ପିଏମଇଣ୍ଡିଆ

ମୋଜାମ୍ବିକରୁ ଡାଲି ଜାତୀୟ ଶସ୍ୟ ଆମଦାନୀ ପାଇଁ ଏକ ଦୀର୍ଘ ମିଆଦୀ ଠିକା ନିମନ୍ତେ ବୁଝାମଣାପତ୍ର (ଏମ୍ଓୟୁ) ସ୍ୱାକ୍ଷରିତ ହେବ । ଏହି ପ୍ରସ୍ତାବକୁ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ଅଧ୍ୟକ୍ଷତାରେ ଅନୁଷ୍ଠିତ କେନ୍ଦ୍ର ମନ୍ତ୍ରୀମଣ୍ଡଳ ବୈଠକରେ ଅନୁମୋଦନ ମିଳିଛି । ଏହି ନିଷ୍ପତ୍ତି ଅନୁଯାୟୀ ଘରୋଇ ସଂସ୍ଥା ମାଧ୍ୟମରେ କିମ୍ବା ଉଭୟ ଦେଶର ସ୍ୱୀକୃତି କ୍ରମେ ଦୁଇ ସରକାରଙ୍କ ରାଷ୍ଟ୍ରାୟତ୍ତ ସଂସ୍ଥା ଜରିଆରେ ମୋଜାମ୍ବିକରୁ ଡାଲି ଜାତୀୟ ଶସ୍ୟ ଆମଦାନୀ କରାଯିବ ।

ସେହି ଏମ୍ଓୟୁ ଦ୍ୱାରା ମୋଜାମ୍ବିକରେ ଚଣା, ପାରାଦାନା ଏବଂ ମୁଗ ସମେତ ଅନ୍ୟାନ୍ୟ ଡାଲିଜାତୀୟ ଶସ୍ୟର ଉତ୍ପାଦନ ବୃଦ୍ଧି ପାଇଁ ଲକ୍ଷ୍ୟ ଧାର୍ଯ୍ୟ କରାଯାଇଛି । ଯାହାଫଳରେ ସେହି ଡାଲି ଜାତୀୟ ଫସଲର ବାଣିଜ୍ୟିକ କାରବାର ହୋଇପାରିବ । ଏହି ଏମ୍ଓୟୁ ରେ ମୋଜାମ୍ବିକରୁ ମୁଗ ଆମଦାନୀ ପାଇଁ ଲକ୍ଷ୍ୟ ଧାର୍ଯ୍ୟ କରାଯାଇଥିବା ବେଳେ ଆଗାମୀ 5 ବର୍ଷରେ ସେହି ପରିମାଣ ଦ୍ୱିଗୁଣିତ ହେବ ବୋଲି ସ୍ଥିର ହୋଇଛି । ବିଶେଷକରି 2016-17 ବର୍ଷରେ ଏହି ଶସ୍ୟର ଆମଦାନୀ ଏକ ଲକ୍ଷ ଟନ ହୋଇଥିବା ବେଳେ 2020-21 ବର୍ଷରେ ତାହା 2 ଲକ୍ଷ ଟନରେ ପହଂଚାଇବାକୁ ନିଷ୍ପତ୍ତି ହୋଇଛି ।

ଏହି ବୁଝାମଣା ଫଳରେ ଭାରତୀୟ ବଜାରରେ ଡାଲିର ଉପଲବ୍ଧତା ବ୍ୟାପକ ହେବ ଏବଂ ଦର ସ୍ଥିର ରହିପାରିବ । ଦେଶରେ 2015-16 ବର୍ଷରେ 17ନିୟୁତ ଟନ୍ ଡାଲିଜାତୀୟ ଶସ୍ୟ ଉତ୍ପାଦନ ହୋଇଥିବା ବେଳେ ଘରୋଇ ଚାହିଦା ପୂରଣ ପାଇଁ ଆଉ 5.79 ନିୟୁତ ଟନ୍ ଡାଲି ଜାତୀୟ ଶସ୍ୟ ଆମଦାନୀ କରାଯାଇଛି । ତେବେ ଘରୋଇ ଉତ୍ପାଦନ ଏବଂ ଆମଦାନୀ ହୋଇଥିବା ଡାଲି ଦେଶର ସାମଗ୍ରୀକ ଆବଶ୍ୟକତା ପୂରଣ କରିବାରେ ସମର୍ଥ ହେଉ ନ ଥିବାରୁ ଡାଲି ଜାତୀୟ ଶସ୍ୟରେ ମୂଲ୍ୟ 2015-16 ଏବଂ ଚଳିତ 2016-17 ରେ ବୃଦ୍ଧି ପାଇଛି ।

ଏହି ପ୍ରସଙ୍ଗରେ ମୋଜାମ୍ବିକ ବୁଝାମଣା ଅନୁରୂପ ଅନ୍ୟ ଦେଶମାନଙ୍କ ସହିତ ମଧ୍ୟ ଏମ୍ଓୟୁ କରାଯିବ ବୋଲି ସୂଚନା ମିଳିଛି ।