୂର୍ଣ୍ଣ ଯୋଗଦାନ ଦେଇଛନ୍ତି। ଏହି ପ୍ରତିଭାକୁ ସ୍ୱୀକୃତି ଦେଇ, ଆଦିବାସୀ ଅଞ୍ଚଳରେ କ୍ରୀଡା ସୁବିଧା ବିସ୍ତାର କରାଯାଉଛି। ଖେଲୋ ଇଣ୍ଡିଆ ଅଭିଯାନ ଅଧୀନରେ, ଆଦିବାସୀ ବହୁଳ ଜିଲ୍ଲାଗୁଡ଼ିକରେ ଆଧୁନିକ କ୍ରୀଡା କମ୍ପ୍ଲେକ୍ସ ନିର୍ମାଣ କରାଯାଉଛି। ଭାରତର ପ୍ରଥମ ଜାତୀୟ କ୍ରୀଡା ବିଶ୍ୱବିଦ୍ୟାଳୟ ମଧ୍ୟ ମଣିପୁରରେ ପ୍ରତିଷ୍ଠିତ ହୋଇଛି।

ବନ୍ଧୁଗଣ,

ସ୍ୱାଧୀନତାର ୭୦ ବର୍ଷ ପରେ, ବାଉଁଶ ସହିତ ଜଡିତ ଆଇନ କଠୋର ଥିଲା, ଯାହା ଆଦିବାସୀ ସମ୍ପ୍ରଦାୟକୁ ସବୁଠାରୁ ଅଧିକ ପ୍ରଭାବିତ କରିଥିଲା। ଆମ ସରକାର ବାଉଁଶ କାଟିବା ସହିତ ଜଡିତ ଆଇନକୁ ସରଳ କରିଥିଲା। ପୂର୍ବ ସରକାରଙ୍କ ଅଧୀନରେ, କେବଳ ୮-୧୦ ବନଜାତ ଦ୍ରବ୍ୟକୁ ଏମ୍‌ଏସ୍‌ପି ପରିସରଭୁକ୍ତ କରାଯାଇଥିଲା। ଏହା ଏନ୍‌ଡିଏ ସରକାର ଯାହା ପ୍ରାୟ ୯୦ ବନଜାତ ଦ୍ରବ୍ୟକୁ ଏମ୍‌ଏସ୍‌ପି ପରିସରଭୁକ୍ତ କରିଛି। ଆଜି, ସାରା ଦେଶରେ ୪,୦୦୦ ରୁ ଅଧିକ ବନ ଧନ କେନ୍ଦ୍ର କାର୍ଯ୍ୟ କରୁଛି, ଯେଉଁଥିରେ ୧୨ ଲକ୍ଷ ଆଦିବାସୀ ଭାଇଭଉଣୀ ସାମିଲ ଅଛନ୍ତି। ସେମାନେ ଜୀବିକା ନିର୍ବାହର ଏକ ଉତ୍ତମ ଉପାୟ ପାଇଛନ୍ତି।

