ପିଏମଇଣ୍ଡିଆ

ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ଅଧ୍ୟକ୍ଷତାରେ ଅନୁଷ୍ଠିତ କେନ୍ଦ୍ର ମନ୍ତ୍ରୀମଣ୍ଡଳ ବୈଠକରେ ମଡେଲ ଦୋକାନ ଏବଂ ପ୍ରତିଷ୍ଠାନ (ରୋଜଗାର ଏବଂ ସେବା ସର୍ତ୍ତାବଳୀ ନିୟନ୍ତ୍ରଣ) ବିଲ 2016 ଉପରେ ଆଲୋଚନା କରାଯାଇଛି । ଏହାପରେ ଏହି ବିଲକୁ ରାଜ୍ୟ ଏବଂ କେନ୍ଦ୍ରଶାସିତ ଅଞ୍ଚଳଗୁଡିକୁ ପଠାଯାଇ ସେ ସମ୍ପର୍କରେ ମତାମତ ଆହ୍ୱାନ କରାଯିବ ଏବଂ ସେମାନଙ୍କ ଆବଶ୍ୟକତା ଅନୁଯାୟୀ ଏହାର ବ୍ୟବସ୍ଥାଗୁଡିକୁ ସଂଶୋଧନ କରାଯିବା ପରେ ଏହାକୁ ଲାଗୁ କରାଯିବା ପାଇଁ ଚିନ୍ତା କରାଯିବ । ଏହାକୁ ଚୁଡାନ୍ତ ରୂପ ଦିଆଯିବା ପୂର୍ବରୁ ଇଣ୍ଟରନେଟ ମାଧ୍ୟମରେ ଜନସାଧାରଣଙ୍କଠାରୁ ବିସ୍ତୃତ ଭାବେ ମତାମତ ଲୋଡାଯିବା ସହ କର୍ମଚାରୀ, ଶ୍ରମିକ ପ୍ରତିନିଧି, ନିଯୁକ୍ତିଦାତା ସଂଘ, ମହାସଂଘ ଏବଂ ରାଜ୍ୟ ସରକାରମାନଙ୍କ ସହ ତ୍ରିପାକ୍ଷିକ ବିଚାର ଆଲୋଚନା କରାଯିବ ।

ମଡେଲ ଚିଠା ପ୍ରସ୍ତାବର ପ୍ରମୁଖ ବିଶେଷତ୍ୱଗୁଡିକ ହେଲା :-

 ନିର୍ମାଣ ସଂସ୍ଥାକୁ ଛାଡି, ଦଶ ଜଣ କିମ୍ବା ଏହାଠାରୁ ଅଧିକ ଶ୍ରମିକ କାର୍ଯ୍ୟ କରୁଥିବା ସଂସ୍ଥା ଏହାର ଅନ୍ତର୍ଗତ ହେବ

 ଏହି ବିଲ ବ୍ୟବସାୟ ପ୍ରତିଷ୍ଠାନକୁ ବର୍ଷର 365 ଦିନ ଖୋଲିବା ଏବଂ ବନ୍ଦ କରିବା ସମୟର ସ୍ୱାଧିନତା ପ୍ରଦାନ କରିବ

 ପ୍ରତିଷ୍ଠାନରେ ଆଶ୍ରୟସ୍ଥଳ, ବିଶ୍ରାମ କକ୍ଷ, ମହିଳାଙ୍କ ପାଇଁ ଶୌଚାଳୟ, ମହିଳାଙ୍କ ସମ୍ମାନର ସୁରକ୍ଷା ଏବଂ ପରିବହନ ଇତ୍ୟାଦିର ସୁବନ୍ଦୋବସ୍ତ ଥିଲେ ମହିଳାମାନଙ୍କୁ ରାତ୍ରୀକାଳୀନ ପାଳିରେ କାର୍ଯ୍ୟ କରିବାର ଅନୁମତି ଦେବ

