ପିଏମଇଣ୍ଡିଆ

ମହାମହିମ, ପ୍ରଧାନମନ୍ତ୍ରୀ ଡ଼କ୍ଟର ଲୋତେ ଶେରିଙ୍ଗ,

ଭୁଟାନରୁ ଏଠାକୁ ଆସିଥିବା ସମସ୍ତ ବିଶିଷ୍ଟ ଅତିଥିଗଣ,

ବନ୍ଧୁଗଣ,

ଏହି ବର୍ଷ ହେଉଛି ଭାରତ ଏବଂ ଭୁଟାନର ରାଜନୈତିକ ସମ୍ବନ୍ଧର ସ୍ୱର୍ଣ୍ଣ ଜୟନ୍ତୀ ବର୍ଷ । ଏହି ଐତିହାସିକ ଏବଂ ଶୁଭ ବର୍ଷରେ, ପ୍ରଧାନମନ୍ତ୍ରୀ ଡ଼କ୍ଟର ଲୋତେଙ୍କର ଭାରତରେ ହାର୍ଦ୍ଦିକ ସ୍ୱାଗତ କରିବା ହେଉଛି ମୋ ପାଇଁ ଆନନ୍ଦର ବିଷୟ । ଭୁଟାନରେ ଚଳିତ ବର୍ଷ ତୃତୀୟ ସାଧାରଣ ନିର୍ବାଚନ ସଫଳତାର ସହିତ ପରିଚାଳନା ପାଇଁ ଭୁଟାନ ସରକାର ଏବଂ ଭୁଟାନର ଜନତା, ଉଭୟଙ୍କୁ  ହୃଦୟର ସହିତ ଅଭିନନ୍ଦନ ଜଣାଉଛି । ଏହି ନିର୍ବାଚନରେ ସଫଳତା ପାଇଁ ପ୍ରଧାନମନ୍ତ୍ରୀ ଡ଼କ୍ଟର ଲୋତେଙ୍କୁ ମୋ ତରଫରୁ ବହୁତ ବହୁତ ଶୁଭେଚ୍ଛା ଏବଂ ଶୁଭ କାମନା । ମୋର ବିଶ୍ୱାସ ଯେ ତାଙ୍କ ନେତୃତ୍ୱରେ ଭୁଟାନ ସଫଳତା ଏବଂ ସୁଖ ଶାନ୍ତିର ପଥରେ ପ୍ରଗତି କରି ଚାଲିବ ।

ବନ୍ଧୁଗଣ,

ପ୍ରଧାନମନ୍ତ୍ରୀ ଡ଼କ୍ଟର ଲୋତେ ଭୁଟାନ ପାଇଁ ତାଙ୍କର “Narrowing the Gap”   ଦୃଷ୍ଟିଭଙ୍ଗୀ ବିଷୟରେ ମୋତେ ବିସ୍ତୃତ ଭାବେ ସୂଚନା ଦେଇଛନ୍ତି । ମୁଁ ତାଙ୍କର ଦୂରଦୃଷ୍ଟିକୁ ତ ପ୍ରଶଂସା କରୁଛି, ମୁଁ ଏଥିପାଇଁ ବହୁତ ଆନନ୍ଦିତ ଯେ ତାଙ୍କ ଦୃଷ୍ଟିଭଙ୍ଗୀ  ମୋର ‘ସମସ୍ତଙ୍କ ସହିତ, ସମସ୍ତଙ୍କର ବିକାଶ’(ସବକା ସାଥ-ସବକା ବିକାଶ) ଦୃଷ୍ଟିଭଙ୍ଗୀ ସହିତ ମେଳ ଖାଉଛି । ମୁଁ ପ୍ରଧାନମନ୍ତ୍ରୀ ମହୋଦୟଙ୍କୁ ଆଶ୍ଵସ୍ତ କରିଛି କି ଭୁଟାନର ବିକାଶରେ ଭାରତ ସଦା ସର୍ବଦା ଏକ ଭରସାଯୋଗ୍ୟ ବନ୍ଧୁ ଏବଂ ଭାଗିଦାରୀର ଭୂମିକା ତୁଲାଇବ । ଭୁଟାନର ଦ୍ୱାଦଶ ପଞ୍ଚବାର୍ଷିକ ଯୋଜନାରେ ଭାରତ ଚାରି ହଜାର, ପାଞ୍ଚ ଶହ କୋଟି ଟଙ୍କାର ଯୋଗଦାନ ଦେବ । ଏହି ଯୋଗଦାନ ଭୁଟାନର ଆବଶ୍ୟକତା ଏବଂ ପ୍ରାଥମିକତାର ଅନୁରୂପ ହେବ ।