ବନ୍ଧୁଗଣ,

ଲକ୍ଷପତି ଦିଦି ଅଭିଯାନ ଆରମ୍ଭ ହେବା ପରଠାରୁ, ପ୍ରାୟ ୨୦ ଲକ୍ଷ ଆଦିବାସୀ ଭଉଣୀ ଲକ୍ଷପତି ଦିଦି ହୋଇଛନ୍ତି। ଏହାର ଅର୍ଥ ନୁହେଁ ଯେ, ସେମାନେ ଥରେ ମାତ୍ର ଏକ ଲକ୍ଷ ଟଙ୍କା ରୋଜଗାର କରିଛନ୍ତି; ବରଂ ସେମାନେ ପ୍ରତିବର୍ଷ ଏକ ଲକ୍ଷ ଟଙ୍କାରୁ ଅଧିକ ରୋଜଗାର କରନ୍ତି। ଅନେକ ଆଦିବାସୀ ପରିବାର ପୋଷାକ, ଖେଳଣା ଏବଂ ସାଜସଜ୍ଜା ସାମଗ୍ରୀ ଭଳି ସୁନ୍ଦର ଜିନିଷ ତିଆରି କରିବାରେ ନିୟୋଜିତ ଅଛନ୍ତି। ସେମାନଙ୍କୁ ସମର୍ଥନ କରିବା ପାଇଁ, ଆମେ ପ୍ରମୁଖ ସହରଗୁଡ଼ିକରେ ଏପରି ଉତ୍ପାଦ ପାଇଁ ହାଟ ବଜାର ଆୟୋଜନ କରୁଛୁ। ଏଠାରେ ଏକ ବଡ଼ ହାଟ ମଧ୍ୟ ଲାଗିଛି ଏବଂ ଏହା ଦେଖିବା ଯୋଗ୍ୟ। ମୁଁ ସେଠାରେ ଅଧ ଘଣ୍ଟା ବିତାଇଲି, ଭାରତର ବିଭିନ୍ନ ଜିଲ୍ଲାରୁ ଆମର ଆଦିବାସୀ ଭାଇଭଉଣୀମାନଙ୍କ ଦ୍ୱାରା ନିର୍ମିତ ଉଲ୍ଲେଖନୀୟ ଜିନିଷ ଦେଖି ଆଶ୍ଚର୍ଯ୍ୟ ହୋଇଗଲି। ମୁଁ ଆପଣମାନଙ୍କୁ ସମସ୍ତଙ୍କୁ ପରିଦର୍ଶନ କରିବାକୁ ଏବଂ ଯଦି ପ୍ରେରଣା ପାଏ, ତେବେ କିଣିବାକୁ ଅନୁରୋଧ କରୁଛି। ଆମେ ଏହି ଉତ୍ପାଦଗୁଡ଼ିକ ପାଇଁ ଏକ ବିଶ୍ୱସ୍ତରୀୟ ଅନଲାଇନ୍ ବଜାର ମଧ୍ୟ ସୃଷ୍ଟି କରୁଛୁ। ଯେତେବେଳେ ମୁଁ ବିଦେଶୀ ନେତାମାନଙ୍କୁ ଉପହାର ପ୍ରଦାନ କରେ, ମୁଁ ପ୍ରାୟତଃ ଆମର ଆଦିବାସୀ ଭାଇଭଉଣୀମାନଙ୍କ ଦ୍ୱାରା ନିର୍ମିତ ଜିନିଷଗୁଡ଼ିକୁ ଅନ୍ତର୍ଭୁକ୍ତ କରେ। ସମ୍ପ୍ରତି, ମୁଁ ପ୍ରମୁଖ ବିଦେଶୀ ନେତାମାନଙ୍କୁ ଝାଡ଼ଖଣ୍ଡର ସୋହରାଇ ଚିତ୍ର, ମଧ୍ୟ ପ୍ରଦେଶର ଗୋଣ୍ଡ ଚିତ୍ର ଏବଂ ମହାରାଷ୍ଟ୍ରର ୱାର୍ଲି ଚିତ୍ର ଉପହାର ଦେଇଛି। ଏବେ, ଏହି କଳାକୃତିଗୁଡ଼ିକ ସେମାନଙ୍କ କାର୍ଯ୍ୟାଳୟର କାନ୍ଥରେ ସଜାଯାଇ ଆପଣଙ୍କର ପ୍ରତିଭା ଏବଂ କଳାର ପ୍ରସିଦ୍ଧି ସାରା ବିଶ୍ୱରେ ପ୍ରସାରିତ ହେବ।

ବନ୍ଧୁଗଣ,

ପରିବାର ସୁସ୍ଥ ରହିଲେ ହିଁ ଶିକ୍ଷା ଏବଂ ରୋଜଗାରର ଲାଭ ଉପଲବ୍ଧ ହୋଇପାରିବ। ଆଦିବାସୀ ସମ୍ପ୍ରଦାୟ ପାଇଁ ସିକଲ ସେଲ ଆନେମିଆ ଏକ ଗୁରୁତ୍ୱପୂର୍ଣ୍ଣ ଚ୍ୟାଲେଞ୍ଜ ହୋଇଛି। ଆମ ସରକାର ଏହାକୁ ମୁକାବିଲା କରିବା ପାଇଁ ଏକ ଜାତୀୟ ଅଭିଯାନ ଆରମ୍ଭ କରିଛନ୍ତି, ଯାହା ଏକ ବର୍ଷ ଧରି ଚାଲିଛି। ଏହି ସମୟ ମଧ୍ୟରେ, ପ୍ରାୟ ୪.୫ କୋଟି ଲୋକଙ୍କର ସ୍କ୍ରିନିଂ କରାଯାଇଛି। ଆଦିବାସୀ ପରିବାରଗୁଡ଼ିକୁ ଅନ୍ୟାନ୍ୟ ଚିକିତ୍ସା ପାଇଁ ଦୂରକୁ ଯିବାକୁ ନପଡ଼ୁ, ଏଥିପାଇଁ ଅନେକ ଆୟୁଷ୍ମାନ ଆରୋଗ୍ୟ ମନ୍ଦିର ସ୍ଥାପନ କରାଯାଉଛି। ସବୁଠାରୁ ଦୂରବର୍ତ୍ତୀ ଅଞ୍ଚଳରେ ମୋବାଇଲ୍ ମେଡିକାଲ୍ ୟୁନିଟ୍ ମଧ୍ୟ ନିୟୋଜିତ କରାଯାଉଛି।