 ନିଯୁକ୍ତି, ତାଲିମ, ବଦଳି କିମ୍ବା ପଦୋନ୍ନତି କ୍ଷେତ୍ରରେ ମହିଳାମାନଙ୍କ ପ୍ରତି କୌଣସି ବାଛ ବିଚାର କରାଯିବ ନାହିଁ

 ସରଳ ପଦ୍ଧତିରେ ଅନ୍-ଲାଇନ ମାଧ୍ୟମରେ ସାଧାରଣ ପଞ୍ଜିକରଣ ହେବ

 କର୍ମଚାରୀଙ୍କ ସ୍ୱାସ୍ଥ୍ୟ ଏବଂ ସୁରକ୍ଷା ପାଇଁ ନିଯୁକ୍ତିଦାତାଙ୍କ ଦ୍ୱାରା ନିଆଯିବାକୁ ଥିବା ଯଥେଷ୍ଟ ପଦକ୍ଷେପ ଧାର୍ଯ୍ୟ କରିବାର କ୍ଷମତା ସରକାରଙ୍କ ହାତରେ ରହିବ

 ସ୍ୱଚ୍ଛ ଏବଂ ବିଶୁଦ୍ଧ ପାନୀୟ ଜଳର ବ୍ୟବସ୍ଥା ରହିବ

 ଶୌଚାଳୟ, ଶିଶୁପାଳନ କେନ୍ଦ୍ର (କ୍ରେଚ), ପ୍ରାଥମିକ ଚିକିତ୍ସା ସହ ବ୍ୟକ୍ତିଗତ ଭାବେ ପ୍ରତିଷ୍ଠାନରେ ଜାଗା ସମସ୍ୟା ଥିଲେ କିଛି ପ୍ରତିଷ୍ଠାନ ମିଶି କ୍ୟାଣ୍ଟିନ ବ୍ୟବସ୍ଥା କରିବେ

 ଜାତୀୟ ଛୁଟି ଦିବସ ବ୍ୟତୀତ ପାଞ୍ଚ ଦିନର ସବେତନ ଉତ୍ସବ ଛୁଟି ଦିଆଯିବ

 ଉଚ୍ଚ ଦକ୍ଷତା ସମ୍ପନ୍ନ କର୍ମଚାରୀ ଯେମିତିକି ସୂଚନା ପ୍ରଯୁକ୍ତିବିଦ୍ୟା, ଜୈବ ପ୍ରଯୁକ୍ତିବିଦ୍ୟା ଏବଂ ଗବେଷଣା କ୍ଷେତ୍ରରେ ନିଯୁକ୍ତ କର୍ମଚାରୀମାନଙ୍କୁ ଦୈନିକ 9 ଘଣ୍ଟା ଏବଂ ସାପ୍ତାହିକ 48 ଘଣ୍ଟା ଯାହା ତ୍ରୈମାସିକ ହିସାବରେ 125 ଘଣ୍ଟା ହେବ, ଏହି ନିୟମରୁ ବାଦ ଦିଆଯିବ

ଏହି ମଡେଲ ଚିଠା ପ୍ରସ୍ତାବ ବୈଧାନିକ ବ୍ୟବସ୍ଥାରେ ସମାନତା ଆଣିବ । ଏଥିସହ ସବୁ ରାଜ୍ୟଙ୍କ ପକ୍ଷରେ ଏହାକୁ ଗ୍ରହଣ କରିବା ସହଜ ହେବ ଏବଂ ତଦ୍ୱାରା ସମଗ୍ର ଦେଶରେ କର୍ମ କ୍ଷେତ୍ରରେ ଏକା ପ୍ରକାର ପରିବେଶ ସୃଷ୍ଟି କରିବ । ବ୍ୟବସାୟର ସରଳୀକରଣ ଏବଂ ନିଯୁକ୍ତି ସୁଯୋଗ ସୃଷ୍ଟି କରିବାରେ ମଧ୍ୟ ଏହି ବିଲ ସହାୟକ ହେବ ।