ପିଏମଇଣ୍ଡିଆ

ସଂସଦରେ ଦୀର୍ଘଦିନ ଧରି ପଡ଼ିରହିଥିବା ବୃହତ ବନ୍ଦର ପ୍ରାଧିକରଣ ବିଧେୟକ 2016ରେ ସରକାରୀ ସମ୍ବଳକୁ ସାମିଲ କରିବା ଲାଗି ଆବଶ୍ୟକ ପରିବର୍ତ୍ତନକୁ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ଅଧ୍ୟକ୍ଷତାରେ ଅନୁଷ୍ଠିତ କେନ୍ଦ୍ର କ୍ୟାବିନେଟ ବୈଠକରେ ଅନୁମୋଦନ କରାଯାଇଛି । ସଂଶୋଧନ ସମ୍ପର୍କିତ ସଂସଦୀୟ ସ୍ଥାୟୀ ସମିତିର ସୁପାରିସକ୍ରମେ ଏହି ସଂଶୋଧନ କରାଯାଇଛି ।

ନିମ୍ନଲିଖିତ ପରିବର୍ତ୍ତନକୁ ଏଥିରେ ସାମିଲ କରାଯାଇଛି:

1. ବନ୍ଦରରେ କାର୍ଯ୍ୟରତ କର୍ମଚାରୀମାନଙ୍କ ମଧ୍ୟରୁ ବନ୍ଦର ପ୍ରାଧିକରଣ ବୋର୍ଡରେ ନିଯୁକ୍ତ ହୋଇଥିବା ଶ୍ରମିକ ପ୍ରତିନିଧିଙ୍କ ସଂଖ୍ୟା ଜଣେରୁ ଦୁଇ ଜଣଙ୍କୁ ବଢ଼ାଇ ଦିଆଯାଇଛି ।
2. କର୍ମଚାରୀଙ୍କ ସ୍ୱାର୍ଥର ପ୍ରତିନିଧିତ୍ୱ କରିବା ଲାଗି ନିଯୁକ୍ତ ହେଉଥିବା ସଦସ୍ୟ 3 ବର୍ଷର ଏକ କାର୍ଯ୍ୟକାଳ ନିମନ୍ତେ ପଦବୀରେ ରହିବେ ଏବଂ ଲଗାତାର ଦୁଇ ଥରରୁ ଅଧିକ ଅବଧି ପର୍ଯ୍ୟନ୍ତ ରହିପାରିବେ ନାହିଁ । ବୋର୍ଡରେ ତାଙ୍କର ସଦସ୍ୟତା ସେମାନଙ୍କ ସେବାନିବୃତ ହେବା ସହିତ ଶେଷ ହୋଇଯିବ ।
3. ବନ୍ଦର ପ୍ରାଧିକରଣ ବୋର୍ଡରେ ସ୍ୱାଧୀନ ସଦସ୍ୟଙ୍କ ସଂଖ୍ୟା ସର୍ବନିମ୍ନ ଦୁଇ ଜଣ ଏବଂ ସର୍ବାଧିକ 4 ଜଣ ହେବ ।
4. ବୃହତ ବନ୍ଦର ନ୍ୟାସ ଅଧିନିୟମ 1963 ଅନ୍ତର୍ଗତ ପ୍ରତ୍ୟେକ ବ୍ୟକ୍ତି, ଯେକି ନ୍ୟାସ ବୋର୍ଡ ଠାରୁ ଏପରି କୌଣସି ତାରିଖ ପୂର୍ବରୁ ଅବସର ନେବାର ଲାଭ ହାସଲ କରୁଥିବେ, ସେ ବୋର୍ଡରୁ ସେପରି ଲାଭ ପାଇଚାଲିଥିବେ ।
