ପିଏମଇଣ୍ଡିଆ

ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ପୌରାହିତ୍ୟରେ ଅନୁଷ୍ଠିତ କେନ୍ଦ୍ର କ୍ୟାବିନେଟ ବୈଠକରେ ଭାରତୀୟ ଗୋଷ୍ଠୀ କଲ୍ୟାଣ ପାଣ୍ଠି (ICWF)ର ନିୟମାବଳୀରେ କରାଯାଇଥିବା ସଂଶୋଧନକୁ ସ୍ୱୀକୃତି ମିଳିଛି । 2009 ମସିହାରେ ICWF ଗଠନ କରାଯାଇଥିଲା । ବିଦେଶରେ ବସବାସ କରୁଥିବା ଭାରତୀୟ ନାଗରିକମାନଙ୍କୁ ଆପାତ ଏବଂ ଦୁର୍ଗତି ସମୟରେ ପ୍ରାମାଣିକତା ଭିତ୍ତିରେ ଏବଂ ସର୍ବାଧିକ ଆବଶ୍ୟକତା ସ୍ଥଳେ ସାହଯ୍ୟ ସହଯୋଗ କରିବା ଏହାର ଉଦ୍ଦେଶ୍ୟ । ଏବେ ଏହି ପାଣ୍ଠିର ନିୟମାବଳୀରେ ଆବଶ୍ୟକ ସଂଶୋଧନ ଅଣାଯାଇ ଏହାର ପରିସରକୁ ଆହୁରି ବ୍ୟାପାକ ଓ ସୁଗମ କରାଯାଇଛି । ଏହି ନିୟମାବଳୀ ଅନୁସାରେ ମୁଖ୍ୟତଃ ତିନୋଟି ପ୍ରମୁଖ କ୍ଷେତ୍ରରେ ଏଭଳି ସହାୟତା ଦରିଆପାରି ଭାରତୀୟମାନଙ୍କୁ ଯୋଗାଯିବ । ସେଗୁଡିକ ହେଲା – ଆପାତକାଳୀନ ସ୍ଥିତି, ଗୋଷ୍ଠୀ କଲ୍ୟାଣ କାର୍ଯ୍ୟକ୍ରମ ଏବଂ ଦୂତାବାସିକ ସେବା ଉନ୍ନତି କ୍ଷେତ୍ର । ଏହାଦ୍ୱାରା ବିଦେଶରେ ଥିବା ଭାରତୀୟ କୂଟନୈତିକ ମିଶନ ଓ ପୋଷ୍ଟ ଅଧିକ ସକ୍ରିୟତା ଓ ସହସା ସାହାଯ୍ୟ ସହଯୋଗ ଯୋଗାଇପାରିବେ ।

ବିଦେଶରେ ଦୁର୍ଗତ ଭାରତୀୟ ନାଗରିକମାନଙ୍କୁ ସହାୟତା ପ୍ରଦାନ ବ୍ୟତୀତ ICWF, ଲିବ୍ୟା, ଇରାକ, ୟେମେନ, ଦକ୍ଷିଣ ସୁଦାନର ବିବାଦୀୟ କ୍ଷେତ୍ରରେ ଫସି ରହିଥିବା ଭାରତୀୟ ନାଗରିକମାନଙ୍କୁ ଉଦ୍ଧାର କରିବାରେ ଗୁରୁତ୍ୱପୂର୍ଣ୍ଣ ଭୂମିକା ନିର୍ବାହ କରିଥିଲା । ସେହିଭଳି ସାଉଦି ଆରବରେ 2013 ର ନିତାକାତ ଅଭିଯାନ ବେଳେ ସେଠାରେ ଥିବା ବେଆଇନ ଭାରତୀୟ ଶ୍ରମିକମାନଙ୍କୁ ଉଦ୍ଧାର କରିବା ଏବଂ 2017 ରେ ଚାଲିଥିବା ଆମନେଷ୍ଟି ଅଭିଯାନରେ ମଧ୍ୟ ICWFର ଭୂମିକା ଗ୍ରହଣ କରିଛି ।

ଏହି ପାଣ୍ଠି ମାଧ୍ୟମରେ ଯେତେ ସହସା ଓ ଯେତେ ମାତ୍ରାରେ ଦୁର୍ଗତ ଭାରତୀୟଙ୍କୁ ସାହାଯ୍ୟ ସହଯୋଗ ଯୋଗାଯାଇପାରୁଛି ତାହାକୁ ବିଶ୍ୱବ୍ୟାପୀ ଭୂୟସୀ ପ୍ରଶଂସା କରାଯାଇଛି । ଏତଦବ୍ୟତୀତ ଯେଉଁ ଦେଶାନ୍ତର ଶ୍ରମିକମାନେ ଦରିଆପାରିକୁ କର୍ମସଂସ୍ଥାନ ନିମନ୍ତେ ଯାଉଛନ୍ତି, କୌଣସି ସମସ୍ୟା ଉପୁଜିଲେ ସରକାର ସେମାନଙ୍କୁ ସହାୟତା କରିବେ ବୋଲି ସେମାନଙ୍କ ମନରେ ଗଭୀର ପ୍ରତ୍ୟୟ ସୃଷ୍ଟି ହୋଇଛି ।

ICWF ଏବେ ବିଦେଶର ସବୁ ଭାରତୀୟ ମିଶନ ଓ ପୋଷ୍ଟକୁ ସଂପ୍ରସାରିତ ହୋଇଛି । ଭାରତୀୟ ମିଶନ ଓ ପୋଷ୍ଟକୁ କନସୁଲାର ସେବାରୁ ଅସୁଲ ବିଭିନ୍ନ ପ୍ରକାର ଟିକସର ଏହି ପାଣ୍ଠି ସଂଗ୍ରହ କରାଯାଇଥାଏ ।

****