ବନ୍ଧୁଗଣ,

ଆଜି, ଭାରତ ଜଳବାୟୁ ପରିବର୍ତ୍ତନ ଏବଂ ପରିବେଶ ସୁରକ୍ଷା ବିରୁଦ୍ଧରେ ଲଢ଼େଇରେ ବିଶ୍ୱସ୍ତରରେ ଏକ ପ୍ରମୁଖ ନାମ ପାଲଟିଛି। କାରଣ ଆଦିବାସୀ ସମ୍ପ୍ରଦାୟର ମୂଳ ମୂଲ୍ୟବୋଧ ଆମକୁ ସର୍ବଦା ପ୍ରକୃତି ସହିତ ସମନ୍ୱୟରେ ରହିବାକୁ ଶିଖାଇଛି। ମୁଁ ଆମର ପ୍ରକୃତିପ୍ରେମୀ ଆଦିବାସୀ ସମାଜର ଶିକ୍ଷାକୁ ବିଶ୍ୱ ସହିତ ବାଣ୍ଟିବାକୁ ଚେଷ୍ଟା କରେ। ଆଦିବାସୀ ସମ୍ପ୍ରଦାୟ ସୂର୍ଯ୍ୟ, ପବନ ଏବଂ ଗଛ ପୂଜା କରେ। ଏହି ପବିତ୍ର ଦିନରେ, ମୁଁ ଏହା କହିବାକୁ ଚାହୁଁଛି ଯେ, ଭଗବାନ ବିର୍ସା ମୁଣ୍ଡାଙ୍କ ୧୫୦ ତମ ଜନ୍ମବାର୍ଷିକୀ ପାଳନ ଅବସରରେ ଦେଶର ଆଦିବାସୀ ବହୁଳ ଜିଲ୍ଲାଗୁଡ଼ିକରେ ବିର୍ସା ମୁଣ୍ଡା ଜନଜାତି ଗୌରବ ଉପବନ (ଆଦିବାସୀ ଗୌରବ ଉଦ୍ୟାନ) ପ୍ରତିଷ୍ଠିତ ହେବ। ଏହି ପ୍ରତ୍ୟେକ ବିର୍ସା ମୁଣ୍ଡା ଜନଜାତି ଗୌରବ ଉପବନରେ ୫୦୦-୧,୦୦୦ ଗଛ ଲଗାଯିବ। ମୁଁ ବିଶ୍ୱାସ କରୁଛି ଯେ, ସମସ୍ତେ ଏହି ପଦକ୍ଷେପକୁ ସମର୍ଥନ କରିବେ ଏବଂ ଯୋଗଦାନ ଦେବେ।

ବନ୍ଧୁଗଣ,

ଭଗବାନ ବିର୍ସା ମୁଣ୍ଡାଙ୍କ ଜନ୍ମବାର୍ଷିକୀ ପାଳନ ଆମକୁ ଗୁରୁତ୍ୱପୂର୍ଣ୍ଣ ଲକ୍ଷ୍ୟ ସ୍ଥିର କରିବାକୁ ପ୍ରେରଣା ଦିଏ। ଏକାଠି, ଆମେ ଆଦିବାସୀ ନୀତି ଆଧାରରେ ଏକ ନୂତନ ଭାରତର ମୂଳଦୁଆ ପକାଇବା। ଆମେ ଆଦିବାସୀ ସମ୍ପ୍ରଦାୟର ଐତିହ୍ୟକୁ ସଂରକ୍ଷଣ କରିବୁ ଏବଂ ଶତାବ୍ଦୀ ଧରି ସେମାନେ ସୁରକ୍ଷିତ ରଖିଥିବା ପରମ୍ପରାରୁ ଶିଖିବୁ। ଏହା କରିବା ଦ୍ୱାରା, ଆମେ ବାସ୍ତବରେ ଏକ ଶକ୍ତିଶାଳୀ, ସମୃଦ୍ଧ ଏବଂ ସକ୍ଷମ ଭାରତ ନିର୍ମାଣ କରିବୁ। ପୁନର୍ବାର, ମୁଁ ଜନଜାତି ଗୌରବ ଦିବସରେ ଆପଣମାନଙ୍କୁ ମୋର ହୃଦୟରୁ ଶୁଭେଚ୍ଛା ଜଣାଉଛି। ପୁଣି ଥରେ, ଆପଣମାନେ ମୋ ପରେ ପୁନରାବୃତ୍ତି କରିବେ –

ମୁଁ ଭଗବାନ ବିର୍ସା ମୁଣ୍ଡା କହିବି – ଆପଣମାନେ କହିବେ ଅମର ରହେ, ଅମର ରହେ!

ଭଗବାନ ବିର୍ସା ମୁଣ୍ଡା – ଅମର ରହେ, ଅମର ରହେ!

ଭଗବାନ ବିର୍ସା ମୁଣ୍ଡା – ଅମର ରହେ, ଅମର ରହେ!

ଭଗବାନ ବିର୍ସା ମୁଣ୍ଡା – ଅମର ରହେ, ଅମର ରହେ!

ଭଗବାନ ବିର୍ସା ମୁଣ୍ଡା – ଅମର ରହେ, ଅମର ରହେ!

ଆପଣମାନଙ୍କୁ ବହୁତ ବହୁତ ଧନ୍ୟବାଦ!

*****

MT