5. ପ୍ରତ୍ୟେକ ବୃହତ ବନ୍ଦର ବୋର୍ଡ କୌଣସି ବିକାଶ ଅଥବା ବନ୍ଦର ସୀମା ଅନ୍ତର୍ଗତ ଏବଂ ସେ ସମ୍ପର୍କିତ ଜମିରେ ନିର୍ମାଣ କରାଯାଇଥିବା ଭିତ୍ତିଭୂମି ଏବଂ ପ୍ରତିଷ୍ଠା କରାଯିବାକୁ ଥିବା ଭିତ୍ତିଭୂମି ସମ୍ପର୍କରେ ସ୍ୱତନ୍ତ୍ର ମାଷ୍ଟର ପ୍ଲାନ ପ୍ରସ୍ତୁତ କରିବା ଲାଗି ହକଦାର । ଏଥିସହିତ ମାଷ୍ଟର ପ୍ଲାନରେ କୌଣସି ସ୍ଥାନୀୟ କିମ୍ବା ରାଜ୍ୟ ସରକାରଙ୍କ କୌଣସି ପ୍ରାଧିକରଣ, ଯାହାବି ହୋଇଥାଉ, ସେଥିରେ ନିୟମ ଲାଗୁ ହେବ ନାହିଁ ।
6. ପିପିପି ପ୍ରକଳ୍ପ ଲାଗି ଅଧିନିୟମ ଲାଗୁ ହୋବରେ ରିହାତି ପ୍ରାପ୍ତକାରୀ ବଜାରର ସର୍ତ୍ତ ଉପରେ ଶୁଳ୍କ ନିର୍ଦ୍ଧାରଣ କରିବା ଲାଗି ସ୍ୱାଧୀନ ହେବ ।
7. ଏହି ଅଧିନିୟମର ବ୍ୟବସ୍ଥା ଅନ୍ତର୍ଗତ ବୋର୍ଡ ଦ୍ୱାରା କିମ୍ବା ବୋର୍ଡ ପକ୍ଷରୁ ପ୍ରାପ୍ତ ସମସ୍ତ ଅର୍ଥ ବନ୍ଦରର ସେହି ସାଧାରଣ ଏକାଉଣ୍ଟ ଏବଂ ଏକାଉଣ୍ଟଗୁଡ଼ିକରେ ଜମା କରାଯିବ ଯାହା ବୋର୍ଡ ଦ୍ୱାରା ଅର୍ଥମନ୍ତ୍ରଣାଳୟ, ଭାରତ ସରକାରଙ୍କ ଦିଗଦର୍ଶନ ଅନୁଯାୟୀ ସମୟ ବ୍ୟବଧାନରେ କୌଣସି ରାଷ୍ଟ୍ରାୟତ ବ୍ୟାଙ୍କରେ ଖୋଲାଯାଇଛି ।
8. କ୍ଷମତାପ୍ରାପ୍ତ ବୋର୍ଡର ପଦବୀଧାରୀ ଅଧିକାରୀ ଏବଂ ସଦସ୍ୟମାନଙ୍କ ନିଯୁକ୍ତି ଚୟନ ସମିତିର ସୁପାରିସ ଉପରେ କେନ୍ଦ୍ର ସରକାରଙ୍କ ଦ୍ୱାରା କରାଯାଇଥାଏ ।
9. କ୍ଷମତାପ୍ରାପ୍ତ ବୋର୍ଡର ପଦବୀଧାରୀ ଅଧିକାରୀ କିମ୍ବା କୌଣସି ସଦସ୍ୟଙ୍କୁ ନିର୍ଦ୍ଧାରିତ ପ୍ରକ୍ରିୟାରେ ଗାଦିଚ୍ୟୁତ କରିବାର ଅଧିକାର କେନ୍ଦ୍ର ସରକାରଙ୍କ ନିକଟରେ ରହିଛି ।
10. ନିରସ୍ତ୍ର ଏବଂ ସଞ୍ଚୟ ଅନ୍ତର୍ଗତ ଏକ ସେଭିଙ୍ଗ ଫଣ୍ଡ ରଖାଯିବ ଯାହାଦ୍ୱାରା ବମ୍ବେ ବନ୍ଦର ନ୍ୟାସ ଅଧିନିୟମ, 1879 ଏବଂ କୋଲକାତା ବନ୍ଦର ନ୍ୟାସ ଅଧିନିୟମ, 1890 ଅନ୍ତର୍ଗତ ସମ୍ପତ୍ତିର ମ୍ୟୁନିସିପାଲ ଆକଳନ ସମ୍ପର୍କରେ ମୁମ୍ବାଇ ଏବଂ କୋଲକାତା ବନ୍ଦର ଦ୍ୱାରା ପ୍ରାପ୍ତ କରାଯାଉଥିବା ବର୍ତ୍ତମାନର ଲାଭ ଜାରି ରହିବ ।