ବନ୍ଧୁଗଣ,

ଭାରତ ଏବଂ ଭୁଟାନର ଦୀର୍ଘ ସହଯୋଗର ଇତିହାସରେ ଜଳ ବିଦ୍ୟୁତ କ୍ଷେତ୍ରରେ ସହଯୋଗର ଏକ ଗୁରୁତ୍ୱପୂର୍ଣ୍ଣ ଅଂଶ ଭାବେ ରହିଛି । ଆଜି ଆମେ ଏହି ମହତ୍ୱପୂର୍ଣ୍ଣ କ୍ଷେତ୍ରର ସମସ୍ତ ସମ୍ବନ୍ଧିତ ପ୍ରକଳ୍ପଗୁଡିକରେ ନିଜର ସହଯୋଗର ସମୀକ୍ଷା କରିଛୁ । ତେବେ ଏହା ଆନନ୍ଦର ବିଷୟ ଯେ, ମାନ୍‌ଗ – ନେଦଛୁ  ପ୍ରକଳ୍ପର କାର୍ଯ୍ୟ ଶୀଘ୍ର ଶେଷ ହେବାକୁ ଯାଉଛି । ଏହି ପ୍ରକଳ୍ପର ଶୁଳ୍କ ନେଇ ସହମତି ପ୍ରକାଶ ପାଇଛି । ଅନ୍ୟ ପ୍ରକଳ୍ପଗୁଡିକର କାର୍ଯ୍ୟ ସନ୍ତୋଷଜନକ ଭାବେ ପ୍ରଗତି କରୁଛି । ଆଉ ଆମେ ଦୁହେଁ ସମସ୍ତ ପ୍ରକଳ୍ପକୁ ଆହୁରି ଅଧିକ ଗତି ଦେବାକୁ ଚାହୁଁଛୁ । ଆମ ସହଯୋଗର ଆଉ ଏକ ନୂତନ ଦିଗ ହେଉଛି ମହାକାଶ ବିଜ୍ଞାନ । ମୁଁ ଆନନ୍ଦିତ ଯେ, ଦକ୍ଷିଣ ଏସୀୟ ଉପଗ୍ରହର ସୁଫଳ ପାଇବା ପାଇଁ ଇସ୍ରୋ ଦ୍ୱାରା ଭୁଟାନରେ ନିର୍ମାଣ କରାଯାଉଥିବା ଗ୍ରାଉଣ୍ଡ ଷ୍ଟେସନ ମଧ୍ୟ ଶୀଘ୍ର ପ୍ରସ୍ତତ ହେବାକୁ ଯାଉଛି । ଏହି ପ୍ରକଳ୍ପ ସମ୍ପୂର୍ଣ୍ଣ ହେବା ଦ୍ୱାରା ଭୁଟାନର ଦୂର ଦୂରାନ୍ତ ଅଞ୍ଚଳରେ ମଧ୍ୟ ପାଣିପାଗର ସୂଚନା,ଟେଲି ମେଡିସିନ ଏବଂ ବିପର୍ଯ୍ୟୟରେ ସହଯୋଗ ଭଳି କାର୍ଯ୍ୟରେ ସହାୟତା ମିଳିବ ।

ବନ୍ଧୁଗଣ,

ଆଜି ପ୍ରଧାନମନ୍ତ୍ରୀ ଡ଼କ୍ଟର ଲୋତେ ମୋତେ ଗୋଟିଏ ଶୁଭଖବର ମଧ୍ୟ ଦେଇଛନ୍ତି । ଭୁଟାନ ସରକାର ହିଁ ଖୁବ ଶୀଘ୍ର ‘ରୂପେ କାର୍ଡ଼’ର ଶୁଭାରମ୍ଭ କରିବା ପାଇଁ ନିଷ୍ପତ୍ତି  ନେଇଛନ୍ତି । ମହାମହିମ, ଏହି ନିଷ୍ପତ୍ତି ପାଇଁ ଆପଣଙ୍କୁ ହୃଦୟର ସହିତ କୃତଜ୍ଞତା ଜଣାଉଛି । ମୋର ବିଶ୍ୱାସ ଯେ ବର୍ତ୍ତମାନର ସମୟରେ ଏହା ଦ୍ୱାରା ଦୁଇ ଦେଶ ମଧ୍ୟରେ  ଲୋକମାନଙ୍କ ମଧ୍ୟରେ ସମ୍ବନ୍ଧକୁ ଆହୁରି ଅଧିକ ଶକ୍ତି ମିଳିବ ।

ମହାମହିମ,

ଆପଣ ନିଜର ପ୍ରଥମ ବିଦେଶ ଯାତ୍ରା ପାଇଁ ଭାରତକୁ ବାଛିଲେ । ଆଉ, ଚାରି ବର୍ଷ ପୂର୍ବେ, ପ୍ରଧାନମନ୍ତ୍ରୀ ଭାବେ ମୋର ପ୍ରଥମ ବିଦେଶ ଯାତ୍ରା ଭୁଟାନକୁ ହିଁ ଥିଲା । ଜଣେ ଅନ୍ୟଜଣଙ୍କ ସହିତ ସହଯୋଗକୁ ସୁଦୃଢ କରିବା ପାଇଁ, ବିକାଶ ପଥରେ ପାଦରେ ପାଦ ମିଳାଇ ଆଗକୁ ବଢିବା ପାଇଁ, ଆମର ସହଯୋଗର ପ୍ରତିବଦ୍ଧତାର ଏହା ହେଉଛି ପ୍ରତୀକ । ମୋର ବିଶ୍ୱାସ ଯେ ଆପଣଙ୍କର ଏହି ଭାରତ ଯାତ୍ରା ଆମ ସମ୍ବନ୍ଧକୁ ଏକ ନୂତନ ଗତି ଦେବାରେ ସଫଳ ହେବ । ଏହି ଶବ୍ଦ ସହିତ ମୁଁ ପୁଣି ଥରେ ଭାରତରେ ଆପଣଙ୍କୁ ଆପଣଙ୍କର ପ୍ରତିନିଧି ଦଳକୁ ହାର୍ଦ୍ଦିକ ସ୍ୱାଗତ ଜଣାଉଛି ।

ଧନ୍ୟବାଦ ।

ତାଶି ଦେଲେଗ!